Na Kaukaua ni Vosa ni Kalou ena Vuvale Lotu Idu

Talanoataka o Nalini Govindsamy

AU NA sega vakadua ni guilecava na neitou katalau vakavuvale ena dua na mataka ni Moniti, ika22 ni Okosita, 2005. E ririkotaki na noqu bula baleta ni tubu tiko ga e dua na ka ena noqu mona. A masu o Krishna na watiqu, oti au mani vosa vei ratou na lewenivuvale kece.

Au tukuna vei ratou: “Au sa na gole qo i valenibula me lai caka vei au e dua na veisele levu, mo dou tu vakarau ke mani yaco e dua na ka. Keu mani mate, au sa tuvanaka rawa tu na ka me na caka ena gauna ni veibulu. Vei kemudou sa qaravi Jiova tiko, au kerea mo dou yalodina tiko ga. Ia vei kemudou na kena vo, au kerea mo dou vulica na iVolatabu, dou lako tale ga ena soqoni vaKarisito. Ke dou cakava qori, dou na vakabauta kina na ka au nuitaka tu me baleta e dua na vuravura vou sa voleka mai, na vuravura parataisi era na bula uasivi kina me tawamudu na dausokalou dina ni Kalou.”

Ni bera niu vakamacalataka na ka e qai yaco niu sa sele oti, au via talanoataka mada na vanua au susu mai kina kei na sala au mai kila kina na Kalou dina.

Susu ena Lotu Idu

Keitou vakaitikotiko ena dua na vale kava levu qai toka ena dua na delana ena siti o Durban e toka e baravi, e Sauca Aferika. Me keitou yaco ena matamata ni neitou vale, keitou dau cabeta rawa e liu e 125 na ikabakaba me tekivu mai na gaunisala levu. E yaco sara na ikabakaba qori ena dua na sala raba lailai veico, sega ni dede o sa na yaco yani ena dua na matamata kaukamea. Ena dua na yasa ni matamata qori e toka kina na nona valenilotu o buqu, e levu kina na itaba kei na matakau ni nodra kalou na Idu. E tukuna o buqu niu “gone ni valenilotu” (mandir kī baccā, kena vakaIdia), baleta na kalou keitou qarava e vakavuna na noqu sucu. E toka veibasai ga na valenilotu qori e dua na ikabakaba damudamu, e yaco sara ena mata ni neitou vale. E vale levu na neitou vale, e dua tu na kena pasese balavu e loma ni vale, dua na valenikuro levu e tiko na kena matadravu, vitu na rumu ni moce, qai sema e dua tale na rumu ena yasa ni vale. Keitou le 27 na tiko kina, wili kina o buqu kei tukaqu, tamaqu kei na nona vuvale, tolu na tacina tagane kei na nodratou dui vuvale, wili kina o ganena gone duadua kei na nona vuvale.

E sega ni rawarawa na qaravi ni dua na vuvale levu va qo. Ia na ivakarau ni bula qori e vakavolekatitaki keitou, e levu tale ga na ka marautaki keitou vakila kina. O ratou na va na yalewa vakawati mai na vuvale qo, wili kina na tinaqu, o Gargee Devi, e dui tu na itavi eratou lesi kina e vale me ratou qarava. E tiko na gauna me ratou dau vakasaqa qai sasamaki kina. E ulunivuvale o tukaqu qai dau vakarautaka na kakana me baleta na vuvale kece. Ena veisiga Vukelulu erau dau gole ina makete o buqu kei tukaqu me rau lai volia mai na lewenimanumanu, vuanikau kei na kakana draudrau. Keitou dau waraki rau tu ena ruku ni dua na vu ni paini levu e toka ena yasa ni baba qai rai sobu tu ena buca. Na gauna ga keitou raica kina ni rau sobu mai ena basi kei na nodrau basikete lelevu, keitou na cici sobu sara ena ikabakaba e 125 me keitou lai veivuke ena kau mai na iyaya e vale.

E dua na vuniniusawa balavu e tiko ena neitou iteitei, era dau vakasova kina na maina. Era dau veivukayaki voli kina, ra qai dau vakasosa. E dau dabe o buqu ena ikabakaba e toka ena mata ni katuba qai dau talanoa, e vaka ga me vakadewataka tiko vei keitou na ka era tukuna tiko na maina. Au se nanuma vinaka toka ga eso na gauna vinaka ena vale qo! So na gauna keitou dau veidredrevaki, keitou tagi, keitou cakava vata na ka​—keitou marautaka na neitou bula vata ena dua na vuvale levu. O koya e bibi sara ni qo sara ga na vanua keitou tekivu vulici Jiova kina na Dauveibuli, kei na Luvena o Jisu Karisito.

