Mark Asɛmpa

5 Afei wotwaa po no baa Gerasafo hɔn asaase do. 2 Na aber a Jesus sianee fii hɛmba no mu ara pɛ na ɔbarimba bi a ɔwɔ sunsum bɔn* fi esiei hɔ behyiaa no. 3 Nna esiei hɔ na ɔtse, na dze bodu dɛm aber no nna obiara nntumii nnkyekyeer no. Kyein* mpo, nna wonntum mmfa nnto no. 4 Ɔwɔ mu dɛ nna wɔdze kyein akyekyer ne nsa na ne nan mpɛn pii dze, naaso nna ɔtsetsew mu. Nna obiara nntum no.* 5 Na da biara, adzekyee na adzesaa nyina, nna ɔtseatsea mu wɔ esiei hɔ nye mbepɔw no mu na ɔdze mbobaa twitwa noho. 6 Na aber a n’enyi bɔɔ Jesus do wɔ ekyirekyir no, otuu mbirika kɔkotoow n’enyim. 7 Afei ɔdze ndze kɛse tseatseaa mu dɛ: “Jesus, Ɔsorsornyi Nyankopɔn ne Ba, ebɛnadze na menye wo wɔ yɛ? Ka Nyankopɔn ntam dɛ erennhaw me.” 8 Siantsir a ɔtseatseaa mu kaa dɛm nye dɛ, nna Jesus aka akyerɛ no dɛ: “Sunsum fi, fi nyimpa no mu pue.” 9 Nna Jesus bisaa no dɛ: “Wɔfrɛ wo dɛn?” Na oyii no ano dɛ: “Wɔfrɛ me Asafokuw, osiandɛ yɛdɔɔ so.” 10 Na ɔkɔr do serɛɛ Jesus dɛ mma ɔmmpam esunsum no mmfi kurow no mu.

11 Nna mpreko pii ridzidzi wɔ bepɔw no do. 12 Ntsi esunsum no serɛɛ no dɛ: “Ma hɛn kwan ma yɛnkɔ mpreko no mu, na yɛnkɛhyehyɛ hɔn mu.” 13 Ntsi ɔmaa hɔn kwan. Na esunsum fi no fii no mu kɛhyɛɛ mpreko no mu, na mpreko no dze mbirika siaan bepɔw no koguu po no mu, na wowuwui. Nna mpreko no hɔn dodow yɛ bɛyɛ 2,000. 14 Na hɔn a wɔrohwɛ mpreko no guanee, na wɔkɛkaa dza woesi no kyerɛɛ hɔn a wɔwɔ kurow no mu nye hɔn a wɔwɔ nkurow a ɔbembɛn hɔ no mu, na nkorɔfo bae bɔhwɛɛ dza woesi no. 15 Ntsi wɔbaa Jesus ne nkyɛn, na wohun dɛ ɔbarimba a nna ɔwɔ esunsum fi a nna wɔyɛ Asafokuw no hyɛ atar tsena hɔ, na n’adwen mu ada no hɔ, na iyi maa wɔbɔɔ hu paa. 16 Afei so, hɔn a wohunii no kaa dza ɔtoo ɔbarimba a nna ɔwɔ esunsum fi no nye dza ɔtoo mpreko no ho asɛm kyerɛɛ hɔn. 17 Ntsi wɔhyɛɛ ase serɛɛ Jesus dɛ omfi hɔn apaamu hɔ nkɔ.

18 Afei aber a nna Jesus rofow hɛmba no, ɔbarimba a nna ɔwɔ esunsum fi no serɛɛ no dɛ ɔnye no bɔkɔ. 19 Naaso ɔamma no kwan, mbom ɔkaa kyerɛɛ no dɛ: “Kɔ w’ebusuafo nkyɛn wɔ fie, na kɛka dza Jehovah* ayɛ ama wo nye ehumbɔbɔr a ɔada no edzi akyerɛ wo no nyina ho asɛm kyerɛ hɔn.” 20 Ntsi ɔbarimba no kɔree kɛkaa ndzɛmba a Jesus ayɛ ama no no nyina wɔ Decapolis,* na ɔyɛɛ nkorɔfo a wɔwɔ hɔ nyina nwanwa.

21 Afei Jesus dze hɛmba twae baa nsu no n’ekyir bio. Na nyimpadɔm pii baa ne nkyɛn wɔ mpoano hɔ. 22 Na nhyiamudan no mu mpanyimfo no mu kor a wɔfrɛ no Jairus baa hɔ, na aber a ohun no no, obobuu ntwɛr wɔ n’enyim. 23 Ɔserɛɛ no mpɛn pii dɛ: “Me babaa kakraba yar ma ɔnnyɛ agor.* Meserɛ wo bra na fa wo nsa bɔto no do ama ɔaatse apɔw na oeennwu.” 24 Ntsi Jesus nye no kɔree, na nyimpadɔm pii dzii n’ekyir. Nna wɔrekyer no do mpo.

