Ɔnnkaa Hɛn Nko

1-2. (a) Ebɛnadze ntsi na yebotum aka dɛ sɛ yehyia ɔhaw a, ɔrennka hɛn nko da? (b) Ebɛnadze na yebosusu ho wɔ adzesua yi mu?

SƐ YERIHYIA ɔhaw akɛseakɛse wɔ hɛn asetsena mu a, obotum ama yaatse nka tse dɛ mbrɛ hɛn nkotsee tsena hɛmba ketseketse bi mu nam po do, na mframa robɔ dzendzenndzen ma po no do ayɛ begyabegya. Naaso ɔnnkaa hɛn nko. Osiandɛ hɛn sor Egya a ɔdɔ hɛn no nyim ɔhaw a yɛrefa mu no, na ɔahyɛ bɔ dɛ ɔbɔboa hɛn ma yeetum egyina ano. Jehovah ama hɛn awerɛhyɛmu dɛ ‘ɔbɔboa hɛn.’—Isa. 41:10.

² Adzesua yi bɔboa hɛn ma yeehu mbrɛ Jehovah si boa hɛn. Akwan a Jehovah fa do yɛ dɛm nye dɛ (1) ɔkyerɛ hɛn kwan, (2) ɔma hɛn nsa ka dza yehia, (3) ɔbɔ hɛn ho ban, na (4) ɔkyekye hɛn werɛ. Jehovah ahyɛ hɛn bɔ dɛ ɔmmfa ho ɔhaw biara a yebehyia wɔ hɛn asetsena mu no, no werɛ rimmfir hɛn da na orinngyaa hɛn dabiarada. Dɛm ntsi ɔrennka hɛn nko da.

JEHOVAH KYERƐ HƐN KWAN

3-4. Jehovah si dɛn kyerɛ hɛn kwan? (Ndwom 48:14)

³ Kenkan Ndwom 48:14. Jehovah nnhwɛ kwan dɛ hɛnankasa bɛkyerɛ hɛnho kwan wɔ abrabɔ mu. Ebɛn kwan na ɔfa do kyerɛ n’asomfo anokwafo kwan ndɛ? Kwan kor nye dɛ ɔfa n’Asɛm Bible no do. (Ndw. 119:105) Jehovah nam n’Asɛm no do boa hɛn ma yetum sisi gyinae pa na ɔboa hɛn ma yenya suban ahorow a ɔbɛma hɛn enyi agye ndɛ na yeenya daa nkwa so daakye.a Dɛ mfatoho no, ɔkyerɛkyerɛ hɛn dɛ yɛmfa afofor hɔn bɔn nkyɛ hɔn na yenyi hɔn ho ebufuw mfi hɛn mu, yendzi nokwar wɔ biribiara mu, na yemfi hɛn akoma nyina mu ndɔ afofor. (Ndw. 37:8; Heb. 13:18; 1 Pet. 1:22) Sɛ yɛda suban pa a ɔtse dɛm edzi a, yɛbɛyɛ awofo pa, hɛn awar bɔsɔ, na yɛnye hɛn anyɛnkofo so ntamu bɛyɛ kama.

⁴ Sɛ yɛdze dza yɛaka yi to nkyɛn a, Jehovah ama wɔakyerɛw nkorɔfo binom ho nsɛm wɔ Bible no mu ama hɛn. Nna dɛm nkorɔfo yi tse dɛ hɛnara, na ɔhaw ahorow a wohyiae no, ɔno ara bi na yehyia no ndɛ. (1 Cor. 10:13; Jas. 5:17) Sɛ yɛkenkan dɛm nkorɔfo yi ho nsɛm na yɛdze dza yesua fi mu no bɔ hɛn bra a, annyɛ yie koraa no ɔbɔboa hɛn wɔ akwan ebien bi do. Odzi kan, ɔbɛma yeehu dɛ ɔnnyɛ hɛn nkotsee na yerihyia ɔhaw a ɔtse dɛm wɔ hɛn asetsena mu. Binom so hyiaa ɔhaw ahorow a ɔtsetse dɛm, naaso Jehovah boaa hɔn ma wotumii gyinaa ano. (1 Pet. 5:9) Na dza otsia ebien no, ɔbɛma yeehu mbrɛ yebesi egyina ɔhaw ahorow a ɔtsetse dɛm ano.—Rom. 15:4.

