“Na Veivakalougatataki Maivei Jiova​—Sa Ia na Veivakavutuniyautaki”

EDA vinakata kece meda vakalougatataki. Na veivakalougatataki e vakavuna na marau, tiko vinaka, kei na rawaka. Ni dau solia o Jiova “nai solisoli vinaka kecega kei nai solisoli kecega e yaga sara,” e vu gona mai vua na noda Dauveibuli dau loloma na veivakalougatataki dina e dei. (Jemesa 1:17) E vakalougatataka na kawatamata kece, o ira sara mada ga era sega ni kilai koya. E tukuni Tamana o Jisu: “Sa vakacabea ko koya na nona mata-ni-siga vei ira na tamata ca kei ira na tamata vinaka, a sa vakatauca mai na uca vei ira na tamata yalododonu, kei ira na tamata tawa yalododonu.” (Maciu 5:45) Io, o Jiova e kauaitaki ira dina era lomani koya.—Vakarua 28:1-14; Jope 1:1; 42:12.

E vola na daunisame: “Ena sega ni bureitaka [o Jiova] e dua na ka vinaka vei ira era sa lako vakadodonu.” (Same 84:11) Io, o ira era qaravi Jiova e vinaka qai vakainaki nodra bula. Era kila ni “veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.” E kaya tale na iVolatabu: “Era na taukena na vanua ko ira sa vakalougatataki [vei Jiova].” (Vosa Vakaibalebale 10:22; Same 37:22, 29) Sa tu tu na veivakalougatataki!

Rawa vakacava nida vakalougatataki vei Jiova? E dodonu meda bucina na itovo e taleitaka. (Vakarua 30:16, 19, 20; Maika 6:8) Eda raica oqo ena nodratou ivakaraitaki na tolu na dauveiqaravi i Jiova ena gauna makawa.

Vakalougatataka Nona Dauveiqaravi o Jiova

E kilai tani o Noa ena dina ni nona qaravi Kalou. Na Vakatekivu 6:8 e kaya: “Ko Noa sa kune loloma e na mata i Jiova.” Baleta? E talairawarawa. E kaya na kena itukutuku: “A daulako vata kei na Kalou ko Noa.” E muria o Noa na ivakavuvuli dodonu i Jiova qai talairawarawa ina nona ivakaro. Ena gauna sa sinai tu kina na vuravura ena itovo kaukaua kei na ivakarau vakasisila, e dei o Noa me cakava “na ka kecega sa vakarota vua na Kalou, io, sa cakava vakakina.” (Vakatekivu 6:9, 22) Mani dusimaki koya o Jiova me taya ‘e dua na waqa me vakabulai kina nona lewenivale.’ (Iperiu 11:7) Ena sala oqo e bula kina o Noa, nona vuvale, vaka kina na kawatamata mai na rusa ni tabatamata oya. E mate o Noa ena inuinui ni na vakaturi me bula tawamudu ena vuravura parataisi. Ena vakalougatataki dina!

A tiko tale ga vei Eparama na itovo e so e vakamarautaki Jiova. E liu duadua vei ira oqo na vakabauta. (Iperiu 11:8-10) A biuta o Eparama na bula vakacegu mai Uri vaka kina e muri mai Karana ni vakabauta na vosa ni yalayala i Jiova ni na levu nona kawa, era na kalougata kina na matanitu kece. (Vakatekivu 12:2, 3) Dina ni dede sara nona vakatovolei, e vakaicovitaki nona vakabauta ni sucu na luvena o Aisake. Ena vukuna, e yaco kina o Eparama me tukadra na matanitu digitaki ni Kalou, na Isireli, vaka kina na Mesaia. (Roma 4:19-21) Kuria, e “tamadra kecega era sa vakabauta,” qai vakatokai tale ga me “weka ni Kalou.” (Roma 4:11; Jemesa 2:23; Kalatia 3:7, 29) E vakainaki dina nona bula, qai vakalougatataki vakalevu!

