Vakararamataki Ira Nona Tamata O Jiova — Watchtower LAIBRI ENA INTERNET

Vakararamataki Ira Nona Tamata O Jiova

“Ni na nomu rarama ko Jiova ka sega ni mudu.”—AISEA 60:20.

1. E vakalougatataki ira vakacava na nona tamata yalodina o Jiova?

“SA VINAKATI ira na nona tamata ko Jiova: ena vakaiukuukutaki ira na yalomalumalumu e na bula.” (Same 149:4) E cavuta na vosa oqo na daunisame, sa vakadeitaki tale ga ni dina na vosa oya. Nira yalodina na nona tamata, e dau kauaitaki ira, e vakatubui ira, qai taqomaki ira tale ga o Jiova. Ena gauna makawa, e vukei ira mera vakamalumalumutaki ira na nodra meca. Ia, ena gauna oqo, e vakaukauataki ira tiko vakayalo. E yalataka tale ga ni na vakabulai ira ena vuku ni isoro i Jisu. (Roma 5:9) E cakava na veika oya baleta nira rairai totoka e matana.

2. Dina ga nira na vakacacani, na cava era nuitaka na tamata ni Kalou?

² Era na vakararawataki o ira ‘na lotu dina’ era tu ena vuravura butobuto oqo. (2 Timoci 3:12) Ia, e raici ira tiko mai na dauveitusaqati o Jiova, e mani vakasalataki ira kina: “Ia na vanua kei na matanitu ena bese ni qaravi iko ena rusa; io, na veimatanitu ko ya ena vakalalataki sara ga.” (Aisea 60:12) E laurai nikua e levu na mataqali veitusaqati. Ena so na vanua, era saga na dauveitusaqati mera tarova se vakatabuya na nodra sokalou vei Jiova na lotu Vakarisito dina. Era mokulaki ira ra qai vakama na veika era taukena na dausokaloutaki Jiova o ira na dauveitusaqati lomaca. Ia sa tukuna oti o Jiova na ka era na sotava na dautusaqata na nona inaki. Ena vodi nodra sasaga. Ena sega ni yaco na lomadra o ira na vala kei Saioni se o ira na luvena era matataki koya tiko e vuravura. E sega li ni veivakauqeti na vosa oqo ni Kalou levu o Jiova?

Veivakalougatataki Sega ni Namaki

3. E vakatakarakarataki vakacava na totoka kei na nodra vuavuaivinaka na dauqaravi Jiova?

³ Ena iotioti ni veisiga oqo, era sega ni bau namaka na nona tamata na levu ni nona veivakalougatataki o Jiova. Vakauasivi na nona toroya cake tiko ga na vanua e sokaloutaki kina kei na nona vukei ira na vakayacani vua. Me vaka na parofisai i Aisea, e kaya vei Saioni o Jiova: “Nai ukuuku kei Lepanoni ena yaco mai vei iko, na damanu kei na paini, kei na dilo, me vakaiukuukutaka na yasa ni noqu vale tabu, ia nai tutu-ni-yavaqu ka’u na vakalagilagitaka.” (Aisea 60:13) E totoka dina na irairai ni ulunivanua e veikauloa. Sa rauta me vakatakarakarataka na veikauloa na nodra totoka ra qai vuavuaivinaka na dauqaravi Jiova.—Aisea 41:19; 55:13.

4. Na cava na “vale tabu” kei na ‘itutu ni yava’ i Jiova, e vakaiukuukutaki vakacava?

⁴ Na cava na “vale tabu” kei na ‘itutu ni yava’ i Jiova e tukuni ena Aisea 60:13? Oqo e vakaibalebaletaki ina lomanibai ni valenisoro vakayalo i Jiova, se na sala ni noda torovi koya ena sokalou ena vuku i Jisu Karisito. (Iperiu 8:1-5; 9:2-10, 23) Sa vakaraitaka o Jiova na nona inaki me vakaiukuukutaka na nona valenisoro vakayalo ena nona kauti ira mai na tamata mai na veimatanitu mera mai sokalou vua. (Akeai 2:7) A raica tale ga o Aisea na nodra drodro ina ulunivanua ni sokalou vei Jiova na ilawalawa levu mai na veimatanitu. (Aisea 2:1-4) Ni oti e vica vata na drau na yabaki, e raica na yapositolo o Joni ena raivotu e “dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa.” Era tu ena “mata ni tikotiko ni Kalou . . . , a ra sa qaravi koya e na siga kei na bogi e nona vale-ni-lotu.” (Vakatakila 7:9, 15) Eda sa raica tiko na kena vakaiukuukutaki na vale i Jiova baleta ni sa vakayacori tiko na veiparofisai oqori.

