Nodra Vakacegui na Vakasagai (Wase 4)

1-2. (a) Eda kila vakacava nida vinakata meda vakacegui, eda rawa tale ga ni veivakacegui? Tukuna e dua na ivakaraitaki. (b) Na ituvaki cava era sotava eso na gone?

EDA vinakata kece meda vakacegui, e rawa tale ga nida dau veivakacegui. Kena ivakaraitaki, ni lutu e dua na gone ni qito tiko qai drakusi na duruna, de dua ena tagi ni cici vei Ta se o Na. Erau na sega ni rawa ni cakava me mavo vakasauri na drakusi, e rawa ga ni rau vakacegui luvedrau. De dua rau na reguci koya, taroga se cava e yaco, qusia na wainimatana, tukuna eso na vosa ni veivakamenemenei, rau boroya tale ga na wainimate ena mavoa se vadretitaka. Mai oti yani nona tagi o gone, de dua ena lai qito tale. Toso na gauna sa na qai mavo na mavoa qori.

² Ena so na ituvaki, e ca sara na ka era sotava na gone. Eso era vaqaseni se vakasagai. E rairai caka ga vakadua vei ira, se vica vata na yabaki. E macala ni na rarawa tiko ga o gone. Eso na dau veivakasagai era kilai ra qai totogitaki. Eso tale e vaka mera sega ni lewai. Ke mani totogitaki mada ga o koya e veivakasagai, ena rawa ni vakila tiko ga o gone na revurevu ni ka e yaco ni lai uabula.

3. Me vaka e tukuni ena 2 Korinica 1:3, 4, na cava e vinakata o Jiova? Na taro cava eda na dikeva?

³ Ke vakasagai e dua na lotu vaKarisito ni se gone qai rarawa tiko ga ni sa uabula, ena vukei vakacava? (Wilika 2 Korinica 1:3, 4.) E vinakata o Jiova mera lomani na nona sipi, mera vakacegui tale ga. Meda dikeva gona e tolu na taro: (1) Na cava era na rairai vinakata kina o ira na vakasagai mera vakacegui? (2) O cei e rawa ni vakacegui ira? (3) Eda na veivakacegui vakacava?

VUNA E BIBI KINA NA VEIVAKACEGUI

4-5. (a) Na cava meda kila kina nira duidui na gone vei ira na uabula? (b) Ni vakasagai e dua na gone, ena vakaleqa vakacava nona veinuitaki?

⁴ Ena rairai vinakati tiko ga mera vakacegui eso na uabula era vakasagai nira se gone, ke sa oti mada ga e vica vata na yabaki. Na vuna? Ena matata na kena isau ke da kila tiko nira duidui sara na gone vei ira na uabula. E duidui nodra rai na gone nira vakasagai ni vakatauvatani kei ira na uabula nira vakalolomataki. Dikeva mada eso na vuna e veivakaleqai kina nodra vakasagai na gone.

⁵ Dodonu mera veivolekati na gone kei ira na veisusu, mera nuitaki ira tale ga. Na veiwekani qori e vakanuideitaki gone, ena nuitaki ira tale ga na lomani koya. (Same 22:9) Ka ni rarawa ni levu na gone era vakasagai sara ga ena vale era tiko kina. Levu na gauna era veivakasagai na lewenivuvale se itokani ni vuvale. Ni caka qori vua na gone, ena dredre me nuitaka eso tale me vica vata na yabaki.

6. Na cava e veivakalolomataki kina na veivakasagai?

⁶ E rawarawa sara nodra vakasagai na gone, e veivakalolomataki. Nira vakasaurarataki na gone ena ivakarau ni veiyacovi, ena vakaleqa sara ga nodra bula. Na vuna? Nira se sega ni yacova na gone na yabaki ni bula ni vakawati mera veiyacovi kina, se sega tale ga ni matua nodra vakasama kei na lomadra ena ka e vauci kina. Ni vakasagai na gone, ena rawa ni beci koya, cala nona rai me baleta na veiyacovi, ena sega tale ga ni veinuitaki.

7. (a) Na cava ena rawarawa kina vua na dau veivakasagai me vakacala e dua na gone, e cakava vakacava qori? (b) E veivakaleqai vakacava na lasu qori?

