Taravale ena Duavata e Vakalagilagia na Kalou

ERA sarava tiko na lewe ni dua na yanuyanu ena Yatu Solomoni na kena tara tiko na nodra Kingdom Hall na iVakadinadina i Jiova. E kaya e dua na marama: “Keimami dau kumuni ilavo me baleta na neimami lotu. Era dau kerei na lewenilotu mera soli ilavo mai, ia e se sega ni rauta me tara kina na neimami valenilotu vou. Ni kumuni ilavo vakacava na iVakadinadina?” E kaya na iVakadinadina erau veitalanoa tiko: “O keimami na qaravi Jiova e veiyasa i vuravura keimami vaka e dua na vuvale. Era cautaka na neimami ivavakoso kei ira na taci keimami e veiyasa i vuravura na veika e gadrevi me tara kina e dua na Kingdom Hall vou. E vakavulici keimami o Jiova me keimami duavata ena veika kece sara.”

E laurai na nodra duavata na iVakadinadina i Jiova ena veika kece era cakava, okati kina na kena tara e vica na udolu na Kingdom Hall. E sega ni ka vou na taravale ena duavata vaka oqo. Era sa cakava voli mai na tamata ni Kalou ena vica na udolu na yabaki sa oti. E kilai vakacava?

Tara ni Valeniveitavaki kei na Valenisoro

E vakasamataka tiko na matanitu o Isireli o Jiova ena nona tukuna vei Mosese ena sivia na 3,500 na yabaki sa oti: “Me ra cakava e dua na vale tabu me noqu.” (Lako Yani 25:8) Me baleta na itaratara ni vale oya, e kaya o Jiova: “Me vaka na ka kecega ka’u sa vakatakila vei iko, me vaka nai vakatakarakara ni vale ni kalou, kei nai vakatakarakara ni kenai yaya kecega, dou cakava vakakina.” (Lako Yani 25:9) Oti oya e qai solia mai o Jiova na peleni ni vale, kei na ka e vinakati me iyaya ni vale. (Lako Yani 25:10–​27:19) Ena vakayagataki na “vale ni veitavaki,” se valelaca oqo me vanua e vu tiko yani kina na sokalou dina e Isireli.

Eda sega ni kila se ra lewe vica era tara na vale oya, ia era sureti na Isireli kece mera tokona na kena tara. E tukuna vei ira o Mosese: “Mo ni taura maivei kemuni nai solisoli vei Jiova: ko koya sa lomasoli, me kauta ga mai ko koya nai solisoli vei Jiova.” (Lako Yani 35:​4-9) Era ciqoma vakacava na Isireli na ka e tukuni vei ira oya? E kaya na Lako Yani 36:3: “A ra sa taura maivei Mosese nai solisoli kecega era sa kauta mai na Isireli me caka kina na cakacaka me yaga e na vale tabu. A ra sa kauta tiko vei koya nai solisoli era sa marau kina, e na veimataka kecega.”

Sa mai bini tu na iyau era solia na tamata, ia era se cau tiko ga mai. Era mani tukuna vei Mosese na tamata vuku se matai era tara tiko na vale: “Era sa kauta mai [vakasivia] ko ira na tamata na ka sa rauta na cakacaka sa vakarota ko Jiova me caka.” E qai vakarota o Mosese: “Me kakua na tagane se na yalewa me cakava tale e dua na cakacaka me soli ki na vale tabu.” Baleta “ni sa rauta na cakacaka kece na ka sa kau mai, ka sa vo tu yani.”​​—Lako Yani 36:​4-7.

Ena nodra lomasoli na Isireli, a vakaoti rawa kina na valeniveitavaki ena loma ga ni dua na yabaki. (Lako Yani 19:1; 40:​1, 2) Era dokai Jiova na tamata ni Kalou nira tokona na sokalou dina. (Vosa Vakaibalebale 3:9) E muri era qai vakaitavi tale ena kena tara e dua na vale e levu cake sara. Era veivuketaka kece na kena tara na vale, se ra matai se sega.

Ni oti e voleka ni lima na senitiuri mai na nodra tara na valeniveitavaki, era tekivu tara tale na Isireli na valenisoro e Jerusalemi. (1 Tui 6:1) Oqo ena dua na vale totoka qai tudei ena vakayagataki kina na vatu kei na kau. (1 Tui 5:​17,18) E solia o Jiova na peleni ni valenisoro vei Tevita ena kaukaua ni ‘yalona.’ (1 Veigauna 28:​11-​19) Ia e digitaki luve i Tevita o Solomoni me liutaka na kena tara na vale. (1 Veigauna 22:​6-​10) E tokona vakalevu o Tevita na tara ni vale. E kumuna mai na kena veimataqali vatu, na isa ni vale, kei na iyaya kece e gadrevi qai cautaka tale ga e dua na iwase levu ni koula kei na siliva. E uqeti ira tale ga na nona itokani Isireli mera lomasoli ena nona tarogi ira: “Ko cei sa vinakata me solia na nona cakacaka [se cau] e na siga edaidai kivei Jiova?” Na cava era qai cakava?​​—1 Veigauna 29:​1-5.

