Muria na Sala ni Yalododonu

“Ia koi au, ka’u na muria lako na noqu yalododonu.”​​—⁠SAME 26:⁠11.

1, 2. (a) Na cava e tiki bibi kina ni kena vakalewai na veiliutaki ni Kalou na nona yalododonu na kawatamata? (b) Era na vakaraitaka vakacava na tamata kei ira na luvena vakayalo na Kalou nira to ena yasa ni veiliutaki i Jiova?

NA NONA veivorati o Setani ena were o Iteni, e vakalewai kina na dodonu ni Kalou me liutaki ira nona ibulibuli kece. Ni toso na gauna, sa qai beitaka o Setani ni tamata e qarava ga na Kalou ena veika e rawata kina. (Jope 1:​9-​11; 2:⁠4) Oya na vuna, na nona yalododonu na kawatamata sa mai tiki bibi kina ni kena vakalewai na dodonu i Jiova me liutaka na lomalagi kei na vuravura.

² E sega ni vakatautaki na nona veiliutaki cecere na Kalou ena yalododonu ni kawatamata, ia e rawa nira vakaraitaka na tamata kei ira na luvena vakayalo na Kalou se o cei era totaka. Era cakava vakacava oya? Ena nodra muria se sega na sala ni yalododonu. Na nona yalododonu gona e dua, e yavu dei ena qai lewai kina.

3. (a) Na cava erau vinakata o Jope kei Tevita me dikeva qai vakalewa o Jiova? (b) Na taro cava so e basika me baleta na yalododonu?

³ A kaya ena nuidei o Jope: “Me’u vakatovolei mada e nai vakarau dodonu [i Jiova], me kila kina na Kalou ni’u sa sega ni cala.” (Jope 31:⁠6) A kerea sara mada ga o Tui Tevita e Isireli makawa me dikeva o Jiova na nona yalododonu ena gauna e masuta kina: “I Jiova, mo ni lewai au; ni’u a muria lako na noqu yalododonu: au a vakararavi talega vei Jiova; ka’u na sega ni tidara.” (Same 26:⁠1) E bibi tale ga meda muria na sala ni yalododonu! Ia na cava na yalododonu, na cava na kena ibalebale ni tukuni meda muria na kena sala? Na cava ena vukea meda yalododonu tiko ga?

‘Niu a Muria Lako na Noqu Yalododonu’

4. Na cava na yalododonu?

⁴ Na yalododonu e tiko kina na vakasama ni ka e dodonu qai tawacala. Ia na yalododonu e sega ni kena caka ga na ka e dodonu. Na vakayacori tale ga ni ka e kilikili, na itovo se na yalo e vakamuai vakatabakidua vua na Kalou. A vakatitiqataka o Setani na inaki ni loma i Jope ena nona kaya vua na Kalou: “Ia mo ni dodoka mada na ligamuni, ka tara na suina kei na lewena, ena qai vosavakacacataki kemuni ki matamuni.” (Jope 2:⁠5) Na yalododonu e okati kina na vakayacori ni ka dodonu kei na ivakarau ni yalo e dodonu.

5. Na cava e vakaraitaka ni sega ni gadrevi sara meda uasivi me rawa nida qai dau yalododonu?

⁵ E sega ni gadrevi sara meda uasivi me qai rawa nida yalododonu. A sega ni uasivi o Tui Tevita qai dau cakava e so na cala bibi. Ia e tukuni koya na iVolatabu me turaga e dau muria na yalododonu se dau “yalodina.” (1 Tui 9:⁠4) Na vuna? O Tevita e dau lomani Jiova. E yalataki koya vakatabakidua vua na Kalou. A tusanaka na nona cala, ciqoma na veivakadodonutaki, qai vakadodonutaka na nona sala. Io, a laurai na yalododonu i Tevita ena nona lomana na nona Kalou o Jiova kei na nona qaravi koya ena lomana taucoko.​​—⁠Vakarua 6:​5, 6.

6, 7. Na cava e vauci ena noda muria na sala ni yalododonu?

