Taro na Dauwiliwili
E ka vakayalomatua beka vua e dua na lotu Vakarisito dina me lai tiko ena lotu ni veibulu se vakamau e valenilotu?
E cata o Jiova ke da vakaitavi ena dua na ka e tiki ni lotu lasu, o koya gona, meda qaqarauni sara kina. (2 Korinica 6:14-17; Vakatakila 18:4) E ivalavala vakalotu na lotu ni veibulu, e sega ni vakabekataki ni na okati kina na vunau e vakabulabulataka na ivakavuvuli tawavakaivolatabu ni sega ni mate na yalo, se era lako kece i lomalagi na tamata vinaka. De dua ena caka tale ga na tonotono me vakatakilakilataka na kauveilatai, se meda masu vata kei na bete se italatala. Ena lotu ni vakamau e valenilotu, se ena duatani tale na vanua, e vuqa na gauna e dau okati tale ga kina na masu kei na ivalavala vakalotu tale e so e veisaqasaqa kei na ivakavuvuli vakaivolatabu. Ke maliwai ira tiko na cakava e so na ivalavala vakalotu tawavakalou vaka oqo na lotu Vakarisito, ena rawarawa vua me vakamuai me cakava tale ga vaka kina. E sega gona ni ka vakayalomatua meda lai tu ena dua na ituvaki e drakidrakita vaka oya!
Vakacava ke nanuma e dua na lotu Vakarisito ni sega ni rawa me levea na nona lai tiko e valenilotu ni caka na lotu ni veibulu se vakamau? Me kena ivakaraitaki, e sega ni tiko ena vakabauta na watina tagane e dua na yalewa lotu Vakarisito, e rairai uqeti watina yalewa me tomani koya ena dua vei rau na soqo oqo. E rawa beka ni tomani watina tagane, ia me kua ga ni lai coko ena dua na ka? Ni dokai watina tagane, ena rairai nakita o yalewa me rau na veitomani, ia me kua ga ni lai vakaitavi ena dua na ivalavala vakalotu. Se nakita o yalewa me sa kua ga ni lako, de mani lai vusolo vakasivia na yalona ena vuku ni soqo qai lai tini cakava kina e dua na ka e veicoqacoqa kei na ivakavuvuli vakalou. E nona sara ga na digidigi. Me vakadeitaka e lomana na ikalawa me na muria, ia me savasava tiko ga kina na nona lewaeloma.—1 Timoci 1:19.
Se mani cava ena cakava, ena vinaka me vakamacalataka vei watina tagane ni sega ni rawa ni lai vakaitavi ena dua na ivalavala vakalotu, na lagati ni serenilotu, se me na cuva ena masu. De dua ni rogoca o watina tagane na nona ivakamacala, ena lewa me sa kua mada ga ni lako o watina yalewa me tarova na kena lai yaco e dua na ituvaki ena rairai sega ni na marautaka. Ni lomani watina yalewa, qai doka na nona vakabauta ena rairai nakita me lako taudua, me kua tale ga ni na madua kina. Ia ke vakaukauataka o watina tagane me salavata kei koya o watina yalewa, de rawa ni gole ia ena sega ga ni lai vakaitavi ena dua na ivalavala vakalotu.
Me nanumi tale ga na nodra rai na mataveitacini ke ra raici keda nida lai curu tu e valenilotu ena lotu ni veibulu se vakamau. Ena rawa ni veivakatarabetaki, se sega beka? Se rawa ni na luluqa kina na nona vakatabui koya e dua mai na qaravi kalou lasu, se vakaevei? E veivakadreti na yapositolo o Paula meda “dau digitaka na veika e uasivi sara” meda ‘galala kina mai na veika dukadukali kece ga ka na sega na ka meda beitaki kina ena siga ena lako mai kina na Karisito.’—Filipai 1:10, VV.
Ke caka na soqo me baleta e dua na wekada voleka, sa macala ga ni na ka ni veivosaki toka ke da sega ni na tiko kina. Ia se mani baleti cei na soqo, e dodonu ga vua na lotu Vakarisito me vakalewa vinaka na veika kece ena vauci kina. De so na ituvaki ena nanuma kina na lotu Vakarisito ni na sega na kena leqa ke tiko ena lotu ni veibulu se vakamau e caka e valenilotu, ia me kua ga ni lai vakaitavi ena dua na ivalavala vakalotu. Ena yasana kadua, ena vakalailaitaka beka na veivosaki ke vakadonuya na lotu Vakarisito me na lai tiko kina, ia ni vakasamataka na kena rawa ni vakacaraka na nona lewaeloma kei na nodra na tani, de vinaka me sa tei yalani koya mada ga mai kina. Se mani cava e sotavi, me vakadeitaka ga na lotu Vakarisito ni ka e vakatulewataka me cakava ena sega ni vakacaraka na vinaka ni nona lewaeloma ena mata ni Kalou kei ira na tamata.