Veivosaki kei Taukeinivale​—E Dau Veitotogitaki na Kalou ena Kama i Eli?

ERA dau marau na iVakadinadina i Jiova mera veivosakitaka kei ira na itaukeinivale na iVolatabu. E tiko e dua na taro vakaivolatabu o dau lomatarotarotaka? O dau vaqaqa na ka era vakabauta se na nodra ivakarau ni sokalou na iVakadinadina i Jiova? Ke vaka kina, vakaraitaka qori vei ira nira veisiko tale yani ena dua na gauna. Era na marau mera veivosakitaka kei kemuni na ka oni dau lomatarotarotaka.

Qo e dua na ivakaraitaki ni ka e rawa ni veivosakitaka kei taukeinivale e dua na iVakadinadina i Jiova. Kaya mada e gole yani ina vale nei Amania o Metui e dua na iVakadinadina.

Ena Totogitaki Ira na Tamata ca na Kalou?

Metui: Au marau ni daru sota tale Amania.

Amania: Au marau tale ga ni daru sota.

Metui: Au se vakasamataka tiko ga e dua na ka o tukuna ena gauna au gole mai kina e liu.

Amania: Na cava ya?

Metui: O tukuna ni o kurabui sara ga ena gauna o rogoca kina nira sega ni vakabauta na kama i eli na iVakadinadina i Jiova.

Amania: Io, au kurabuitaka sara ga. Meu tukuna na ka dina, e dredre meu ciqoma na nomuni sega ni vakabauta na kama i eli.

Metui: Au marautaka ni o tukuna mai vakadodonu. Au dau taleitaka tale ga meu rogoca na nodra nanuma eso tale. Me vaka ni levu na ka era tukuna na tamata me baleta na ivakavuvuli ni kama i eli, ia vakacava o iko na cava o vakabauta?

Amania: Ahh . . . na ka mada ga au dau vakabauta nira na lako i eli na tamata ca ena gauna era mate kina, era na lai vakararawataki tu ekea me tawamudu.

Metui: Levu era vakabauta tale ga qori. Meu tarogi iko mada, o sa bau sotava eso na ka ca ena nomu bula?

Amania: Io. A labati o ganequ ena lima na yabaki sa oti.

Metui: Isa vosoti au sara. Dua mada ga na ka nomu dau nanumi koya.

Amania: Io. Au dau nanumi koya e veisiga.

Metui: Au kila ni vuna levu era vakabauta kina eso na kama i eli baleta nira rarawataka na ka era cakava na tamata ca. O ira tale ga e caka vei ira na ka ca era vinakata mera vakararawataki o ira na tamata ca me isau ni ka era cakava.

Amania: Dina sara ga! Au vinakata sara ga me saumi tale vua na turaga a labati ganequ na ka a cakava ena neitou vuvale.

Metui: E sega ni cala na rai qori. E tukuna na iVolatabu ni cudru tale ga na Kalou ena gauna e caka kina na ka ca vei ira na sega ni cala—e yalataka tale ga ni na totogitaki ira na tamata ca. Dikeva mada na ka e tukuni qo ena Aisea 3:11: “Ena ca ko ira na tamata ca! Ena yaco ga vua na ca: na ka sa cakava na ligana ena caka talega vua.” Eda nuidei gona ni na totogitaki ira dina na tamata ca na Kalou.

Amania: Ia e rawa vakacava qori ke sega na kama i eli?

Metui: Taro vinaka qori. Na kena isau ga oya ni na totogitaki ira na tamata ca na Kalou ena rusa tawamudu. Dikeva mada na ka e tukuni ena 2 Cesalonaika 1:9. Kerekere, o rawa ni wilika mada mai vei kedaru?

Amania: Sa donu. E tukuna: “O ira sara ga qo, ena nodra sa lewai mera rusa tawamudu, era na kau tani mai na mata ni Turaga.”

