Jehovah ‘Sa Hɔn A Hɔn Akoma Ebubu No Yarba’

1. Jehovah tse nka dɛn wɔ n’asomfo ho?

JEHOVAH n’enyi tua biribiara a n’asomfo refa mu wɔ asaase yi do no. Sɛ hɛn enyi gye a, ohu na sɛ hɛn werɛ how so a, ohu. (Ndw. 37:18) Sɛ ohu dɛ atseetsee a yɛrefa mu nyina ekyir no yɛreyɛ dza yebotum biara dze asom no a, ɔma n’enyi gye paa! Afei so ɔayɛ krado dɛ ɔbɔboa hɛn na ɔaakyekye hɛn werɛ.

2. Ebɛnadze na Jehovah yɛ ma hɔn a hɔn akoma ebubu no, na yebesi dɛn enya mboa a Jehovah dze ma hɛn no do mfaso?

² Ndwom 147:3 ka dɛ Jehovah ‘kyekyer hɔn a hɔn akoma ebubu no hɔn ekur.’ Dɛm kyerɛwsɛm yi ma yehu dɛ, Jehovah tɔ no bo ase hwɛ hɔn a ɔhaw a wɔrefa mu no ebubu hɔn no. Ebɛnadze na ɔsɛ dɛ yɛyɛ ama yeenya mboa a Jehovah dze ma hɛn no do mfaso? Ɔwodze ma yɛnyɛ dɛm mfatoho yi. Sɛ obi pira a, dɔkta a onyim edwuma yie no botum ahwɛ no ma no ho aatɔ no. Naaso sɛ obi a oepira no ho bɔtɔ no a, akwankyerɛ biara a dɔkta no dze bɛma no no, ɔsɛ dɛ odzi do pɛpɛɛpɛr. Adzesua yi mu no, hɔn a ɔhaw a wɔrefa mu no ebubu hɔn no, yɛbɔhwɛ dza Jehovah ka kyerɛ hɔn wɔ n’Asɛm no mu. Afei so yɛbɔhwɛ mbrɛ yebesi dze n’afotu no ayɛ edwuma.

JEHOVAH MA YEHU DƐ YƐSOM BO MA NO PAA

3. Ebɛnadze ntsi na binom tse nka dɛ mfaso biara nnyi hɔn do?

³ Wiadze a yɛtse mu yi dze, ɔdɔ ho yɛ na. Dɛm ntsi nyimpa pii wɔ hɔ a, wɔtse nka dɛ mfaso biara nnyi hɔn do. Akyerɛbaa bi a wɔfrɛ no Helena kaa dɛ: “Ɔdɔ a wɔfrɛ no ɔdɔ dze, nna bi nnyi hɛn ebusua mu. Nna me papa wɔ akoma paa. Biribi ketseketse biara nna no bo efuw. Nna da biara ɔka kyerɛ emi na mo nuanom no dɛ mfaso biara nnyi hɛn do.” Bi a tse dɛ Helen no woara so obi atseetsee wo da. Bi mpo a nna ɔtaa kasa tsia wo anaa nna ɔma etse nka dɛ ɔwodze nnka nyimpa ho. Sɛ dɛm a, nna ɔno bi a ɔbɛyɛ dzen ama wo dɛ ebɛgye edzi dɛ obi wɔ hɔ a ɔdɔ wo ankasa.

4. Ebɛn awerɛhyɛmu na Jehovah ma yenya wɔ Ndwom 34:18?

⁴ Sɛ nkorɔfo atseetsee wo da mpo a, ibotum enya awerɛhyɛmu dɛ Jehovah dɔ wo na esom bo ma no. Jehovah “bɛn hɔn a hɔn akoma abobɔ” no. (Kenkan Ndwom 34:18.) Ntsi sɛ ‘ebotow’ a, kaa dɛ Jehovah hun biribi papa bi wɔ w’akoma mu, ntsi na ɔtwee wo baa ne nkyɛn no. (John 6:44) Ɔayɛ krado aber biara dɛ ɔbɔboa wo, osiandɛ esom bo ma no paa.