5. Na veisau vinaka cava era sotava na luve i Saioni?

⁵ Oqo e dua na veisau vinaka vei Saioni! E kaya o Jiova: “Ia, ni ko a biu ka cati, ka sega e veilakovi kei iko, ka’u na qai qisi iko kina mo lagilagi ka sega ni mudu, mo vu ni marau vei ira na veitabatamata kecega.” (Aisea 60:15) Ni vakarau cava na imatai ni ivalu levu, e galili vakalailai “na Isireli ni Kalou.” (Kalatia 6:16) E vakila na nona “biu” baleta ni a sega ni matata vinaka vei ira na luvena na inaki ni Kalou me baleti ira. Ia e qai vakabulai ira tale na nona dauveiqaravi lumuti o Jiova ena 1919, ni sa tekivu vakalougatataki ira tale vakayalo. Eda marautaka tale ga na ka e yalataki ena tikinivolatabu oqo. Ena raici Saioni o Jiova me vaka e dua na ka “lagilagi.” Io, era na dokai Saioni o ira na luvena kei Jiova. Ena “vu ni marau” tale ga. Ena sega ni vu ni marau ga ena dua na gauna lekaleka. Na marau nei Saioni, me vaka era vakadinadinataka tiko na luvena e vuravura, ena yacova na “veitabatamata kecega.” Ena sega ni oti rawa.

6. Era vakayagataka vakacava na lotu Vakarisito dina na veika era taukena na veimatanitu tani?

⁶ Rogoca tale mada e dua na vosa ni yalayala ni Kalou oqo. E tukuna vei Saioni o Jiova: “Ko na sucuma na nodra wai-ni-sucu na veimatanitu tani, ia na sucudra na tui ko na sucuma: ko na qai kila ni sai au ko Jiova na nomui Vakabula, ni sai Koya ka voli iko na Kaukauwa nei Jekope.” (Aisea 60:16) E sucuma vakacava o Saioni na “nodra wai-ni-sucu na veimatanitu tani” kei na “sucudra na tui”? E yaco oqo nira vakayagataka na lotu Vakarisito lumuti vaka kina o ira na nodra itokani ‘so tani tale na sipi’ na veika era taukena na veimatanitu tani mera vakatetea kina na sokalou savasava. (Joni 10:16) Era ciqoma na cau vakailavo e vukea na nodra vunau kei na veivakavulici ena veiyasa i vuravura. Era vakayagataka tale ga na veimisini vovou mera tabaka kina na iVolatabu kei na ivola vakaivolatabu ena vica na drau na vosa. Sa ra le levu cake sara nikua era rawa ni wilika na veika dina mai na iVolatabu ni vakatauvatani kei na veigauna sa oti. Era sa qai raica rawa na lewe ni veimatanitu ni o Jiova, o koya e sereki ira nona dauveiqaravi lumuti mai na nodra vesuki tu vakayalo, e dauveivakabulai dina.

Na Toso ni iSoqosoqo

7. Na cava era toroya cake na luve i Saioni?

⁷ E dua tale na sala e vakaiukuukutaki ira kina na nona tamata o Jiova. Ni toroya cake na ivakarau ni kena cicivaki na nona isoqosoqo. Eda wilika ena Aisea 60:17: “Ka’u na kauta mai na koula mei sosomi ni parasa, ka’u na kauta mai na siliva mei sosomi ni aironi, ka mei sosomi ni kau na parasa, ka mei sosomi ni vatu na aironi: ia ka’u na cakava na nomu mataveilewai me vu ni veivakacegui, kei ira sa dauvakasaurarataki iko me ra vu ni valavala dodonu.” Na sosomitaki ni parasa ena koula e vakaraitaka na toro cake, e vaka kina nira veisosomitaki na vo ni veika era cavuti e cake. E laurai oqo ena nodra toroya cake na ivakarau ni kena cicivaki na isoqosoqo ena iotioti ni veisiga oqo na Isireli ni Kalou. Raica mada e so na kena ivakaraitaki oqo.

8-10. Vakamacalataka e so na veiveisau e caka ena isoqosoqo me tekivu mai na 1919.

