Ra Tokona na Sokalou Dina​—E Liu, Edaidai Tale Ga

O SE nanuma li na yaca ni turaga a tagicaka na koro makawa o Jerusalemi? O na rairai kaya ni ‘o Jisu,’​—io, o Jisu dina. (Luke 19:​28, 41) Ia, ni se vo e vica vata na senitiuri me qai mai bula e vuravura o Jisu, a dua na dauveiqaravi yalodina ni Kalou a tagicaki Jerusalemi tale ga. Na yacana o Niemaia.​—Niemaia 1:​3, 4.

Na cava a vakavuna me tagicaki Jerusalemi kina o Niemaia? Na cava a cakava me vukea kina na koro kei ira na lewena? Na cava eda rawa ni vulica mai na nona ivakaraitaki? Me saumi oqori, ena vinaka meda raica mada e so na ka a yaco ena nona gauna.

A Kauai Vakalevu, a Yavala Tale Ga

A lesi o Niemaia me kovana kei Jerusalemi, ia ni bera oya, a vakaitutu torocake ena vale vakatui kei Perisia ena korolevu mai Susani. Ia, a sega ni vakalaiva na nona ivakarau ni bula vutuniyau me guilecavi ira kina na tacina Jiu era tu vakayawa mai Jerusalemi. Nira tadu yani i Susani na ilawalawa Jiu mai Jerusalemi, a liu sara yani o Niemaia me “tarogi iratou e na vukudra na Jiu era sa dro bula, ko ira na kena vo vei ira na vakabobulataki, e na vuku talega i Jerusalemi.” (Niemaia 1:2) Gauna era tukuna kina na vulagi “[ni]ra sa tiko vakaca sara” o ira mai Jerusalemi qai “sa basuraki sobu talega” na bai kei Jerusalemi, a “tiko sobu ka tagi, ka yaso bogi vica” o Niemaia. Oti oya sa qai tauca vei Jiova e dua na masu veilauti me tukuna kina na nona rarawataka na ka e rogoca. (Niemaia 1:​3-​11) Na cava sa rui rarawa vakalevu kina o Niemaia? Baleta o Jerusalemi na itikotiko liu ni nona sokaloutaki o Jiova e vuravura, ia oqo era sa sega ni kauaitaka. (1 Tui 11:36) Kuria, na ituvaki vakaloloma ni koro oqo e vakaraitaka sara ga na ituvaki vakaloloma ni nodra bula vakayalo na lewena.​—Niemaia 1:​6, 7.

Nona kauaitaki Jerusalemi kei ira na nona itokani Jiu era tiko e kea, a uqeti Niemaia me yavala, me veivuke. Gauna a vakadonuya kina na tui Perisia me gade vakalekaleka, sega ni bera na nona lalawataka o Niemaia na nona ilakolako balavu i Jerusalemi. (Niemaia 2:​5, 6) A vinakata me vakayagataka na nona kaukaua, gauna, kei na nona kila me tokona kina na kena vakavinakataki na lalaga. Ni yaco gona yani, e taura ga e vica na siga me vakarautaka kina e dua na peleni ni kena vakavinakataki na lalaga taucoko e Jerusalemi.​—Niemaia 2:​11-​18.

A wasewasea ina levu na vuvale o Niemaia na cakacaka vakaitamera oqo ena kena vakavinakataki na lalaga, ia mera na cakacaka vata.a E sivia ni 40 na iwasewase era dui lesi mera vakavinakataka e dua na “tiki ni bai.” Na cava a qai yaco? Era le levu na tamata cakacaka​—e wili kina o ira na itubutubu kei ira na dui luvedra​—era solia nodra gauna kei na nodra kaukaua, me vakayacori rawa kina na cakacaka vakaitamera oqo. (Niemaia 3:​11, 12, 19, 20) Ena loma ga ni rua na vula, sa mai vakavinakataki kina na lalaga taucoko! A vola o Niemaia ni o ira sara mada ga na tusaqata tiko na cakacaka oqo, e yaco mera vakadinadinataka ena voraki ni “caka rawa na cakacaka oqo e na vuku ni neimami Kalou.”​—Niemaia 6:​15, 16.