5. Mbrɛ Jesus nye hɔn a nna nkorɔfo bu hɔn dɛ wɔnnsɛ hwee no dzii no, ebɛnadze na yesua fi mu?

⁵ Sɛ yɛhwɛ mbrɛ Jesus nye afofor dzii no a, ɔboa hɛn ma yɛtse mbrɛ Jehovah si hu hɛn no ase yie. Aber a Jesus reyɛ no som edwuma wɔ asaase do no, ɔnye hɔn a nna nkorɔfo bu hɔn dɛ wɔnnsɛ hwee no dzii no yie. (Matt. 9:​9-12) Ber bi, maame bi a nna bɔgya rutu no no kosuoo Jesus n’atar mu. Nna ɔgye dzi dɛ sɛ ɔyɛ dɛm a noho bɔtɔ no. Naaso Jesus annkasakasa n’enyim, mbom ɔkyekyee no werɛ na ɔkamfoo no wɔ gyedzi a ɔdaa no edzi no ho. (Mark 5:​25-34) Jesus suasuaa n’Egya no suban pɛpɛɛpɛ. (John 14:9) Ntsi, woara so ibotum enya awerɛhyɛmu dɛ esom bo ma Jehovah, na suban pa a eda no edzi nyina n’enyi tua. Onyim dɛ egye no dzi na edɔ no so.

6. Sɛ obi tse nka dɛ mfaso nnyi no do a, ebɛnadze na obotum aboa no?

⁶ Sɛ etaa tse nka dɛ mfaso nnyi wo do a, ebɛnadze na ibotum ayɛ? Ɔyɛ a kenkan Bible mu nsɛm a ɔma ihu dɛ esom bo ma Jehovah no, na dwendwen ho.b (Ndw. 94:19) Sɛ enntum enndu botae bi a edze sii w’enyi do no ho, anaa w’abaw mu ebu osiandɛ inntum nnyɛ pii dɛ mbrɛ afofor yɛ no a, mma innya adwen dɛ ɔwodze mfaso nnyi wo do. Jehovah nnhwɛ kwan dɛ ebɛyɛ dza ɔbor w’ahoɔdzen do. (Ndw. 103:​13, 14) Sɛ obi atseetsee wo da anaa ɔayɛ adze ma wɔahaw wo paa a, mma innya adwen dɛ biribi a eyɛe ntsi na ɔmaa ɔyɛɛ wo dɛm no. Kaa dɛ hɔn a wɔtseetsee nkorɔfo no, Jehovah bobu hɔn atsɛn. Naaso ɔboa hɔn a wɔatseetsee hɔn no. (1 Pet. 3:12) Aber a Sandra yɛ abofra no, ɔfaa atseetsee mu paa. Asɛm a ɔkae nye dɛ: “Da biara mobɔ Jehovah mpaa, na meserɛ no dɛ suban pa a ohu wɔ mo ho no, ɔmboa me ma mara so munhu bi.”

7. Dza yɛafa mu wɔ hɛn asetsena mu no, yebesi dɛn dze aboa nkorɔfo wɔ Jehovah no som mu?

⁷ Gye to mu dɛ Jehovah botum afa wo do aboa afofor. Ɔama wo hokwan dɛ enye no mbɔ mu nyɛ asɛnka edwuma no. (1 Cor. 3:9) Osian dza afa mu wɔ asetsena mu ntsi, bi a ɔrennyɛ dzen mma wo dɛ ebɛtse afofor so a woruhu amandze no ase. Ibotum ayɛ ndzɛmba beberee dze aboa hɔn. Wɔboaa Helen a yeedzi kan aka no ho asɛm no, ntsi seseiara noara so tum boa afofor. Dza ɔkae nye dɛ: “Emi a mennsɛ hwee yi, Jehovah ama mehu dɛ ɔdɔ me na ɔnam mo do so roboa afofor.” Sesei, Helen yɛ daa kwampaafo na n’enyi gye paa.

