Vakavu Marau na Soli Ka
SA VOLEKA ni yabaki 50 nona veiqaravi voli mai ena yalodina e dua na tacida yalewa lotu Vakarisito. Dina ni sa qase sara, qai malumalumu tale ga vakayago, ia e nakita dei ga me lai raica na Kingdom Hall e se qai tara vou. E yabeni koya yani e dua na tacida tagane lotu Vakarisito ina loma ni Kingdom Hall, e vakadodonu sara ena dua na vanua sa nanuma tiko me na liu kina—na kato ni cau. E biuta sara kina e dua na ilavo lailai, a dau kumuna tu me baleta na Kingdom Hall vou oqo. Dina ni sega ni rawa ni vakaitavi ena kena tara, ia e via veivuke dina kina.
Na ivakaraitaki ni yalewa lotu Vakarisito oqo o na rairai nanuma lesu tale kina e dua na marama yalodina—na “yada dravudravua” a wanonova toka o Jisu ni biuta e rua na ilavo lalai sara ena kato ni cau ena valenisoro. Dina ni sega sara ni tukuni vakamatailalai na kena ituvaki, ia ena gauna oya ena dredre toka nona bula vakailavo e dua na yalewa e sega tu na watina. Sega ni vakabekataki ni lomani koya dina o Jisu, ni kila vinaka nona leqa. Ni tukuni koya gona o Jisu me ivakaraitaki vei ira nona tisaipeli, e kaya ni nona cau lailai oya e okati sara tiko ga kina “na nona ka kecega, io na nona ka kece e bula kina.”—Marika 12:41-44.
Na cava mada e via cau kina e dua na yada dravudravua vaka oqo e gadreva tu na veivuke? E laurai ena nona cakava oqori ni lomani Jiova dina, na Kalou e sokaloutaki tiko ena valenisoro e Jerusalemi. Dina ni vakaiyalayala ga na ka e rawa ni cakava na marama oqori, ia e via tutaka na veiqaravi tabu. E sega ni vakabekataki ni vakamarautaki koya vakalevu nona cautaka na ka e sa rawata.
Na iSolisoli e Tokoni Kina na Cakacaka i Jiova
E dau tiki bibi ni sokalou savasava na soli ka kei na cau vakailavo, qai vu ni marau levu. (1 Veigauna 29:9) E Isireli makawa, e sega wale ga ni inaki ni cau me vakarairaivinakataki kina na valenisoro, e kena inaki tale ga me qaravi vinaka kece na sokalou e caka vei Jiova e veisiga. E vakaroti ena Lawa vei ira na luve i Isireli mera vakacabora na dua na ikatini ni ka era rawata, mera vukei kina na Livai era veiqaravi tiko ena valenisoro. Ia, o ira tale ga na Livai era na vakacabora vei Jiova na dua na ikatini ni ka e soli vei ira.—Tiko Voli Mai na Lekutu 18:21-29.
E dina ni sega ni vauci ira na lotu Vakarisito na veiyalayalati ni Lawa, ia e dei tu ga na ivakavuvuli vei ira na tamata ni Kalou mera tokona na sokalou savasava ena nodra dau cau. (Kalatia 5:1) Kena ikuri, era marautaka na lotu Vakarisito ena imatai ni senitiuri nodra dau dodoliga ena gauna era leqa kina na tacidra. (Cakacaka 2:45, 46) E tukuna na yapositolo o Paula vei ira na lotu Vakarisito mera dau solia na veika vinaka vei ira tale e so, me vaka ga nona dau soli ka vakayalololoma vei ira na Kalou. E vola: “Vunauci ira era sa vutuniyau e na veika ni vuravura oqo me ra kakua ni qaciqacia se vakararavi ki na i yau sa sega ni tudei, ia me ra vakararavi ga vua na Kalou o koya sa solia wale ga vakayauyau na veika kece ga vei keda me da marau kina. Tukuna vei ira me ra caka vinaka, me ra vutuniyau e na cakacaka vinaka me ra lomasoli ka yalo vinaka ka vakarau tu me ra vota vei ira na tani na ka e tu vei ira, e na sala oqo era na maroroya kina na i yau ka sa i koya na yavu e na tudei e na gauna mai muri ka ra na rawata tale ga na bula, sa i koya na bula dina.” (1 Timoci 6:17-19, VV; 2 Korinica 9:11) Ni a vakadinadinataka o Paula na tikina oqori, e duavata rawa kina kei na vosa i Jisu: “A ka ni veivakalougatataki vakalevu me soli ka, ka vakalailai ga me taura na ka.”—Cakacaka 20:35.