Ena gauna e tekivu tara kina na valenisoro o Solomoni, sa tiko rawa vua e vica na udolu na tani koula kei na siliva. Ni rui vakaitamera na varasa kei na kaukamea, e sa sega ni vakarautaki rawa. (1 Veigauna 22:​14-​16) Ena veivuke i Jiova kei na nodra veitokoni o ira kece na Isireli, e vakaoti na kena tara na valenisoro ena loma ga ni vitu veimama na yabaki.​​—1 Tui 6:​1, 37, 38.

‘Na Vale ni Kalou Dina’

Rau vakatokai ruarua na valeniveitavaki kei na valenisoro me “vale ni Kalou” dina. (Dauveilewai 18:31; 2 Veigauna 24:7) E sega ni gadreva o Jiova me vakaruru ena dua na vale. (Aisea 66:1) E vakavuna ga me tara na veivale oqori me yaga vua na tamata. E taroga kina o Solomoni ena gauna e vakatabui kina na valenisoro: “Ena tiko vakaidina li na Kalou e vuravura? raica, ko lomalagi, kei lomalagi ecake sara, sa sega ni rauti kemuni; ka sa sega dina sara na vale oqo ka’u sa qai tara.”​​—1 Tui 8:​27.

E tukuna o Jiova ena gusu i Aisea na parofita: “Ni na vakatokai na noqu vale me nodra vale ni masu na tamata kecega.” (Aisea 56:7) Na isoro kei na masu kece e cabori ena valenisoro, kei na veisoqo e caka kina, e vukei ira na Jiu kei ira na sega ni Jiu mera toro volekata na Kalou dina. Era rawata na tamata na veiwekani vinaka kei na veitaqomaki i Jiova nira sokalou ena nona vale. E vakabibitaki na tikina oqo ena masu e cabora o Solomoni ena gauna e vakatabui kina na valenisoro. O rawa ni wilika na masu e cabori vua na Kalou oqo ena 1 Tui 8:​22-​53 kei na 2 Veigauna 6:​12-​42.

Na vale ni Kalou dina oya sa vakarusai makawa, ia e dusia tiko na Vosa ni Kalou na gauna era na kumuni mai kina na lewe ni veimatanitu mera mai sokalou vei Jiova ena dua na valenisoro vakayalo e uasivi cake sara. (Aisea 2:2) Na isoro uasivi ga ni luvena duabau e vakatubura na Kalou, a vakatakarakarataki voli mai ena manumanu e dau vakacabori ena valenisoro, e sala duadua ga ni noda torovi Jiova rawa. (Joni 14:6; Iperiu 7:​27; 9:​12) O ira na iVakadinadina i Jiova era sa sokalou tiko vua na Kalou ena sala uasivi oya, era sa vukei ira tale tiko ga e lewe levu mera tomani ira.

Taravale ena Gauna Oqo

Era qarava tiko na Kalou dina na iVakadinadina i Jiova ena veiyasa i vuravura. Era sa yaco me dua na “matanitu kaukauwa,” qai tubu tiko ga na kedra iwiliwili. (Aisea 60:22) Era dau soqoni na iVakadinadina i Jiova ena Kingdom Hall.a Sa vakayagataki tiko e vica na udolu na Kingdom Hall, ia e se vinakati tale tiko e vica na udolu.

Era dau “soli ira vakarawarawa” na iVakadinadina i Jiova mera tara na Kingdom Hall e gadrevi me tara. (Same 110:​3, NW) Vakalevu era sega ni kila vinaka sara na taravale na iVakadinadina ena so na vanua, qai so tale na vanua e tubu sara tiko vakatotolo era vanua dravudravua. Oqo na vuna e tauyavutaka kina ena 1999 na iLawalawa Dauvakatulewa ni iVakadinadina i Jiova e dua na ituvatuva ni tara Kingdom Hall me wali kina na veileqa vaka oya. Ena ituvatuva oqo, era gole kina i vanuatani o ira na iVakadinadina era kenadau ena taravale mera lai vakavulici ira na tacidra kei na ganedra ena tara Kingdom Hall. Era qai dau tomana tiko na tara Kingdom Hall o ira na sa vakavulici. E yaga vakacava na sasaga oqori?