JEHOVAH PƐ DƐ EGYE TO MU DƐ ƆDZE WO BƆN AKYƐ WO

8. Ebɛn awerɛhyɛmu na asɛm a ɔwɔ Isaiah 1:18 no ma yenya?

⁸ Jehovah n’asomfo binom wɔ hɔ a, bɔn a wɔyɛe ansaana worubonuma hɔn anaa bɔn a wɔyɛe wɔ hɔn enuma ekyir no da ho ara retseetsee hɔn paa. Naaso ɔsɛ dɛ yɛkaa dɛ osiandɛ Jehovah dɔ hɛn paa ntsi na ɔmaa ne Ba no bowui maa hɛn no. Ɔsɛ dɛ yɛgye to mu dɛ osian werdam afɔrbɔ no ntsi, Jehovah botum dze hɛn bɔn akyɛ hɛn. Jehovah ma yenya awerɛhyɛmu dɛ, sɛ yesiesiec yɛnye no ntamu a, ɔdze hɛn bɔn bɛkyɛ hɛn korakora. (Kenkan Isaiah 1:18.) Ɔyɛ hɛn enyigye paa dɛ Jehovah nnkaa bɔn yɛyɛe mber bi a abɛsen kɔ no bio! Naaso ndzɛmba papa a yɛayɛ no dze, no werɛ rimmfir da.—Ndw. 103:​9, 12; Heb. 6:10.

9. Bɔn bi a yɛyɛe mber bi a abɛsen kɔ no, ebɛnadze ntsi na ɔnnsɛ dɛ yɛkɔ do ara dwendwen ho?

⁹ Sɛ bɔn bi a eyɛe mber bi a abɛsen kɔ no da ho ara retseetsee wo a, bɔ mbɔdzen fa w’adwen si dza ereyɛ no sesei nye dza ibotum ayɛ no daakye no do. Hom mma yensusu ɔsomafo Paul n’asɛm no ho. Onuu noho dɛ ɔtaan Christianfo no enyi dzendzenndzen, naaso nna onyim dɛ Jehovah dze no bɔn akyɛ no. (1 Tim. 1:​12-15) Ehwɛ a, ɔkɔr do ara dwendween bɔn a ɔyɛe no ho anaa? Ndzɛmba ahorow bi a ɔyɛe wɔ Judasom mu a ɔmaa ɔgyee dzin no, ɔanndwendwen ho. Na dɛmara so na ɔanndwendwen bɔn a ɔyɛe mber bi a abɛsen kɔ no so ho. (Phil. 3:​4-8, 13-15) Mbom no, Paul yeer noho yɛɛ asɛnka edwuma no, na ɔdze n’adwen sii dza nna ɔda n’enyim daakye no do. Nna Paul nyim dɛ dza woesi no, orunntum nnyɛ ho hwee. Ntsi woara so gye to mu dɛ dza woesi no, irunntum nnyɛ ho hwee. Dza mbowa edzi no, ma wondzi nkɔ. Naaso seseiara dze, ibotum eyi Jehovah ayɛw na aadwendwen daakye papa bi a ɔdze ahyɛ wo bɔ no ho.

10. Sɛ biribi a yɛyɛe mber bi a abɛsen kɔ no ahaw afofor a, ebɛnadze na yebotum ayɛ?

¹⁰ Bi a mber bi a abɛsen kɔ no, eyɛɛ biribi ma ɔhaaw afofor, na iyi ho asɛm da ho ara retseetsee wo. Sɛ dɛm a, nna ɔno ebɛnadze na obotum aboa wo? Yɛ dza ibotum biara fa siesie ɔhaw no, na fi w’akoma mu pa hɔn kyɛw. (2 Cor. 7:11) Serɛ Jehovah dɛ ɔmboa hɔn. Nya awerɛhyɛmu dɛ, Jehovah botum aboa hom nyina ma hom aakɔ do dze enyigye asom no na hom eenya asomdwee.

