Veivakadrukai na Mataivakatagi Bitu ni Yatu Solomoni

Dauvolavola ni Yadra! mai na Yatu Solomoni

O SA BAU tovolea mada mo uvuca na ivakatagi bitu? Eda walekakai tale ni vinakati meda guraka na noda icegu. Ia vakasamataka mo uvuca na bitu e rua na mita na kena balavu, e lima na mita na raba ni gusuna, qai vinakati me yavala na yagomu kece ena nomu saga me rogo. E veivakadrukai na mataivakatagi bitu ni Yatu Solomoni ni kena iyaya vakatabakidua e 40 na ivakatagi bitu. Io, na iyayanivakatagi kece ni mataivakatagi oqo e buli mai na bitu! E duidui na rorogo e rawa ena veimataqali bitu ni veikauloa ni Yatu Solomoni, mai na kena e rogo watatagi sara ina kena e rogo bi sara.

Meda lai saravi iratou mada na mataivakatagi na Narasirato Pipers e Honiara, ena vale eratou dau vakarautaka kina na nodratou iyayanivakatagi, ratou vakatovotovo tale tiko ga kina ni ratou vakavakarau ina nodratou ilakolako ni veivakamarautaki i Taiwan. E so na nodratou iyayanivakatagi e tiko kina e tolu na tolonibitu eratou vau vata qai tolu na mataqali rorogo ena rogoci kina ni uvuci. Ena nodratou saga na daunivakatagi me veilutuki vinaka na tolu na rorogo oya, eratou taura na tolonibitu tolutolu oqo ratou qai vakatavitavia toka ena dela ni dua na vatu raraba me yacova ni sa veilutuki vinaka na kedratou irorogo. Ke sega, ena musu vakalalai tiko na gusu ni bitu e sega ni rogo vinaka. Ia ena gauna ni vakatagi ena sega ni uvuci. Ena vauci na muadratou e ra ena wadrega qai tuki toka na muana e delaniqele. Dua na ka na kena rogo bi!a

E dredre me vakamacalataki na veimataqali rorogo nira sa tekivu vakatagi. E so na gauna e rogo malumu sara; so tale na gauna e vasugu sara. E vulici vinaka na ivakatagi kece, ra qai dau sua veicurumaki nira vakatagi tiko. So na gauna e lai vaka sara na irorogo ni yaso na ivakatagi, ia vakavuqa ga me veivakamalaudetaki. De dua na siga o rawa ni sikovaa na yatuyanuyanu oqo mo rogoca kina n irorogo veivakadrukai ni mataivakatagi bitu ni Yatu Solomoni.!

[iVakamacala e ra]