Me qai yacova na Feperueri 2006, era sa tara oti na iVakadinadina i Jiova e sivia e 13,000 na Kingdom Hall vou ena veivanua era sega so ni rawati ira. Wilika mada na veika era kaya e so era sa vakayagataka tiko na Kingdom Hall vovou.

“Ena kena ivakatautauvata, era tiko ena soqoni e lewe 160. Ena imatai ni soqoni ena Kingdom Hall vou, sa tubu na iwiliwili ina 200. Ena gauna oqo, ni oti e ono na vula, sa ra dau tiko ena soqoni e lewe 230. E vakilai na veivakalougatataki i Jiova ena kedra tara na veivale yaga dina oqo.”​​—Dua na ivakatawa ni tabacakacaka e Ecuador.

“Sa vica na yabaki na nodra dau tarogi keimami tiko na lewenivanua, ‘Ena gauna cava ena qai dua kina na nomuni Kingdom Hall e vaka na kena keimami dau raica ena nomuni ivola?’ Keimami vakavinavinakataki Jiova ena kena sa qai tara e dua na neimami vale ni sokalou. Keimami dau soqoni tu ga na lewe 30 ena nona sitoa e dua na taci keimami tagane. Ena imatai ni soqoni ena neimami Kingdom Hall vou, keimami tiko kina e lewe 110.”​​—Dua na ivavakoso mai Uganda.

“Rau kaya e rua na yalewa erau painia tudei ni rau marautaka dina na nodrau vunau ena yalava ena gauna sa tara oti kina na Kingdom Hall. Era dau vakarorogo na tamata ni rau vunau e veivale kei na nodrau vunau tawalokuci. Sa 17 na nodrau vuli iVolatabu, e levu vei ira era sa lako tiko ina soqoni.”​​—Valenivolavola ni tabana ena Yatu Solomoni.

“E kaya e dua na italatala ni lotu e tiko volekata e dua na Kingdom Hall vou ni vale oqo e vukea me rakorako na itikotiko oya qai nodra isakisaki tale ga na tu voleka e kea. Era lewe levu na lako sivita na Kingdom Hall era vakasakita na kena totoka. Oqo e solia e dua na gauna vinaka vei ira na tacida mera vunau vei ira. Sa qai levu ga na tamata era via kila na ka e baleta noda mataveitacini e vuravura raraba. E levu era sa sega ni soqoni tu ena vica na yabaki era sa uqeti mera sosoqoni wasoma tale.”​​—Valenivolavola ni tabana e Myanmar.

“A sureta e dua na turaga tataleitaki e dua na tacida yalewa me lai raica na kena tara tiko e dua na Kingdom Hall. E qai kaya e muri na turaga oya: ‘Au nanuma ga de ra na sega ni vakacurumi au e loma. Au kurabuitaka nira kidavaki au na iVakadinadina. Era cakacaka kaukaua na tagane kei na yalewa, era sega ni mokusiga. Era duavata ra qai mamarau.’ E qai vakadonuya na turaga oya me vuli iVolatabu qai tekivu tiko tale ga ena soqoni. E qai tukuna e muri: ‘Sa veisau na noqu rai. Niu sa qai kila na Kalou, au na sega ni biuti koya.’ ”​​—Valenivolavola ni tabana e Colombia.

Bibi Noda Veitokoni

Na tara ni Kingdom Hall e tiki bibi ni noda sokalou. E totoka vakaoti na nodra tokona vakailavo kei na veisala tale e so na cakacaka oqo o ira na iVakadinadina i Jiova e veiyasa i vuravura. Meda nanuma tale ga ni bibi vaka kina na veibasoga tale e so ni noda cakacaka tabu. So na gauna era dau vakaleqai e so na lotu Vakarisito ena leqa tubukoso ra qai gadreva na noda veivuke. E tokona vakalevu na cakacaka tabu na tabaki ni ivola vakaivolatabu. Levu eda sa vakadinadinataka na yaga ni ivoladraudrau se ivola dabani vakaivolatabu vei ira na tamata lomavinaka. E bibi tale ga na noda tokoni ira na daukaulotu kei ira e nodra cakacaka vakatabakidua na cakacaka vakaitalatala. O ira na lotu Vakarisito vaka oqori era vakaitavi sara tiko vakalevu ena kena vakatetei na cakacaka vakavunau ena iotioti ni veisiga oqo.

