Veitokoni kei na Veinanumi Mai na Veiyasana

E RA lako mai na veiyasa i Mereke na bole veivuke vaka kina mai na so tale na vanua. Dua vei ira oqo o Tom (vakaraitaki e cake), yabaki 29, e daubokobuka e Ottawa, mai Canada. E kaya ina Yadra!: “Au raica ena retioyaloyalo na veika a yaco, au mani via vukei ira noqu itokani daubokobuka e Niu Yoka. Au draiva sobu mai ena Vakaraubuka qai tekivu veivuke sara ena vanua e yaco kina na leqa ena Vakarauwai. Au veiqaravi ena tabana e vakatokai na bucket brigade, e vakayagataki na vokete me kau tani kina na benu.

“Vakamalua neimami veitosoyaka na benu, dua na isivi sinai ena dua na gauna, ni keimami vaqara na veika era rawa ni kunei kina na daubokobuka era mate. Au kunea na iyaya e vakatokayacataki vei Halligan e vakayagataki me dola kina na katuba e lokataki tu, vaka kina na isema mai na osipaipo. Sa dua na tama ni cakacaka levu. E taura e rua na aua vei ira e rauta ni 50 na bole veivuke mera vakasinaita e dua na lori ni benu.

“Ena Moniti, 17 Sepiteba, keimami dreta mai kina na yagodra e so na daubokobuka era curuma na vale ena Tusiti sa oti. Au na sega ni guilecava na tikinigauna oya, nira tu vakadua na dauveivueti kece, ra luvata nodra isala, me ivakaraitaki ni nodra dokai ira nodra itokani daubokobuka era mate.

“Niu tucake tu au qai vakaraica na ituvaki ni vanua, e lauti au na kena rawa ni veisau vakasauri na bula. E vakavuna meu liaca noqu bula, noqu cakacaka, kei na noqu vuvale. Dina ni rivarivabitaki noqu cakacaka, ia e yaga sara vakalevu, ni rawa niu vukei ira na tamata se vakabulai ira sara mada ga.”

Ra Veivuke na iVakadinadina

Na imatai ni rua na siga ni sa yaco oti na leqa, rauta nira le 70 era qara veivuke ena itikotiko liu ni iVakadinadina i Jiova. So vei ira e rusa vakadua nodra rumu ena otela kei na nodra iyaya, e soli vei ira na vanua mera tiko kina kei na nodra isulu. Era vakani. Koya e bibi duadua nodra vakaukauataki vei ira na qase matua ena ivavakoso.

Era vakauta tale ga na iVakadinadina i Jiova na iyaya ni veivuke vei ira na tabana ni vaqaqara kei na veivueti era cakacaka tiko ena vanua sara ga e yaco kina na leqa. E vakarautaki tale ga na sala ni veilakoyaki ina tabana ni bokobuka me kauti ira na daubokobuka ena vanua ni veivueti. O Ricardo (ena imatau, e cake), e iVakadinadina e yabaki 39 qai cakacaka ena tabana ni tiko bulabula, a vakaitavi kei ira e vica vata tale na drau mera usana laivi e vica vata na tani benu e veisiga. E tukuna ina Yadra!: “E vakaloloma na irairai ni vanua, vakauasivi vei ira na daubokobuka, nira vaqarai ira tiko nodra itokani era yali. Au raica nira dreta bula mai e dua na daubokobuka. Dua tale na daubokobuka e mate ni lutuki koya e dua tale na tamata. Era tagi e levu na daubokobuka. Au tini tagi tale ga. Ena siga oya e sega ni dua e yaloqaqa me vakataki ira.”

“Gauna kei na Ka e Sega ni Namaki”

Vica vata na udolu era mate ena leqa oya. Wili kina e 14 na iVakadinadina, era tiko sara ga se volekata na vanua ni leqa. O Joyce Cummings mai Trinidad, e yabaki 65, e lai laurai vua na vuniwainibati volekata na World Trade Center. Ka ni rarawa ni donuya sara ga na gauna ni leqa. E tasogo nona icegu ena kubou mani cicivaki ina valenibula voleka. Era sega ni vakabulai koya rawa. Na ka e yaco vua, e dua vei ira na ituvaki era sotava na tamata ena vuku ni “gauna kei na ka e sega ni namaki.” (Dauvunau 9:11, NW) E kilai o koya ni dua na daukaulotu gugumatua.