⁷ Era se sega ni yalomatua na gone mera vakatulewa vinaka se yawaka na leqa. (1 Kor. 13:11) E rawarawa gona vei ira na dau veivakasagai mera vakacalai ira na gone qai vakasagai ira. E rerevaki na lasu era tukuna vei ira na gone. Kena ivakaraitaki, era tukuna ni bale ga vei ira na nodra vakasagai, mera kua ni tukuna na ka e yaco, ke ra mani tukuna, era na sega ni rogoci se kauaitaki. Era kaya tale ga ni nodra veiyacovi na uabula kei na gone e vakaraitaka ga nodra veilomani. Ena taura toka e vica vata na yabaki mera qai kila na gone ni qori e lasu kece. Ni tubucake na gonetagane se goneyalewa lailai qori, ena rairai yalolailai, e nanuma ni sa vakaleqai nona veiwekani kei na Kalou kei na so tale, qai sega ni ganiti koya me lomani se vakacegui.

8. Na cava eda nuidei kina ni o Jiova ena vakacegui ira na rarawa?

⁸ E macala gona ni na taura toka e vica vata na yabaki na revurevu ni veivakasagai. E torosobu dina na itovo ca qo! Na takalevu ni veivakasagai e dusia ga nida sa bula tiko ena iotioti ni veisiga, e levu ena “yali vei ira na veilomani vakaveiwekani,” o ira tale ga na “daucaka ca kei ira na dauveidabui era na qai torosobu ga.” (2 Tim. 3:1-5, 13) E torosobu dina na ilawaki nei Setani, e rarawataki gona ni levu era vakamarautaka na Tevoro ena nodra itovo. Ia e kaukaua sara o Jiova vei Setani kei ira na nona ito. E sega ni vunitaki vua na ilawaki nei Setani. Eda nuidei ni kila vinaka o Jiova na levu ni noda rarawa, e rawa tale ga ni vakacegui keda. Eda marau nida qarava “na Kalou e dau vakacegui keda ena ka kece, e vakacegui keda ena veika dredre kece eda sotava, meda vakacegui ira kina era sotava na veimataqali ituvaki dredre ena vakacegu vata ga e vakacegui keda kina na Kalou.” (2 Kor. 1:3, 4) O cei e vakayagataka o Jiova mera veivakacegui?

O CEI ME VEIVAKACEGUI?

9. Me vaka e tukuna o Tui Tevita ena Same 27:10, na cava ena cakava o Jiova vei ira na vakawaleni ena nodra vuvale?

⁹ E bibi dina mera vakacegui o ira na vakasagai ni vakawaleni ira na nodra itubutubu, se a vakasagai ira e dua era veivolekati. E kila na daunisame o Tevita ni o Jiova e ivurevure nuitaki duadua ni veivakacegui. (Wilika Same 27:10.) E nuidei tale ga ni o Jiova e Tamadra na vakalolomataki ena nodra vuvale. Ena sala cava? E vakayagataki ira nona dausokalou yalodina. O ira na tacida era qaravi Jiova era noda vuvale vakayalo. Kena ivakaraitaki, e kaya o Jisu ni o ira na muri koya mera qaravi Jiova era tacina, ganena, tinana tale ga.—Maciu 12:48-50.

10. Na cava e tukuna na yapositolo o Paula me baleta nona itavi vaqase?

¹⁰ Dikeva e dua na ivakaraitaki e vaka kina na vuvale na ivavakoso vaKarisito. E qase gugumatua na yapositolo o Paula, e turaga yalodina. E ivakaraitaki vinaka, e uqeti tale ga vakalou me tukuna mera vakatotomuri koya eso tale me vaka nona vakatotomuri Karisito. (1 Kor. 11:1) Dikeva mada na ka e tukuna o Paula me baleta nona itavi vaqase: “Keitou yalovinaka ena kemuni maliwa me vaka na tina se qai vakasucu vou e karona vakayalololoma na luvena.” (1 Ces. 2:7) O ira tale ga na qase nikua era na vosa vakayalovinaka nira vakayagataka na iVolatabu mera vakacegui na rarawa.

