Dua na iYaya Vou me Tauyavu Kina na Vuli iVolatabu!

¹ E duruvesi ni lotu Katolika e dua na marama ni Mereke. E dau tokona ena yalodina na ivakavuvuli ni lotu. Ni lako sara mada ga ina dua na ilakolako vakalotu ina Vatikani. Ia, ni sikovi koya yani e dua na iVakadinadina i Jiova ena nona vale, e ciqoma na nona sureti me vulica na iVolatabu. Na cava e vuna? Ni via vulica na iVolatabu me vaka ni sega ni dau caka na vuli iVolatabu ena nona lotu. A cava eda vulica ena ivakaraitaki oqo? Nida sega ni kila se o cei ena via vulica na iVolatabu.​—Dauv. 11:6.

² O dau tu vakasuka beka na tukuna vei ira na lewenivanua nida marautaka meda vakavulici ira ena iVolatabu ke ra taleitaka? Era kila beka o ira na vakaitikotiko volekati iko nida sureti ira kece mera vuli iVolatabu wale? Eda na vakadeitaka vakacava oqo? Ena kena vakayagataki na iyaya ni cakacaka vou! Na ivolacebaceba totoka e ono na taqana, e kena ulutaga Oni Via Kila Vinaka na iVolatabu? Meda dikeva mada na kena veiulutaga lalai.

³ “Na Cava me Wiliki Kina na iVolatabu?” Na vuna eda uqeti kina e vakamacalataka vakavinaka na ivolacebaceba. E vakamacalataka ni tu kina na “ivakasala momona ni Kalou dau loloma,” na ivalavala meda masuti koya kina me rawa ni vukei keda, kei na sala me noda kina na isolisoli ni bula tawamudu. (1 Ces. 2:13) E dusia na ivolacebaceba e so na “dina e veivakararamataki” e kune ena iVolatabu, me vaka na ka dina me baleta na ituvaki ni mate kei na vuna e levu tu kina na leqa ena vuravura. E kaya tale ga, ke da bulataka na “ivakavuvuli vakalou ena iVolatabu” ena vinaka kina na noda bula vakayago, eda na tamata mamarau, ena vakaraitaka vei keda na inuinui, eda na vakaitovotaka tale ga kina na veitovo vinaka e so. E dua tale na vuna vinaka e kaya na ivolacebaceba meda wilika kina na iVolatabu​—na parofisai era vakaraitaka na ka ena yaco mai muri, kei na ka sa voleka sara ga oqo me yaco.​—Vkta. 21:3, 4.

⁴ “Veivuke me Kilai Kina na iVolatabu”: E kaya na ivolacebaceba: “O keda kece eda gadreva meda vukei meda na kila kina na Vosa ni Kalou.” Sa qai vakamacalataka na sala ni noda veivakavulici mai na iVolatabu: “De vinaka me vulici ga vakalalai na iVolatabu, me tekivu ena so ga na ivakavuvuli rawarawa.” E vakamatatataka na ivolacebaceba ni “iVolatabu ga e yavu ni vuli,” ia e dusia tale ga na brochure na Loma ni Kalou ni rawa ni vukea na gonevuli me “vulica kina e levu na usutu vakaivolatabu.” E vakavure vakasama na taro ena ulutaga lailai e tarava.

⁵ “O Taleitaka Mo Vulica na iVolatabu e Veimacawa?” E tomana na ivolacebaceba ni kaya ni rawa ni tuvanaki na vuli iVolatabu ena gauna kei na vanua e ganiti gonevuli, ena nona vale se e rawa sara mada ga ni vuli ena talevoni. O cei e rawa ni tiko tale ga ena vuli oqo? E sauma vaka oqo na ivolacebaceba: “Nomu vuvale kece. Ke dua nomu itokani o via sureta e rawa tale ga ni tiko kina. Ke o vinakata, o rawa ni vuli duadua ga o iko.” Me vakacava na dede ni vuli? E tomana ni kaya: “Le levu era vakayagataka ga e dua na aua ena veimacawa mera vuli iVolatabu kina. Ke mani balavu se lekaleka ga na gauna ni nomu vuli e veimacawa, era na tu vakarau na iVakadinadina mera na vukei iko.” Oqo na tikina bibi! Nida tu vakarau meda veisautaka na noda ituvatuva me ganiti gonevuli.

⁶ “Neimami Veisureti”: E koto tale ga ena daku ni ivolacebaceba na vanua e rawa ni vola kina e dua e tataleitaki na nona kerea na brochure na Loma ni Kalou, se nona vinakata me sikovi me vakamacalataki vua na porokaramu ni vuli iVolatabu wale eda vakayacora tiko. E tabaki tale toka ga kina na Loma ni Kalou. E sega ni vakabekataki ni na uqeti ira na lomadina na ivolacebaceba oqo mera ciqoma na noda veisureti, se vakaevei? Ia, eda na vakayagataka vinaka vakacava na iyaya ni cakacaka vou oqo?

