Taro na Dauwiliwili
Ni vakaroti ira nona imuri o Jisu mera “dau solia na ka [“na ilavo,” NW], ka sega ni namaka e dua na ka mo ni rawata tale mai kina,” e kena ibalebale beka oya me sa kua sara ga ni saumi lesu na ilavo a kerei?
Ena kilai vinaka na vosa i Jisu ena Luke 6:35 (VV), ni dikevi vata kei na Lawa e soli vei Mosese. E vakarota na Kalou vei ira na Isireli mera solia na dinau vei nodra itokani Isireli era leqa tu vakailavo, ra qai gadreva dina na veivuke, ia mera kua ga ni namaka e dua na kena ikere se tubu. (Lako Yani 22:25; Vunau ni Soro 25:35-37; Maciu 5:42) Na dinau era solia mera kua ni cakava me vaka na ka ni bisinisi, mera rawata tale kina e dua na tubu. Na vuna baleta ni inaki ni dinau oqori mera vukei kina na dravudravua se o ira na sotava tiko na leqa. Sa rauta vinaka oqo, ni sega ni ka vakayalololoma na kena dau rawati tale na ka ena nodra leqa vakailavo na wekadra. Ia, e dodonu me namaka o koya e soli dinau ni na saumi lesu vua na dinau. E so na gauna ena taura e dua na ka e taukena na wekana me ivakadei ni dinau.—Vakarua 15:7, 8, NW.
E doka na Lawa o Jisu, ia e vakarabailevutaka na ka e tukuni kina ena nona kaya me baleti koya e veivuke se solia tiko na dinau me kua ni nuitaka ni na ‘rawata tale kina e dua na ka.’ Me vakataki ira ga na Isireli, era dau leqa tale ga vakailavo ena so na gauna na lotu Vakarisito se ra sotava e so na ituvaki e vakavuna mera dravudravua, se mera ligalala. Kevaka gona sa tu ena ituvaki vaka oqori e dua na tacida lotu Vakarisito qai kere veivuke vakailavo, e sega beka ni ka vakayalololoma meda vukei koya? Io, na loloma dina ena uqeta sara ga e dua na lotu Vakarisito me vukea na tacina e sega ni bale vua nona sa mai leqa tu vakailavo. (Vosa Vakaibalebale 3:27) E rawa ni solia sara ga vakailoloma vua na tacina e leqa tu oqori e dua na iwase ni ilavo e rawata, dina ni na lailai beka ni vakatauvatani kei na kena ena solia vakadinau.—Same 37:21.
Ena imatai ni senitiuri S.K., rau a lesi na yapositolo o Paula kei Panapasa me rau vota na ka ni veivuke era cautaka yani na lotu Vakarisito e Esia Lailai vei ira na tacidra e Jutia era sotava tiko na dausiga levu. (Cakacaka 11:28-30) E vaka tale ga kina nikua ni yaco na leqa, era dau vakauta na ka ni veivuke na lotu Vakarisito vei ira na mataveitacini era gadreva tu na veivuke. Ena nodra cakava oqori, era sa ivakaraitaki vinaka sara tiko ga kina vei ira tale e so. (Maciu 5:16) Ena so na ituvaki ena ka vakayalomatua meda tarogi keda me baleti koya e kere veivuke tiko, ‘Cava e vakavuna na leqa e sotava tiko? Cava nona rai me baleta na ituvaki oqori?’ Me qai nanumi tale ga na vosa i Paula: “Me kakua ni kana ko koya sa sega ni cakacaka.”—2 Cesalonaika 3:10.
Kevaka e via dinau e dua na tacida me vukei koya ena gauna lekaleka me rawa ni tudei tale nona bula vakailavo, e rawa ni soli vua na dinau e sega na kena tubu. Ena ituvaki vaka oqori ena sega ni veisaqasaqa kei na vosa i Jisu ena Luke 6:35 (VV) ke namaka o koya e solia na dinau me sauma lesu kece na tacina na ilavo e dinautaka. Me vakaivolataki nodrau veidinadinati, qai saga o koya e dinau me sauma lesu me vaka ga nodrau veidinadinati. Dodonu me nanuma tiko o koya e kere veivuke ni loloma vakarisito e uqeta na tacina me solia vua na dinau. Me uqeti koya tale ga vaka kina nona loloma vakarisito me sauma lesu na ka e dinautaka.
O koya tale ga e nanuma tiko me solia na dinau (se me solia ga vakailoloma na ilavo) e dodonu me dikeva vinaka na ituvaki ni nona vuvale. Me vakasamataka mada e liu na nona itavi vakaivolatabu, oya me qaravi iratou vakavinaka na lewe ni nona vuvale. (2 Korinica 8:12; 1 Timoci 5:8) Ia, era na saga tiko ga na lotu Vakarisito mera dau veilomani. Era na qai vukei ira kina na tacidra ena sala cava ga e rawa, me salavata kei na ivakavuvuli vakaivolatabu.—Jemesa 1:27; 1 Joni 3:18; 4:7-11.