Era Marau na Cakava na Loma ni Kalou
A LAIVA e dua na ivakarau o Jisu vei ira na lotu Vakarisito kece ena nona masu vei Tamana: “Me kakua ni yaco na lomaqu, me yaco ga na lomamuni.” (Luke 22:42, VV) Na masu e cavuti oqo ena yalomalumalumu kei na vakarokoroko vei Jiova era bulataka sara tiko ga e vica na milioni na dauveiqaravi ni Kalou nikua. Era okati tiko kina na lewe 52 na gonevuli ena ika120 ni kalasi ni Watchtower Bible School of Gilead. Ena 11 Maji, 2006, o ira na tuvaitutu oqo era marau na cakava na loma ni Kalou ena veivanua, dina ga nira na sotava kina na veika dredre.
Na cava e uqeti ira na tuvaitutu oqo me lewa nodra bula na loma i Jiova? Rau vakamacalataka na ka e uqeti rau e dua na veiwatini rau lesi i Bolivia, o Chris kei Leslie: “Ni keirau sa sega ni lewai keirau tale, keirau sa galala me keirau vakayacora ga na veika e vauca na isoqosoqo i Jiova.” (Marika 8:34) Erau kaya tale ga o Jason kei Chere, rau lesi i Albania: “Na ilesilesi kece e lesi keirau kina na isoqosoqo i Jiova e dau salavata mai kei na kena dredre. Ia, keirau raica rawa ni dodonu ga me keirau vakararavi vakatabakidua vei Jiova.”
Uqeti Mera Muria na Loma i Jiova
A dolava na porokaramu ena masu o George Smith, e dua na lewenivuvale e Peceli, e cakacaka tiko ena Tabana ni Droini. Na jeameni ni porokaramu ni tuvaitutu o Stephen Lett, e dua na lewe ni iLawalawa Dauvakatulewa ni iVakadinadina i Jiova, a kidavaki ira kece na tiko kina. Era mai tiko ena Watchtower Educational Center e Patterson, Niu Yoka, na vulagi era gole mai na 23 na veivanua mera mai marautaka na soqo oqo. A tukuna o Brother Lett vei ira na gonevuli era tuvaitutu nira na rawata e “dua na ka e kaukaua sara.” A dusimaki ira ina “bai ni valu kaukauwa”—me vaka na ivakavuvuli ni lotu lasu—ena rawa vei ira na daukaulotu vou oqo mera na talaraka sobu ena kaukaua ni Vosa ni Kalou. (2 Korinica 10:4, 5) E tinia: “Oni na marau ni vakayagataki kemuni o Jiova mo ni vukica na veika e vaka na bainivalu kaukaua sa vakawakana tu vei ira na tamata lomadina era tu ena vanua oni na lesi kina!”
E dua na lewe ni iLawalawa Dauvakatulewa o Harold Jackson, a vosa ena ulutaga “E So na Ka me Nanumi.” E vakasalataki ira na daukaulotu vou oqo mera kua vakadua ni guilecava na bibi ni nodra ‘vakasaqara taumada na Matanitu ni Kalou kei na nona yalododonu.’ (Maciu 6:33) Mera nanuma tiko ni “loloma sa dau veivakatataki cake” ena rawati dina kina na marau. (1 Korinica 8:1, VV) A kaya: “Me nomuni idusidusi na loloma ena nomuni veitaratara kei ira tale e so.”
E nona na itavi e tarava o Geoffrey Jackson, e lewe ni iLawalawa Dauvakatulewa, a veiqaravi tu vakadaukaulotu mai na 1979 ina 2003, a tarogi ira na tuvaitutu, “Na Cava e Nomuni iTavi?” A vakabibitaka me tiko vei ira na rai dodonu me baleti ira, vaka kina na cakacaka vakavunau. E nodra itavi na lotu Vakarisito mera gumatua ena tea qai vakasuasuataka na sore ni ka dina. Ia o Jiova duadua ga e nona itavi na kena tubu vakayalo, ni “Kalou ga sa vakatubura.” (1 Korinica 3:6-9) E tomana o Brother Jackson: “Ena tarogi kemuni o Jiova ena nomuni itavi me baleta na nomuni saga mo ni kaukaua tiko ga vakayalo. Ia na cava na nomuni itavi levu duadua? Na nomuni lomani Jiova, kei na nomuni lomani ira na lewenivanua oni na lai veiqaravi kina.”