⁸ Ni bera na 1919, era dau cicivaka na nodra ivavakoso na tamata ni Kalou o ira na qase kei na dikoni era digitaka ga na lewe ni ivavakoso. Me tekivu mai na yabaki oya, sa tekivu lesia e dua na service director na “dauveiqaravi yalo dina ka vuku” me liutaka na cakacaka vakavunau. (Maciu 24:45-47, VV) Ia, e sega ni cici vinaka ena levu na ivavakoso na veisau oqo baleta ni so vei ira na qase era digitaki oqo era sega ni tokona na cakacaka vakavunau. Oqo na vuna era vakaroti kina na ivavakoso mera sa kua ni digitaki ira na qase kei na dikoni. Ia mera digitaki ira ga na tagane mera lewena kei koya na service director e dua na komiti ni cakacaka. Oqo e dua na veisau levu, e vaka ga ni sosomitaki na “kau” ena “parasa.”

⁹ Ena 1938, era vakadonuya na ivavakoso e veiyasa i vuravura e dua na veisau e vinaka cake qai salavata kei na iVolatabu. E vakararavitaki na cicivaki ni ivavakoso vua na company servant kei ira na dauveiqaravi e lesi ira kece na dauveiqaravi yalodina. Sa oti na veidigidigi! O ira na lesi oqo era lesi kece vakalou. Oqo e vaka sa sosomitaki na “vatu” ena “aironi” se sosomitaki na “parasa” ena “koula.”

¹⁰ Ni oti oya, e toso tiko ga na veiveisau. Me kena ivakaraitaki, e laurai ena 1972 ni nodra cicivaka na ivavakoso e dua na ilawalawa qase era lesi vakalou qai sega ni dua vei ira me iliuliu, sa volekata sara ga na ivalavala ni kena cicivaki na ivavakoso vakarisito ena imatai ni senitiuri. Kuria oqori, ena rua na yabaki sa oti, sa veisautaki na ivakarau ni kena cicivaki vakalawa na isoqosoqo, ni sa veisautaki na kena dairekita me rawa kina vei iratou na iLawalawa Dauvakatulewa me ratou qarava vinaka cake na veika era gadreva vakayalo na tamata ni Kalou ni ratou sa na sega ni vakaogai iratou ena kena qaravi na veika vakalawa e baleta na isoqosoqo.

11. O cei e vakavuna na veiveisau e caka vei ira na tamata i Jiova, na cava e yaco ni caka na veiveisau?

¹¹ O cei e vakavuna na veiveisau oqo? Na Kalou o Jiova. A kaya o koya: “Ka’u na kauta mai na koula.” A tukuna tale ga: “Ka’u na cakava na nomu mataveilewai me vu ni veivakacegui, kei ira sa dauvakasaurarataki iko me ra vu ni valavala dodonu.” Io, e lewai ira tiko na nona tamata o Jiova. Na veiveisau oqo ena isoqosoqo e baci vakaraitaka tale kina ni sa vakaiukuukutaki ira tiko na nona tamata. Era kalougata vakalevu kina na iVakadinadina i Jiova. Eda wilika ena Aisea 60:18: “Ena sega ni rogoci tale e na nomu vanua, nai valavala kaukauwa, se na rarawa se na rusa e na nomui yalayala; ia ko na vakatoka na nomu bai me bai ni Bula, kei na nomu matamata-ni-koro me matamata-ni-koro ni Vakavinavinaka.” E totoka dina na vosa oya! Ia e vakayacori vakacava?

12. E vakilai vakacava na bula vakacegu vei ira na lotu Vakarisito?

¹² Nira namaki Jiova na lotu Vakarisito me vakavulici ira qai dusimaki ira, era vakila sara ga na ka e parofisaitaka o Aisea: “A luvemu kecega ena vakavulici ira ko Jiova, ena ka levu talega na nodra vakacegu na luvemu.” (Aisea 54:13) Na yalo tabu i Jiova e sobuti ira tale ga na nona tamata, qai dua tiko na vuana na vakacegu. (Kalatia 5:22, 23) Na nodra bula vakacegu na tamata i Jiova ena vuravura voravora oqo e vaka e dua na tobu wai ena vanua dravuisiga. Na bula vakacegu e yavutaki ena veilomani dina vakarisito oqo e sabolo ni bula ena vakilai ena vuravura vou. (Joni 15:17; Kolosa 3:14) Sega ni vakabekataki nida marautaka tiko da qai cuqena tale ga na bula vakacegu oqo baleta ni vakalagilagi kina na noda Kalou. E tiki bibi tale ga ni noda parataisi vakayalo!—Aisea 11:9.