11. Ebɛnadze na yebotum esua efi nkɔnhyɛnyi Jonah n’asɛm no mu? (Hwɛ mfonyin no so.)

¹¹ Mfom a idzii mber bi a abɛsen kɔ no, sua biribi fi mu na ma kwan ma Jehovah nye wo ndzi dwuma dɛ mbrɛ ɔpɛ. Ma yɛmfa nkɔnhyɛnyi Jonah n’asɛm no dɛ mfatoho. Jehovah somaa no dɛ ɔnkɔ Nineveh. Naaso dɛ nkyɛ ɔbɔkɔ Nineveh no, ɔdze n’enyi kyerɛɛ beebi fofor mbom. Jehovah twee Jonah n’asowa na osuaa biribi fii mfom a odzii no mu. (Jonah 1:​1-4, 15-17; 2:​7-10) Jehovah annka dɛ osian dza Jonah yɛe ntsi ɔnye no rinndzi dwuma bio. Mbom no Nyankopɔn sanee kaa kyerɛɛ Jonah dɛ ɔnkɔ Nineveh. Dɛm aber yi dze otsiei; ɔannkyɛr ho koraa. Ɔwɔ mu dɛ ɔyɛɛ Jonah yaw dɛ ahyɛse no oenntsie Jehovah dze, naaso ɔamma ɔno ennsiw no kwan dɛ dɛm aber yi dze ɔbɛyɛ dza Jehovah aka no.—Jonah 3:​1-3.

JEHOVAH NAM NO SUNSUM KRƆNKRƆN NO DO KYEKYE HƐN WERƐ

12. Sɛ awerɛhosɛm bi to hɛn a, ebɛn kwan do na Jehovah ma yenya asomdwee? (Philippifo 4:​6, 7)

¹² Sɛ awerɛhosɛm bi to hɛn a, Jehovah nam no sunsum krɔnkrɔn no do kyekye hɛn werɛ. Hom mma yɛnhwɛ asɛm bi a ɔtoo Ron na Carol. Hɔn babanyin kum noho yayaayaw. Wɔkaa dɛ: “Yɛafa ɔhaw nye amandze pii mu, naaso iyi dze nna n’ano yɛ hyew paa. Nna yɛda a, yɛnnda. Ntsi yɛbɔɔ Jehovah mpaa mpɛn pii, na yenyaa asomdwee a wɔaka ho asɛm wɔ Philippifo 4:​6, 7 no bi.” (Kenkan.) Sɛ erefa ɔhaw kɛse bi mu a, ibotum efi w’akoma mu aka ho asɛm akyerɛ Jehovah wɔ mpaabɔ mu. Ibotum nye no aka ho asɛm mpɛn dodow biara a epɛ. (Ndw. 86:3; 88:1) Kɔ do serɛ Jehovah dɛ ɔma wo no sunsum krɔnkrɔn no. Nya awerɛhyɛmu dɛ Jehovah rummbu n’enyi nngu w’ebisadze no do da.—Luke 11:​9-13.

13. Ebɛn kwan do na sunsum krɔnkrɔn no botum aboa hɛn ma yaakɔ do dze nokwardzi asom Jehovah? (Ephesusfo 3:16)

¹³ Irihyia ɔhaw kɛse bi ma w’abaw mu ebu anaa? Sunsum krɔnkrɔn no botum ahyɛ wo dzen ma aakɔ do dze nokwardzi asom Jehovah. (Kenkan Ephesusfo 3:16.) Hom mma yɛnhwɛ dza ɔtoo hɛn akyerɛbaa bi a wɔfrɛ no Flora. Nna ɔnye no kun nyina yɛ asɛmpatserɛwfo, naaso no kun faa n’ekyir na iyi maa wogyaa awar. Hɛn akyerɛbaa no kaa dɛ: “Mo kun enndzi mo nokwar, na dza ɔyɛe no maa mo werɛ hoow paa. Nna meyɛ moho hwee a ɔnnyɛ yie. Mobɔɔ Jehovah mpaa dɛ ɔmma no sunsum krɔnkrɔn no mboa me ma muntum ngyina ɔhaw a ɔtse dɛm ano. Jehovah kyekyee mo werɛ. Ahyɛse no dze, nna m’adwen yɛ me dɛ murunntum nngyina ɔhaw no ano, naaso Jehovah boaa me na ɔhyɛɛ me dzen ma mutumii gyinaa ano.” Flora gye dzi dɛ Nyankopɔn aboa no ma ahotodo a ɔwɔ wɔ no mu no ayɛ kɛse, na ɔmmfa ho ɔhaw biara a obehyia no, ɔbɔwowaw no. Ɔtoaa n’asɛm no do dɛ: “Asɛm a ɔwɔ Ndwom 119:32 no fa moho paa. Hɔ ka dɛ: ‘Mibedzi wo mbransɛm do dzendzenndzen, osiandɛ ema onya beebi tsena wɔ m’akoma mu.’”