Nodra iSolisoli na Lotu Vakarisito Nikua
Nikua tale ga era dau solia nodra iyau na tamata i Jiova me tokoni kina na cakacaka ni Kalou. O ira mada ga e lailai tu vei ira na ka, era na solia na ka ni veivuke cava ga era rawata. E kila “na dauveiqaravi yalodina ka vuku” ni nona itavi vei Jiova me vakayagataki vinaka na cau kece oqori. (Maciu 24:45, VV) E vakayagataki na cau oqori me cicivaki kina na veivalenivolavola ni tabana, ra vakadewataki ra tabaki vou tale ga na iVolatabu kei na ivola vakaivolatabu, tuvanaki kina na soqoni vakarisito lelevu, ra vakavulici ra qai lesi yani na daukaulotu vaka kina o ira na ivakatawa dauveilakoyaki, ra vukei na vakacacani ena leqa tubukoso, kei na levu tale na veika bibi. Da raica mada e dua na sala sa vakayagataki tiko kina na cau oqori—me tara kina na vanua ni sokalou.
Era dau sota vakavica ena nodra Kingdom Hall na iVakadinadina i Jiova ena dua na macawa mera vakavulici kina vakayalo, ra veimaliwai tale ga kei ira na tacidra. Ia, ena levu na vanua era sotava tu na leqa vakailavo na iVakadinadina, qai dredre mera tara e dua na nodra Kingdom Hall, ia era na rawa ga ni cakava oqori ke soli taumada vei ira na veivuke vakailavo. O koya gona, me tekivu mai na 1999 era tekivuna kina na iVakadinadina i Jiova e dua na ituvatuva me vakayagataki na nodra cau na vanua vutuniyau me tara kina na Kingdom Hall ena veivanua dravudravua. Me kena ikuri, e vicavata na udolu na dau bolecakacaka era solia na nodra gauna kei na kila e tu vei ira, mera vukei ira kina na tacidra ena veivanua ribayawa vaka oqori. O ira tale ga na iVakadinadina ni veivanua oqori era sa bau vulica na tara vale kei na kena vakavinakataki qai veivuke sara ga vakalevu na Kingdom Hall Fund ena voli ni yaya me vakayagataki. O ira na iVakadinadina era sa vakayagataka tiko na Kingdom Hall vovou vaka oqori era dau vakavinavinaka vakalevu ena nodra veivuke kei na nodra cau vakailavo na tacidra. Ena veivula tale ga era dau cau me baleta na qaravi ni Kingdom Hall kei na kena sagai me saumi e so na ilavo a vakayagataki ena kena tara. Na nodra cau tale ga oqori e vukei kina na tara ni so tale na Kingdom Hall.
Ena vakayagataki ga na iwalewale ni tara vale ni vanua oya vaka kina na iyaya sa tu rawa vei ira me tara kina na Kingdom Hall. Dina ni na sega beka ni sau levu, ia ena sagai ga me rairai vinaka, me yaga qai veiganiti. Ni se qai tekivu na ituvatuva ni taravale oqo ena 1999, era a wili ga kina e rauta ni 40 na vanua dravudravua. Me tekivu mai na gauna oya sa tete ina 116 na vanua, e sivia na veimama ni ivavakoso kece ni iVakadinadina i Jiova e vuravura era okati kina. Ena lima na yabaki sa oti e dikevi ni sa tara rawa e 9,000 na Kingdom Hall ni vakamuri tiko na ituvatuva oqo, rauta ni sivia na 5 ena dua na siga! Ia, e se gadrevi tiko ga ena 116 na vanua oqori e 14,500 na Kingdom Hall vovou. E nuitaki ni na rawati vinaka na cakacaka levu oqo ena veivakalougatataki i Jiova kei na nodra lomasoli na iVakadinadina ena veiyasa i vuravura. —Same 127:1.