Cila Tiko ga na Rarama i Jiova

13. Eda vakadeitaka vakacava ni na cila tiko ga na rarama i Jiova vei ira na nona tamata?

¹³ Ena cila tiko beka ga na rarama i Jiova vei ira na nona tamata? Io! Eda wilika ena Aisea 60:19, 20: “Na mata-ni-siga ena sega tale ni nomu rarama e na siga; na vula talega, ena sega ni cila mai me nomu rarama: ia ko Jiova ga, ena nomu rarama ka sega ni mudu; kei na nomu Kalou, ena nomui ukuuku. Ena sega ni dromu tale na nomu mata-ni-siga, na nomu vula talega ena sega ni dromu: ni na nomu rarama ko Jiova ka sega ni mudu, ia ena oti ga na siga ni nomu tagi.” Ni cava na ‘tagicaki’ ni nodra vesuki tu vakayalo ena 1919, sa qai tekivu cilavi ira na rarama i Jiova. Ni oti tale oqo e 80 na yabaki, e se vakararamataki ira tiko ga o Jiova. Ena rarama tiko ga me sega ni mudu. Ena sega ni “dromu” me vaka na matanisiga se na vula na noda Kalou. Ena vakararamataki ira tiko na nona dauveiqaravi me tawamudu. E veivakauqeti dina oqori vei keda na bula tiko ena gauna butobuto ni iotioti ni veisiga oqo!

14, 15. (a) Era “yalododonu” vakacava na tamata kece ni Kalou? (b) Na cava era vakanamata tu kina na so tani tale na sipi me vaka na parofisai ena Aisea 60:21?

¹⁴ Rogoca tale mada e dua na vosa ni yalayala ni Kalou vua e matataki Saioni tiko e vuravura, na Isireli ni Kalou. E kaya na Aisea 60:21: “Ko ira na nomu tamata, era na yalododonu kecega: era na taukena na vanua ka sega ni mudu, na sulina ka’u a tea, na cakacaka ni ligaqu, me’u vakarokorokotaki kina.” Era duatani duadua na lotu Vakarisito lumuti ena gauna era sereki kina ena 1919. Era vakadonui mera “yalododonu” ena vuravura e levu kina na ivalavala ca baleta ni dei vinaka tu na nodra vakabauta na isoro i Karisito Jisu. (Roma 3:24; 5:1) Me vakataki ira na Isireli era sereki mai na veivakabobulataki e Papiloni, era taukena tale ga na lumuti e dua na “vanua,” e vanua vakatakarakara, ni vakatakarakarataka na nodra yalava ni cakacaka, era na marautaka kina na parataisi vakayalo. (Aisea 66:8) Ena sega ni yali na totoka ni parataisi oya, nira sega ni ucui Isireli makawa o ira na Isireli ni Kalou baleta nira yalodina tiko ga. Ena dei tiko ga na nodra vakabauta, ra vosota ra qai yaloqaqa tiko ga ena nodra vakacaucautaka tiko na yaca ni Kalou.

¹⁵ O ira kece na lewe ni matanitu vakayalo oqo era okati ena dua na veiyalayalati vou. E volai e lomadra kece na vunau i Jiova, e vosota tale ga o Jiova na nodra ivalavala ca ena vuku ni isoro i Jisu. (Jeremaia 31:31-34) E vakadonui ira me ‘luvena’ qai raici ira me vaka era ibulibuli uasivi. (Roma 8:15, 16, 29, 30) E bokoci tale ga na nodra ivalavala ca na nodra itokani so tani tale na sipi ena vuku ni isoro i Jisu. Me vakataki Eparama, era vakadonui tale ga mera itokani ni Kalou ena vuku ni vakabauta e tu vei ira. “Era sa sava nodrai sulu, ka vakavulavulataka e na dra ni Lami.” Era vakanamata tu na so tani tale na sipi ina dua tale na veivakalougatataki uasivi. Nira sa bulata na “veivakararawataki levu” se nira sa vakaturi mai na mate, era na qai raica sara ga e matadra na kena vakayacori na Aisea 60:21 ni sa vuki na veiyasa i vuravura me parataisi. (Vakatakila 7:14; Roma 4:1-3) Ena gauna oya o “ira na yalomalumalumu era na taukena na vanua; ka na daumarau tiko e na veivakacegui vakaidina.”—Same 37:11, 29.