⁶ Na yalododonu e sega ni yalani ga ena so na ka e vauca na bula ni tamata, me vaka na veika vakalotu. E vauca na ivakarau ni noda bula kece. O Tevita a “muria lako” na nona yalododonu. “Na vosa ‘muria lako’ e kena ibalebale na ‘sala ni bula’ se ‘ivakarau ni bula,’ ” e kaya na New Interpreter’s Bible. Ni tukuni ira tiko sa “dodonu sara e na [nodra] sala,” a lagata kina na daunisame: “Sa kalougata ko ira era vakabauta na nona vosa [na Kalou], era qarai koya e na lomadra taucoko. Era sa sega talega ni caka cala: era lako ga e na nona sala.” (Same 119:​1-3) Na yalododonu e vinakati kina noda saga tiko ga meda cakava na loma ni Kalou da qai muria na nona sala.

⁷ Na noda muria na sala ni yalododonu e vauci kina noda kabita matua na Kalou, ena gauna sara mada ga ni leqa. E laurai na noda yalododonu nida vosota na veivakatovolei, tudei nida sotava na veika dredre, se vorata na veitemaki ni vuravura ca nikua. Na noda ‘vakamarautaka na loma i Jiova’ e rawa kina vua me tauca na vosa vua e beitaki koya. (Vosa Vakaibalebale 27:11) E tiko gona na vuna vinaka meda dei kina me vakataki Jope: “Au na sega ni biuta tani vei au na noqu yalododonu, ka yacova na siga ka’u na mate kina.” (Jope 27:⁠5) Na ika26 ni Same e vakaraitaka na veika ena vukei keda meda muria tiko ga na yalododonu.

“Vakatovolea na Noqu Ivi kei na Yaloqu”

8. Na cava o vulica ena vakamamasu i Tevita me vakadikeva o Jiova nona ivi kei na yalona?

⁸ A masulaka o Tevita: “Mo ni vakadikevi au, Jiova, ka vakatovolei au; vakatovolea na noqu ivi kei na yaloqu.” (Same 26:⁠2) Na ivi e toka e lomadonu ni yagoda. O koya gona, na ivi e vakaibalebaletaka na titobu ni nona vakanananu e dua kei na veika e tara na nona bula. Na yaloqu e vakaibalebaletaka na veika e uqeta e dua, na ivakarau ni yalona, kei na nona kilaka. Na nona masuta o Tevita me dikevi koya o Jiova, a kerea tiko ga me vakasaqarai qai vakadikevi na nona vakanananu kei na ivakarau ni yalona.

9. E vakadikeva vakacava o Jiova na noda ivi ivakatakarakara kei na yaloda?

⁹ A vakamamasu o Tevita me dikevi nona ivi kei na yalona. E dikeva vakacava o Jiova na keda ituvaki e loma? A lagata o Tevita: “Au na vakamolimoli vei Jiova, o koya sa vakavulici au; sa vakavulici au talega na yaloqu e na lomaloma ni bogi.” (Same 16:⁠7) Na cava na kena ibalebale oqori? Kena ibalebale ga ni nona ivakasala na Kalou e yacova sara na loma i Tevita qai toka dei kina, e vakavulica na nona vakanananu kei na ivakarau ni yalona. Ena vakatale ga oya vei keda ke da dau vakananuma na ivakasala ena Vosa ni Kalou, na nodra ivakasala o ira era matataki koya, kei na nona isoqosoqo da qai laiva me lutu sara e lomada. Na noda masuta wasoma me dikevi keda ena sala oqo o Jiova ena vukea meda muria tiko ga na sala ni yalododonu.

“Sa Tu ga e Mataqu na Nomuni Yalololoma”

10. Na cava a vukei Tevita me muria tiko ga na ka dina me baleta na Kalou?

¹⁰ E tomana o Tevita: “Ni sa tu ga e mataqu na nomuni yalololoma: ka’u sa muria lako talega na nomuni dina.” (Same 26:⁠3) Kila vinaka o Tevita na nona yalololoma na Kalou, qai dau vakananuma. A lagata: “Mo vakavinavinaka vei Jiova, na yaloqu, ia mo kakua ni guilecava na nona ka ni loloma kecega.” Ni nanuma tiko e dua na “ka ni loloma” ni Kalou e tomana kina o Tevita: “Sa kitaka ko Jiova na ka dodonu kei na lewa vinaka, e na vukudra kecega era sa vakasaurarataki. Sa vakatakila ko koya na nonai valavala vei Mosese, kei na nona cakacaka vei ira na Isireli.” (Same 103:​2, 6, 7) De a rairai vakasamataka tiko o Tevita na nodra vakasaurarataki na Isireli vei ira na kai Ijipita ena gauna i Mosese. Ke dina oya, e kena ibalebale ni nona dau vakananuma o Tevita na nona vakatakila o Jiova vei Mosese na sala ena veisereki kina a rairai tara sara ga na loma i Tevita qai vakaukauataka nona sasaga me muria tiko ga na ka dina me baleta na Kalou.