Metui: Sa qai raica rawa Amania ni sega na nodra inuinui na tamata ca, baleta ni sa totogitaki ira na Kalou mera mate vakadua. Sa sega na nodra inuinui me baleta na gauna se bera mai.

Amania: Au taura rawa na tikina qori, ia e vaka me sega ni donu toka. Eda na mate kece. E dodonu sara ga mera vakararawataki vakalevu na tamata ca, se vakacava?

Cava e Okati ena Lewadodonu?

Metui: Au raica rawa ni o dau kauaitaka na lewadodonu.

Amania: Io, au dau kauaitaka sara ga.

Metui: Vinaka sara ga qori. Ni a buli keda ga na Kalou meda vakaduiduitaka na ka dodonu kei na ka ca, e dau kauaitaka tale ga vakabibi na ka dodonu. Ia nira vakavuvulitaka na iliuliu ni lotu ni dau veitotogitaki na Kalou ena kama i eli, era sa tukuna sara tiko ga ni tawayalododonu na Kalou.

Amania: Ah? Au sega ni tara rawa na ka o tukuna tiko.

Metui: Meu tukuna mada vei iko e dua na ivakaraitaki. Au kila ni matata tiko vei iko na italanoa me baleti Atama kei Ivi.

Amania: Io. A tukuna vei rau na Kalou me rau kua ni kania na vuanikau vakatabui, ia erau a talaidredre.

Metui: Donu. Daru raica mada na ka e tukuna na iVolatabu me baleta na italanoa qo. E tiko ena Vakatekivu 2:16, 17. E tukuni kina: “A sa vakarota na tamata na Kalou ko Jiova, ka kaya, E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.” Na cava gona a tukuna na Kalou ni na yaco vei Atama ke kania na vuanikau vakatabui?

Amania: E tukuna ni na mate o Atama.

Metui: Io. Vakasamataka mada: Ena vuku ni nona ivalavala ca o Atama, a vakavuna kina me sucu ivalavala ca na kawatamata.a Ia e bau tukuna e keri na Kalou e dua na ka me baleta na veitotogitaki ena kama i eli?

Amania: Sega.

Metui: Ia ke leqataki ni rau na vakararawataki me tawamudu o Atama kei Ivi, e dodonu ga me na vakasalataki rau rawa e liu na Kalou, se cava? Ke cakava qori ena vakaraitaka ni dau lewadodonu qai yalololoma.

Amania: Io, au duavata kina.

Metui: Vakasamataka tale ga na ka e qai tukuna na Kalou vei Atama kei Ivi ni rau sa valavala ca. Kerea ke o rawa ni wilika mai na Vakatekivu 3:19?

Amania: OK. E tukuni kina: “E na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.”

Metui: Vinaka. Na cava e tukuna e keri na Kalou me baleta na vanua ena lako kina o Atama ni sa mate?

Amania: E tukuna na Kalou ni o Atama ena suka tale ena kuvu ni qele.

Metui: Qori sara ga. Kaya mada ke tukuni me lesu e dua na tamata ina dua na vanua, e macala ga ni a tiko mai kina e liu, se vakaevei?

Amania: Ka dina.

Metui: E vei gona na vanua a tu mai kina o Atama ni bera ni buli koya na Kalou?

Amania: Sega ni dua na vanua.

Metui: Io. O na raica tale ga ni lewa e tauca na Kalou e sega ni tukuna kina e dua na ka me baleta na kama i eli. Ena donu beka ke tukuna na Kalou vei Atama ni na lesu tale ina qele a buli mai kina, ia kena dina ni na lai kama i eli?

Amania: Sega, au vakabauta ni na sega ni donu oya.

E Tokona Beka na Tevoro na iNaki ni Kalou?

Metui: E vinaka me daru raica tale mada e dua na tikina me baleta na ivakavuvuli ni kama i eli.

Amania: Na cava ya?

Metui: O cei era tukuna e levu ni na “liutaka” na veivakamai i eli? O cei ena veitotogitaki ena vanua qori?

Amania: Na Tevoro.