Levu na ka keitou dau cakava ena lotu Idu ni bera ni keitou mai vulica na veika me baleti Jiova. E levu na gauna keitou dau solevutaka tale ga eso na soqo lelevu, keitou na sureti ira eso na vulagi me keimami mai sokaloutaka na duidui kalou kei ira na kalou yalewa. Ena so na gauna ni soqo va qori, e dau sega ni vakilai koya o buqu qai dau veivosaki kei ira na yalo, ia ena tinikarua na kaloko ena bogilevu, ena cabori kina na manumanu me vakamarautaki ira. E kilai levu tale ga o tukaqu ena neitou yasayasa ni dau cau ena kena tara kei na cicivaki ni koronivuli, wili kina na nodra valenilotu na Idu.

Keitou Kunea Vakacava na ka Dina me Baleti Jiova?

A tauvimate o tukaqu ena 1972, mani mate sara. Ena vica na vula tarava, e rua na iVakadinadina i Jiova rau a solia vei noqu na lailai o Indervathey​—e kilai tale ga me o Jane​—na mekesini na Vale ni Vakatawa kei na Yadra! E ora voli na lomana ni a sega ni sureti rau e lomanivale me ratou veitalanoa. Keitou dau sega ni ciqomi ira na iVakadinadina. Ia ena dua tale na gauna rau veisiko mai kina, a sureti rau sara i vale o noqu na lailai qai tukuna vei rau e dua na leqa e sotava tiko ena nona bula vakawati, oya na nona dau gunu sivia o noqu ta lailai. O ira na weka kei ira era tiko veitikivi era dau uqeti noqu na lailai me rau veisere. Erau vakamacalataka na iVakadinadina na rai ni Kalou me baleta na vakawati. (Maciu 19:6) E tarai noqu na lailai sara ga na ivakasala vakaivolatabu e rogoca kei na ka e yalataka tu me baleta na bula vinaka ena vakilai ena vuravura qo.a Mani vakatulewataka me kua ni sereki watina. Sa tekivu tale ga me vulica vakawasoma na iVolatabu kei ira na iVakadinadina. Na vuli e dau caka e lomanivale, ena gauna ni vuli eratou dau vakarorogo tale ga mai na nodratou dui rumu o ratou na vo ni yalewa.

Toso na gauna, eratou sa tiko tale ga ena gauna ni vuli iVolatabu o iratou na yalewa qori. E dau wasea vei keitou o na lailai Jane na veika e sa vulica, e dau wilika qai vakamacalataka vei keitou na italanoa mai na ivola na Vakarorogo Tiko ki Vua na Qasenivuli Levu.b Eratou sa kila kece na noqu ta lailai ni ratou sa vuli iVolatabu tiko na dui watidratou, ratou mani veitusaqati. Dua vei ratou noqu ta lailai a vakama kece na neitou ivola, okati kina na iVolatabu. Eratou vosa vakacacataki keitou qai vakayacora eso na ivalavala kaukaua baleta keitou dau gole ena soqoni. Ia o tamaqu a sega ni vakaraitaka na ivakarau ni rai qori, e sega ni tusaqati keitou ena neitou vulica na veika me baleti Jiova. Eratou tomana tiko ga na veikaruani yalewa qori na nodratou dau gole ina soqoni, sa qai titobu tiko ga na nodratou lomana na Kalou o Jiova.

Ena 1974, a papitaiso me dua na iVakadinadina i Jiova o na lailai Jane, sega ni dede sa papitaiso tale ga o tinaqu kei ratou na vo ni yalewa. Ni toso na gauna sa sega tale ni qai lotu Idu o buqu. Au dau veitomani tu ga ina soqoni vaKarisito me vica vata na yabaki. Ena dua na soqo ni tikina ni iVakadinadina i Jiova, a qai tarogi au o Shameela Rampersad e dua na iVakadinadina, “Gauna cava o na qai papitaiso kina?” Au tukuna vua: “E sega ni rawa niu papitaiso baleta e sega ni dua e vakavulici au ena iVolatabu.” A mani tukuna me vakavulici au. Au mani papitaiso ena soqo ni tikina e tarava, ena Tiseba 16, 1977. Mai na 27 na lewe ni neitou vuvale, e le 18 sa papitaiso. Ia ena gauna au sele kina, e se lotu Idu tiko ga na tamaqu o Sonny Deva.