11. Na cava ena vukea meda muria tiko ga na sala ni yalododonu?

¹¹ Na vulici wasoma ni Vosa ni Kalou kei na vakananumi ni veika eda vulica ena vukea meda muria tiko ga na sala ni yalododonu. Kena ivakaraitaki, na noda vakananuma na nona drotaka o Josefa na sasaga i wati Potifa me rau moce vata ena vakayaloqaqataki keda meda drovaka na ivalavala vata oqo ena noda vanua ni cakacaka, e koronivuli, se vanua cava tale. (Vakatekivu 39:​7-​12) Vakacava ke da temaki ena so na sala meda vutuniyau se rogo, se meda vakaitutu ena vuravura ni cakacaka nikua? E rawa nida nanuma na ivakaraitaki i Mosese, a besetaka na iyau mai Ijipita. (Iperiu 11:​24-​26) Na noda nanuma na vosota nei Jope ena vukei keda dina meda yalodina vei Jiova ke da tauvimate se sotava na dredre. (Jemesa 5:​11) Vakacava ke da vakacacani? Na noda nanuma na veika a sotava o Taniela ena qara ni laione ena vakayaloqaqataki keda!​​—⁠Taniela 6:​16-​22.

“Au na Sega ni Tiko Vata kei Ira na Tamata Lasulasu”

12, 13. Na ilala cava meda cata?

¹² E lai tukuna sara o Tevita e dua tale na vuna e yalododonu tiko ga kina, e kaya: “Au na sega ni tiko vata kei ira na tamata lasulasu, ka’u na sega talega ni lako vata kei ira era dauveivakaisini. Au sa cata nai soqosoqo tamata caka ca; ka’u na sega ni tiko vata kei ira nai valavala ca.” (Same 26:​4, 5) O Tevita a sega tu ga ni tiko kei ira na tamata ca. A cata na vakailala ca.

¹³ Vakacava o keda? Eda dau cata beka ni tiko kei ira na tamata lasulasu nida saravi ira ena porokaramu ena retioyaloyalo, vidio, iyaloyalo yavala, ena internet, se ena so tale na sala? Eda dau vakatikitikitaki keda beka vei ira era lasutaka na kedra itukutuku? E so e koronivuli se ena noda vanua ni cakacaka era via veitokani kei keda ena inaki ca. Eda dau saga beka meda veivolekati kei ira era sega ni muria na ka dina me baleta na Kalou? E so na vukitani era na kaya nira dau dina, ia era tabonaka na nodra inaki mera vakamuai keda tani ena noda qaravi Jiova. Vakacava ke so ena ivavakoso vakarisito e rua tu na ivakarau ni nodra bula? O ira tale ga oqo era vunitaka na ka dina me baleti ira. O Jayson, sa dauveiqaravi vakaitalatala tiko nikua, era vaka sara ga oqori na nona itokani ni se itabagone. E kaya me baleti ira: “Ena dua na siga, a kaya vei au e dua: ‘E sega ni bibi na ka eda cakava ena gauna oqo baleta ni sa na yaco mai na ituvaki vou, eda sa na mate tu. Eda na sega ni kila nida calata e dua na ka.’ Au kidavi au sara ga ena ivakarau ni vosa oya. Au sega ni via mate ni sa na vakavoui na vuravura.” E tagutuva sara ga o Jayson nona vakailala kei ira. A vakarota na yapositolo o Paula: “Dou kakua ni vakaisini kemudou vakataki kemudou: sa vakacala nai valavala vinaka na dautiko vata kei ira era sa ca.” (1 Korinica 15:33) E bibi dina meda cata na vakailala ca!

‘Au na Tukuna Kece ga na Nomuni Cakacaka Veivakurabuitaki’

14, 15. E rawa vakacava nida ‘vakavolivolita na icabocabonisoro i Jiova’?