⁷ O Cei me Soli Vua? E rawa ni soli vakadodonu vei ira na lewenivanua se biu ena nodra vale ke lala nida lai vunau. E rawa nida solia ena cakacaka e veivale, ena salatu, se yalava ni bisinisi. Ke sega mada ga nira taleitaka na tamata mera taura na noda ivola e se rawa ga nida solia na ivolacebaceba oqo. E rawa tale ga nida solia vata kei na ivoladraudrau se na ivolatabaki tale e so. Vakacuruma vata kei na nomu ivola ni o volavola. E rawa ni o vakauta vei ira o vunau vei ira ena talevoni. Me dau tu ga vei iko na ivolacebaceba ena veigauna kece, ni o lai volivoli, vodo basi se vunau tawalokuci. Solia vei ira kece era gole yani i vale. Vei ira tale ga na wekamu, o ira era tiko tikivi iko, itokani vakacakacaka, icaba e koronivuli kei ira kece na nomu veikilai. Saga mo solia na ivolacebaceba vei ira kece o sotava! Na cava tale meda cakava?

⁸ Ke Vakaraitaka na Nona Tataleitaki: E so era na vakaraitaka ena tiki ni gauna sara ga drau veitalanoa kina na nodra taleitaka mera vuli iVolatabu. O koya gona, ni o cakacaka tiko vakavunau, me sa tiko rawa vei iko e rua na ilavelave ni brochure na Loma ni Kalou​—me dua me nona o gonevuli, me dua e nomu. Sa rawa ni o tekivutaka sara ga e kea na vuli, ke vakadonuya o koya e tataleitaki. Cega na imatai ni taqana qai wilika “Na iVakavakayagataki ni iVola Oqo.” Tekivu sara ena lesoni 1, mo vakaraitaka na icakacaka ni vuli. E rawarawa dina!

⁹ Ke Vinakata o Koya o Vosa Vua me sa Vakasamataka Mada: De vinaka me vakalailai ga mo sikovi koya tale. Ni drau sa sota, me sa tiko rawa vei iko na brochure na Loma ni Kalou. Vakaraitaka vua na lewenivola ena imatai ni taqana. Me digia ga o koya na ulutaga e taleitaka. Oya sara ga na lesoni mo drau veivosaki kina.

¹⁰ Lesuvi Ira na Taura na iVoladraudrau: Ke o a solia vata na ivolacebaceba kei na ivoladraudrau, o rawa ni vakayagataka na vakatutu oqo: “Ena nodaru a sota taumada, au a solia vei kemuni e dua Na Vale ni Vakatawa. Oni sa rairai raica beka ni ulutaga ni ivola Na Vale ni Vakatawa​—Kacivaka na Matanitu i Jiova. Nikua, au via vakamacalataka vei kemuni na Matanitu oqo kei na ka ena solia vei kemudou vakavuvale.” Qai cega na brochure na Loma ni Kalou ina lesoni 6. Tekivu wilika qai veivosakitaka kei itaukeinivale na imatai ni parakaravu, drau qai tomana me vakatau ena levu ni nona gauna. Vakaraitaka vua ni rawa ni o lesuvi koya ena dua tale na siga me lai vakacavari na lesoni.

¹¹ Me Kua ni Yali Vei Iko na iVolacebaceba: Me vakadeitaka na ivakatawa ni cakacaka kei ira na tacida era qarava na ivola me veirauti na ivolacebaceba na Kila na iVolatabu me dau tu ena ivavakoso ena veigauna kece. Biuta tu e so ena nomu taga, ena nomu kato, nomu motoka, vanua ni cakacaka, koronivuli, me tu tale ga e vale e so me rawarawa na nomu solia. Sa macala ga mo tawana tu ena nomu kato ni vunau mo vakayagataka ke o sotava e dua e rawa ni drau veivosaki vakaivolatabu.

¹² Me Vakalougatataka Mada ga o Jiova na Noda Sasaga: E vinaka meda sauva kece na lotu Vakarisito meda vakatavulica e dua ena ka dina. (Maciu 28:19, 20) E dua tiko beka na nomu vuli iVolatabu? Ke sa dua tiko, e rawa beka ni o tuvanaka ena nomu ituvatuva e veimacawa e dua tale? Ia ke sega ni o se vakavulica tiko e dua, e sega ni vakataratutu ni o na vinakata me dua na nomu vuli iVolatabu. Masuti Jiova me vakalougatataka na nomu sasaga mo kunea e dua mo vakavulica. Me qai salavata na nomu sasaga kei na ka o masulaka.​—1 Joni 5:14, 15.

¹³ Sa tu oqo e dua na iyaya vou me tauyavu kina na vuli iVolatabu! Vakawilika vinaka sara. Qai veisoliyaka yani. Meda saga yadua ‘meda caka vinaka, meda vutuniyau ena cakacaka vinaka, meda lomasoli ka yalovinaka ka vakarau tu meda vota vei ira na tani na ka e tu vei keda,’ oya na ka eda vulica mai na Vosa ni Kalou.​—1 Tim. 6:18, VV.

[Kato ena tabana e 4]

SALA E RAWA NI SOLI KINA NA IVOLACEBACEBA

◼ Vei ira eda dau veivosaki e veisiga

◼ Ni dua e ciqoma na noda ivola

◼ Ni lala na vale nida lai vunau

◼ Nida veisikovi lesu

◼ Nida sotava e dua ena vunau e salatu

◼ Nida vunau ena yalava ni bisinisi

◼ Nida vunau tawalokuci

◼ Vakacuruma vata kei na nomu ivola ni o volavola

◼ Nida vodo basi

◼ Ni gole yani e dua i vale

◼ Nida veitalanoa kei ira na wekada, o ira era tiko tikivi keda, itokani vakacakacaka, icaba e koronivuli kei ira kece na noda veikilai