Era marau vakalevu o ira na cau ina kena tara na valenisoro. (1 Veigauna 29:9) Eda marau tale ga nikua nida tokona na sokalou dina ena noda cau. (Cakacaka 20:35) Eda vakila na marau oqori nida biuta na noda cau ena kato e volai tiko kina na Kingdom Hall Fund kei na noda cau tale ga me baleta na cakacaka e vuravura raraba, nida sa tokona tiko kina na veicakacaka tale e so e vauca na kena vunautaki na itukutuku vinaka ni Matanitu ni Kalou. E totoka vakaoti na nodra duavata ena sokalou dina na iVakadinadina i Jiova. Me sobuti keda mada ga na marau e vu mai na noda tokona na sokalou oya!

[iVakamacala e ra]

[Kato/iYaloyalo ena tabana e 20]

Sala Era Bolea Kina Eso Mera Soli Ka

CAU INA CAKACAKA E VURAVURA RARABA

Levu era vakatikitikitaka e dua na iwase ni ilavo mera biuta ina katonicau e vakatokai “Cau ina Cakacaka e Vuravura Raraba​—Maciu 24:14.”

Era dau vakauta e veivula na ilavo oqo na ivavakoso yadua ina valenivolavola ni iVakadinadina i Jiova ena nodra dui vanua. Na ilavo e cautaki e rawa ni vakau sara ga vakadodonu ina Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-​2483, se ina valenivolavola ni tabana ni iVakadinadina i Jiova ena nomu vanua. Na jeke e vakau ina itikotiko e volai toka e cake me volai kina na “Watch Tower.” E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko oya e soli vakailoloma.

CAU E TIKO NA KENA VEIDINADINATI

E rawa ni cautaki na ilavo ina Watch Tower ena dua na veidinadinati me vakayagataki e vuravura raraba, ia ena suka tale vua e cau ke mani gadreva. Me baleta e so tale na ivakamacala, yalovinaka qai veitaratara kei na Treasurer’s Office ena itikotiko e volai toka mai cake.

SOLI KA E LALAWATAKI

Me ikuri ni kena cautaki vakadodonu na ilavo, e tiko tale e so na mataqali cau me yaga ena cakacaka ni Matanitu ni Kalou e vuravura. Oqo e okati kina na:

Inisua: E rawa ni volai ina Watch Tower na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni dau tauri tu ga vakawawa ena vuku ni Watch Tower, se me qai soli me taukena na Watch Tower ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa me dau soli na stock kei na bond ina Watch Tower me dua ga na cau vakadodonu.

Qele kei na Vale: E rawa me soli vakadua na qele se na vale se, e rawa tale ga me caka e dua na veiyalayalati me se tei tawana tiko mada ga na qele se vale o koya e solia me yacova nona mate. Me veitaratara kei na valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.

Will kei na Trust: E rawa ni soli na iyau se na ilavo ina Watch Tower ena kena tabaki e dua na will, se na rawa ni vagolei ina Watch Tower na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi na kena vagolei na trust ina dua na isoqosoqo vakalotu.

Na cau vaka oqo era vakatokai mera “soli ka e lalawataki,” e kena ibalebale ni soli ka vaka oqo e dodonu me lalawa sara ga kina vakavinaka o koya e via soli ka. Me vukei ira na via soli ka ina cakacaka ni iVakadinadina i Jiova e vuravura raraba ena sala vaka oqo, sa vakarautaki kina e dua na ivola lailai vakavalagi kei na kena vakaSipeni e vakatokai na Charitable Planning to Benefit Kingdom Service Worldwide. E volai na ivola oqo me baleta e so na sala ni soli ka vakailoloma ena gauna sara ga oqo, se me qai soli ena gauna sa mate kina e dua. Nira wilika na ivola lailai oqo ra qai veitaratara kei na nodra dui daunivakasala ni lawa se ivakacavacava, era le levu era sa veivukei ena nodra cakacaka vakalotu kei na nodra veivukei na iVakadinadina i Jiova e vuravura raraba, qai gauna vata oqori era vakalailaitaka kina na ivakacavacava e dau lavaki vei ira. E rawa ni kerei na ivola lailai oqo ina Charitable Planning Office.

Ena so tale na ivakamacala, e rawa ni o veitaratara kei na Charitable Planning Office, e rawa ni o volavola ina itikotiko se qiri ina talevoni e toka oqo e ra, se veitaratara kei na valenivolavola ni iVakadinadina i Jiova ena nomu vanua.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-​0707

[iYaloyalo ena tabana e 18]

E tara rawa na Kingdom Hall totoka e veiyasa i vuravura ena noda duavata

[iYaloyalo ena tabana e 18]

Kingdom Hall vou mai Ghana