iVakaraitaki me Nanumi

A sega ni vakayagataka ga o Niemaia na nona kila kei na nona gauna. A vakayagataka tale ga na veika e taukena me tokona kina na sokalou dina. Ni a vakayagataka na nona ilavo me sereki ira kina na tacina Jiu era kau vakabobula. E sega ni dau lavaka na tubu ni ilavo e dinautaki mai vua. Me vaka ni o koya e dua na kovana, a sega vakadua ni vakasaurarataka me “dausaumi” mai vei ira na Jiu, dina ga ni dodonu me vaka kina. Ia, e dau veivakacegui na nona vale ni vakani ira kina na “le dua na drau ka limasagavulu  . . . kei ira talega eso era sa lako mai vei keimami maivei ira na veimatanitu tani, era tiko voleka vei keimami.” Veisiga e vakarautaka e “dua na pulumokau, e ono na sipi digitaki; . . . na toa” me kedra na vulagi. Kena ikuri, vakadua ena veibogi tini ena solia vei ira “na waini sa duidui ga”​—ena sauma kece o koya.​—Niemaia 5:​8, 10, 14-​18.

Sa dua dina na ivakaraitaki totoka ni lomasoli e kotora o Niemaia vei ira kece na dauveiqaravi ni Kalou e liu kei na gauna oqo! A solia wale qai tu vakarau na dauveiqaravi ni Kalou yaloqaqa oqo me vakayagataka na veika e taukena, me tokoni ira na tamata cakacaka me tosoi kina na sokalou dina. Ena veiganiti gona me kerea vei Jiova: ‘Mo ni nanuma, na noqu Kalou, meu vinaka kina, me vaka na ka kau sa kitaka vei ira na tamata oqo.’ (Niemaia 5:​19) Sega ni vakabekataki ni na cakava vaka kina o Jiova.​—Iperiu 6:​10.

Vakamuri na iVakaraitaki i Niemaia ena Gauna Oqo

E ka marautaki nida raica nira vakaraitaka tale ga o ira na tamata ni Kalou nikua na yalo ni veinanumi, nodra tu vakarau mera cakava na ka, kei na nodra cabori ira ena vuku ni sokalou dina. Eda dau kauaitaki ira sara vakalevu noda itokani vakabauta vata, nida rogoca na ituvaki dredre era sotava voli. (Roma 12:15) Me vakataki Niemaia, eda na masuti Jiova me tokoni ira na tacida eda vakabauta vata era vakacacani tu, meda kerea: “Kemuni na turaga, me vakarorogo mada na daligamuni ki na noqu masumasu na nomuni tamata, kei na nodra masumasu na nomuni tamata, ko ira era via rerevaka na yacamuni.”​—Niemaia 1:​11; Kolosa 4:2.

O koya gona, nida kauaitaka na nodra bula vakayalo, vakayago na tacida lotu Vakarisito kei na toso ni sokalou dina, ena sega wale ga ni cakayaco ina lomada. Ena tosoi keda tale ga meda yavala. O ira era galala cake na kedra ituvaki, ena uqeti ira na loloma mera biuta na nodra vale vinaka, me vakataki Niemaia, ra qai toki ina vanua e vinakati kina na veivuke. E sega ni vakayalolailaitaki ira era soli ira oqo na ituvaki dravudravua era na rairai sotava ena so na yasa i vuravura, ia era veitauriligataka ga kei ira na nodra itokani lotu Vakarisito na kena tokoni na vakatetei ni sokalou dina. E vakasakiti dina na ivakaraitaki ni yalo ni cabori ira era vakaraitaka.

Cola iTavi ena Vanua ga Eda Dui Tiko Kina

E kilai ni levu vei keda eda na sega ni rawa ni toki ina duatani tale na vanua. O koya gona, eda na tokona ga na sokalou dina ena noda itikotiko. E vakamacalataki tale ga oqori ena ivola i Niemaia. Dikeva na veika matailalai e tukuna o Niemaia me baleta e so na vuvale yalodina era vakaitavi ena kena vakavinakataki na lalaga. A vola: “A sa viri bai . . . ko Jitaia na luve i Erumafi, e na tikina sa donuya na nona vale . . . Ko Penijamini kei Asupi me donuya na nodrau vale. Sa viri bai me taravi koya ko Asaraia na luve i Meesea na luve i Ananaia me voleka ki na nona vale.” (Niemaia 3:​10, 23, 28-30, neitou na matanivola kala.) Era vakaitavi vakalevu na turaga oqo kei na nodra dui vuvale ena kena vakatetei na sokalou dina, oya na nodra vakaitavi ena kena vakavinakataki na lalaga e volekata na nodra dui vale.

