iMatai ni Samuela

1 Ia e dua na turaga ni Ramaceimi-sofimi*+ ena veiulunivanua e Ifireimi+ na yacana o Elikana,+ na luvei Jiroame, na luvei Ilaiu, na luvei Tou, na luvei Sufi, na turaga ni Ifireimi. 2 E rua na watina, e dua na yacana o Ana, e dua tale na yacana o Penina. E vakaluveni o Penina, ia e sega ni vakaluveni o Ana. 3 E dau biuta na turaga qo na nona koro e veiyabaki me lai sokalou,* me vakacaboisoro vei Jiova ni lewe vuqa* e Sailo.+ Erau tiko e kea na luvei Ilai o Ofinai kei Finiasi,+ erau veiqaravi vakabete vei Jiova.+

4 Ena dua na siga ni vakacaboisoro o Elikana, e solia vei watina o Penina eso na kena iwase, vaka kina vei ira kece na luvena tagane kei na luvena yalewa,+ 5 e solia o koya vei Ana e dua na iwasewase talei ni lomani Ana vakalevu, ia o Jiova e sega ni solia vua e dua na gone.* 6 E vakalialiai Ana tiko ga na kena meca, na ikarua ni wati Elikana, me vakararawataki koya ni sega ni solia vua e dua na gone o Jiova. 7 E cakava tiko qori e veiyabaki o Penina ena gauna kece e dau lako cake kina o Ana ina vale i Jiova,+ e dau vakalialiai koya vakalevu na kena meca me tagi kina qai sega ni kana. 8 Ia e kaya vei Ana o Elikana na watina: “Na cava o tagicaka tiko Ana, na cava o sega ni kana kina, na cava o sa rui rarawataka?* Ke tini na luvemu tagane, vakacava au sega ni uasivi ratou?”

9 E tucake sara o Ana ni oti na nodratou kana kei na gunu e Sailo. Ena gauna qori e dabe toka o Ilai na bete ena dua na idabedabe volekata na duru ni katuba ena valenisoro*+ i Jiova. 10 E rarawa vakalevu o Ana, e masu vei Jiova+ qai sorova na tagi. 11 E bubului qai kaya: “Kemuni Jiova ni lewe vuqa, ke oni kauaitaka na rarawa ni nomuni dauveiqaravi moni nanumi au, moni kua ni guilecava na nomuni dauveiqaravi, moni solia vua na nomuni dauveiqaravi e dua na luvena tagane,+ au na soli koya vei Jiova ena gauna kece ni nona bula, ena sega ni tasi na uluna.”+

12 Ena gauna e masu tiko kina vakabalavu vei Jiova, e vakaraica tiko na gusuna o Ilai. 13 A vosa tiko ga e lomana o Ana, na tebenigusuna ga e yavala tiko, e sega ni rogo na domona. E nanuma kina o Ilai ni mateni. 14 E kaya vua o Ilai: “Me vakacava na dede ni nomu mateni? Sa rauta mada nomu gunu waini tiko.” 15 E sauma o Ana: “Sega noqu turaga! E rui lomabibi* ga na nomuni marama, au sega ni gunu waini se dua na ka e veivakamatenitaki, au talaucaka tiko ga na lomaqu vei Jiova.+ 16 Moni kua ni nanuma ni sega ni yaga na nomuni dauveiqaravi, ena levu ni vusolo ni lomaqu kei na noqu lomaleqa au vosa tiko kina qo.” 17 E sauma o Ilai: “Mo lako ena vakacegu, me solia mada ga na Kalou ni Isireli na ka o kerea vua.”+ 18 E kaya o koya: “Me nanumi mada ga e matamuni na nomuni dauveiqaravi.” E lako sara na yalewa me kana, e sega tale ni laurai e matana na lomaleqa.

19 Eratou yadra sara vakamataka me ratou cuva ena mata i Jiova, oti eratou lesu ina nodratou vale e Rama.+ Erau veiyacovi o Elikana kei Ana na watina, e kauaitaki* koya+ o Jiova. 20 E mani bukete o Ana ni oti e dua na yabaki,* e vakasucuma e dua na gonetagane qai vakayacani+ koya me o Samuela,* ni kaya, “au a kerei koya vei Jiova.”

21 Sa dede toka e lako cake o Elikana kei na nona lewenivuvale kece me cabora vei Jiova+ na isoro e cabo e veiyabaki kei na nona isoro ni bubului. 22 Ia e sega ni lako cake o Ana+ ni a kaya vei watina: “Ena gauna ga e kali kina na gone au na kauti koya yani, ena tu ena mata i Jiova, me tiko vakadua+ e kea.” 23 E kaya sara vua o Elikana na watina: “Mo vakayacora ga na ka o nanuma ni vinaka.* Mo tiko ga e vale me yacova ni o kali koya. Me vakayacora mada ga o Jiova na ka o tukuna.” E tiko ga e vale na marama qo, e susuga tiko na luvena me yacova ni kali.

24 Ni kalia oti ga na gone e kauti koya cake i Sailo, e kauta tale ga e dua na bulumakau tagane yabaki tolu, e dua na efa* falawa, kei na dua na saqa waini levu,+ e mani lako ina vale i Jiova e Sailo+ ni rau lako vata yani kei na gonetagane. 25 Era vakamatea sara na bulumakau tagane ra qai kauta na gonetagane vei Ilai. 26 E kaya sara o Ana: “Vosoti au noqu turaga! Me vaka ni oni se bula tiko noqu turaga, o yau ga na marama drau a duri vata tiko ena vanua qo meu masu vei Jiova.+ 27 Na gonetagane ga qo au masulaka qai solia vei au o Jiova na ka au kerea vua.+ 28 Ia qo au sa soli koya vei Jiova. Sa soli vei Jiova ena gauna kece ni nona bula.”

E mani cuva e kea o koya* vei Jiova.