Tukutuku Mai na Daukacivaka na Matanitu

Era sa Rogoca Tale ga na iTukutuku ni Matanitu na Didivara Mai Brazil

ME RAWA ni vunautaki na itukutuku vinaka ni Matanitu ni Kalou vei ira na didivara mai Brazil era sa vulica kina e levu na iVakadinadina i Jiova mai kea na vosa vagalu ni Brazil. E sa yaga sara tiko ga na nodra sasaga, me vaka e kune ena rua na ivakaraitaki oqo.

O Eva,a e dua na marama didivara e São Paulo, a tekivu vulica na vosa vagalu ni oti ga vakalailai nodratou toki vakaveitinani me ratou lai tiko kei na dua na turaga e galu. Rau mani sotavi ira na iVakadinadina didivara o Eva kei na nona itau oqo ena vanua ni volivoli, ra qai sureti rau ina soqoni ena Kingdom Hall. Erau ciqoma na veisureti ni rau nanuma ni oqo e dua ga na soqo ni marau.

Ni sega ni kila vinaka na vosa vagalu o Eva, a lailai wale kina na ka e taura rawa ena ivunau ena soqoni. Ni oti oya, era sureti koya e so na mataveitacini me lai gunu ti ena nodra vale. Era vakaraitaka vua na iyaloyalo ena brochure Me Tawamudu Nomu Rekitaka na Bula ena Vuravura!, me rawa nira vakamacalataka kina na ka e yalataka na Kalou baleta na parataisi ena vuravura oqo ena dua na gauna mai muri. E taleitaka o Eva na veika e vulica qai tekivu lakova wasoma na soqoni.

Sega ni dede, sa biuti nona itau me rawa ni bulataka na ivakatagedegede vakaivolatabu. Dina ga ni sotava na veitusaqati kaukaua mai vei ira na wekana, e toso tiko ga vakayalo me yacova nona papitaiso ena 1995. Ni oti tale e ono na vula sa painia, se cakacaka vakaitalatala vakatabakidua. Me yacova mai na gauna oqo, e sa vukei iratou e lewe va me ratou yalayala qai papitaiso.

E sucu didivara o Carlos. Ni se gone ga sa vakayagataka na wainimate gaga, sa tekivu coko tale ga ena veidauci kei na butako. Ena nona rerevaka e dua na ilawalawa ca a dro kina i São Paulo, rau lai tiko vata vakalailai kei João. Me vakataki Carlos, e didivara tale ga o João, qai vakasisila nona itovo.

Ni oti e vica na yabaki, a vulica o Carlos na itukutuku ni Matanitu ni Kalou, e uqeti koya me vakasavasavataka nona bula qai vakalawataka na nona vakamau. Ni sa yacova na ivakatagedegede vakaivolatabu, e papitaiso me vakaraitaka nona sa yalataki koya vei Jiova. Ia, e sega ni kila vakadua o Carlos nona sa vulica tale ga na itukutuku vinaka o João qai levu sara na veiveisau e sa cakava ina nona bula. Ena gauna e vulica kina o João ni sega ni vakadonuya o Jiova na vakayagataki ni matakau ena sokalou, e viritaka laivi kece na nona ivakatakarakara ni “sanito” a vakumuna tu. A qai papitaiso tale ga ni sa biuta nona itovo makawa kece.

Dua na ka na nodrau marau o Carlos kei João ni rau sota ena dua na Kingdom Hall, rau qai raica na veisau rau sa dui vakayacora ina nodrau bula! Rau sa ulunivale nuitaki ruarua, rau qai dauvunau gugumatua ni Matanitu ni Kalou.

Ena gauna oqo sa 30 na ivavakoso ni didivara mai Brazil, e 154 na iwasewase lalai, qai kedra iwiliwili kece na dautukutuku era lewena e sivia na 2,500, mai vei ira oya e rauta nira le 1,500 era didivara. Lewe 3,000 era tiko ena Soqo ni Tikina ni didivara mai Brazil ena 2001, e kena usutu “Qasenivuli ni Vosa ni Kalou,” ra qai papitaiso kina e 36. Ena veivakalougatataki i Jiova, e nuitaki nira na ciqoma e levu tale na didivara na itukutuku ni Matanitu.

[iVakamacala e ra]