Meda Caka Vinaka ena Noda Dau Veivukei
1 “Sa dauoga sara” o Tokasa “e na cakacaka vinaka, kei na cakacaka loloma.” (Caka. 9:36, 39) Na yalo ni soli ka e tu vua e veivolekati kina kei ira era kilai koya vaka tale ga kina na Kalou o Jiova. E kaya na Iperiu 13:16 (VV): “Kakua ni guilecava mo ni dau caka vinaka ka dau veivukei; ni sa vinakata na Kalou na i madrali vaka oqo.” Rawa vakacava nida caka vinaka ena noda dau veivukei ena gauna oqo?
2 Dua na sala eda rawa ni veivukei kina, oya na noda wasea na ‘noda iyau.’ (Vkai. 3:9) Na noda cau gona ena cakacaka e vuravura raraba e tara rawa kina na Kingdom Hall, Assembly Hall, kei na valenitabana e veiyasa i vuravura. Noda soli ka e rawa kina vei ira e milioni vakacaca me yaga vei ira na veivakavulici vakalou, ra mai marautaka tale ga kina na veimaliwai e veitaraicake vakayalo.
3 Meda Veivakacegui: Ni yaco e dua na leqa tubukoso, era dau tu vakarau na tamata i Jiova mera “caka vinaka” vei ira era vakabauta vata, vaka kina o ira na sega ni vakabauta. (Kala. 6:10) Ni oti ga na kena a kacabote na vanua ni buli kasi e Varanise, rau kaya e dua na veiwatini erau tiko volekata na vanua oqori: “Sega ni bera na nodra sa mai veivuke na tacida lotu Vakarisito ena kena samaki na neirau itikotiko kei na so tale na itikotiko ena neitou itabavale. Era kurabuitaka na tiko tikivi keirau na levu ni tamata era mai veivuke.” E kaya e dua tale na tacida: “Era veivuke sara tale ga na qase ni ivavakoso ena nodra mai vakayaloqaqataki keimami. Oqo sara ga na ka keimami gadreva vakalevu cake mai na veivuke vakayago.”
4 E levu tu na sala eda rawa ni caka vinaka kina, ia na kena e bibi duadua, oya na noda wasea vei ira na tani na kilaka dina, e okati kina na ‘inuinui ni bula tawamudu’ e yalataka sara ga o Jiova. (Taito 1:1, 2) E veivakacegui dina na itukutuku e koto ena iVolatabu vei ira na tagicaka na ituvaki sa tu kina o vuravura, vaka kina nodra ivalavala ca. (Maciu 5:4) Meda caka vinaka mada ga da qai veivukei ni sa rawa vei keda meda cakava vaka kina.—Vkai. 3:27.