25 Nna ɔbaa bi wɔ hɔ a bɔgya etu no mfe 12. 26 Nna ɔaberɛ wɔ eduyɛfo pii hɔn nsa ano paa, na ɔasɛɛ ne sika a ɔwɔ nyina so. Naaso ne nyina ennkesi hwee, mbom nna yɛ ara na ne yarba no reyɛ kɛse. 27 Nna ɔbaa yi atse Jesus no ho asɛm, ntsi osii Jesus n’ekyir wɔ nyimpadɔm no mu na ɔdze ne nsa kaa n’atar ngugudo no. 28 Nna n’asɛm a ɔreka ara nye dɛ: “Sɛ medze me nsa ka n’atar ngugudo no nkotsee mpo a, moho bɔtɔ me.” 29 Na ntsɛmara na bɔgya a orutu no no twae, na ɔtsee wɔ no honam mu dɛ yarba a no mu yɛ dzen no efi no do.

30 Amonmu hɔ ara na Jesus tsee wɔ no mu dɛ tum bi efi no mu, ntsi ɔdaan noho wɔ dɔm no mu na obisaa dɛ: “Woana na ɔdze ne nsa kaa m’atar ngugudo no?” 31 Nna n’esuafo no kaa kyerɛɛ no dɛ: “Woara w’enyi tua dɛ nyimpadɔm akyer wo do, nna iribisa dɛ, ‘Woana na ɔdze ne nsa kaa me no?’” 32 Naaso nna ɔrototo n’enyi dɛ obohu nyimpa a ɔyɛɛ dɛm no. 33 Na osiandɛ nna ɔbaa no nyim dza wɔakɔ do wɔ no mu ntsi, ɔdze suro na ahopopo bɔkotoow n’enyim na ɔkaa nokwar a ɔwɔ mu nyina kyerɛɛ no. 34 Nna Jesus kaa kyerɛɛ no dɛ: “Babaa, wo gyedzi ama woho atɔ wo. Fa asomdwee kɔ, na wo yarba a no mu yɛ dzen yi mfi wo do.”

35 Na aber a ogu do rekasa no, mbarimba bi fi nhyiamudan mu panyin no ne fie bɛkaa kyerɛɛ no dɛ: “Wo babaa no ewu o! Ebɛnadze ntsi na igu do ara rehaw Kyerɛkyerɛnyi no?” 36 Naaso Jesus tsee dza wɔreka no, na ɔkaa kyerɛɛ nhyiamudan mu panyin no dɛ: “Mma nnsuro, ɔwodze nya gyedzi ara.” 37 Na ɔamma obiara enndzi n’ekyir annkɔ gyedɛ Peter, James, nye no nua John.*

38 Ntsi wɔbaa nhyiamudan mu panyin no ne fie, na ohun dɛ hɔ ayɛ gyigyeegye, na binom rusu na wɔrekeka mu. 39 Aber a owuraa mu no, ɔkaa kyerɛɛ hɔn dɛ: “Ebɛnadze ntsi na hom rusu na hom reyɛ gyigyeegye yi? Abofra no nnwui mbom ɔada.” 40 Aber a ɔkaa dɛm no, wɔhyɛɛ ase sereew no twee. Na ɔkaa kyerɛɛ hɔn nyina dɛ wompue paado. Ɔno ekyir no ɔfaa abofra no ne papa nye ne maame nye hɔn a wɔka no ho no, na wɔkɔr beebi a abofra no da no. 41 Afei osuoo abofra no ne nsamu na ɔkaa kyerɛɛ no dɛ: “Talitha cumi,” n’asekyerɛ nye dɛ: “Babaa, mese wo dɛ, ‘Soɛr!’” 42 Na amonmu hɔ ara, basiaba no soɛree na ɔhyɛɛ ase dɛ ɔrenantsew. (Nna oedzi mfe 12.) Na aber a ne maame na ne papa hunii no, hɔn enyi gyee araa ma nna wonnhu dza wɔnyɛ hɔnho mpo. 43 Naaso ɔhyɛɛ hɔn dzendzenndzen* dɛ mma wɔnnka ho asɛm nnkyerɛ obiara. Afei ɔkaa kyerɛɛ hɔn dɛ wɔmma abofra no biribi ma ondzi.