E Vakarautaki na Noda Mekesini me Taleitaki
1. Sala cava e vakatotomuri Paula kina na dauveiqaravi yalodina e vuku?
1 A moica na yapositolo o Paula na iwalewale ni nona vakamacalataka na itukutuku vinaka me rawai ira kina na “veimatatamata kece.” Na dauveiqaravi yalodina e vuku e vakayagataka tale ga na mekesini me rawai ira e duidui na nodra ivakarau ni bula kei na nodra vakabauta. (1 Kor. 9:22, 23) Me yaga noda vakayagataka Na Vale ni Vakatawa kei na Yadra! ena vinaka meda vakasamataki ira na wilika.
2. E vakarautaki me baleti cei na Yadra!?
2 Yadra!: Na mekesini qo e baleti ira na tamata era vakataki ira “na kai Aceni” a vosa tiko vei ira na yapositolo o Paula. (Caka. 17:22) O ira qori era sega ni lotu vaKarisito era sega tale ga ni kila vinaka na iVolatabu. E vakarautaki na Yadra! me baleti ira era sega ni kila se lailai ga na ka era kila me baleta na iVolatabu. De dua era sega ni kila na ivakavuvuli vaKarisito, era sega ni nuitaka na lotu, se ra sega ga ni kila ni tu ena iVolatabu na idusidusi yaga. Na inaki bibi ni Yadra! me rawai ira na wilika mera vakabauta ni bula tiko na Kalou dina. E kena inaki tale ga mera vakabauta na iVolatabu o ira na wilika, mera kila tale ga nira duidui na iVakadinadina i Jiova vei ira na isoqosoqo lotu tale eso.
3. E vakarautaki me baleti cei Na Vale ni Vakatawa?
3 Na Vale ni Vakatawa: Na Vale ni Vakatawa e tabaki me baleti ira na lewenivanua e kena inaki mera wilika o ira era sa bau doka toka na Kalou kei na iVolatabu. Era kila toka na iVolatabu, ia era sega ga ni kila na kena ivakavuvuli dina. O ira qori era vakataki ira na ilawalawa a tukuna o Paula nira “doka na Kalou.” (Caka. 13:14-16) Na Vale ni Vakatawa e tabaki kina na ulutaga ni vuli, e baleti keda ga na iVakadinadina i Jiova. A nanuma o Paula ni o ira era wilika na nona ivola era kila vinaka na iVolatabu, era kila tale ga na ka dina. (1 Kor. 1:1, 2) Na ulutaga tale ga ni vuli e vakarautaki me baleti ira era dau tiko ena noda soqoni, era kila vinaka na vosa eda dau vakayagataka kei na kena ivakavuvuli.
4. Na cava meda kila vinaka kina na mekesini eda vakayagataka ena cakacaka vakavunau?
4 Eda dau solia vata na Yadra! kei Na Vale ni Vakatawa ena cakacaka vakavunau, ia e dua ga eda na vakamacalataka. E vinakati gona meda kila vinaka sara na mekesini ruarua. Rawa kina meda tu vakarau meda vakamacalataka na ulutaga era na taleitaka o ira eda sotava.