Au Marau Niu Vakatulewa Donu

Au susu ena lomanivanua kei Ositerelia. Rau vulica noqu itubutubu kei rau na tubuqu na ka dina ena veiyabaki ni 1950. Au tekivu vunau niu yabaki ono, qai papitaiso niu yabaki 13. Au dau painia veivuke ni sereki na vuli. Au lomani Jiova qai vinakata meu qaravi koya me tawamudu.

Niu yabaki 15, e raica na dauniveivakavulici ni qito e koronivuli niu dau matai na qito. E mani solia vei au e dua na vakailesilesi ni timi rakavi rogo, na sikolasivi ni qito. Au vinakata sara ga meu rogo ena qito rakavi, ia au sa yalataki au tu vei Jiova. E kaya o Ta meu vakasamataka noqu yalayala ni bera niu vakatulewa. Au muria na ka e tukuna, au qai liaca ni sega ni rawa niu qarava ruarua. Au mani vakasuka na sikolasivi. Oti e vica na vula e soli vei au e dua tale na sikolasivi ena koronivuli na Australian Institute of Sport, e Canberra. Au vakavulici kina meu dua na dau veitaucici balavu (marathon runner), me rawa niu matataki Ositerelia ena Commonwealth Games, se na Olympic Games. Ia au vinakata tiko ga meu cakava noqu yalayala vua na Kalou au lomana. Au mani sega ni vakadonuya.

Oti qori au biu vuli, au tekivu painia sara. Qori na isausau au dau vakasamataka tu. Ia keitou sotava vakavuvale na leqa vakailavo, au mani cegu na painia qai tekivu cakacaka niu draivataka na misini lelevu ni teitei. Gauna qori au sa cauravou, au sa tu ga vakataki au. Dina niu qaravi Jiova, ia e caka tu ga me rawa. Au yalolailai qai malumu vakayalo. Au vakailala kei ira na daugunu qai cakava na itovo dukadukali. Au temaki tale ga ena nodra ivakarau. Au vakawalena noqu veiwekani kei Jiova qai vakaliuca ga na ka au vinakata.

Toso na gauna, au vakatulewataka meu veisautaka na ka au vakaliuca. Au mani toki ena dua na tauni e yawa mai vei ira noqu ilala. E vinaka tale noqu veiwekani kei Jiova qai vinakata meu painia. Au mani sotavi Leann McSharry, e goneyalewa mamadua. E painia tiko ena gauna qori, keirau mani veitokani sara. Keirau veitalanoataka neirau isausau, me vaka na veiqaravi vakadaukaulotu. Ena 1993, keirau vakamau. Keirau vinakata me dusimaka neirau bula o Jiova.

Vakaliuci Neirau Sausau

Au tomani Leann ena painia tudei ena 1993. Keirau vinakata me keirau bula rawarawa ga qai kua ni dinau. Keirau volia e dua na vale veicavuyaki (caravan) me keirau tiko kina. E ono na yabaki neirau veitokiyaki ena vanua e lesi keirau kina na isoqosoqo i Jiova, keirau cakava tale ga eso na cakacaka lalai me tokoni keirau. Keirau dau vunau ena ivavakoso lalai ena lomanivanua e Kuinisiladi. E yalava levu, vanua bucabuca qai mamaca tale ga. Levu na gauna keirau na keba ena vanua lala, qai caka na soqoni ena loma ni veikau se dua na vale ena itikotiko. Keirau marautaka dina qori. Ia keirau vakasamataka, ‘Vakacava e rawa ni levu tale na ka keirau solia vei Jiova?’ Sega ni dede sa saumi neirau taro.

Keirau sureti me keirau daukaulotu ena dua tale na vanua! Ia keirau lomaleqa qai nanuma ni na sega ni ganiti keirau, baleta ni keirau se bera ni vuli e Kiliati. Keirau nanuma kina ni keirau na sega ni qarava vinaka neirau itavi. Keirau marautaka na vunau ena lomanivanua, ia e sega ni levu neirau vuli iVolatabu. Keirau kila ni keirau sega ni qasenivuli maqosa sara.

Keirau mani vakaraitaka neirau nanuma vei Brother Max Lloyd, e lewe ni Komiti ni Tabana.a E kaya me keirau yalorawarawa ni soli keirau ke mani lalai mada ga na ka keirau kila. O Jiova ena qai vukei keirau ena neirau ilesilesi. Nona vosa ni veivakayaloqaqataki qori, keirau ciqoma kina na neirau ilesilesi e Sri Lanka.

iLesilesi Dredre

Ena 1999, keirau yaco e Colombo, na koroturaga kei Sri Lanka. E duidui na ivakarau ni bula e kea, ni vakatauvatani ena lomanivanua kei Ositerelia! E yaco na ivalu, levu na dravudravua, ira na daukerekere, e vanua osooso qai dredre na kena vosa. Ia e tiko kina na iyau talei, ya o ira na mataveitacini kei ira na yalomalumalumu era se bera ni kilai Jiova.