11. Eda kila vakacava ni sega ni nodra itavi ga na qase mera veivakacegui?

¹¹ Vakacava mera vakacegui ira ga na vakasagai o ira na qase? Sega. E noda itavi kece meda “veivakacegui tiko ga.” (1 Ces. 4:18) Rawa nira veivakayaloqaqataki na tacida yalewa matua vei ira na yalolailai. Sa rauta me vakatauvatani koya o Jiova kei na tina e vakaceguya na luvena tagane. (Aisea 66:13) E tu ena iVolatabu na nodra ivakaraitaki na yalewa era vakacegui ira na rarawa. (Jope 42:11) Dua na ka nona marau o Jiova ni raici ira na yalewa lotu vaKarisito nikua nira vakacegui ira na tacida yalewa era rarawa voli! Ena so na ituvaki, e dua se rua na qase erau na kerea lo e dua na tacida yalewa matua me vukea na tacida yalewa e rarawa.b

MEDA VEIVAKACEGUI VAKACAVA?

12. Na cava eda na qarauna?

¹² Nida vukea e dua na tacida, eda na qarauna meda kua ni siova na ka e sega ni via veitalanoataka. (1 Ces. 4:11) Ia vakacava o ira mera vukei, kei ira na vinakata mera vakacegui? Meda dikeva mada e lima na sala e yavutaki vakaivolatabu meda veivakacegui kina.

13. Me vaka e tukuni ena 1 Tui 19:5-8, na cava e cakava vei Ilaija na agilosi i Jiova? Meda vakatotomuria vakacava?

¹³ Cakava eso na ka mo veivuke kina. Ni dro tiko o Ilaija me bula, e yalolailai sara ga qai vinakata me mate. E mani tala o Jiova e dua nona agilosi kaukaua me veivuke. E yaga sara ga vei Ilaija na ka e cakava na agilosi. E vakarautaka na kakana e katakata vinaka qai uqeti koya me kana. (Wilika 1 Tui 19:5-8.) Dua na ka dina eda vulica ena ivakaraitaki qo, oya ni dau yaga vakalevu na ka lalai eda cakava meda veivuke kina. De dua meda vakarautaka e dua na kakana, dua na iloloma lailai, volavola se qiri meda vakayaloqaqataka na tacida e yalolailai. Nida cakava qori, eda vakadeitaka vua noda loloma kei na kauai. Eda rawa ni cakava eso na ka lalai va qori ke dredre meda veitalanoataka na ituvaki mosimosi e sotava.

14. Na cava eda vulica ena italanoa kei Ilaija?

¹⁴ Mera nuidei, lomavakacegu tale ga. Dua tale na ka eda vulica ena italanoa kei Ilaija. E vakaukauataka vakacakamana na parofita qo o Jiova me taubale vakayawa sara i Ulu i Orepi. Ena rairai nuidei sara ga o Ilaija ni yaco e kea, ni a veiyalayalati kina o Jiova kei ira nona tamata ena vica na senitiuri e liu. De dua ena lomavakacegu sara ga ni sa yawaki ira na via vakamatei koya. Na cava eda vulica? Ke da via vakacegui ira na vakasagai, e bibi meda vukei ira mada mera nuidei. Kena ivakaraitaki, mera nanuma tiko na qase ni na rairai nuidei qai lomavakacegu na tacida yalewa e yalolailai ke ratou veivosaki ga e vale, sega ni Vale ni Soqoni. E dua tale na tacida ena rairai vinakata na kena veibasai.

15-16. Na cava na ibalebale ni vakarorogo vinaka?

¹⁵ Dau vakarorogo vinaka. E matata na ivakasala vakaivolatabu qo: “Me totolo ni vakarorogo na tamata yadua, me berabera ni vosa.” (Jeme. 1:19) Vakacava o dau vakarorogo vinaka? Eda na rairai nanuma ni kena ibalebale meda galu qai raici koya e vosa tiko. Ia e levu tale na ka e vauci kina. Kena ivakaraitaki, e vakarorogo vinaka o Jiova ni talaucaka o Ilaija na nona rarawa. E kila ni rere o Ilaija, e galili, e nanuma tale ga ni tawayaga kece na nona cakacaka. E kauaitaka yadua o Jiova na ka e leqataka o Ilaija. E macala gona ni a rogoci Ilaija vinaka.—1 Tui 19:9-11, 15-18.

