Meda Maqosa Tiko ga ena Cakacaka Vakaitalatala—Ka Meda Cakava ni Cudru o iTaukeinivale

Vuna e Bibi Kina: Levu eda vosa vei ira ena cakacaka vakavunau era yalovinaka. Ia e parofisaitaka o Jisu ni so era na cati keda. (Joni 17:14) Meda kua gona ni kurabui nida sotavi ira na itaukeinivale cudrucudru. Meda qarauna na ka eda cakava ni yaco qo, eda vinakata meda vakamarautaki koya eda matataka, o Jiova. (Roma 12:17-21; 1 Pita 3:15) Noda cakava qori ena sega ni vakatubutaka na leqa. E ivakadinadina vinaka tale ga vei koya na itaukeinivale kei ira na vakararai tu, ena uqeti ira mera vakarorogo ena gauna eda vunau tale yani kina.—2Kor. 6:3

Kena iWalewale:

Mo kua ni yalototolo, mo yalovinaka tiko ga. Qo ena vakamalumutaka na ituvaki. Kua ni taura vakabibi nona cudru o itaukeinivale. (Dauv. 7:9) E rairai leqataka eso na ka e sotava tiko, se ni o gole yani ena gauna cala. Ke sega ni taleitaka na noda itukutuku, vakalevu ni vu qo ena itukutuku veivakacalai e rogoca.—2Kor. 4:4.
Vosa ena yalomalua kei na yalovinaka. (Vkai. 15:1) O vakayadrati koya se o vakataotaka na nona cakacaka? Eda na sega ni kere veivosoti ena vuku ni noda cakacaka, o rawa ga ni kere veivosoti ni o lako yani ena gauna e osooso tu kina. E cudruvaka e dua na itukutuku vuka e sega ni dina me baleti keda? Ke vaka kina, o rawa ni kaya: “Au kila na vuna e vakacudrui kemuni kina qori. Ia na ka oni rogoca me baleti keimami e sega ni dina. Oni taleitaka meu vakamacalataka?” De dua e sega ni taleitaka e dua na ka eda vakabauta, na ka beka e vauca na veivakasivoi se na dra. O rawa ni kaya: “Au kila na vuna oni kauai kina. Eso e va tale ga qori na nodra rai. Oni taleitaka meu vakaraitaka mai na iVolatabu na yavu ni ivakavuvuli qori?”
Ke cudru vakalevu o itaukeinivale, e vinaka mo biubiu mo kua ni vakamacala tale. Ke tukuna me kua ni sikovi koya tale yani na iVakadinadina i Jiova, mo vakadeitaka vua ni na vakayacori qori.

Tovolea ena Vula Qo:

Dou vakatovotovo ena nomudou sokalou vakavuvale.
Ni drau vosa oti vua na itaukeinivale cudrucudru, veivosakitaka kei na kemu isa se cava drau rawa ni vakavinakataka ena ituvaki oya.