E Mana na Vunau ena Talevoni
1. Na cava e bibi kina ena noda cakacaka vakaitalatala na vunau ena talevoni?
1 Na cava meda saga kina meda vunau ena talevoni? Baleta qo e dua na sala eda rawa ni vukei ira kina eso tale mera rawata na kilaka dodonu era na bula kina. (2 Pita 3:9) Na iwalewale eda dau vakayagataka vakalevu duadua meda vakatetea kina na itukutuku vinaka ni Matanitu ni Kalou, na vunau e veivale. Ia meda vakayagataka vinaka eso tale na iwalewale meda vunau kina vei ira era sega ni dau tiko e vale.—Maciu 24:14; Luke 10:1-7; Vkta. 14:6.
2. E tuvanaki vakacava na vunau ena talevoni?
2 Kena Tuvanaki: Me vaka ga na ituvatuva ni cakacaka vakavunau e veivale, e tuvanaki tale ga na vunau ena talevoni vei keda na dautukutuku. E rawa nida cakava duadua se rawa nida le yarua se yatolu. Me vakayacori tale ga ena dua na rumu vakanomodi, me kua kina na veivakasosataki. Levu era raica ni vinaka mera dabe volekata na teveli, me toka vakarawarawa tale ga na ivola era dau vakayagataka ena cakacaka vakavunau.
3. Na cava me nanumi nida vunau ena talevoni?
3 Kena iCakacaka: Noda vunau ena talevoni me vaka ga noda veivosaki e veisiga. Eso era dau wilika na ka era tukuna nira se qai tekivu, ia era vakayagataka na vosa ni veisiga. E ivukevuke yaga ena tikina qo na ikaunivosa ena ivola na Reasoning, Noda Cakacaka Vakaitalatala, kei na ivolacebaceba O Via Kila na Ka Dina? Ke da vakarautaka ga na noda ivakamacala, meda vakasamataka rawa na cava eda via lai tukuna, na taro meda taroga vei taukeinivale, da qai tu vakarau meda wilika eso na tikinivolatabu ena sauma na taro qori. Ena levu na gauna, eda na vakamacalataka tale ga na ivola e dau soli ena cakacaka vakavunau e veivale. Eso na ka me nanumi: Vosa vakamalua, kua ni tavayaya. Meda dau veidokai, vosovoso, yalovinaka. Na itovo qo ena vakilai ena gauna eda vosa tiko kina ena talevoni. Vakatudaliga matua ni tukuna o taukeinivale nona nanuma, vakavinavinakataki koya ena nona ivakamacala. Meda kua ni tukuna e dua na ka me baleta na cau, ni rawa ni nanumi cala me dua na sala ni kere ilavo.
4. Ena yaga vakacava ena noda yalava na vunau ena talevoni?
4 O ira eda veitalanoa ena talevoni ena rairai vakaleqai tu na ituvaki ni yagodra se ra tauvimate, eso era dau osooso vakalevu ena lomanimacawa e dredre kina meda vunau vei ira. Eso e yadravi nodra itikotiko se vakatabui kina na curu vakaveitalia. Meda saga gona meda vunau ena talevoni, ni vuavuaivinaka, da qai cakava vinaka tale ga kina noda cakacaka vakaitalatala.