Ena gauna oqo, e vuqa na sala eda dau tokona kina e levu vei keda na sokalou dina ena vanua eda vakaitikotiko kina. Eda na tokona beka na tara ni Kingdom Hall, veivuke ena leqa tubukoso kei na kena e bibi taudua, oya na vunautaki ni itukutuku vinaka ni Matanitu ni Kalou. Kuria oya, ke mani da na lai vakaitavi se sega ina tara vale se cakacaka ni vakacoko, ena uqeti keda na loma e vinakata meda tokona na sokalou dina ena noda vakayagataka na veika eda taukena, vaka ga na nona lomasoli o Niemaia ena nona gauna.​—Raica na kato “iValavala ni Cau.”

So na gauna e rawa ni kena irairai ni sa na sega ni yacova na noda iqila na vakailavotaki ni levu ni tabaivola e caka, nodra vukei na vakaleqai, kei na vuqa tale na veiqaravi ena veiyasa i vuravura. Kua ni guilecava ni a nanumi tale ga ni na dua na tama ni cakacaka na kena vakavinakataki na lalaga levu mai Jerusalemi. (Niemaia 4:​10) Ia, a vakayacori rawa na cakacaka oqo ni a wasewasei ina vuqa na vuvale lomasoli. Ena gauna tale ga oqo, ena rawa ni vakailavotaki na kena cicivaki na noda cakacaka ena vuravura taucoko, ke da dui cakava na noda itavi.

E vakamacalataka vei keda na kato “Sala Era Bole Kina e So Mera Soli Ka” e vica na sala eda rawa ni tokona kina vakailavo na cakacaka ni Matanitu ni Kalou. Ena yabaki sa oti, era dodoliga ena veitokoni e levu na tamata ni Kalou, qai via vakaraitaka tale ga na iLawalawa Dauvakatulewa ni iVakadinadina i Jiova na nodratou vakavinavinaka levu vei ira kece sara a uqeta na lomadra mera cau. Kena ilutua, me vakavinavinakataki mada ga o Jiova ena vuku ni nona veivakalougatataki levu e vakaraitaka vei ira na nona tamata ena nodra saga me vakatetei tiko ga na sokalou dina ena vuravura taucoko. Io, nida raica lesu na liga ni veidusimaki i Jiova ena veiyabaki sa sivi, eda duavata kei na malanivosa i Niemaia, ena nona kaya ena vakavinavinaka: “Sa vinaka vei au na ligana na noqu Kalou.”​—Niemaia 2:​18.

[iVakamacala e ra]

[Kato/iYaloyalo ena tabana e 28, 29]

Sala Era Bolea Kina e So Mera Soli Ka

CAU INA CAKACAKA E VURAVURA RARABA

Levu era vakatikitikitaka e dua na iwase ni ilavo mera biuta ina katonicau e vakatokai “iSolisoli Ena Cakacaka e Vuravura Raraba​—Maciu 24:14.”

Era dau vakauta e veivula na ilavo oqo na ivavakoso yadua ina valenivolavola liu ni iVakadinadina i Jiova se ina valenitabana ena nodra vanua. Na ilavo e cautaki e rawa ni vakau sara ga vakadodonu ina Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-​2483, se ina valenivolavola ni tabana ena nomu vanua. E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko oya e soli vakailoloma.

CAU E TIKO NA KENA VEIDINADINATI

E rawa ni cautaki na ilavo ena veidinadinati e tiko, ni na suka tale vua e cau ke mani gadreva o koya. Me baleta e so tale na ivakamacala, yalovinaka qai veitaratara kei na Treasurer’s Office ena itikotiko e volai toka e cake.

SOLI KA E LALAWATAKI

Me ikuri ni kena cautaki vakadodonu na ilavo kei na cau ni veidinadinati, e tiko tale e so na mataqali cau me yaga ena cakacaka ni Matanitu ni Kalou e vuravura. Oqo e okati kina na:

Inisua: E rawa ni volai vua na Watch Tower Society na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu e dua e rawa ni dau tauri tu ga vakawawa ena vuku ni Watch Tower Society, se me qai soli me taukena na Watch Tower Society ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa me dau soli na stock kei na bond ina Watch Tower Society me dua na cau taucoko.