Keirau lesi ena siti o Kandy e toka e veidelana qai wavokita na veiloga ti kei na veikau. E tiko kina e levu na valenilotu ni Buda. Ia e le vica ga era kila tiko na Dauveibuli dauloloma. Era lewena na ivavakoso na tacida era vosa vakaSinhala kei na vosa vakaTamil, qai vakayacori na soqoni ena rua na vosa qori. E dredre na vulici ni vosa vakaSinhala, ia era marautaka na ivavakoso kei ira na vuli iVolatabu neirau sasaga. Era dau dredre ni keirau cavuta cala eso na vosa!

Ia e levu tale na ka dredre keirau sotava. Sa qai imatai ni gauna me keirau tusaqati kina vakaukaua ena vuku ni ka dina. Dua na gauna era wavokiti au kei na dua tale na tacida tagane e dua na ilala cudrucudru. Era vakama neirau ivola, ra caqelaki keirau qai mokulaki keirau. Keirau masuti Jiova me solia vei keirau na vakacegu, me qai nanumi keirau ke keirau mate. E lutu sara ga neirau cegu nira sa biubiu na ilala qori. Dua na ka neirau rere ni keirau biubiu mai ena koro, ia keirau vakavinavinakataka nona veitaqomaki o Jiova.

Toso na gauna, sa vaka ga me neirau vale na vanua o Sri Lanka. Dina ni yaco tu na ivalu, ia keirau marautaka nona vagolei ira tiko mai na yalomalumalumu o Jiova ina nona vuvale. E levu na ka marautaki keirau sotava ena yanuyanu totoka qori. Ia oti e rua na yabaki, era uqeti ira na iliuliu ni lotu na vakailesilesi mera vakatalai e levu na daukaulotu.

Oti e vica na macawa keirau sega ni kila na ka me keirau cakava. Keirau vakasamataka i vei na vanua keirau na gole kina. E qai lesi keirau i Papua Niu Kini na iLawalawa Dauvakatulewa. Ena Seviteba 2001, keirau yaco yani ena kena koroturaga o Port Moresby.

Papua Niu Kini​—Vanua Duatani

E veivolekati toka ga o Papua Niu Kini kei Ositerelia, ia e duidui sara na ivakarau ni bula kei na kena itovo vakavanua. Ia e vinakati me keirau vakamatauni keirau kina. E sivia ni 800 na vosa e vakayagataki e Papua Niu Kini. Keirau vulica na vosa vakaTok Pisin ni vosataki vakalevu duadua kina.

Oti e tolu na yabaki neirau veiqaravi ena tauni e Popondetta, keirau lesi ena itavi ni ivakatawa ni tabacakacaka. Keirau sega ni tadra ni na vakayagataki keirau o Jiova ena sala qo! Au dau mareqeta nodra veidusimaki, veivakavulici maqosa kei na nodra matua na ivakatawa ni tabacakacaka. Au nanuma kina ni na sega ni ganiti au na itavi qori. Au vinakata ga meu daukaulotu. Au sega ni tadra meu ivakatawa ni tabacakacaka! Qori e dua dina na itavi dokai mai vei Jiova.

Na tauni kece keirau sikova e tiko kina na livaliva, wai kei na rumunimoce. Ia e sega qori e lomanivanua, keirau na moce ena bure lalai, vasaqa ena buka qai sili ena uciwai. Ke tiko kina na karokotaile, keirau na tawana na wai ena vokete qai lai sili ena bure.

Ni vakatauvatani e liu, na ilesilesi qo e vinakati vakalevu kina me keirau kaukaua vakayago. Ia keirau vakadeitaka ke keirau ‘lako ena kaukaua e tiko vei keirau,’ ena vukei keirau o Jiova. (Dauveilewai 6:14) E dau dredre na veisiko ena so na ivavakoso kei na wasewase lalai. Nira tu e loma ni veikau, veidogo kei na veiulunivanua. Ni keirau sikovi ira na mataveitacini keirau na vodo lori, waqa, waqavuka se taubale.b

Ni keirau sikova na ivavakoso volekata na iyala ni vanua e Idonisia, keirau na draiva me sivia e 350 kilomita ena gaunisala sukusukura. Keirau na muria tiko na gaunisala qori me sivia e 200 na gauna, keirau dau takosova tale ga e levu na drekeniwai, uciwai, kei na so na wavu. Ena veiyabaki sa sivi, rawa ni vica vata na aua neirau dau kelia na soso qai biliga na motoka me yacova ni keirau yaco yani vei ira na mataveitacini. Era na wawa tu mai ena matadredredre, ra vakarautaka tale ga na kakana.