Metui: Ia na Tevoro e meca naba dua ni Kalou. Ke biuti ira na tamata na Kalou mera lai kama i eli me vakararawataki ira na Tevoro, ena vakaraitaka qori ni rau cakacaka vata na Kalou kei na Tevoro, se vakacava?

Amania: Umm. Au sega ni bau vakasamataka tu va qori.

Metui: Dua na kena ivakaraitaki qo​—o iko e dua na tama, se vakaevei?

Amania: Io, dua tiko na luvequ tagane. Se qai yabaki 15 qo.

Metui: Kaya mada ke dau talaidredre vakalevu o luvemu. E cakava e levu na ka ca qai vakararawataki iko sara ga. Na cava o na cakava?

Amania: Au na saga meu vakadodonutaki koya.

Metui: Io, au kila ni o na sasaga tiko ga mo veisautaka na nona ivakarau ni bula.

Amania: Io au na cakava sara ga qori.

Metui: Kaya mada ke sega ni via rogoca na ka o tukuna vua, dina ga ni o solia kina nomu vinaka kece. Yaco na gauna mo sega ni cakava rawa kina e dua na ka, sa na vinaka ga mo totogitaki koya, se vakacava?

Amania: Io.

Metui: Ia vakacava ke o kila ni dua na tamata ca e vakamuai luvemu tiko, e vakavulici koya tale ga ena ka ca e dau vakayacora, na cava o na cakava?

Amania: Au na cudruva sara ga na tamata qori.

Metui: Ia tukuna mada mai nomu nanuma ena tikina qo. Na nomu kila ni vakamuai luvemu tiko ina ca e dua na tamata ca qai dukadukali nona itovo, o na kerei koya tale na turaga qori me totogitaki luvemu?

Amania: Sega, qori e sega sara ga ni vakaibalebale.

Metui: Koya gona, ena sega tale ga ni vakaibalebale ke kerea na Kalou vei Setani na Tevoro​—o koya sara ga e vakamuai ira tiko na tamata ca—me totogitaki ira tale, se vakaevei?

Amania: Io.

Metui: Ena tikina qori, ke vinakata na Kalou mera totogitaki na tamata ca, na cava ena muria kina na Tevoro​—meca levu ni Kalou​—na ka e vinakata na Kalou qai vakararawataki ira?

Amania: Au sega sara ga ni bau vakasamataka tu va qori!

Ena Vakaotia o Jiova na Veika ca Kece

Metui: Ia kua ni lomaleqa. Na Kalou ena yavala me vakarusai ira na tamata ca era sega ni veivutuni. De dua ena vinaka me daru raica tale mada na iotioti ni tikinivolatabu ena vakamatatataka na tikina qo. Na Same 37:9. Kerekere wilika mada mai vei kedaru.

Amania: Sa donu, e tukuna: “Ni na muduki tani na daucaka ca; ia ko ira sa dauwaraki Jiova, era na taukena na vanua.”

Metui: Vinaka. O raica rawa na ka ena cakava na Kalou vei ira na tamata ca?

Amania: E tukuni ena tikina qo ni na muduki ira tani na Kalou.

Metui: Dina sara ga. Kena ibalebale qori ni na vakarusai ira sara ga vakadua. Ia o ira na tamata vinaka​—o “ira sa dauwaraki Jiova”​—era na marautaka na nodra bula tawamudu e vuravura. E macala ga ni o na lomatarotarotaka kina eso na ka. Kena ivakaraitaki, na cava e sega ni tarovi ira kina na tamata ena imatai ni gauna na Kalou mera kua ni caka ca? Ke vinakata dina me totogitaki ira na tamata ca, na cava e se bera ni cakava kina?

Amania: Taro vinaka qori.

Metui: De dua au na qai vakaraitaka vei iko na kedra isau vakaivolatabu ena gauna daru na qai veitalanoa tale kina.b

Amania: Au na taleitaka sara ga qori.

[iVakamacala e ra]

[iYaloyalo ena tabana e 12]