Sa na Oti na Rarawa​—Na Yalayala ena Yaco Dina

“[Na Kalou] ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”​—Vakatakila 21:​4.

VAKACAVA o vakabauta dina na yalayala qori? Vakasamataka lesu mada e dua na ivakaro a soli taumada vei Atama. E tukuna na Kalou vua ni na “mate vakaidina” ke talaidredre. (Vakatekivu 2:​17) Io e qai mate dina me vaka ga a tukuna na Kalou. Mai na ka e yaco qori, salavata kei na mate kei na rarawa eda sucu kaya mai, e macala kina nida rawa ni nuitaka na Kalou. Vakacava, e tiko na vuna meda vakatitiqataka kina na yalayala ni Kalou me vakalesuya na bula uasivi e vuravura?

Vakasamataka tale ga na itovo ni Kalou eda veivosakitaka ena ulutaga sa oti. Na noda dau via vakaotia mada ga na rarawa e vakaraitaka nida ucuya na Kalou ena nona yalovinaka, loloma kei na lewa dodonu. Kena ikuri, na ka e yaco tu qo e vuravura kei na kena itovo e dusia ni sa voleka ni yavala na Kalou.​—Raica na kato “Yaco Ninaica na Veika Qo?”

Na cava e ganiti koya duadua ga kina na Kalou o Jiova me vakaotia na noda rarawa? Vakasamataka mada na sala e vakayagataki Jisu kina o Jiova me vakaotia na noda rarawa.

Na vakatulewa. Na leqa eda sa mai sotava tu qo na kawatamata e vu mai na nona vakatulewa cala na tukada o Atama. E vola na yapositolo o Paula: “Eda kila nira vutugu ra qai rarawa tu na kabuli kece me yacova mai qo.” (Roma 8:​22) Na iwali e vakarautaka na Kalou e dodonu, e uasivi ena yalololoma qai veiganiti. E vakamacalataka na Roma 6:​23: “Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.”

A vinaka vakaoti na nona bula na turaga uasivi o Jisu. Na nona mate ena kaunirarawa eda sereki kina na kawatamata talairawarawa mai na veivakabobulataki ni ivalavala ca kei na mate. Eda sa rawa ni nuitaka na bula tawamudu ena vuravura, ni na sega tale kina na vakatulewa cala. Ena sega tale ga kina o ira na dau vakavuna meda rarawa, “ni na muduki tani na daucaka ca.”​—Same 37:9.

Veika tawanamaki kei na bula sega ni uasivi. O Jisu Karisito na Tui Lumuti ni Kalou, e tu vua na kaukaua me lewa na igu kaukaua ni vuravura me vaka na draki, uneune kei na so tale. Ena imatai ni senitiuri  S.K., ratou vodo tiko ena dua na waqa ni qoli o Jisu kei ratou na nona yapositolo “qai tubu mai e dua na batinicagi kaukaua, e suaigelegele na waqa ena kaukaua ni ua ni roba mai na babana, e voleka sara kina ni luvu.” Ni kacivi o Jisu me vukei ratou, “e duri sara ga me vunauca na cagi, e kaya ina wasawasa: ‘Mo maravu!’ Mai ruru yani na cagi, e maravu tale ga na wasawasa.” E ratou kidroa na nona yapositolo, ratou qai kaya: ‘E talairawarawa mada ga vua na cagi kei na wasawasa.’​—Marika 4:​37-​41.

Ena veiliutaki i Jisu, o ira na talairawarawa era na “tiko vinaka, ka na vakacegu ka sega ni rerevaka e dua na ka ca.” (Vosa Vakaibalebale 1:​33) Qori e okati kina na leqa tubukoso. Ena sega tale ga ni vakacacani na vuravura, sega ni gadrevi na itaratara ni vale e vakadonui vakalawa, sega ni leqataki na igu kaukaua e tu e vuravura me vaka na draki, uneune kei na so tale. Io eso tale na leqa e dau vakavuna na kawatamata ena oti yani. Ena sega ni yacovi keda tale na leqa tawanamaki se yacovi keda na leqa nida tiko ena vanua kei na gauna cala.

E vakaraitaka o Jisu ena nona bula e vuravura, e dua tale na ka e vakasakiti kina na nona veiliutaki, qo na nona vakaotia na rarawa e vu mai na veika tawanamaki. E tukuna: “O yau na tucake tale kei na bula.” (Joni 11:25) Io, e tu vei Jisu na kaukaua, e vinakata tale ga me vakaturi ira na vica vata na milioni era mate vakaloloma ena leqa tubukoso. Vakacava, ena yaco dina na yalayala qo? Na nona veivakabulai e vuravura o Jisu eda nuitaki koya kina vakalevu. E volatukutukutaki ena iVolatabu e tolu na ivakaraitaki ni nona veivakabulai.​—Marika 5:​38-​43; Luke 7:​11-​15; Joni 11:​38-​44.

“Na turaga ni vuravura.” Na Kalou e lesi Karisito Jisu me “vakawabokotaki kina na Tevoro, o koya e vakavuna na mate.” (Iperiu 2:​14) E tukuna o Jisu: “E sa lewai tiko na vuravura qo; ena vakamalumalumutaki na turaga ni vuravura qo.” (Joni 12:31) Ena “vaqeavutaka na cakacaka ni Tevoro” o Jisu ena nona vakaotia na veivakamuai ni Tevoro e vuravura. (1 Joni 3:​8) Vakasamataka mada na ivakarau ni bula ena gauna qori ni sa sega kina na yalo kocokoco ni Tevoro, na nona veidabui kei na yalo ni nanumi koya ga!

[Kato ena tabana e 9]

“Yaco Ninaica na Veika Qo?”

Eratou tarogi Jisu na nona imuri: “Ni tukuna mada vei keitou se na yaco ninaica na veika qo, na cava tale ga na ivakatakilakila e dusia ni oni sa tiko, kei na ivakataotioti ni veika vakavuravura?” (Maciu 24:3) E macala mai na isaunitaro i Jisu, salavata kei na so tale na itukutuku uqeti vakalou e volai ni oti nona mate, na ka ena yaco ni sa voleka ni vakaotia na Kalou na rarawa.a Veidutaitaka eso na parofisai qo kei na ivakarau ni bula e sa takalevu tu nikua.

● Veivaluvaluti e vuravura​—Maciu 24:7; Vakatakila 6:4.

● Dausiga kei na mate ca​—Luke 21:11; ­Vakatakila 6:​5-8.

● Vakarusai na vuravura​—Vakatakila 11:18.

● “Lomana na ilavo”​—2 Timoci 3:2.

● “Talaidredre vei ira nodra itubutubu”​—2 Timoci 3:2.

● “Era na lomana ga na marau era sega ni lomana na Kalou”​—2 Timoci 3:4.

Era na marautaka na iVakadinadina i Jiova mera vukei iko mo kila ni sa voleka qo na bula e sega kina na rarawa. Raica e dua na iVakadinadina ena vanua o vakaitikotiko kina. Era na marautaka mera vakavulici iko ena iVolatabu ena nomu vale se vanua veiganiti vei iko.

[iVakamacala e ra]