“Kua ni Lomaocaocataka e Dua na Ka”

E vukei au sara vakalevu na ka e tukuni ena Filipai 4:6, 7, vakabibi ni sa laurai ni tubu tiko e dua na ka ena noqu mona. E kaya na tikinivolatabu ya: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka; ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” E dredre dina meda kua ni “lomaocaocataka e dua na ka,” vakabibi ke tukuni ni o na mate ena dua ga na gauna lekaleka. Au tagi, ia au qai masuti Jiova. Me tekivu mai na gauna oya, au vakila “na vakacegu ni Kalou e uasivia na vakasama kece.”

E vaka ga ni taura na ligaqu imatau na Kalou o Jiova, au qai vakila ni tuberi au ena sala meu lakova. (Aisea 41:13) E vukei au meu vakamacalataka ena doudou vua na vuniwai na ka au sa vakatulewataka me baleta noqu talairawarawa ena ivakaro vakaivolatabu me kua ni vakayagataki na dra. (Cakacaka 15:28, 29) E mani vakadonuya o koya na dauveisele kei na vuniwai e dau veivakamoceri me kua ni vakayagataki na dra. A qai vakamacalataka na dauveisele ni a vakayacori vinaka na veisele, sa kau tani tale ga na ka e tubu tiko ena noqu mona. E tukuna tale ga ni se sega ni bau raica e dua me vakayacori vua na veisele levu va qo me bulabula totolo.

Ena tolu na macawa tarava, au vakayacora e dua na vuli iVolatabu mai na noqu idavodavo e vale. Ni oti e vitu na macawa, au sa tekivu draiva tale, lako ena cakacaka vakavunau, tiko tale ga ena nodra soqoni na iVakadinadina i Jiova. Au vakavinavinakataka na nodra veivuke na taciqu lotu vaKarisito ena nodra tokoni au ena cakacaka vakaitalatala. Era vakadeitaka ni na tiko e dua me keirau veitomani ena veigauna kece, meu na lesu tale ga vakavinaka i vale. Au vakabauta ni noqu dau vakarogoca na katokatoni ni iVolatabu kei na noqu raica vakabibi na veika vakayalo e vukea tale ga noqu bulabula totolo.

E dua na ka na noqu marau ni oti ga noqu sele, a vakadonuya o tamaqu me vulica na iVolatabu kei ira na iVakadinadina. A papitaiso ni sa yabaki 73, e se qaravi Jiova tiko ga ena yalodina nikua. Era sa mai duavata kei keitou ena sokalou vei Jiova e sivia na le 40 na wekaqu. Dina ga ni sa leqa na mataqu imawi, biu tale tu ga e uluqu na kaukamea e vakatokai na cranio fix, ia au vakanamata ena gauna sa na “vakavoutaka na ka kece” na Kalou o Jiova ena vuravura vou Parataisi.​—Vakatakila 21:3-5.

Au vakalougatataki ni dua na watiqu dauloloma, e veiqaravi tiko vaqase ni ivavakoso vaKarisito ena gauna qo kei na dua na luvequ yalewa totoka o Clerista, e dau tokoni au ena noqu cakacaka vakaitalatala vakatabakidua. E vakalougatataka dina vakalevu na Kalou o Jiova na noqu cakacaka vakaitalatala. Au sa vukei ira tale ga e levu na noqu vuli iVolatabu mera vakila tale ga na kaukaua ni Vosa ni Kalou ena nodra bula. Sa sivia qo e 30 era sa yalataki ira vua na Kalou, era sa papitaiso tale ga.

Au nuidei tu ni na yaco na gauna ena vakabulai keda na Kalou o Jiova mai na ituvaki rarawataki qo, qai liutaki keda ina vuravura parataisi.

[iVakamacala e ra]

[iYaloyalo ena tabana e 9]

[iYaloyalo ena tabana e 10]

Keveti au tiko o Tinaqu

[iYaloyalo ena tabana e 10]

Neitou vale

[iYaloyalo ena tabana e 10]

Volekata na ikabakaba e 125

[iYaloyalo ena tabana e 11]

Keirau vakaveiwatini (imawi), luvequ yalewa, kei rau noqu itubutubu