14. Ebɛnadze na yɛyɛ a ɔbɛma Nyankopɔn dze no sunsum krɔnkrɔn no aboa hɛn?

¹⁴ Ebɛnadze na ɔsɛ dɛ eyɛ aber a aserɛ Jehovah dɛ ɔmfa no sunsum krɔnkrɔn no mboa wo no? Yɛ ndzɛmba ahorow a ɔbɛma enya Nyankopɔn no sunsum krɔnkrɔn no. Dɛm ndzɛmba no bi nye dɛ ebɔkɔ asafo nhyiamu nye asɛnka. Kenkan Bible no da biara da na dwendwen ho, na iyi bɔboa wo ma eenya Jehovah n’adwen wɔ ndzɛmba ho. (Phil. 4:​8, 9) Sɛ erekenkan Bible no a, nyimpa ahorow a hɔnho asɛm wɔ mu no, ɔyɛ a hyɛ ɔhaw ahorow a wohyiae no nsew, na dwendwen mbrɛ Jehovah boaa hɔn ma wotumii gyinaa ano no ho. Sandra a yeedzi kan aka no ho asɛm no hyiaa ɔhaw akɛse toatoaa do. Ɔkaa dɛ: “Joseph n’asɛm no hyɛ mo nkuran paa. Ohyiaa ɔhaw pii na nkorɔfo so nnye no enndzi no yie, naaso ɔamma iyi annsɛɛ ɔnye Jehovah ntamu.”—Gen. 39:​21-23.

JEHOVAH NAM HƐN NUANOM CHRISTIANFO DO KYEKYE HƐN WERƐ

15. Woananom na wobotum akyekye hɛn werɛ, na wobesi dɛn aboa hɛn? (Hwɛ mfonyin no so.)

¹⁵ Sɛ yeruhu amandze a, hɛn nuanom Christianfo botum ‘akyekye hɛn werɛ pii.’ (Col. 4:11) Mboa a hɛn nuanom Christianfo dze ma hɛn no yɛ kwan kor a Jehovah fa do ma yehu dɛ ɔdɔ hɛn. Sɛ yɛreka ɔhaw bi a yerihyia ho asɛm akyerɛ hɛn nuanom Christianfo na sɛ wɔyɛ aso tsie hɛn a, obotum akyekye hɛn werɛ. Sɛ yehu hɔn kɛkɛ mpo a, bi a obotum akyekye hɛn werɛ. Wobotum mpo akenkan Bible mu asɛm bi dze ahyɛ hɛn nkuran anaa wɔnye hɛn abɔ mu abɔ mpaa.d (Rom. 15:4) Ɔtɔ da a, onua anaa akyerɛbaa bi botum aboa hɛn ma yeenya Jehovah n’adwen wɔ ndzɛmba ho, na iyi botum aboa hɛn ma yaakɔ do egyina hɛn haw no ano. Afei so, sɛ yɛrefa ahohia mu a, hɛn nuanom Christianfo botum ayɛ ndzɛmba pɔtsee bi dze aboa hɛn. Bi nye dɛ, wobotum ayɛ edziban ama hɛn.