Tubu na iVavakoso ni Tara Oti na Kingdom Hall
E tarai ira vakacava na iVakadinadina ena veivanua oqori kei na kena vunautaki na itukutuku vinaka na sasaga levu oqori? Ena levu na vanua e laurai ni tubu vakalevu na kedra iwiliwili na tiko ena soqoni ni tara oti na Kingdom Hall vou. Dua na kena ivakaraitaki oqo mai Burundi: “Ni tara oti ga na Kingdom Hall, sega ni bera na kena tawa. Kena ivakaraitaki, a tara e dua na Kingdom Hall me baleti ira e rauta ni 100 era dau soqoni tiko kina. Era na rawa ni dabe kina e 150. Ia, ni sa tara oti era sa soqoni tiko kina e 250.”
Na cava e yaco tiko kina na tubu vaka oqori? Dua, ni sega tu na nodra vanua ni soqoni na dautukutuku ni Matanitu ni Kalou, era dau sota ga ena dua na ruku ni vunikau se dua na veiwere, e vakavuna gona mera kilakasamitaki. Kena ivakaraitaki, ena dua na vanua sa ra kilai tiko kina e so na veimatalotu lalai nira dau veiraravui vakaduikaikai, qai vakarota gona na lawa me sa na tekivu caka na veisoqoni kece vakalotu ena dua na kena vale.
Ni tara tale ga e dua na nodra Kingdom Hall vou na iVakadinadina i Jiova, e ivakadinadina levu oqori vei ira na tiko volekati ira nira sega ni qarava tiko e dua na italatala. E vola mai na valenivolavola ni tabana ni iVakadinadina i Jiova e Zimbabwe: “E liu, era dau vakayagataka na mataveitacini na nona vale e dua na tacida mera soqoni kina, ra qai dau kaya na tiko voleka e kea ni oqori na ivavakoso ni tacida oya. Era dau kaya nira lewena na mataveitacini na lotu nei ‘Mr. Ka (na tacida e nona vale oya).’ Ia, e veisau kece na nodra rai na lewenivanua nira raica na vale ni soqoni vovou kei na kena volai vakamatata tu kina na ‘Kingdom Hall of Jehovah’s Witnesses.’”
Meda Soli Ka ena Marau
“Sa dauvinakata na Kalou na tamata e soli ka e na yalomarau,” e vola na yapositolo o Paula. (2 Korinica 9:7, VV) Sega ni vakabekataki ni yaga sara ga vakalevu na kena dau cautaki e dua na uma ilavo levu. Ia, e dua na iwase levu ni cau e qaravi tiko kina na nodra cakacaka na iVakadinadina i Jiova e rawati ga ena kato ni cau ena Kingdom Hall. Se ra mani lailai se levu, era bibi kece qai sega ni dau vakawaleni. Nanuma ni a raica rawa o Jisu na yada dravudravua a cautaka ga e rua na ilavo lalai. E raici koya tale ga o Jiova kei ira na agilosi. Eda sega mada ga ni kila na yacana, ia e raica ga o Jiova me volaitukutukutaki ena iVolatabu me kilai ena veitabagauna nona lomasoli.
Me ikuri ni kena tara na Kingdom Hall, na noda cau e tokoni tale ga kina na cakacaka bibi tale e so ni kena vakatetei na Matanitu ni Kalou. Eda na marautaka vakalevu na noda veitokoni da qai ‘vakavinavinaka tale ga vakalevu vua na Kalou.’ (2 Korinica 9:12) Era volaitukutukutaka mai na tacida lotu Vakarisito e Benin: “Levu na masu ni vakavinavinaka e cabo vei Jiova ena veisiga, ena vuku ni veivuke vakailavo era dolea mai vei keimami na mataveitacini e vuravura raraba.” Ena gauna vata oqori, e vakavu marau vei keda na lotu Vakarisito noda dau cau vakailavo me tokoni kina na cakacaka e vauca na Matanitu ni Kalou!