Dikeva tale mada ga na turaga yalodina o Mosese. E kilai tani ena nona itovo ni dau taleitaka na veika vakayalo. E vakanadakuya o Mosese na iyau mai Ijipita qai “gumatua me vaka sa raici koya sa sega ni kune.” (Iperiu 11:27) Ni oti e 40 na yabaki nona tiko mai Mitiani, e lesu tale i Ijipita ni sa kena turaga me sota kei na qaqa ni gauna oya o Fero, me kerea mera sereki na tacina. (Lako Yani 7:1-7) E vakadinadinataka na tau ni tini na kuita, na wasei ni Wasa Damudamu, kei na rusa ni mataivalu i Fero. E taurivaki koya o Jiova me solia vei ira na Isireli na Lawa me qai dauveivuke ni nona veiyalayalati ina matanitu vou oqo. E 40 na yabaki nona liutaki ira voli na Isireli o Mosese ena vanualiwa. E vakainaki dina nona bula qai marautaka kece na nona ilesilesi.

Veivakalougatataki Nikua

Na ivakaraitaki kece oqo e dusia ni vakainaki dina nodra bula o ira na qarava na Kalou. Nira bucina na tamata i Jiova na itovo me vaka na talairawarawa, vakabauta, kei na taleitaki ni veika vakayalo, era vakalougatataki kina.

Eda vakalougatataki vakacava? Nira lauqa vakayalo e vica vata na milioni ena lotu ni Veivanua Vakarisito, eda “marau ena vinaka i Jiova.” (Jeremaia 31:12, NW) Ni vakayagataki Jisu Karisito kei na “dauveiqaravi yalodina ka vuku,” e vakarautaka vakayauyau o Jiova na kakana vakayalo meda dei tiko ga kina ena “sala sa basika ki na bula.” (Maciu 7:13, 14; 24:45, VV; Joni 17:3) E veivakalougatataki tale ga noda veimaliwai kei ira na tacida vakarisito. Ena veisoqoni kei na so tale na soqo, nida tiko kei ira eda sokalou vata ra vakaraitaka na loloma ra qai saga vakaukaua mera tokara na “tamata vou” e vakavumarau dina. (Kolosa 3:8-10, VV; Same 133:1) Ia, na veivakalougatataki levu duadua noda rawa ni veiwekani kei na Kalou o Jiova kei na noda vakatotomuria na weniyava i Luvena, o Karisito Jisu.—⁠Roma 5:1, 8; Filipai 3:8.

Nida vakasamataka na veivakalougatataki vaka oqo, eda kila kina na bibi ni noda veiqaravi vua na Kalou. Eda nanuma kina na ivakatautauvata i Jisu me baleta na dauveivoli e vakasaqara e so na mataniciva vinaka. E tukuni koya o Jisu: “Ia ni sa kunea e dua na mata-ni-civa talei sara, sa lako ka volitaka na ka kecega sa tu vua, ka sa volia na ka ko ya.” (Maciu 13:46) E vaka sara ga oya noda raica noda veiwekani kei na Kalou, na itavi dokai meda qaravi koya, na veimaliwai vakarisito, noda inuinui vakarisito, kei na veivakalougatataki kece e semai kei na noda vakabauta. E sega tale ni dua na ka e talei cake ena noda bula.

Solia Lesu Vei Jiova

Eda via vakavinavinakataka na veika eda vakalougatataki kina nida kila ni o Jiova e dau solia na isolisoli vinaka kece ga. Eda na cakava vakacava? Dua oya noda vukei ira tale e so mera vakila tale ga na veivakalougatataki eda sotava. (Maciu 28:19) Ena sivia na 230 na vanua, sa ra ogaoga tiko ni cakava na ka oqo na iVakadinadina i Jiova nira sikovi ira na wekadra. Nira cakava oya, era vakayagataka na ka era taukena—⁠na gauna, kaukaua, kei na nodra iyau—⁠mera vukei tale kina e so mera “mai kila sara nai vakavuvuli dina.”—⁠1 Timoci 2:⁠4.

Vakasamataki rau mada na painia erau vakaitikotiko e Glendale, Kalifonia, mai Mereke. Ena veimataka kece ni Vakarauwai, erau dau lakova e 100 na kilomita me rau lai sikova e dua na valeniveivesu. Dina ni dau vica ga na aua nodrau veivosaki kei ira na kaivesu ena dua na veisiko, erau sega ni yalolailai. E kaya e dua vei rau: “E yaga dina neirau veiqaravi ena yalava duatani vaka oqo. Keirau marautaka. Levu era tataleitaki, e dredre me keirau tarai ira kece. Ena gauna mada ga oqo, keirau vuli tiko kei iratou e lewe lima, e va tale sa ratou via vuli iVolatabu.”