O Calvin Dawson (raica na kato) e cakacaka ena tabana ni veivoli ena ika84 ni tabavale ni south tower. A tiko ena nona valenivolavola qai raica vinaka sara tu ga ni sa cumuta na north tower na waqavuka. Na itaukei ni nona cakacaka, a sega ni tiko ena valenivolavola, e qiri sara mai ena talevoni me kila na ka e yaco. E kaya: “A via tukuna tiko mai vei au o Calvin na ka e raica. E mani kaya, ‘Sa ra rika tiko na tamata!’ Au kaya sara vua me lako tani mai kea kei ira tale na so mai na valenivolavola.” A sega ni yaco rawa mai tuba o Calvin. E kuria na itaukei ni cakacaka: “E turaga vinaka o Calvin qai keimami taleitaki koya kece, o keimami mada ga na sega ni dau taleitaka na veika vakayalo. Keimami dau qoroya nona itovo vakalou kei na nona yalololoma.”

O James Amato (ena imatau e ra, ena taqana e 10) e dua tale na iVakadinadina a mate, e va na luvena, e kavetani ni tabana ni bokobuka e Niu Yoka. O ira era kilai koya era kaya, ena nona yaloqaqa “ena curu ena vale sa kama tu dina ga nira sa dro tiko mai kina na tamata.” Dina ni sa yali o James, ia a qai tosoi cake nona itutu me iliuliu ni dua na batelieni ni daubokobuka.

O George DiPasquale e dua tale na iVakadinadina e daubokobuka, sa vitu na yabaki nona cakacaka. Na watina o Melissa qai dua na luvedrau yalewa yabaki rua o Georgia Rose. E qase ena ivavakoso ni iVakadinadina i Jiova e Staten Island. A tiko ena ikatini ni tabavale ena south tower ena gauna e kasura kina. E vakayalia tale ga nona bula ni saga me vakabulai ira tale e so.

O rau oqo e rua ga vei ira na vica vata na drau na daubokobuka, ovisa, kei ira na dauveivueti era mate nira via vakabulai ira tale e so. E sega ni vakamacalataki rawa nodra yaloqaqa na dauveivueti oqo. E muri a qai tukuna o Rudolph Giuliani na turaganikoro ni Korolevu o Niu Yoka vei ira e dua na ilala daubokobuka sa tosoi cake nodra itutu: “Nomuni sega ni tuvakasuka ena ituvaki vakadomobula duadua oqo e uqeti keimami kece. . . . E . . . sega tale ni dua e ivakaraitaki ni yaloqaqa me vakataki kemuni na Tabana ni Bokobuka ena Korolevu o Niu Yoka.”

Cakacaka ni Veivakacegui

Ena gauna sa yaco oti kina na leqa, rauta ni 900,000 na iVakadinadina i Jiova e Mereke taucoko era saga mera vakacegui ira na rarawa. Nodra lomani ira na wekadra e uqeti ira mera vakacegui ira na lolosi. (Maciu 22:39) Ena nodra cakacaka era tovolea mera vakaraitaka na inuinui duadua ga vei ira na kawatamata sa sotava tu na leqa.​—2 Pita 3:13.

Era torovi ira vakayalololoma na lewenivanua na iVakadinadina. E nodra inaki mera veivakacegui ena iVolatabu ra qai vakatotomuria na ivakaraitaki i Karisito, ni a kaya: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou. Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou. Ni sa rawarawa na noqui vua, ka mamada na noqui colacola.”​—Maciu 11:28-​30.

Era vakatarai e dua na ilala qase ni ivavakoso ni iVakadinadina i Jiova e Manhattan mera lako ina vanua e yaco kina na leqa, mera lai veivosaki ra qai vakacegui ira na dauveivueti. E ciqomi vinaka sara nodra itukutuku. Era kaya na italatala oqo: “E tuturu na wainimatadra na turaga oqo ni keimami wasea vei ira na itukutuku ena iVolatabu.” Era mai vakabulabula tiko na dauveivueti ena waqa ena kena ikelekele. “E veilecayaki sara tu ga na kedra irairai na turaga oqo, era cuva tu ga, ra qai sega ni taqea rawa na ka era raica. Keimami dabe vata kei ira qai keimami wasea vei ira na itukutuku ena iVolatabu. Era vakavinavinakataka na turaga oqo neimami yaco yani, ra qai kaya nira taleitaka dina na veivakacegui vaka oqo.”