¹⁴ E tomana o Tevita: “Au na vuluvulu ni ka’u sa sega ni cala: ka’u na vakavolivolita vakakina na nomuni cabocabo-ni-soro, i Jiova.” Na vuna? “Me’u vakarogoya voli e na domo ni vakavinavinaka, ka tukuna kecega na nomuni cakacaka e veivakurabuitaki.” (Same 26:​6, 7) A vinakata o Tevita me savasava tiko ga nona itovo me rawa kina ni qaravi Jiova qai vakadeitaka nona yalodina vua.

¹⁵ Na veika kece e vauca na sokalou dina ena valeniveitavaki qai tini ena valenisoro e “[i]vakatakarakara kei na [i]yaloyalo ni veika vakalomalagi.” (Iperiu 8:5; 9:​23) Na icabocabonisoro e dusia na loma i Jiova me ciqoma na isoro i Jisu Karisito me vakabulai kina na kawatamata. (Iperiu 10:​5-​10) Eda vuluvulu nida sega ni cala da qai ‘vakavolivolita na icabocabonisoro i Jiova,’ nida vakabauta na isoro oqori.​​—⁠Joni 3:​16-​18.

16. Ena yaga vakacava vei keda na noda tukuna na cakacaka veivakurabuitaki ni Kalou?

¹⁶ Nida vakasamataka na veika kece e rawati ena vuku ni isoro, e dodonu ga meda vakavinavinakataki Jiova kei na Luvena duabau ga a vakatubura. Eda vakavinavinaka ena noda tukuna gona na cakacaka veivakurabuitaki ni Kalou me tekivu mai na bula ni kawatamata ena were o Iteni me yacova na vakavoui ni veika kece ena vuravura vou ni Kalou. (Vakatekivu 2:7; Cakacaka 3:​21) Ena taqomaki keda tale ga vakayalo na vunautaki ni Matanitu ni Kalou kei na nodra vukei e so tale mera tisaipeli! (Maciu 24:14; 28:​19, 20, VV) Na noda ogaoga kina ena vukea me dei tiko ga noda inuinui ena gauna mai muri, ena qaqaco noda vakabauta na vosa ni yalayala ni Kalou, qai torocake noda lomani Jiova kei ira na wekada.

“Au sa Vinakata na Vale Ko ni sa Dautiko Kina”

17, 18. Meda raica vakacava na soqoni vakarisito?

¹⁷ Na valeniveitavaki, kei na kena icabocabonisoro, e vanua sara ga e sokaloutaki kina o Jiova e Isireli. Ni tukuna tiko o Tevita nona taleitaka na vale oya, a masuta kina: “I Jiova, au sa vinakata na vale ko ni sa dautiko kina, kei na yasana sa tiko kina na nomuni ukuuku.”​​—⁠Same 26:⁠8.

¹⁸ Eda dau taleitaka beka meda soqovata ena vanua eda vulici Jiova kina? Na Kingdom Hall kece kei na kena porokaramu ni veivakavulici vakayalo e vanua ni sokalou dina ena yasayasa eda vakaitikotiko kina. Sa qai tiko na soqo ni tikina e veiyabaki, soqo ni tabacakacaka, kei na siga ni soqo lavotaki. E veivosakitaki na “vosa” i Jiova ena soqoni vaka oqo. Ke da vulica meda “lomana vakalevu” na vosa i Jiova, eda na makutu ni lako ena soqoni da qai vakarorogo vinaka sara. (Same 119:167) E veivakabulabulataki dina meda maliwai ira na tacida eda vakabauta vata era kauaitaki keda ra qai vukei keda meda muria tiko ga na sala ni yalododonu!​​—⁠Iperiu 10:​24, 25.

‘Kua ni Kauta Laivi Noqu Bula’

19. Na ivalavala ca cava a sega ni via beitaki kina o Tevita?

¹⁹ Na nona kila o Tevita na ka ena yaco ke tiva tani mai na ka dina, a vakamamasu kina: “Mo ni kakua ni kauta vata na yaloqu kei ira na tamata ca, se na noqu bula kei ira na tamata era dauveivakamatei: sa tiko e na ligadra na ca, ka sa sinai na ligadra i matau e na tautauri ni vere.” (Same 26:​9, 10) O Tevita a sega ni via wili vata kei ira na tamata tawavakalou era beitaki nira ivalavala velavela se dauveivaqumi.

20, 21. Na cava e rawa ni vakamuai keda ena sala tawavakalou?