Tubu Tiko Ga

16. Na vosa ni yalayala totoka cava e cavuta o Jiova, e vakayacori vakacava?

¹⁶ Eda wilika ena iotioti ni tikina ena Aisea 60 na iotioti tale ga ni vosa ni yalayala i Jiova ena wase oqo. E kaya vei Saioni: “Ko koya sa lailai, ena yaco me le dua na udolu; kei koya sa lailai, me matanitu kaukauwa: koi au ko Jiova, ka’u na vakusarawataka e na kena gauna.” (Aisea 60:22) E vakayacori na vosa i Jiova oqo ena noda gauna. Nira tomana tale na nodra cakacaka na lotu Vakarisito lumuti ena 1919, era se lewe lailai ga, era vaka dina “o koya sa lailai.” E tubu na kedra iwiliwili nira kumuni mai e so tale na Isireli vakayalo. E dua tale ga na iwiliwili levu ni so tani tale na sipi era mai tomani ira. Nodra bula vakacegu na tamata ni Kalou nira tiko ena nodra parataisi vakayalo ena nodra “vanua” e dreti ira mai e levu na tamata lomavinaka me lai vakavuna me “matanitu kaukauwa” dina o koya “sa lalai.” Nikua na “matanitu” oqo, era lewena na Isireli ni Kalou kei na sivia na ononamilioni na “kai tani” era sa yalataki ira, sa levu cake na kedra iwiliwili ni vakatauvatani kei na so na matanitu e vuravura. (Aisea 60:10) Era vakacila kece na lewe ni matanitu oqo na rarama i Jiova, oqo e vakavuna me totoka kina na kedra irairai ena mata i Jiova.

17. E uqeti iko vakacava na kena vakamacalataki na Aisea wase e 60?

¹⁷ Io, e vakaukauataka na noda vakabauta na noda dikeva na tikina bibi ni Aisea wase e 60. E veivakacegui nida raica ni sa kila makawa tu mai o Jiova nodra vesuki vakayalo na nona tamata kei na nona sereki ira tale ga. Eda kurabuitaka ni sa parofisaitaka makawa tu mai o Jiova na kena tubu vakalevu na kedra iwiliwili na dausokalou dina ena noda gauna. E veivakacegui tale ga na noda kila ni na sega ni biuti keda o Jiova! E ivakaraitaki ni loloma na kena yalataki ni na dola tu ga na matamata ni “koro” mera curuma o ira “sa vakarautaki tu ki na bula tawa mudu.” (Cakacaka 13:48, VV) Ena vakararamataki ira tiko ga na nona tamata o Jiova. Ena lagilagi tiko o Saioni nira rarama cake tiko ga na luvena. (Maciu 5:16) Oqo e uqeti keda meda kabiti ira tiko ga na Isireli ni Kalou da qai maroroya vinaka na noda itavi ni vakacila na rarama i Jiova.

Vakamacalataka Mada

• Na cava eda nuitaka me baleta na veitusaqati eda sotava?

• Era sucuma vakacava na luve i Saioni na “nodra wai-ni-sucu na veimatanitu tani”?

• E sosomitaka vakacava na “kau” ena “parasa” o Jiova?

• Na cava e rua na itovo e vakabibitaki ena Aisea 60:17, 21?

• E yaco vakacava me “matanitu kaukaua” o “koya sa lailai”?

[Kato/iYaloyalo ena tabana e 18]

PAROFISAI I AISEA—Me Vakararamataka na Kawatamata

Na ivakamacala ena rua na ulutaga oqo a vunautaki ena Soqo ni Tikina ni “Qasenivuli ni Vosa ni Kalou” a vakayacori ena yabaki 2001/02. Ni cava na vunau oya ena levu na vanua, a sereki kina na ikarua ni ivola ni Parofisai i Aisea—Me Vakararamataka na Kawatamata. Ena yabaki yani e liu a sereki kina na imatai ni ivola ni Parofisai i Aisea—Me Vakararamataka na Kawatamata. E tabaki tu ena ivola vou oqo na ivakamacala vovou ni voleka ni veitikinivolatabu kece sara ni ivola i Aisea. Na ivola e rua oqo e vukei keda meda kila vinaka da qai taleitaka tale ga na ivola i Aisea e vakaukauataka na noda vakabauta.

[iYaloyalo ena tabana e 15]

E ‘vakaiukuukutaki ira nona tamata o Jiova ena bula,’ dina ga nira vakacacani

[iYaloyalo ena tabana e 16]

Era vakayagataka na tamata ni Kalou na veika era taukena na veimatanitu me tete kina na sokalou savasava

[iYaloyalo ena tabana e 17]

Vakalougatataki ira nona tamata o Jiova ena veiveisau kei na vakacegu