Meda Maqosa Tiko ga ena Cakacaka Vakaitalatala—Vunau ena Intercom

Vuna e Bibi Kina: Dau dredre toka meda vunau ena intercom. Na cava meda cakava me kua ni vakataotaka noda cakacaka vinaka na ivakarau ni vunau qo? E rairai sala duadua ga era rogoca kina eso na itukutuku vinaka na vunau ena intercom. (Roma 10:14) Sa vakadinadinataki ni rawa ni vuavuaivinaka na vunau ena sala qo. (Raica na Yearbook ni 2011, tabana e 65-66, kei na Yearbook ni 2000, tabana e 54, para. 3.) Dikeva eso na vakatutu qo.

Kena iWalewale:

Vakarautaka e dua na ivakamacala lekaleka, vola mo rawa ni wilika vei itaukeinivale ni o vosa ena intercom. O na yalodei kina. Mo vakamacalataka e liu na inaki ni nomu veisiko. Vakayagataka na yaca i itaukeinivale ke volai tu. Tinia nomu vosa ni o tukuna ni o via solia vua (se ciqira ena ruku ni katuba) e dua na tikidua se mekesini e tiko kina eso tale na ivakamacala.
Me donu tiko ga nomu rai. Mo matadredredre qai matau nomu ivukivuki me vaka ga drau veirai tiko.
Kua ni taqaya, vosa me vaka o vosa ena veisiga. Vosa vakamatata, mo vosa i cake. Kua ni cegu vakawasoma, ia me kua ni totolo nomu vosa.
Vakalewa vinaka na ituvaki. Ena vale e taba vica vata, ena rairai levu kina na intercom se lali ena katuba. De dua o rawa ni qiria e tolu se va na lali, vola na vanua o yaco tiko kina, qai biubiu. Era na rawa ni rere na itaukeinivale ke o dede tiko ena vanua ni wawa ni o qirita wasoma na intercom.

Tovolea ena Vula Qo:

Me vakatovotovotaki ena sokalou vakavuvale, me rau kua ni veiraici o rau na vakaitavi.