5. Woananom na Jehovah fa hɔn do kyerɛ hɛn kwan ma yɛkɔ do nantsew nkwa kwan no do?

⁵ Bio so, Jehovah nam hɛn nuanom Christianfo do kyerɛ hɛn kwan.b Dɛ mfatoho no, amansin do ahwɛfo taa kɛserasera asafo ahorow hyɛ hɔn nkuran. Ɔkasa ahorow a wɔma no hyɛ hɛn gyedzi dzen na ɔboa hɛn ma koryɛ kɔ do tsena yɛnye hɛn nuanom ntamu. (Andw. 15:40–16:5) Ɔdawurbɔfo biara ho hia asafo mu mpanyimfo no, na mpanyimfo no bɔ mbɔdzen dɛ wɔbɔboa hɔn mu biara ma ɔaasom Jehovah yie. (1 Pet. 5:​2, 3) Awofo so bɔ mbɔdzen boa hɔn mba ma wɔdɔ Jehovah na wɔboa hɔn ma wohu mbrɛ wobesi esisi gyinae pa na woeenya suban pa. (Mbɛ. 22:6) Afei so, Christianfo mbaa a hɔnho akokwaa no twa sa pa ma enuanom mbabaa no, wotu hɔn fo na wɔhyɛ hɔn nkuran so.—Titus 2:​3-5.

6. Ebɛnadze na ɔsɛ dɛ yɛyɛ ama yeenya akwankyerɛ a Jehovah dze ma hɛn no do mfaso?

⁶ Jehovah ama hɛn dza yehia biara ama yeetum esisi gyinae pa na hɛn enyi aagye wɔ asetsena mu. Naaso yebesi dɛn akyerɛ dza ɔayɛ ama hɛn no ho enyisɔ? Mbɛbusɛm 3:​5, 6 ka dɛ: “Fa wo werɛ nyina hyɛ [Jehovah] mu, na mma nntwer wankasa wo ntseasee.” Sɛ yɛyɛ dɛm a, ɔbɛma hɛn akwan atsen. Dza iyi kyerɛ nye dɛ, ɔbɔboa hɛn ma yaatwe hɛnho efi ɔhaw ahorow pii ho na hɛn enyi aagye wɔ hɛn asetsena mu. Ɔyɛ hɛn dɛw paa dɛ Jehovah dɔ hɛn na ɔma hɛn mu biara afotu a ohia!—Ndw. 32:8.

JEHOVAH MA HƐN NSA KA DZA YEHIA

7. Ndzɛmba a Jehovah dze ma hɛn no, bi nye dɛn? (Philippifo 4:19)

⁷ Kenkan Philippifo 4:19. Sɛ yɛdze akwankyerɛ a Jehovah dze ma hɛn ma yɛnye no ntamu yɛ papa no to kyɛn a, ɔsan so boa hɛn ma hɛn nsa ka dza yebedzi, dza yɛbɛhyɛ nye beebi a yɛdze hɛn tsir bɔto. (Matt. 6:33; 2 Thess. 3:12) Mfom biara nnyi ho dɛ yɛbɔdwendwen ndzɛmba a yehia no ho. Naaso Jehovah hyɛ hɛn nkuran dɛ ɔnnsɛ dɛ yɛdwendwen dɛm ndzɛmba yi ho ma ɔbor do. (Hwɛ Matthew 6:25 no ho nkyerɛkyerɛmu no.) Ebɛnadze ntsi a? Osiandɛ sɛ hɛnho kyer hɛn a, yenyim dɛ hɛn Egya renndan n’ekyir mma hɛn da. (Matt. 6:8; Heb. 13:5) Sɛ Jehovah ka dɛ ɔbɛma hɛn nsa aka dza yehia a, ɔnnsɛ dɛ yɛgye no kyim.