Era marau na italatala lotu Vakarisito gugumatua mera cakava wale na cakacaka ni veivakabulai oqo. E tiko vei ira na rai i Jisu, ni kaya: “Dou a rawata walega, mo dou solia walega.” (Maciu 10:8) Vica vata na milioni ena veiyasa i vuravura era cakava tiko na cakacaka vata ga oqo, e levu kina na tamata lomadina era rogoca, era sa mai tisaipeli sara. Ena lima mada ga na yabaki se qai oti oqo, voleka ni 1.7 na milioni sa ra yalataka nodra bula vei Jiova. Me qaravi na tubu levu oqo, e gadrevi kina me tabaki na iVolatabu kei na ivola vakaivolatabu, vaka kina na tara ni Kingdom Hall vovou kei na so tale na vanua ni soqoni. E kau mai vei na ilavo me caka kina na ka oqo? Ena cau duadua ga.

Ena vuku ni leqa vakailavo ena so na yasa i vuravura, e levu era sasaga kina vakaukaua mera bau rawata mada ga na veika me bula kina nodra vuvale. E kaya na ivola na New Scientist, ni duanabilioni era vakayagataka e 70 na pasede ni nodra ilavo vakavuvale ena kakana. Levu na tacida tagane kei na yalewa lotu Vakarisito era tu ena ituvaki oqo. Ke ra sega ni veivuke na tacidra vakayalo, ena sega na nodra ivolatabaki vakarisito se na Kingdom Hall vinaka.

Ia, e sega ni kena ibalebale oya nira vakasavuliga o ira oqo me qai dua tale e qarava nodra icolacola. Era gadreva na veivuke. Ni vakayaloqaqataki ira tiko na Isireli o Mosese mera cau me ivakaraitaki ni nodra vakavinavinakataka na veivakalougatataki i Jiova, e kaya: “Me ra solia ko ira na tamata yadua me vaka na ka era sa rawata, me vaka na ka sa solia vei kemuni ko Jiova na nomuni Kalou ni sa vakalougatataki kemuni.” (Vakarua 16:17) Ni raica gona o Jisu ena valenisoro ni cautaka e dua na yada “e rua nai lavo lalai sara,” e vakacaucautaki koya sara vei iratou na tisaipeli. A solia na ka e rawata. (Luke 21:2, 3) O ira na lotu Vakarisito dravudravua era vakayacora vaka kina nira solia na ka era rawata. Ke dua na ka era lekata, ena qai sosomitaki ena nodra cau na nodra itokani lotu Vakarisito era sega sara ni dravudravua.​—2 Korinica 8:13-15.

E bibi me tiko vei keda na rai dodonu nida soli ka lesu vaka oqo vei Jiova. (2 Korinica 8:12) E kaya o Paula: “Me ra dui solia me vaka na ka sa vinakata ko koya yadua e na yalona; me kakua e na voraki, se ni sa vakasaurarataki: ia ko koya sa solia e na marau sa vinakata na Kalou.” (2 Korinica 9:7) Nida soli ka mai vu ni lomada, sa da tokona tiko kina na tubu ni isoqosoqo ni Kalou nikua, eda na marau tale ga kina vakalevu.​—Cakacaka 20:35.

Na cakacaka vakavunau kei na cau e rua na sala e rawa nida dolea lesu kina na veika e vakalougatataki keda kina o Jiova. E veivakauqeti tale ga meda kila ni o Jiova e via vakalougatataki ira tale e levu na tamata lomadina, era se sega ni kilai koya! (2 Pita 3:⁠9) Koya gona, meda vakayagataka mada ga na ka eda taukena ena cakacaka i Jiova meda qarai ira kina na tamata lomadina da qai vukei ira mera bucina na itovo me vaka na talairawarawa, vakabauta, kei na vakavinavinaka. Ena sala oya, eda na marau nida vukei ira mera “tovolea mada ka raica ni sa yalovinaka ko Jiova.”​—Same 34:8.