Vakalevu mera via wilivola o ira era tarai ni sa yaco oti na leqa, mani soli wale kina e vica vata na udolu na ivola. E so vei ira na ivola oqo, Ni Mate e Dua na Wekamu Voleka, Will There Ever Be a World Without War?, kei na Does God Really Care About Us? Na imatai tale ga ni vica na ulutaga ena rua na itabataba ni Awake! e taleitaki vakalevu: “The New Look of Terrorism” (22 Me, 2001) kei na “Coping With Post-traumatic Stress” (22 Okosita, 2001). Levu na gauna era vakamacalataka kina na iVakadinadina na inuinui ni veivakaturi. (Joni 5:28, 29; Cakacaka 24:15) E vica vata na milioni era tarai ena itukutuku veivakacegui oqo.

Meda Lialiaci

Na leqa me vaka oqo ena Korolevu o Niu Yoka e dodonu meda liaca kina se cava eda cakava tiko ena noda bula. Eda bula tiko ga baleti keda yadua, se da saga meda vakalevutaka nodra mamarau e so tale? E taroga na parofita o Maika: “Ka cava tale sa taroga maivei iko ko Jiova, mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?” (Maika 6:8) E dodonu me uqeti keda na yalomalumalumu meda rai ena Vosa ni Kalou meda kila kina na veika sa voleka ni vakayacora na Kalou me Parataisi tale kina na vuravura. Ke oni via kila e so tale na vosa ni yalayala ena iVolatabu, oni uqeti mo ni veitaratara kei ira na iVakadinadina i Jiova ena nomuni yasayasa.​—Aisea 65:17, 21-​25; Vakatakila 21:1-4.

[Kato/iYaloyalo ena tabana e 11]

MASU NEI TATIANA

Na yada i Calvin Dawson, o Lena, e talanoataka ena Yadra! na qaqanimasu nei luvena yalewa yabaki vitu ni oti ga e vica na siga nona kila ni sa na sega ni lesu mai vale o tamana. Sa masu oti o Lena, mani kerea o Tatiana, “Nana, au rawa tale ga ni masu?” Vakadonuya sara o tinana. Mani masu o Tatiana: “I Jiova na Tama i keirau vakalomalagi, keirau vakavinavinakataka vei kemuni na kakana oqo kei na siga nikua. Keirau kerea me tiko mada ga kei keirau kei Nana na yalomuni me keirau kaukaua tiko kina. Me tiko tale ga na yalomuni kei Tata, me rawa ni kaukaua ni sa na lesu tale mai. Ni sa na lesu mai, me rairai totoka, kaukaua, mamarau qai bulabula, me keitou sota tale. Ena yaca i Jisu . . . isa kua ni guilecava mo ni vakaukauataki Nana. Emeni.”

Ni sega ni vakadeitaka o Lena ni sa matata vei Tatiana na veika e cavuta, e mani kaya: “Tiana, totoka sara oya. Ia, noqu daulomani, o kila ni sa na sega ni lesu tale mai o Tata?” E laurai vakasauri na kurabui ena mata i Tatiana. E kaya: “Ena sega?” Mani kaya o tinana, “Sega. Au vakabauta au sa kaya oti vei iko oya. Au nanuma de o sa kila ni na sega ni lesu tale mai o Tata.” Kaya sara o Tatiana: “Ia o dau tukuna vei au ni na lesu tale mai ena vuravura vou!” Ni sa qai kila na ka e vakaibalebaletaka na luvena, mani kaya o Lena: “Vosoti au, Tatiana. Au sega ni tauri iko rawa. Au nanuma de o vakaibalebaletaka ni na lesu mai ni mataka o Tata.” E kaya o Lena: “Au lomavakacegu niu kila ni ka dina tiko vua na vuravura vou.”