8. Ebɛnadze na Jehovah yɛe dze boaa David?

⁸ Hom mma yɛnhwɛ mbrɛ Jehovah sii boaa David. Aber a nna Ɔhen Saul rohwehwɛ David eku no ma ɔno ntsi David guanee no, Jehovah maa David nye ne mbarimba no dza wohia. David rodwendwen mbrɛ Jehovah sii hwɛɛ no dɛm aber no ho no, ɔkaa dɛ: ‘Meyɛɛ abofra, na afei dze mayɛ akɔkora; naaso munnhun ɔtseneneenyi a wɔapa no, anaa n’asefo a wɔserɛserɛ edziban.’ (Ndw. 37:25) Bi a woara so edze w’enyi ehu mbrɛ Jehovah fi ɔdɔ mu boaa ɔwo nye wo nuanom Christianfo aber a homho kyeer hom no.

9. Ndɛ, sɛ atoyerɛnkyɛm bi si a, ebɛn kwan na Jehovah fa do ma n’asomfo nsa ka dza wohia? (Ibotum ahwɛ mfonyin ahorow no so.)

⁹ Jehovah dze dza n’asomfo hia ma hɔn. Dɛ mfatoho no, aber a ɔkɔm sii Jerusalem wɔ asomafo no hɔn aber do no, Christianfo a wɔwɔ aman ahorow do no dze ndzɛmba kɛmaa hɔn nuanom a nna ɔkɔm no ama hɔnho akyer hɔn no. (Andw. 11:​27-30; Rom. 15:​25, 26) Ndɛ so, dɛmara na Nyankopɔn n’asomfo yɛ dze boa hɔn nuanom a wohia mboa no. Sɛ atoyerɛnkyɛm bi si a, Jehovah ka n’asomfo hɔn akoma ma wɔdze ndzɛmba bi tse dɛ edziban, nsu, ntar nye ndur kɛma hɔn nuanom a hɔnho aka no. Enuanom a wɔwɔ adansi ho nyimdzee so kɔboa ma wosiesie enuanom hɔn efie nye Ahendzi Asa ahorow a wɔasɛɛsɛɛ no. Na sɛ enuanom binom hɔn egyapadze fi hɔn nsa anaa hɔn dɔfo bi wu a, hɔn nuanom yɛ ntsɛm kɛhyɛ hɔn nkuran na wɔkyekye hɔn werɛ.c

10-11. Ebɛnadze na yesua fi Borys n’asɛm no mu?

¹⁰ Hɔn a wɔnnsom Jehovah no mpo, Jehovah fi n’akoma mu dze dza wohia ma hɔn. Dɛmara na hɛn so, yesuasua Jehovah, na yɛhwehwɛ hokwan ahorow dze yɛ hɔn a wɔnnsom Jehovah no papa. (Gal. 6:10) Mpɛn pii no, iyi bue kwan ma yetum dzi hɔn dase. Hom mma yɛnhwɛ Borys n’asɛm no. Ɔyɛ panyin bi a ɔda skuul bi ano wɔ Ukraine. Ɔwɔ mu dɛ Borys nnyɛ Jehovah Dasefo dze, naaso aber biara nna ɔnye skuulfo a wɔyɛ Adasefo no dzi no yie, na nna ɔnnhyɛ hɔn dɛ wɔnnyɛ biribi a otsia hɔn gyedzi. Aber a nna ɔko no taa mu wɔ beebi a Borys tse no, ɔyɛɛ n’adwen dɛ oboguan akɔ beebi fofor wɔ ɔman no mu mbrɛ ɔbɛyɛ a obenya bambɔ, na enuanom boaa no. Ekyir yi, Borys kɔr Christ no wu ho Nkaadzi no bi. Borys reka dza enuanom yɛe dze boaa no no ho asɛm no, ɔkaa dɛ: “Adasefo no fii hɔn akoma mu dze dza mihia nyina maa me na wɔhwɛɛ me yie so. Meda Jehovah Adasefo no ase paa.”

¹¹ Hɛn so, sɛ yehu binom a wohia mboa, dɛ wɔyɛ Adasefo anaadɛ wɔnnyɛ Adasefo no, yebotum esuasua hɛn sor Egya a ehumbɔbɔr ahyɛ no ma no na yaada ɔdɔ edzi akyerɛ hɔn. (Luke 6:​31, 36) Hɛn mpaabɔ ara nye dɛ ɔdɔ a yɛbɛda no edzi akyerɛ dɛm nkorɔfo no bɛka hɔn ma wɔaabɛyɛ Christ n’esuafo. (1 Pet. 2:12) Naaso sɛ wɔbɔsom Jehovah o, sɛ wɔammbɔsom no o, hɛn enyi bɛgye paa osiandɛ yɛyɛɛ biribi dze boaa hɔn.—Andw. 20:35.

