Era Vakamarautaki Ira na Nodra iTubutubu

“NA LUVEQU, kevaka ena vuku na lomamu, ena reki dina na yaloqu.” (Vosa Vakaibalebale 23:15) Era dau marautaka na itubutubu lotu Vakarisito ni tiko vei luvedra na vuku vakalou. Ena Vakarauwai, 10 Sepiteba, 2005, era le 6,859 mai na veimatanitu era a tiko ena nodra tuvaitutu na ika119 ni kalasi ni Watchtower Bible School of Gilead. Dua na ka na marau ni lomadra, vakauasivi vei ira na nodra itubutubu na le 56 na gonevuli.

E dola na porokaramu ni soqo oqo ena dua na masu veiuqeti i David Walker, sa veiqaravi dede tu ena Peceli mai Mereke. Sa qai tekivuna na porokaramu ni tuvaitutu na jeameni o David Splane, e dua na lewe ni iLawalawa Dauvakatulewa ni iVakadinadina i Jiova, qai tukuna vei ira na itubutubu ni gonevuli: “Keimami vakavinavinakataki kemuni vakalevu. Na itovo oni teivaka vei ira na luvemuni sa uqeti ira mera veiqaravi vakadaukaulotu.” Era rairai lomaleqa na itubutubu oqori nira sa vakarau biubiu na luvedra ina ilesilesi vakayawa. Ia, e vakadeitaka vei ira o Brother Splane: “Ni kua ni lomaleqataki ira na luvemuni, ni na karoni ira vinaka cake sara o Jiova.” Sa qai kaya: “Vakasamataka ga na veika totoka era na cakava na luvemuni. O ira na tamata era rarawa voli era sa na qai bau lai vakacegui dina.”

Sala Mo Vakamarautaki Ira Tiko ga Kina e So Tale

Sa qai cavuti iratou e le va eratou na vunau na jeameni ni soqo. E vosa e liu o Ralph Walls, e dua na lewe ni Komiti ni Tabana mai Mereke ena ulutaga “Ni Yadra Tiko Ga.” E vakabibitaka ni ca sara vakalevu na mataboko vakayalo ni vakatauvatani kei na mataboko vakayago. A laurai vei ira na lewe ni ivavakoso mai Leotisea ena imatai ni senitiuri nira sa mataboko vakayalo, era a qai vukei o ira na lotu Vakarisito era mataboko. E vinaka gona meda dau yadra tiko ga vakayalo me itataqomaki ena ituvaki vaka oqo. (Vakatakila 3:​14-​18) Sa qai kaya: “Mo ni yadra tiko ga, mo ni raici ira na tamata nuitaki me vaka ga nona raici ira o Jiova.” Ke mani yaco e so na leqa ena ivavakoso mera kua ni taqaya kina na gonevuli. E kila vinaka tu na Turaga o Jisu Karisito na veika kece oqori. Ena raica me wali na leqa oqori ena kena gauna veiganiti.

Tarava, e sauma o Samuel Herd, e dua na lewe ni iLawalawa Dauvakatulewa na taro “O sa Vakarau Tu Beka?” O ira na gonevuli oqo mera na vakaisulu se vakaitovotaki ira tiko ga ena itovo ni tamata vou, me vaka ga e dua e dauveilakoyaki ni na kauta tu ga na isulu e gadreva. Mera yalololoma vakataki Jisu. E laurai na loloma oqori ena gauna e tukuna kina vei Jisu e dua na vukavuka: “Kevaka ko ni sa vinakata, ko ni sa vakasavasavataki au rawa,” qai kaya o Jisu: “Au sa vinakata; mo savasava mai.” (Marika 1:​40-​42) Sa qai kaya o Brother Herd: “Ke oni via vukei ira dina na tamata, oni na vakasaqara na sala mo ni cakava kina.” E kaya na Filipai 2:​3, (VV) vei ira na lotu Vakarisito mera dau “okati ira na tani me ra uasivi cake.” E kaya o Brother Herd: “E bibi cake na yalomalumalumu mai na vuku. Ke oni dau yalomalumalumu, ena vakilai na kena yaga vei ira oni sota ena cakacaka vakavunau kei ira na tacimuni kei na ganemuni ena ivavakoso.” Sa qai tinia ena nona kaya, ke ra vakasulumi ira ena loloma vakarisito na gonevuli, e vakaraitaka oqo nira sa tu vakarau mera vakayacora nodra ilesilesi, era na gumatua tale ga kina.​​—Kolosa 3:​14.

Ra qai vakatudaliga sara vei Mark Noumair, e dua na qasenivuli e Kiliati, ena dua na ulutaga e vakavuna nodra nanamaki, “O na Dei Beka Kina?” Oqo e tukuni tiko kina na noda dau vakavinavinakataka na vinaka i Jiova. E kaya na Same 103:2: “Mo vakavinavinaka vei Jiova, na yaloqu, ia mo kakua ni guilecava na nona ka ni loloma kecega.” Era sega ni vakavinavinakataka na Isireli na mana era a bula tiko kina, ra qai tukuna ni “kakana vakasisila.” (Tiko Voli mai na Lekutu 21:5) Ni toso na gauna, era kania tiko ga na mana, ia sa ra sega ga ni vakavinavinakataka. E kaya na qasenivuli ni Kiliati oqo: “Ke o guilecava na ka e dau cakava o Jiova, o qai vakawalena na nomu veiqaravi e vanuatani, ena veisautaka na nomu rai me baleta na cakacaka e solia vei iko o Jiova.” E kaya na Same 103:4 ni “vakaisalataki iko ena ka ni loloma” o Jiova. Era na vakila na gonevuli na loloma ni Kalou ena nodra ivavakoso vou.