[Kato/iYaloyalo ena tabana e 22, 23]
Sala Era Bolea Kina e So Mera Soli Ka
CAU INA CAKACAKA E VURAVURA RARABA
Levu era vakatikitikitaka e dua na iwase ni ilavo mera biuta ina katonicau e vakatokai “iSolisoli ena Cakacaka e Vuravura Raraba—Maciu 24:14.”
Era dau vakauta e veivula na ilavo oqo na ivavakoso yadua ina valenivolavola ni iVakadinadina i Jiova ena nodra dui vanua. Na ilavo e cautaki e rawa ni vakau sara ga vakadodonu ina Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, se ina valenivolavola ni tabana ena nomu vanua. Na jeke me volai kina na “Watch Tower.” E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko oya e soli vakailoloma.
CAU E TIKO NA KENA VEIDINADINATI
E rawa ni cautaki na ilavo ena veidinadinati e tiko, ni na suka tale vua e cau ke mani gadreva o koya. Me baleta e so tale na ivakamacala, yalovinaka qai veitaratara kei na Treasurer’s Office ena itikotiko e volai toka ena imawi.
SOLI KA E LALAWATAKI
Me ikuri ni kena cautaki vakadodonu na ilavo kei na cau ni veidinadinati, e tiko tale e so na mataqali cau me yaga ena cakacaka ni Matanitu ni Kalou e vuravura. Oqo e okati kina na:
Inisua: E rawa ni volai vua na Watch Tower Society na nona inisua e dua se nona ilavo ni vakacegu se peniseni.
Akaude ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni dau tauri tu ga vakawawa ena vuku ni Watch Tower Society, se me qai soli me taukena na Watch Tower Society ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.
Stock kei na Bond: E rawa me dau soli na stock kei na bond ina Watch Tower Society me dua na cau taucoko.
Qele kei na Vale: E rawa me soli vakadua na qele se na vale se, e rawa tale ga me caka e dua na veiyalayalati me se tei tawana tiko mada ga na qele se vale o koya e solia me yacova nona mate. Me veitaratara kei na valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.
Will kei na Trust: E rawa ni soli na iyau se na ilavo ina Watch Tower Society ena kena tabaki e dua na will, se na rawa ni vagolei ina Watch Tower Society na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi ena kena vagolei na trust ina dua na isoqosoqo vakalotu.
Na cau vaka oqo era vakatokai mera “soli ka e lalawataki,” e kena ibalebale ni soli ka vaka oqo e dodonu me lalawa sara kina vakavinaka o koya e via soli ka. Me vukei ira na via soli ka ina cakacaka ni iVakadinadina i Jiova e vuravura raraba ena sala vaka oqo, sa vakarautaki kina e dua na ivola lailai vakavalagi kei na kena vakasipeni e vakatokai na Charitable Planning to Benefit Kingdom Service Worldwide. E volai tale ga na ivola oqo me baleta e so na sala ni soli ka vakailoloma ena gauna sara ga oqo, se me qai soli ena gauna sa mate kina e dua. Ni levu era wilika na ivola lailai oqo ra qai veitaratara kei na nodra dui daunivakasala ni lawa se ivakacavacava kei na Charitable Planning Office, era sa vukei ira kina na iVakadinadina i Jiova e vuravura raraba, qai gauna vata oqori era vakalailaitaka kina na ivakacavacava e dau lavaki vei ira. E rawa ni kerei na ivola lailai oqo ena Charitable Planning Office.
Ena so tale na ivakamacala, e rawa ni o veitaratara kei na Charitable Planning Office, e rawa ni o volavola se qiri ina itikotiko se talevoni e toka oqo e ra, se ina valenivolavola ni iVakadinadina i Jiova ena nomu vanua.
Charitable Planning Office
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Talevoni: (845) 306-0707
[iYaloyalo ena tabana e 20, 21]
Na nodra vanua ni soqoni makawa na iVakadinadina i Jiova kei na kena e tara vou
Zambia
Central African Republic