JEHOVAH BƆ HƐN HO BAN

12. Ebɛn akwan na Jehovah ahyɛ bɔ dɛ ɔbɛfa do abɔ n’asomfo ho ban? (Ndwom 91:​1, 2, 14)

¹² Kenkan Ndwom 91:​1, 2, 14. Ndɛ, Jehovah ahyɛ hɛn bɔ dɛ ɔbɔbɔ hɛn ho ban efi biribiara a obotum asɛɛ yɛnye no ntamu anyɛnkofa no ho. Ɔremma kwan ma Satan nnsɛɛ nokwar som da. (John 17:15) Na wɔ ‘ahohiahia kɛse no’ mu so, yebotum enya awerɛhyɛmu paa dɛ bɔ a Jehovah ahyɛ dɛ ɔbɔboa hɛn ma hɛn gyedzi aakɔ do ayɛ dzen no, obedzi do na ɔaagye hɛn.—Nyi. 7:​9, 14.

13. Jehovah si dɛn bɔ hɛn mu biara ho ban?

¹³ Ebɛnadze na Jehovah yɛ dze bɔ hɛn mu biara ho ban? Jehovah nam Kyerɛwnsɛm no do boa hɛn ma yehu dza ɔyɛ papa nye dza ɔyɛ bɔn. (Heb. 5:14) Sɛ yɛdze afotusɛm a ɔwɔ Nyankopɔn n’Asɛm mu no bɔ hɛn bra a, ɔbɔbɔ hɛn ho ban efi biribiara a obotum asɛɛ yɛnye Jehovah ntamu anyɛnkofa no ho. Afei so, ɔbɔboa hɛn ma yeesisi gyinae a ɔbɛma yeenya apɔwmudzen na hɛn enyi so aagye. (Ndw. 91:4) Bio so, Jehovah nam asafo no do bɔ hɛn ho ban. (Isa. 32:​1, 2) Hɛn nuanom Christianfo dɔ Jehovah na wɔdze n’afotusɛm so bɔ hɔn bra. Dɛm ntsi sɛ yɛnye hɔn bɔ a, wɔbɛhyɛ hɛn nkuran na wɔaaboa hɛn ma yaatwe hɛnho efi bɔn ho.—Mbɛ. 13:20.

14. (a) Ebɛnadze ntsi na Nyankopɔn mmbɔ hɛn ho ban mmfi ɔhaw ahorow a yehyia no nyina ho? (b) Ebɛn awerɛhyɛmu na Ndwom 9:10 ma yenya? (Ibotum ahwɛ ase hɔ asɛm no so.)

¹⁴ Tsetse no, nna ɔtɔ da a Jehovah bɔ n’asomfo ho ban amma woeemmpira anaa woennku hɔn. Naaso ɔnnyɛ aber nyina na ɔyɛɛ dɛm. Bible no ma yehu dɛ “esian” botum ato hɛn mu biara aber a yɛnnhwɛ kwan. (Ɔsɛnk. 9:11) Afei so, wɔ tsetse mber mu no, Jehovah maa kwan ma wɔtaan n’asomfo binom hɔn enyi na wokum binom mpo mbrɛ ɔbɛyɛ a ɔbɛda edzi dɛ Satan yɛ ɔtorfo. (Job 2:​4-6; Matt. 23:34) Dɛmara so na ɔtse ndɛ. Bi a Jehovah rinnyi ɔhaw ahorow a yerihyia no mmfi hɔ dze, naaso yebotum enya awerɛhyɛmu dɛ ɔrenndan n’ekyir mma hɔn a wɔdɔ no no da.d—Ndw. 9:10.

