Taro na Dauwiliwili

E kilikili beka vua e dua na iVakadinadina i Jiova me tiko ena vakamau ni dua na wekana se itokani e sega ni qaravi Jiova?

E gauna marautaki na vakamau, e sega ni vakabekataki ni na via tiko tale ga ena soqo ni marau vaka oqori na lotu Vakarisito. Kevaka era sureti na itabagone, mera vakarorogo vei ira nodra itubutubu se o ira na veiqaravi ena vukudra, mera na vakatulewataka na ka me caka. (Efeso 6:​1-3) Ia, vakacava ke kerei watina lotu Vakarisito e dua na tagane e sega ni iVakadinadina i Jiova, me rau veitomani ina dua na vakamau vakalotu? De na rairai vakadonuya nona lewaeloma me lai sarasara ga, ia me kua ni vakaitavi ena dua na ka vakalotu e caka me baleta na soqo.

O koya gona, nona tiko se sega na lotu Vakarisito ena vakamau vaka oqori e nona vakatulewa sara ga. Ia, me nanuma tiko ni na saumitaro vei Jiova, ena vinaka gona me dikeva e so na ivakavuvuli vakaivolatabu qai vakatulewataka me tiko se sega ena nona vakamau e dua e sega ni iVakadinadina i Jiova.

E bibi duadua vua na lotu Vakarisito me vakadonui koya na Kalou. A kaya o Jisu: “A Yalo na Kalou: ia ko ira sa lotu vua, e dodonu me ra lotu vakayalo ka vakaidina.” (Joni 4:​24) Koya gona, era sega ni vakaitavi na iVakadinadina i Jiova ena nodra ivalavala ni sokalou na lotu tale e so, me vaka na masumasu se soqo vakalotu e veisaqasaqa kei na ivakavuvuli vakaivolatabu.​—2 Korinica 6:​14-​17.

E kila e dua na lotu Vakarisito ni nona vakatulewa ena cakayaco vei ira e so tale. Kevaka o vakatulewataka mo na tiko ena vakamau, era na cudru beka na wekamu ke o sega ni vakaitavi ena veika kece e vauca na soqo? Me nanumi tale ga na kena cakayaco vei ira na tacida vakayalo. (Roma 14:13) De o nanuma se ra nanuma e so na lewe ni nomu vuvale ni sega ni cala na lai tiko ena nona vakamau e dua e sega ni iVakadinadina. Ia, vakacava o ira na tacimu vakayalo, era na tarabe beka kina? Ena vakaleqa beka nodra lewaeloma e so?

Ena basika e so na ituvaki dredre ena nodra soqo ni vakamau na wekada era sega ni iVakadinadina. Vakacava ke o kerei mo duri vata kei koya e vakamau? Se via vakaitavi o watimu sega ni iVakadinadina ena ka kece e vauca na kena soqo? Ke cakava na vakamau e dua na turaganilewa se vakailesilesi ni matanitu, ena rairai okati ga mo lai vakadinadinataka na kena vakalawataki na vakamau.

Ia, e leqataki na vakamau e caka ena vale e dau vakayagataki ena ka vakalotu se cakava na vakamau e dua na italatala. O na rairai vakatulewataka mo kua ni tiko ena vakamau, mo muria kina na nomu lewaeloma vakavulici vakaivolatabu, mo kua tale ga ni cakava na ka e veisaqasaqa kei na nomu vakabauta qai vakamadualaki ratou na itaukei ni soqo. (Vosa Vakaibalebale 22:3) Ena yaga vei iko kei iratou na lewe ni nomu vuvale ke o vakamacalataka rawa vakailiu na nomu vakabauta yavutaki vakaivolatabu, vakaraitaka na vanua ena yalani kina nomudou vakaitavi qai vakatura e so tale na ka dou rawa ni veivuke kina.

Ni vakalewai oti na veika kece me dikevi, era na vakatulewataka e so na lotu Vakarisito ni sega ni cala ke ra tiko ena nona vakamau e dua e sega ni iVakadinadina baleta nira na sega ni vakaitavi ena ka vakalotu. Ia, ena vakadeitaka e dua na lotu Vakarisito, ni na vakavu leqa vakalevu nona tiko ena vakamau ke nanuma ni na temaki me beca na ivakavuvuli vakaivolatabu. Kevaka e lewa me kua ni tiko ena vakamau, me qai lai tiko ga ena kena soqo, ia me vakadeitaka me ‘cakava na ka kece ena vakarokorokotaki kina na Kalou.’ (1 Korinica 10:31) Ena vakatulewa vaka oqori, ‘na tamata yadua ena colata na nona icolacola.’ (Kalatia 6:5) Se cava ga o vakatulewataka, nanuma tiko ni bibi me vinaka tiko ga nomu lewaeloma ena mata i Jiova.