16. Ebɛnadze na bi a ɔsɛ dɛ yɛyɛ ama afofor eetum aboa hɛn?

¹⁶ Sɛ yɛpɛ dɛ afofor boa hɛn a, bi a obehia dɛ yɛka kyerɛ hɔn dɛ yehia mboa. Nokwasɛm nye dɛ, hɛn nuanom Christianfo no dɔ hɛn na wɔpɛ dɛ wɔboa hɛn. (Mbɛ. 17:17) Naaso bi a worunntum nnhu mbrɛ yesi tse nka anaa dza yehia. (Mbɛ. 14:10) Dɛm ntsi, sɛ ɔhaw bi retseetsee wo a, ibotum aka mbrɛ isi tse nka ho asɛm akyerɛ w’anyɛnkofo a egye hɔn dzi. Ma wonhu dza epɛ dɛ wɔyɛ dze boa wo. Epɛ so a, asafo mu mpanyimfo a wɔyɛ w’anyɛnkofo no, ibotum aka ho asɛm akyerɛ hɔn. Hɛn nkyerɛbaa binom so ehu dɛ sɛ wɔka dza wɔrefa mu no ho asɛm kyerɛ nkyerɛbaa afofor a hɔnho akokwaa a, wotum kyekye hɔn werɛ.

17. Ebɛnadze na obotum ama wɔaayɛ dzen ama hɛn dɛ yɛbɛma kwan ma afofor ahyɛ hɛn nkuran, na ebɛnadze na yebotum ayɛ wɔ ho?

¹⁷ Hwɛ yie na aanntsew woho. Bi a yaw a erefa mu ntsi, w’enyi renngye ho dɛ enye afofor bɔbɔ. Ɔtɔ da a, bi a wo nuanom Christianfo mpo renntse mbrɛ isi tse nka no ase, anaa wɔbɛka nsɛm a ɔyɛ yaw akyerɛ wo. (Jas. 3:2) Naaso ɔnnsɛ dɛ dɛm ndzɛmba yi ma etwe woho fi hɔn ho, osiandɛ Jehovah botum afa hɔn do ahyɛ wo nkuran. Asafo mu panyin bi a wɔfrɛ no Gavin a ɔwɔ adwen mu yarba bi kaa dɛ: “Osian me yarba no ntsi, mpɛn pii no, memmpɛ dɛ menye m’anyɛnkofo bɔbɔ nkɔmbɔ anaa menye hɔn bɔbɔ.” Naaso ɔmmfa ho mbrɛ Gavin si tse nka no, ɔbɔ mbɔdzen dɛ ɔbɛbɛn no nuanom no, na dɛm a ɔyɛ no boa no paa. Akyerɛbaa bi so a wɔfrɛ no Amy kaa dɛ: “Osian dza mafa mu da ntsi, ɔyɛ a ɔyɛ dzen ma me dɛ mebɛgye nkorɔfo edzi. Naaso morobɔ mbɔdzen dɛ mobɔdɔ mo nuanom no na magye hɔn edzi, osiandɛ dɛm na Jehovah yɛ. Minyim dɛ sɛ meyɛ dɛm a, ɔma Jehovah n’enyi gye, na mara so m’enyi gye.”

MA BƆ A JEHOVAH AHYƐ DƐ NDZƐMBA BƐYƐ YIE DAAKYE NO NKYEKYE WO WERƐ

18. Ebɛnadze na yebotum ahwɛ kwan daakye, na ebɛnadze na yebotum ayɛ no sesei?

¹⁸ Yebotum enya awerɛhyɛmu dɛ ɔrennkyɛr Jehovah beyi biribiara a ɔma yedzi yaw anaa yɛtseetsee no efi hɔ korakora ma hɛnho aatɔ hɛn. (Nyi. 21:​3, 4) Dɛm aber no, atseetsee anaa yaw a yɛafa mu no nyinara ‘remmba hɛn adwen mu bio.’ (Isa. 65:17) Dɛ mbrɛ yeebohu no, seseiara mpo sɛ yeruhu amandze a, Jehovah ‘kyekyer hɛn ekur,’ kyerɛ dɛ, ɔkyekye hɛn werɛ. Jehovah fa akwan ahorow pii do boa hɛn na ɔkyekye hɛn werɛ. Dɛm ntsi bɔ mbɔdzen na gye ne nyina to mu. Ma ɔntsena w’adwen mu aber nyina dɛ ‘ɔdwen wo ho.’—1 Pet. 5:7.