JEHOVAH KYEKYE HƐN WERƐ

15. Ebɛn kwan do na mpaabɔ, Nyankopɔn n’Asɛm na hɛn nuanom Christianfo kyekye hɛn werɛ? (2 Corinthfo 1:​3, 4)

¹⁵ Kenkan 2 Corinthfo 1:​3, 4. Ɔtɔ da a, yedzi awerɛhow, dadwen hyɛ hɛn do, anaa yɛyɛ basaa. Bi a dza erefa mu sesei no ama ayɛ hahaaha na etse nka dɛ wɔaka wankotsee. Obi wɔ hɔ a ɔtse dza erefa mu no ase anaa? Nyew, Jehovah tse dza erefa mu no ase. Naaso ɔnnyɛ dɛ Jehovah tse yaw a yɛrefa mu no ase kɛkɛ o, mbom “ɔkyekye hɛn werɛ wɔ hɛn ahohia nyina mu.” Osi dɛn yɛ dɛm? Dza ɔyɛ nye dɛ, sɛ yefi hɛn akoma mu ka dza ɔhaw hɛn ho asɛm kyerɛ no a, ɔma hɛn “Nyankopɔn asomdwee a ɔtra ntseasee nyina no.” (Phil. 4:​6, 7) Afei so, sɛ yɛkenkan dza Jehovah aka akyerɛ hɛn wɔ n’Asɛm Bible no mu no a, ɔkyekye hɛn werɛ. Bible no mu nsɛm ma yehu dɛ Jehovah dɔ hɛn paa, ɔma yehu nyansa, na ɔma yenya enyidado. Dɛm nsɛm yi hyɛ hɛn dzen na ɔhyɛ hɛn nkuran. Bio so, sɛ yɛkɔ Christianfo nhyiamu a, yenya hokwan nye hɛn nuanom a wɔdɔ hɛn no bɔ fɛkuw na yesua Bible mu nsɛm so a ɔhyɛ nkuran, na iyi kyekye hɛn werɛ.

16. Ebɛnadze na isua fi Nathan na Priscilla hɔn asɛm no mu?

¹⁶ Nathan na Priscilla yɛ awarfo bi a wɔwɔ United States. Hom mma yensusu hɔn asɛm no ho kakra, na ɔbɛma yeehu mbrɛ Jehovah fa n’Asɛm no do kyekye hɛn werɛ na ɔhyɛ hɛn nkuran. Mfe bi a etwa mu no, wɔyɛɛ dɛ wobotu akɛtsena beebi a wohia Ahendzi adawurbɔfo pii. Nathan kaa dɛ: “Nna yɛgye dzi dɛ Jehovah behyira dza yɛpɛ dɛ yɛyɛ yi do.” Naaso wokodur hɔ no, yarba bi bɔɔ hɔn mpofirmu na hɔn sikasɛm so yɛɛ basaa. Owiee ase no, awarfo yi saan hɔn ekyir kɔr hɔn kurow mu, naaso nna hɔnho da ho ara kyer hɔn. Nathan kaa dɛ: “Mbrɛ nna yɛrohwɛ kwan dɛ Nyankopɔn bɔboa hɛn no, wɔammba no dɛm. Ntsi minyaa adwen mpo dɛ gyama mayɛ bɔn bi.” Naaso odur beebi no, Nathan na Priscilla bohun dɛ aber a hɔnho kyeer hɔn mpo no, Nyankopɔn ennyi n’enyi amma hɔn. Nathan kaa dɛ: “Aber a ndzɛmba mu yɛɛ dzen maa hɛn no, Bible no bɛyɛɛ tse dɛ hɛn nyɛnko bi a onyim nyansa a ɔhyɛ hɛn nkuran na ɔkyerɛ hɛn kwan. Dɛ nkyɛ yɛdze hɛn adwen besi ɔhaw a yerihyia no do no, yɛdze hɛn adwen sii mbrɛ nna Jehovah roboa hɛn ma yeegyina ano no do mbom. Iyi ntsi yɛgye dzi paa dɛ ɔhaw biara a yebehyia no daakye no, Jehovah bɔboa hɛn.”