Keirau dau vodo waqavuka lalai ena vanua ribayawa. Ni bera ni ro na waqavuka, ena saga na pailate me raica mai e macawa na raraniwaqavuka me kua ni dua na manumanu se gone e tiko kina. Keirau na vakarau tu me keirau sobu ena vanua e soso qai sukusukura ena ulunivanua e rauta ni 2,100 na mita na kena cere. Eso na gauna ena biubiu mai na waqavuka ena batibati ni barinivatu.c

Eso na gauna keimami taubaletaka na veiqakilo se vanua lolobo ena draki katakata. E tawa ena beki na ivola vakaivolatabu kei na so tale na ka. E gauna marautaki qori ni keirau tomani ira na mataveitacini yalodina, keimami dau veivakayaloqaqataki qai veidredrevaki.

Keirau duavata kei na ka e tukuna na yapositolo o Paula ena 1 Cesalonaika 2:8: “Ena levu ni neitou lomani kemuni, keitou vakadeitaka me keitou . . . solibula tale ga ena vukumuni, ni oni sa rui talei vei keitou.” Keirau kila nira tu vakarau na tacida mera cakava qori vei keirau, era taqomaki keirau tale ga ke ra mani vakayalia kina nodra bula. Dua na gauna e vakarerei Leann e dua na tagane e taura tu na iselekava. Au sega ni rawa ni vukei koya niu tu mai ena dua tale na koro. Ia e totolo ga nona vukei Leann e dua na tacida tagane. E mavoa vakalailai na tacida qori, ra qai cici yani eso mera tarovi koya na tagane ya. Io o Jiova e tokoni keirau tu ga ena vanua e levu kina na basulawa, me rawa ni keirau vakayaloqaqataki ira na mataveitacini.

E sega ni taucoko sara na iyaya ni veiqaravi vakavuniwai e Papua Niu Kini, e dredre kina me keirau bulabula vinaka. Ena 2010, e tauvi Leann e dua na mate (bacterial infection), qai voleka ni vakayalia kina nona bula. Keirau mani gole i Ositerelia me lai qaravi vakavuniwai. Keirau vakila tu ga na lomavakacegu ena veitokoni i Jiova. Era mani kunea na vuniwai e dua na wainimate ena yaga vua. E kaya e dua na vuniwai: “Drau cakacaka vua na Kalou, qo sa vukei kemudrau.” Oti e vica na vula, keirau tomana tale neirau ilesilesi.

Levu Tale na ka me Caka

E vinakati me qaravi vakavuniwai o Leann e veiyabaki e Ositerelia. Ena 2012, e kaya na valenivolavola ni tabana me keirau sa tiko ga e kea ena vuku ni veiqaravi vakavuniwai. Oti e vica vata na yabaki, e ka ni sasaga me donu neirau rai kei na lomai keirau. Keirau rarawa ni keirau sa biuta neirau ilesilesi kei na vuvale vakayalo keirau lomana vakalevu. Keirau nanuma ni keirau sega ni qarava vinaka neirau itavi se sa tawayaga vei Jiova. E dredre me keirau vakamatauni keirau ena bula e Ositerelia. Ia e yaga dina vei keirau na nodra veitokoni na mataveitacini.

Ni sa bula vinaka tale o Leann, keirau lai painia lavotaki e Wollongong ena ceva kei Serene, e New South Wales. Ena yabaki tarava keirau marau ni keirau sureti ena Koronivuli ni Vuli iVolatabu ni Veiwatini (gauna qo sa Koronivuli ni iTalatala ni Matanitu). Oti keirau lesi me ivakatawa ni tabacakacaka. E vica vata na yabaki, neirau sikova na ivavakoso kei na iwasewase lalai ena siti osooso, tauni ena vanua dravuisiga, kei na so na koro e dau caka kina na siwa. Gauna qo keirau sa veiqaravi tiko ena vanua dravuisiga ena vuira kei Ositerelia, kei na veivanua e Timor-Leste.

Dua na ka nona tokoni au o Leann qai gumatua ni qaravi Jiova, qori e dua na iloloma talei mai vei Jiova. E dau yalorawarawa ena ilesilesi cava ga keirau lesi kina, ke dredre mada ga na ituvaki. Ni tarogi e vosota vakacava na dredre, e kaya, “Au dau tukuna vei Jiova na ka kece.” Ni wili iVolatabu e vakalaivi Jiova me dusimaka na ivakarau ni nona vakasama, na lomana kei na ka e cakava.

Au sega vakadua ni veivutunitaka nona dusimaki au voli mai o Jiova, qai kua vakaliuca na qito. O Jiova e rawa ni vakavulici keda meda cakava nona inaki ke da yalorawarawa ni cakava na itavi e lesia vei keda. Au vulica kina keu sotava na ituvaki dredre se vakatulewataka e dua na ka, e bibi meu kerea na vuku kei na yalo tabu e veisiga. E solia vei keirau na Tama dauloloma o Jiova na bula e vakainaki qai marautaki. Keirau vakanamata me keirau raica eso tale na ka e rawa ni cakava ena “saqa qele” qo.​—2 Korinica 4:7.