Qele kei na Vale: E rawa me soli vakadua na qele se na vale ina Watch Tower Society se me caka e dua na veiyalayalati me tawana tiko ga na qele se vale o koya e solia me yacova nona mate. Me veitaratara kei na valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.

Will kei na Trust: E rawa ni soli na iyau se na ilavo ina Watch Tower Society ena kena tabaki e dua na will, se na rawa ni vagolei ina Watch Tower Society na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi ena kena vagolei na trust ina dua na isoqosoqo vakalotu.

Na cau vaka oqo era vakatokai mera “soli ka e lalawataki,” e kena ibalebale ni soli ka vaka oqo e dodonu me lalawa sara kina vakavinaka o koya e via soli ka. Me vukei ira na via soli ka ina cakacaka ni iVakadinadina i Jiova e vuravura raraba ena sala vaka oqo, sa vakarautaki kina e dua na ivola lailai vakavalagi kei na kena vakasipeni e vakatokai na Charitable Planning to Benefit Kingdom Service Worldwide. E volai na ivola oqo ena vuku ni vakatataro e tauri me baleta na iloloma, will kei na trust. E tiko tale ga kina e so na ivakamacala yaga me baleta na qele taukeni, na lalawa vakailavo kei na ivakacavacava. E vakamacalataki tale ga kina e so na sala ni soli ka vakailoloma ena gauna sara ga oqo, se me qai soli ena gauna sa mate kina. E rawa ni kerei na ivola lailai oqo ena Charitable Planning Office.

Ni levu era wilika na tikidua oqo ra qai veitaratara kei na Charitable Planning Office, era sa vukei ira kina na iVakadinadina i Jiova e vuravura raraba, qai gauna vata oqori era vakalailaitaka kina na ivakacavacava e dau lavaki vei ira. E dodonu me vakaraitaki ina Charitable Planning Office na isolisoli vaka oqo, kei na veika vakaivola kece e vauca. Ke o via soli ka e lalawataki, e dodonu mo veitaratara kei na Charitable Planning Office, e rawa ni o volavola se qiri ina itikotiko se talevoni e toka oqo e ra, se ina valenivolavola ni iVakadinadina i Jiova ena nomu vanua.

Charitable Planning Office

Watch Tower Bible and Tract Society of Pennsylvania

100 Watchtower Drive Patterson, New York 12563-​9204

Talevoni: (845) 306-​0707

[Kato ena tabana e 30]

iValavala ni Cau

Ena nona ivola na yapositolo o Paula vei ira mai Korinica, a cavuta kina e tolu na ivalavala ni cau. (1) Me baleta na kumuni ni soli, a vakarota o Paula: “E nai matai ni siga ni wiki, mo dou dui tugana nai yau eso me tu.” (1 Korinica 16:2a) Io, e dodonu me lalawataki vakailiu na ka me soli, qai gadrevi me caka vakawasoma. (2) A vola tale ga o Paula ni dodonu vua na tamata yadua me solia “[e] dua na kena i wase me veiganiti kei na ka e dau rawata.” (1 Korinica 16:2b, VV) Ena dua tale na kena itukutukuni, ke dua e via cau ena vinaka me na veiraurautaka. Kevaka mada ga e lailai na ka ena cautaka e dua na lotu Vakarisito baleta ni cakacaka isau lailai, e talei oqori vei Jiova. (Luke 21:​1-4) (3) A kuria o Paula: “Me ra dui solia me vaka na ka sa vinakata ko koya yadua e na yalona; me kakua e na voraki, se ni sa vakasaurarataki: ia ko koya sa solia e na marau sa vinakata na Kalou.” (2 Korinica 9:​7) Na lotu Vakarisito dina ena soli ka mai vu ni lomana​—ena solia ena marau.

[iYaloyalo ena tabana e 26]

A dua na turaga yavala qai dauveikauaitaki o Niemaia

[iYaloyalo ena tabana e 30]

Na cau e tokona na kena qaravi na tabaivola, nodra vukei na vakaleqai, taravaki ni Kingdom Hall, kei na so tale na veiqaravi yaga e vuravura taucoko