²⁰ Sa luvuci tu o vuravura nikua ena itovo dukadukali. Na retioyaloyalo, ivola, kei na iyaloyalo yavala e uqeta na ivalavala tawakilikili, na “dauveibutakoci, na i vakarau vakasisila, na i valavala velavela.” (Kalatia 5:​19, VV) E so era sa lai vesuki tu ena saravi ni iyaloyalo ca, e dau vakavuna na itovo dukadukali. E vakamuai ira vakalevu na itabagone na idre vaka oqo. Ena so na vanua e vakadonui kina na veibuku, era dau uqeti na itabagone mera kila ni dodonu mera vakayacora oya. Levu na itabagone era sa lai veivinakati sara, e dina ni se bera nira yacova na yabaki ni vakamau. Mera vakaceguya na gagano sa tubu tiko e lomadra, era vakayacora kina na itovo dukadukali me lai tini sara ena nodra veidauci.

²¹ Era sega tale ga ni galala na uabula mai na idre cala. Na caka bisinisi vakailawaki kei na vakatulewa ena inaki kocokoco e ivakatakilakila ni kena lekati na yalododonu. Na noda muria na sala ni vuravura e vakayawaki keda vei Jiova. Meda “cata na ka ca, ka vinakata na ka vinaka” da qai muria tiko ga na sala ni yalododonu.​​—⁠Emosi 5:​15.

“Ni Vakabulai Au, ka Lomani Au Mai”

22-24. (a) Na veivakayaloqaqataki cava o kunea ena itinitini ni vosa ena Same 26? (b) Na icori cava ena veivosakitaki ena ulutaga e tarava?

²² Sa qai tinia o Tevita nona vakamamasu vua na Kalou ni kaya: “Ia koi au, ka’u na muria lako na noqu yalododonu: ni vakabulai au, ka lomani au mai. Sa tu ga na yavaqu e na vanua vinaka: ka’u na vakavinavinaka vei Jiova e nai soqosoqo.” (Same 26:​11, 12) Na nona nuidei o Tevita me yalododonu tiko ga e salavata kei na nona vakamamasu me vakabulai. Sa bau veivakayaloqaqataki dina oya! E dina nida ivalavala ca, o Jiova ena vukei keda ke da vakadeitaka meda muria tiko ga na sala ni yalododonu.

²³ Me laurai mada ga ena veika eda cakava nida doka da qai rokova na veiliutaki cecere ni Kalou ena veibasoga kece ni noda bula. Meda dui kerei Jiova ena masu me dikeva qai vakatovolea na ivakarau ni noda vakanananu kei na ivakarau ni yaloda. E rawa nida nanuma vinaka tiko na ka dina oqo ke da vulica vagumatua na nona Vosa. Koya gona, meda cata na vakailala ca ia meda vakavinavinaka vei Jiova ena noda dau tiko ena soqoni. Meda gumatua mada ga ena vunautaki ni Matanitu ni Kalou kei na nodra vukei e so tale mera tisaipeli, da qai kua ni vakalaiva na vuravura me vakaleqa na noda veiwekani talei kei na Kalou. Nida solia noda vinaka kece meda muria na sala ni yalododonu, meda nuidei ni o Jiova ena lomani keda.

²⁴ Me vaka ni vauca na noda bula kece na yalododonu, meda qarauna e dua na icori e dau veivakaleqai​​—⁠na gunu vakasivia. Ena veivosakitaki oqo ena ulutaga e tarava.

O se Nanuma Tiko?

• Na cava e yavu dei kina ni nodra lewai na tamata kei ira na luve vakayalo ni Kalou na nodra yalododonu?

• Na cava na yalododonu, na cava e vauci ena muri ni kena sala?

• Na cava ena vukei keda meda muria na sala ni yalododonu?

• Na cava meda qarauna da qai cata me rawa nida yalododonu tiko ga?

[iYaloyalo ena tabana e 14]

O dau kerei Jiova wasoma me dikeva na nomu vakanananu?

[iYaloyalo ena tabana e 14]

O dau vakasamataka na nona yalololoma o Jiova?

[iYaloyalo ena tabana e 15]

Na noda yalododonu tiko ga nida vakatovolei e vakamarautaki Jiova

[iYaloyalo ena tabana e 17]

O dau vakayagataka vakavinaka na veika e vakarautaka o Jiova mo muria kina na sala ni yalododonu?