E vosa e dua tale na qasenivuli e Kiliati, o Lawrence Bowen, ena ulutaga “Oni na Vauci Beka ena Veivakalougatataki?” E kaya ni o ira na lewe ni ika119 ni kalasi e Kiliati era cakacaka vakaukaua me na rawa kina nira daukaulotu gugumatua. Ia, e gadrevi ena gauna oqo mera kabiti Jiova tiko ga ra qai cakava na itavi e lesia vei ira. E vakamacalataki ena Vakatakila 14:​1-4 ni o ira na 144,000 “era sa muria na Lami e na veiyasana sa lako kina ko koya.” Dina nira vakatovolei, ia era yalodina kece ena nodra kabiti Jiova kei Luvena, ra sauva tale ga na nodra isausau. “Se mani cava gona ena rairai yaco, o keda tale ga meda kabiti Jiova tiko ga ena yalodina da qai vakayacora na itavi e lesi keda kina,” e kaya o Brother Bowen. Nira cakava oqori, era na raica sara ga na gonevuli oqo ni “vauci” ira na veivakalougatataki i Jiova.​​—Vakarua 28:2.

Vua Nodra Cakacaka

Ena gauna kece e vakayacori tiko kina na vuli era dau cakacaka vakavunau na gonevuli ena muanimacawa. Na gauna e vosa kina vei ira o Wallace Liverance, na vunivola ni koronivuli, e laurai ni vuavuaivinaka na nodra cakacaka. Era vunau ena rauta ni tini na vosa, ra tekivuna tale ga e vica na vuli iVolatabu. Kena ivakaraitaki, rau vuli iVolatabu kei na dua na turaga ni Jaina e dua na veiwatini erau lewe ni kalasi. Ni oti e rua na veisiko rau sa taroga sara nona nanuma ni sa mai kilai Jiova. E cega nona iVolatabu ina Joni 17:3 qai kerea me rau wilika. E kaya ni sa muria sara tiko ga na sala e basika ina bula.

E dua tale na lewe ni iLawalawa Dauvakatulewa o Anthony Morris a vakatarogi iratou e tolu na tacida eratou veiqaravi tiko ena Komiti ni Tabana mai Côte d’Ivoire, mai na Dominican Republic, kei Ecuador. Eratou vakadeitaka vei ira na gonevuli nira sa vakanamata tu na Komiti ni Tabana ina nodra tadu yani na gonevuli, era na vukei ira tale ga ena nodra qarava na nodra ilesilesi.

E tarava o Leonard Pearson, e dua na lewe ni vuvale e Peceli mai Mereke, a vakatarogi tale ga e tolu na tacida eratou lewe ni Komiti ni Tabana mai na Democratic Republic of the Congo, Papua Niu Kini, kei Uganda. Ratou uqeti ira na gonevuli mera dau vakaitavi vakalevu ena cakacaka vakavunau. Dua na veiwatini daukaulotu rau sa yabaki 21 mai na Congo, erau vukei ira e le 60 mera yalataki ira, ra papitaiso tale ga. Ena gauna oqo sa 30 tiko na nodrau vuli iVolatabu, qai 22 vei ira oqori era dau tiko ena soqoni ni ivavakoso. Ena levu ni tatamusuki vakayalo vaka oqori, e gauna vinaka sara ga oqo mera lai veiqaravi kina vakadaukaulotu.

Vakaraitaka ni Nomu Vakadinadina e Vakatotolotaki

E nona na iotioti ni vosa o Gerrit Lösch, e dua na lewe ni iLawalawa Dauvakatulewa. E nona ulutaga ni vosa na “Vunautaka na Kalou Qai Vakadinadinataki Jisu ena Siga ni Turaga.” Na vosa “vakadinadina” e cavuti vakavica ena iVolatabu. E matata vinaka kina na cakacaka sa vakarautaka tu o Jiova mera cakava na nona tamata. Gauna cava meda na vunau se vakadinadina kina? Donuya na “siga ni Turaga.” (Vakatakila 1:​9, 10) Na siga oqori e tekivu ena 1914, sa tomani tiko ena noda gauna, ena yacova yani na veigauna mai muri. E kaya na Vakatakila 14:​6, 7, nira tokona na agilosi noda vunautaka na veika me baleta na Kalou. E vakaraitaka na Vakatakila 22:17 nira vakacolati na vo ni lotu Vakarisito lumuti mera vunautaka na itukutuku me baleti Jisu. Ia e noda itavi dokai kece oqori nikua. Ena tikina e 20, e volai tu kina ni tukuna o Jisu: “Ka’u sa lako kusarawa mai.” E uqeti ira kece na tiko e kea o Brother Lösch: “Ni tukuna yani vei ira na tamata, ‘Ni lako mai, ni mai gunuva wale ga na wai ni bula.’ Sa lako kusarawa mai o Jisu. Eda sa vakarau tu beka?”

Sa qai tinia na porokaramu ena dua na masu ni vakavinavinaka vei Jiova e tara sara ga na lomadra kece na tiko ena soqo oya o Fred Rusk, a qasenivuli tu ni Koronivuli o Kiliati me 11 na yabaki. E mai tini vinaka kina na soqo oya baleta ni dua na gauna marautaki.

[Kato ena tabana e 13]

VEIKA ME BALETA NA KALASI

Vanua era cavutu mai kina: 10

Vanua era lesi kina: 25

Levu ni gonevuli: 56

iVakatautauvata ni nodra yabaki: 32.5

iVakatautauvata ni yabaki ena dina: 16.4

iVakatautauvata ni yabaki ena cakacaka vakaitalatala vakatabakidua: 12.1

[iYaloyalo ena tabana e 15]

Nodra Tuvaitutu na Kalasi 119 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.