17. Ebɛn kwan do na akyerɛbaa bi a wɔfrɛ no Helga nyaa awerɛkyekyer? (Ibotum ahwɛ mfonyin no so.)

¹⁷ Hɛn nuanom Christianfo so botum akyekye hɛn werɛ. Wobesi dɛn ayɛ iyi? Hom mma yɛnhwɛ akyerɛbaa bi a wɔfrɛ no Helga a ɔtse Hungary n’asɛm no. Ohyiaa ɔhaw ahorow mfe pii, na iyi maa dadwen hyɛɛ no do na ɔmaa ɔtsee nka dɛ mfaso biara nnyi no do. Naaso sɛ ɔdwendwen dza osii wɔ dɛm mber no mu no ho a, ohu mbrɛ Jehovah faa no nuanom Christianfo do kyekyee no werɛ. Ɔkaa dɛ: “Aber biara a Jehovah bohu dɛ m’edwuma, me ba a ɔyar a morohwɛ no, nye ɔhaw afofor ahyɛ mo do ma mayɛ hahaaha no, ɔboa me. Bɔ a ɔdze hyɛɛ me dɛ ɔbɛkyekye mo werɛ no, mfe 30 nye yi, da kor mpo nnyi hɔ a oenndzi do. Mpɛn pii no, ɔnam nsɛm a ɔyɛ dɛw nye nkuranhyɛsɛm a afofor ka kyerɛ me no do hyɛ me dzen. Ɔyɛ so a, aber a mihia awerɛkyekyer paa no, metaa nya tɛst mɛsegye, kaad, anaa metse nkuranhyɛsɛm bi fi enuanom hɔ.”

18. Yebesi dɛn akyekye afofor hɔn werɛ?

¹⁸ Yeenya hokwan dɛ yebosuasua hɛn Nyankopɔn na yaakyekye afofor hɔn werɛ. Ebɛn kwan na yebotum afa do ayɛ iyi? Dza yebotum ayɛ no bi nye dɛ, sɛ wɔrekasa a yebenya hɔn ho abotar etsie hɔn, yɛbɛka nsɛm a ɔbɛma hɔn akoma atɔ hɔn yamu akyerɛ hɔn, na yaayɛ ndzɛmba afofor bi a wobehia dze aboa hɔn. (Mbɛ. 3:27) Yɛyɛ dza yebotum biara kyekye obiara a oruhu amandze no werɛ, dɛ ɔsom Jehovah anaadɛ ɔnnsom no no. Hɔn a yɛnye hɔn tse mpotamu no, sɛ yehu dɛ hɔn dɔfo bi ewu, wɔyar, anaa dadwen ahyɛ hɔn do a, yebotum akɛsera hɔn, ayɛ aso etsie hɔn na yaaka Bible mu nsɛm bi dze ahyɛ hɔn nkuran. Sɛ yesuasua Jehovah a ɔyɛ “awerɛkyekyer nyina Nyankopɔn” no a, yebotum aboa hɛn nuanom Christianfo ma woeegyina ɔhaw ahorow a worihyia no ano. Afei so, bi a ɔbɛka hɔn a wɔnnsom Jehovah no hɔn akoma ma hɔn enyi aabɛgye ho dɛ wobosua Jehovah ho adze.—Matt. 5:16.

JEHOVAH WƆ HƆ MA HƐN ABER NYINA

19. Ebɛnadze na Jehovah yɛ ma hɛn, na yebesi dɛn esuasua no?

¹⁹ Hɔn a wɔdɔ Jehovah no, ɔdwen hɔn ho paa. Sɛ ɔto ma ɔyɛ dzen a, ɔnndan n’ekyir mma n’asomfo da. Ɔwofo biara a ɔdɔ ne ba no, ɔhwɛ ne ba no yie, na dɛmara so na Jehovah hwɛ n’asomfo anokwafo so yie. Ɔkyerɛ hɛn kwan, ɔma hɛn nsa ka dza yehia, ɔbɔ hɛn ho ban, na ɔkyekye hɛn werɛ. Sɛ yɛboa hɔn a woruhu amandze na yɛhyɛ hɔn nkuran a, nna yerusuasua hɛn sor Egya a ɔyɛ ɔdɔ no. Ɔhaw na atseetsee dze, yebotum ehyia bi wɔ dɛm wiadze yi mu. Naaso yebotum enya awerɛhyɛmu dɛ Jehovah ka hɛn ho. Osiandɛ ɔahyɛ hɛn bɔ dɛ: “Mma nnsuro, na menye wo nam.” (Isa. 41:10) Ntsi yebotum enya awerɛhyɛmu dɛ ɔnnkaa hɛn nko!