Ena Tekivu ena 17 Maji na Veisureti ina iVakananumi
1. Na cava eda na vakayacora tiko ena 17 Maji?
1 Na iVakananumi e caka e veiyabaki e dau vakatakila na nona mate o Jisu. (1 Kor. 11:26) Eda vinakata mera mai tiko kei keda eso tale meda rogoca vata na loloma i Jiova ena nona vakarautaka na ivoli. (Joni 3:16) Eda na tekivu veisureti ena iVakananumi ni yabaki qo ena Vakarauwai, 17 Maji. O sa tu vakarau mo vakaitavi vakalevu ena veisureti qori?
2. Na cava eda rawa ni tukuna nida solia na ivola ni veisureti?
2 Ka Eda Rawa ni Tukuna: Ena vinaka me lekaleka ga na ka eda tukuna. Eda rawa ni kaya: “Ni bula. Au sureti kemudou vakavuvale ena dua na soqo bibi ena caka e vuravura raraba ena 5 Epereli. Ena rogoci tiko e dua na ivunau e vakamacalataki kina na ka e rawati ena nona mate o Jisu kei na ka sa cakava tiko o koya ena gauna qo. Na vanua kei na gauna ena caka kina sa volai tiko ena ivola ni veisureti qo.” Nida veisoliyaka ena muanimacawa na ivola ni veisureti meda solia vata kei na mekesini ke veiganiti.
3. Eda na rawa vakacava ni veisureti vakalevu ena iVakananumi?
3 Veisureti Vakalevu: Me noda inaki meda veisureti vakalevu. Meda sureti ira na vuli iVolatabu, ira na noda veisikovi lesu, ira na wekada, itokani vakacakacaka, noda itokani e koronivuli, ira eda tiko veitikivi, kei na so tale eda veikilai. Eratou na tuvanaka na qase na cakacakataki ni nomuni yalava. E yaga dina na noda dauveisureti ina iVakananumi e veiyabaki. Ena yabaki sa oti a gole mai e dua na marama ena vanua ni soqo. A via vukei koya e dua na dauveivuke me vaqara na dautukutuku a sureti koya. Ia e kaya na marama oya ni sega ni kila e dua e kea, a solia vua na ivola ni veisureti e dua a cakacaka vakavunau tiko ena mataka ni siga oya.
4. Na cava meda vakaitavi kina vakalevu ena veisureti ni iVakananumi?
4 Rairai ena tiko ena iVakananumi e dua o solia vua na ivola ni veisureti. Sa dua na ivakadinadina levu na noda gumatua ena veisureti, se mani ciqomi se sega. Na ivola ni veisureti o solia ena vakatakila ni sa Tui qaqa tiko o Jisu ena gauna qo. Nomu gumatua ni vakaitavi ena veisureti ena vakaraitaka vei ira era raici iko—o ira ena yalava, nomu itokani dautukutuku, vakabibi o Jiova—ni o vakavinavinakataka dina na isolisoli talei, na keda ivoli.—Kolo. 3:15.