¹⁶ Nida rogoci koya tiko na tacida, eda na vakaraitaka vakacava nida lomani koya, nida kauai tale ga? Vakasamataka vinaka qai tukuna eso na ka me kila kina na ivakarau ni lomamu. O rawa ni kaya: “Au rarawataka sara ga na ka e yaco! Sega ni dodonu me caka qori vua e dua na gone!” De dua mo taroga e dua se rua na taro mo vakadeitaka na ibalebale ni ka e tukuna tiko. O rawa ni taroga, “Vosota, o rawa ni vakamacalataka na ka o via tukuna tiko?” Se “Kena ibalebale o kaya tiko ni o . . . se cava o vakaibalebaletaka?” Ni o vosa vakayalovinaka, e rawa ni vakadeitaka vua ni o vakarorogo tiko, o saga tale ga mo kila na lomana.—1 Kor. 13:4, 7.

17. Na cava meda vosovoso kina, meda “berabera [tale ga] ni vosa”?

¹⁷ Mo “berabera ni vosa.” Kua ni vosa takoso mo veivakasalataki se mo vakadodonutaka nona rai. Mo dau vosovoso! E rarawa vakalevu o Ilaija ni talaucaka na lomana vei Jiova, e qai vakaukauataka nona vakabauta o Jiova. Oti e talaucaka tale o Ilaija na lomana ni cavuta na veika vata ga a tukuna e liu. (1 Tui 19:9, 10, 13, 14) Na cava eda vulica? Eso na gauna era na talaucaka vakavica na lomadra o ira na rarawa tu. Meda vakarorogo vinaka gona me vakataki Jiova. Eda na sega ni saga meda walia na leqa, ia mera vakila nida lomani ira, eda kauai tale ga.—1 Pita 3:8.

18. Ena vakacegui ira vakacava na rarawa tu na noda masu?

¹⁸ Masu vata kei koya e rarawa. Ena rairai dredre vei ira na rarawa tu mera masu. De dua era nanuma ni sega ni ganiti ira mera masu vei Jiova. Ke da via veivakacegui, eda rawa ni masu vata kei ira, meda cavuta sara ga na yacadra. Eda rawa ni tukuna vei Jiova nida lomani koya e yalolailai, era lomani koya tale ga na lewe ni ivavakoso. Eda na rairai kerei Jiova me vakaceguya nona sipi mareqeti, me lomavakacegu kina. Na masu va qori e veivakacegui dina.—Jeme. 5:16.

19. Eda na vakarautaki keda vakacava meda veivakacegui?

¹⁹ Me veivakacegui noda vosa, me veivakabulai tale ga. Vakasama ni bera ni o vosa. E dau mosimosi na vosa e sega ni vakasamataki vinaka. Ia e veivakabulai na vosa vakayalovinaka. (Vkai. 12:18) Mo kerea gona vei Jiova mo vosa vakayalovinaka, veiuqeti, me veivakacegui tale ga. Nanuma tiko ni kaukaua sara na vosa i Jiova e volai tu ena iVolatabu.—Iper. 4:12.

20. Na cava era na rairai nanuma na tacida era vakasagai? Cava meda vakadeitaka vei ira?

²⁰ Era na rairai nanuma na tacida era vakasagai nira dukadukali, era tawayaga ra qai sega ni lomani. Qori e dua na lasu levu! Mo vakadeitaka gona vei ira ena iVolatabu nira talei sara ena mata i Jiova. (Raica na kato “Veivakacegui na iVolatabu.”) Vakasamataka nona vakayaloqaqataki Taniela e dua na agilosi ni yalolailai tu. E vinakata sara ga o Jiova me kila o Taniela ni mareqeti vakalevu. (Tani. 10:2, 11, 19) O Jiova e mareqeti ira tale ga na tacida era rarawa tu!

21. Na cava ena yacovi ira na sega ni veivutuni? Cava meda saga tiko ga?

²¹ Nida vakaceguya e dua, eda vakadeitaka vua ni lomani koya o Jiova. Meda kua tale ga ni guilecava ni o Jiova e Kalou lewadodonu. E sega ni vunitaki vua na ivakarau ca. E raica na ka kece, ena totogitaki ira dina na sega ni veivutunitaka nodra cala. (Tiko 14:18) Meda saga tiko ga ena noda vinaka kece meda vakaraitaka noda loloma vei ira na vakasagai. E veivakacegui tale ga meda kila ni o Jiova ena vakabulai ira kece e vakalolomataki ira o Setani kei na nona vuravura! Dua na gauna voleka qo, sa na sega tale ni nanumi na veika mosimosi qori.—Aisea 65:17.