Na Veitokoni e Uqeta na Toso Vakayalo
ENA vinakati na veitokoni me yaga na veituberi ena vuvale qaravi Kalou. Ni bulia na imatai ni veiwatini o Jiova, a vakabibitaka sara ga na veitokoni. Me ‘dauveivuke’ o Ivi vei Atama. (Vkte. 2:18) E dodonu me rau cakacaka vata na tagane kei na yalewa ena bula vakawati. (Dauv. 4:9-12) E vinakati na veitokoni me vakayacori vinaka kina na itavi e lesia o Jiova vei ira na itubutubu kei ira na gone.
Sokalou Vakavuvale
E lima na luvedrau o Barry kei Heidi. Erau vakadinata ni yaga sara na nodratou veitokoni vakavuvale me caka na vuli iVolatabu vakavuvale. A vakamacalataka o Barry: “Ena vuli vakavuvale, au na lesia eso na itavi lalai vei ratou na gone, de dua au na kerei ratou me ratou vakamacala ena ulutaga yavutaki ena Yadra! E tiko tale ga na gauna me keitou vakatovotovotaka na ka me tukuni ena cakacaka vakavunau, me rawa ni tiko kece nodratou ikau ni vosa ni ratou lai vunau.” E tomana o Heidi: “E tiko na neitou isausau yadudua vakayalo, ena neitou vuli gona vakavuvale keitou dau dikeva na veika sa bau rawati tiko me baleta na isausau qori.” Ena bogi e lokuci kina me ratou kua ni sara tivi, rau dikeva na veiwatini ni levu na gauna ratou wilivola kina.
Soqoni vaKarisito
Erau susuga e va na gone o Mike kei Denise. A yaga vakacava nodratou veitokoni na vuvale qo? E kaya o Mike: “Ena so na gauna, e sega ni muri vinaka na neitou ituvatuva me keitou yaco totolo yani ena soqoni. Ia, e yaga sara na neitou veitokoni me rawa ni keitou yaco ena soqoni ena kena gauna.” E kaya o Denise: “Ni ratou tubu tiko na gone, e tiko tale ga na nodratou dui itavi. Na luvei keirau yalewa o Kim e veivuke ena vakasaqa kei na kena vakarautaki na teveli ni kana.” E nanuma lesu na luvedrau tagane o Michael: “Ena bogi ni Tusiti e dau caka e vale na soqoni vakaivavakoso. Keitou dau samaka na rumu, taviraka na fuloa, tuvana tale ga vakamatau na idabedabe.” Dua tale na luvedrau o Matthew, e kaya: “E dau saga o Tamaqu me yaco totolo mai vale ena gauna ni soqoni me liutaka na vakavakarau ena soqoni.” Na cava na kena yaga?
Yaga Dina na Sasaga
E kaya o Mike: “Keirau tekivu painia vakaveiwatini ena 1987. Na gauna qori ratou se tiko ga i vale e tolu na luvei keirau. Erau painia tale ga e rua, e dua tale e veiqaravi ena tabana ni taravale e Peceli. E ikuri ni marau oya na neitou vukei ira e le 40 mera yalataki ira, ra papitaiso sara. E ka dokai tale ga na neitou veitokoni vakavuvale ena cakacaka ni tara Kingdom Hall se Peceli, lai yaco sara i vanuatani.”
Io, e yaga dina na veitokoni vakavuvale. Rawa beka ni o vaqara eso tale na sala mo tokoni ratou kina e vale? O na vakadinata ni na toso vinaka vakayalo nomu vuvale ke tiko na yalo ni veitokoni.
[iYaloyalo ena tabana e 28]
Ni tiko na gauna ni vakatovotovo, ena vuavuaivinaka kina na cakacaka vakavunau