[Kato ena tabana e 28, 29]

Sala Era Bolea Kina e So Mera Soli Ka

CAU INA CAKCAKA E VURAVURA RARABA

Levu era vakatikitikitaka e dua na iwase ni ilavo mera biuta ina katonicau e vakatokai “iSolisoli Ena Cakacaka e Vuravura Raraba—⁠Maciu 24:14.”

Era dau vakauta e veivula na ilavo oqo na ivavakoso yadua ina valenivolavola liu ni iVakadinadina i Jiova mai Brooklyn, Niu Yoka, se ina valenitabana ena nodra vanua. Na ilavo e cautaki e rawa ni vakau sara ga vakadodonu ina Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, se ina valenivolavola ni tabana ena nomu vanua. E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko oya e soli vakailoloma.

CAU E TIKO NA KENA VEIDINADINATI

E rawa ni cautaki na ilavo ena veidinadinati e tiko, ni na suka tale vua e cau ke mani gadreva o koya. Me baleta e so tale na ivakamacala, yalovinaka qai veitaratara kei na Treasurer’s Office ena itikotiko e volai toka e cake.

SOLI KA E LALAWATAKI

Me ikuri ni kena cautaki vakadodonu na ilavo kei na cau ni veidinadinati, e tiko tale e so na mataqali cau me yaga ena cakacaka ni Matanitu ni Kalou e vuravura. Oqo e okati kina na:

Inisua: E rawa ni volai vua na Watch Tower Society na nona inisua e dua se nona ilavo ni vakacegu se peniseni.

Akaude Ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu e dua e rawa ni dau tauri tu ga vakawawa ena vuku ni Watch Tower Society, se me qai soli me taukena na Watch Tower Society ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock Kei na Bond: E rawa me dau soli na stock kei na bond ina Watch Tower Society me dua na cau taucoko.

Qele Kei na Vale: E rawa me soli vakadua na qele se na vale ina Watch Tower Society se me caka e dua na veiyalayalati me tawana tiko ga na qele se na vale o koya e solia me yacova nona mate. Me veitaratara kei na valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.

Will Kei na Trust: E rawa ni soli na iyau se na ilavo ina Watch Tower Society ena kena tabaki e dua na will e vakadonui vakalawa, se na rawa ni vagolei ina Watch Tower Society na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi ena kena vagolei na trust ina dua na isoqosoqo vakalotu.

Na cau vaka oqo era vakatokai mera “solika e lalawataki,” e kena ibalebale ni solika vaka oqo e dodonu me lalawa sara kina vakavinaka o koya e via solika. Me vukei ira na via solika ina cakacaka ni iVakadinadina i Jiova e vuravura raraba ena sala vaka oqo sa vakarautaki kina e dua na ivola lailai vakavalagi kei na kena vakasipeni e vakatokai na Charitable Planning to Benefit Kingdom Service Worldwide. E volai na ivola oqo ena vuku ni vakatataro e tauri me baleta na iloloma, will kei na trust. E tiko tale ga kina e so na ivakamacala yaga me baleta na qele taukeni, na lalawa vakailavo kei na ivakacavacava. E vakarautaki na ivola oqo mera vukei kina o ira mai Mereke era lalawataka tiko mera solika vakailoloma ena gauna sara ga oqo, se mera vakarautaka e dua na ka me qai soli nira sa na mate, ia me vakatau sara ga ena ituvaki ni nodra vuvale se kedra ituvaki yadua. E rawa ni kerei na ivola lailai oqo ena Charitable Planning Office.

Nira wilika e levu na tikidua oqo kei na nodra veitaratara kei na Charitable Planning Office, sa ra vukei ira sara na iVakadinadina i Jiova e vuravura raraba, qai gauna vata oqori era vakalailaitaka kina na ivakacavacava e dau lavaki vei ira. E dodonu me vakaraitaki ina Charitable Planning Office na isolisoli vaka oqo, kei na veika vakaivola kece e vauca. Ke o via solika ena ituvatuva ni solika e lalawataki, e dodonu mo veitaratara kei na Charitable Planning Office, e rawa ni o volavola se qiri ina itikotiko se talevoni e toka oqo e ra, se ina valenivolavola ni iVakadinadina i Jiova ena nomu vanua.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Talevoni: (845) 306-0707