‘Meda Cabora Vei Jiova na iMadrali’

NI CAKA vinaka vei iko e dua, na cava o na cakava mo vakavinavinakataki koya kina? Vakasamataka mada na sala era vakaraitaka kina na nodra vakavinavinaka na iliuliu ni mataivalu ni Isireli ni oti na nodra veivaluvaluti kei ira na kai Mitiani. A yaco na ivalu ni oti na nodra valavala ca na Isireli ena nodra qaravi Peali-piori. Era qaqa na Isireli ena veivuke ni Kalou, ra qai wasea na itoki ni valu na 12,000 na sotia kei ira na vo ni Isireli. Me salavata kei na veidusimaki i Jiova, era cautaka na sotia e dua na pasede ni nodra ivotavota vei ira na bete, ra solia tale ga e dua na pasede na vo ni Isireli vei ira na Livai.—Tiko 31:1-5, 25-30.

Ia o ira na iliuliu ni mataivalu era vinakata mera vakalevutaka na ka era solia. Era tukuna vei Mosese: “Koi keitou na nomu tamata, keitou sa wiliki ira oti na tamatai valu keitou sa lesi me lewa, ka sa sega ni yali e dua vei keimami.” Ena nodra cau vei Jiova, era solia kina na koula kei na iyaya talei, qai rauta ni 190 na kilokaramu na bi ni koula.—Tiko 31:49-54.

Nikua, e levu era via vakaraitaka tale ga va qori na nodra vakavinavinakataka na levu ni ka e cakava o Jiova ena vukudra. E sega ni yalani na yalo ni vakavinavinaka va qori vei ira na dauveiqaravi yalayala ni Kalou. Raica mada qo e dua na kena ivakaraitaki, e dua na draiva ni basi a kauti ira tiko eso na mataveitacini mai vanuatani mera gole ena raraniqito a caka tiko kina na soqo ni veimatanitu ni iVakadinadina i Jiova e Bologna, e Itali ena 2009. Ni sega ni draiva vakasausa qai turaga yalomalua, era nanuma kina na mataveitacini era vodo tiko ena basi mera vola e dua na ivola lailai ni vakavinavinaka, ra solia e dua na nona ilavo (tip) kei na ivola Na Cava Sara Mada e Kaya na iVolatabu? A tukuna na draiva ni basi: “Au ciqoma ena marau na nomuni ivola lailai ni vakavinavinaka kei na ivola vakaivolatabu oni solia, ia au na vakasuka na ilavo me noqu cau ena kena tokoni tiko ga na cakacaka oni cakava tiko. Au sega ni iVakadinadina i Jiova, ia au via cau baleta niu vakadinadinataka ni oni cakava na ka ena loloma.”

Ni o vakavinavinakataka na ka e cakava ena vukumu o Jiova, e dua na sala o rawa ni cakava kina qori ena nomu cau ena cakacaka e vuravura raraba ni iVakadinadina i Jiova. (Maciu 24:14) E volai koto ena kato na sala eda rawa ni cau kina.

[Kato ena tabana e 20, 21]

SALA ERA BOLEA KINA E SO MERA SOLI KA

CAU INA CAKACAKA E VURAVURA RARABA

Levu era vakatikitikitaka e dua na iwase ni ilavo mera biuta ina katonicau e vakatokai “Cakacaka e Vuravura Raraba.”

Era dau vakauta e veivula na ilavo qo na ivavakoso yadua ina valenivolavola ni iVakadinadina i Jiova ena nodra dui vanua. Na ilavo e cautaki e rawa ni vakau sara ga vakadodonu ina Watchtower Bible and Tract Society of New York Inc., Attention Treasurer’s Office, 25 Columbia Heights, Brooklyn, New York 11201-2483, se ina valenivolavola ni tabana ni iVakadinadina i Jiova ena nomu vanua. Na jeke e vakau ina itikotiko e volai toka e cake me volai kina na “Watchtower.” E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko e soli vakailoloma.

CAU E TIKO NA KENA VEIDINADINATI

E rawa ni cautaki na ilavo ina Watch Tower Bible and Tract Society of Pennsylvania ena dua na veidinadinati me vakayagataki e vuravura raraba, ia ena suka tale vua e cau ke mani gadreva. Me baleta e so tale na ivakamacala, yalovinaka qai volavola ina Treasurer’s Office ena itikotiko e volai toka mai cake.

SOLI KA E LALAWATAKI

Me ikuri ni kena cautaki vakadodonu na ilavo, e tiko tale e so na mataqali cau me yaga ena cakacaka ni Matanitu ni Kalou e vuravura. Qo e okati kina na:

Inisua: E rawa ni volai ina Watch Tower Bible and Tract Society of Pennsylvania na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni dau tauri tu ga vakawawa ena vuku ni Watch Tower Bible and Tract Society of Pennsylvania, se me qai soli me taukena na Watch Tower and Tract Society of Pennsylvania ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa ni dau soli na stock kei na bond ina Watch Tower Bible and Tract Society of Pennsylvania me dua ga na cau vakadodonu.

Qele kei na Vale: E rawa me soli vakadua na qele se na vale se rawa tale ga me caka e dua na veiyalayalati me se tei tawana tiko mada ga na qele se vale o koya e solia me yacova nona mate. Me tukuna yani ina valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.

Will kei na Trust: E rawa ni soli na iyau se na ilavo ina Watch Tower Bible and Tract Society of Pennsylvania ena kena tabaki e dua na will, se na rawa ni vagolei ina Watch Tower Bible and Tract Society of Pennsylvania na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi na kena vagolei na trust ina dua na isoqosoqo vakalotu.

Na cau va qo era vakatokai mera “soli ka e lalawataki,” e kena ibalebale ni soli ka va qo e dodonu me lalawa sara ga kina vakavinaka o koya e via soli ka. Me dusimaki ira na via soli ka ina cakacaka ni iVakadinadina i Jiova e vuravura raraba, sa vakarautaki kina e dua na ivola lailai vakavalagi kei na kena vakaSipeni e vakatokai na Charitable Planning to Benefit Kingdom Service Worldwide. E volai na ivola qo me baleta e so na sala ni soli ka vakailoloma ena gauna sara ga qo, se me qai soli ena gauna sa mate kina e dua. Nira wilika na ivola lailai qo ra qai veivosaki kei na nodra dui daunivakasala ni lawa se ivakacavacava, era le levu era sa veivukei ena nodra cakacaka vakalotu kei na nodra veivukei na iVakadinadina i Jiova e vuravura raraba, qai gauna vata qori era vakalailaitaka kina na ivakacavacava e dau lavaki vei ira. E rawa ni kerei na ivola lailai qo ina Charitable Planning Office.

Ena so tale na ivakamacala, e rawa ni o veivosaki kei na Charitable Planning Office, e rawa ni o volavola ina itikotiko se qiri ena talevoni e toka qo e ra, se tukutuku yani ina valenivolavola ni iVakadinadina i Jiova ena nomu vanua.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707