iTabataba Vou ni Vale ni Vakatawa e Tabaki Kina na Ulutaga ni Vuli

OQO na imatai ni ilavelave ni itabataba vou ni Vale ni Vale Vakatawa e tabaki kina na ulutaga ni vuli. Ena vinaka moni kila e so na ka me baleta na itabataba vou oqo.

E tabaki me baleti ira na iVakadinadina i Jiova kei ira na vuli iVolatabu era sa toso tiko vakayalo. Ena taba ga vakadua ena veivula, qai kovuti kina e va se lima na ulutaga ni vuli. Sa tabaki toka na ituvatuva ni vuli ena waqa ni ilavelave oqo. E sega ni tautauvata kei na Vale ni Vakatawa e tabaki me baleti ira na lewenivanua. Na kena meda vulica ena sega ni veisau na iyaloyalo e biu ena waqana, ni na sega ni veisoliyaki ena cakacaka vakavunau.

E vakamacalataki vakalekaleka ena tabana e 2 na veitaravi ni ulutaga ni vuli, na kena inaki kei na kedra yaga, vaka kina e so tale na ulutaga e baleti keda. Ena yaga sara vakalevu oqo vua na tacida e Dauveitauri ena Vuli ni Vale ni Vakatawa, ena nona vakarautaka e so na ivakamacala momona me veivosakitaki ena gauna ni vuli.

Sa na sega tale ga ni balavu na ulutaga ni vuli me vaka e liu, nira sa vakalekalekataki e so na ka. Na kena inaki levu me veivosakitaki kina vakavinaka na tikinivolatabu bibi ena vuli ni Vale ni Vakatawa. Oni kerei moni vakawilika toka na tikinivolatabu kece era lavetaki ena ulutaga ni vuli. E so na tikinivolatabu e volai toka kina “wilika,” mera na qai wiliki ena gauna e vulici tiko kina na Vale ni Vakatawa qai veivosakitaki. Ke vo na gauna me qai wiliki e so tale na tikinivolatabu. E so na tikinivolatabu era volai toka kina “vakatauvatana.” Vakalevu ena sega ni wiliki ena gauna ni vuli ni sega ni sema sara vakadodonu ina veitikina bibi e vulici tiko. Ia, e tiko kina e so tale na itukutuku vakavure vakasama se ra tokona na tikina e veivosakitaki tiko. Oni uqeti moni dau dikevi ira ni bera ni mai vulici na Vale ni Vakatawa ena soqoni. De dua oni na via okati ira tale ga ena nomuni ivakamacala.

Sa na sega ni tabaki na itukutuku vakayabaki ena Vale ni Vakatawa. Ia, me tekivu ena 2008 sa na dau tabaki tiko ena itoma ni Noda Cakacaka Vakaitalatala kei na Yearbook. Sa tukuni toka mai cake ni na taba tale ga ena ilavelave ni Vale ni Vakatawa ni vuli e so tale na ulutaga me baleti keda na lotu Vakarisito. Dina nira na sega ni vulici kece ena ivavakoso, ia oni uqeti moni wiliki ira. Era kakana vakayalo tale ga e vakarautaka na “dauveiqaravi yalo dina ka vuku.”​—Maciu 24:​45-​47, VV.

E dua ga na inaki ni rua na itabataba ni Vale ni Vakatawa​—me Kacivaka na Matanitu i Jiova. Tautauvata na imatai ni parakaravu e tabaki ena tabana e 2 ni ilavelave ruarua, qai vakamacalataki toka kina na inaki ni kena volai na Vale ni Vakatawa. Rau na tabaki tale ga ena bound volume. Na ulutaga “O Se Nanuma Tiko?” ena taba ena ilavelave me baleti keda. Ia, ena okati tiko kina na veika e tabaki ena itabataba ruarua ni Vale ni Vakatawa.

Me tekivu mai na 1879, ni yaco tu na veivaluvaluti, bula leqaleqa vakailavo, kei na veivakacacani, sa dau vakayagataki tiko na Vale ni Vakatawa me kacivaka na veika dina me baleta na Matanitu ni Kalou. Neitou masu ni na vakalougatataka o Jiova na vakayagataki ni itabataba vou oqo me vunautaki tiko ga kina na itukutuku vinaka oqori. Masulaki tale ga ni na vakalougatataki kemuni na dau wilika na itabataba vou ni Vale ni Vakatawa ena nomuni vakayagataka vakavinaka.