E vosa e dua tale na qasenivuli e Kiliati o Lawrence Bowen, ena ulutaga “Me Vinaka na Nomuni iValavala.” E vakananuma vei ira na gonevuli na nona dusimaki ira qai taqomaki ira vakacakamana na Isireli o Jiova ena vanualiwa. (Lako Yani 13:21, 22) E dusimaki keda qai taqomaki keda tale ga o Jiova nikua, e dua na sala oya nona vakayagataka na ivavakoso lumuti vakarisito,“na duru kei na yavu ni vakavuvuli dina.” (1 Timoci 3:14, 15) E bibi vei ira na daukaulotu vou oqo mera taura dei na ivakavuvuli dina, ni oqo ena dusimaki ira qai taqomaki ira na yalomalumalumu.
O Wallace Liverance e dua tale ga na qasenivuli e Kiliati a vakauqeti ira na tuvaitutu oqo mera kua vakadua ni guilecava na Vosa ni Kalou mai ‘dakudra.’ Ni tukuni na Vosa ni Kalou mai dakudra, e tiko kina na vakasama ni volai oti na iVolatabu ena vica na senitiuri sa oti. E vaka ga na nona tiko na ivakatawanisipi mai dakudra na qelenisipi qai kacivi ira, o Jiova tale ga e tiko mai dakudra na nona tamata qai dusimaki ira tiko ena nona vakayagataka “na dauveiqaravi yalo dina ka vuku.” (Aisea 30:21; Maciu 24:45-47, VV) Na Koronivuli gona o Kiliati e vukei ira na gonevuli mera vakalevutaka nodra vakavinavinakataka na ilawalawa dauveiqaravi oya. E vakarautaka sara mada ga na “dauveiqaravi” oqo na iVolatabu na New World Translation of the Holy Scriptures. Sa qai uqeti ira na gonevuli o koya e vunau: “Vakayagataka na ivola vakamareqeti oqo mo ni veivakavulici kina.”—Maciu 13:52.
Cakava na Loma i Jiova ena Cakacaka Vakavunau
Na ulutaga “Gumatua ni Kacivaka na iTukutuku Vinaka,” e kauta cake mai kina o Mark Noumair, e dua na qasenivuli e Kiliati e so na nodra ivakaraitaki na tuvaitutu oqo ena cakacaka vakavunau ena gauna era vuli tiko kina ena Koronivuli o Kiliati. (Roma 1:15) E laurai ena nodra vakatarogi na gonevuli nira a gumatua dina mera vunau ena gauna veiganiti kece ga.
Ra baci vakaukauataki tale na gonevuli ena nona itavi o Kenneth Flodin, a vakatarogi iratou e tolu na ivakatawa dauveilakoyaki eratou sa veiqaravi tiko ena gauna oqo e Mereke. O Richard Keller kei Alejandro Lacayo rau a veiqaravi tu e liu mai Sauca Amerika kei Amerika e Loma, rau vakamacalataka na sala erau muria ni rau sotava na veika dredre, rau qai tukuna tale ga na veivakalougatataki erau ciqoma ena gauna rau a veiqaravi tu kina vakaulotu. A vakamacalataka o Moacir Felisbino na ka e vulica ena gauna a cakacaka vata voli kina kei ira na daukaulotu e Brazil, na vanua a susugi kina.
O David Schafer a vakataroga e tolu na daukaulotu dede o Robert Jones, Woodworth Mills, kei Christopher Slay. Eratou vakamacalataka na tolu na tacida oqo na ka eratou cakava ena nodratou nuitaki Jiova ena gauna eratou dau sotava kina na dredre. Ratou vakadeitaka vei ira na gonevuli ni veika kece era vulica ena isoqosoqo i Jiova e vakarautaki ira vinaka ena ilesilesi vakadaukaulotu. A tinia o Brother Mills: “Dina ga niu vulica na ivakavuvuli ena iVolatabu, ia na ka e vukei au sara vakalevu, oya na ka e vakavulici au kina na koronivuli me baleta na yalomalumalumu kei na loloma.”
O Guy Pierce e dua na lewe ni iLawalawa Dauvakatulewa, a qai vosa ena ulutaga levu “Sega Vakadua ni Guce o Jiova.” Ni guce o Atama e kena ibalebale beka oya ni a guce tale ga na Kalou? A sega beka ni buli Atama vakavinaka na Kalou me vaka era kaya e so? Sega, ni “sa bulia na tamata na Kalou me yalododonu.” (Dauvunau 7:29) Nona yalodina o Jisu ena veivakatovolei levu duadua a mai sotava e vuravura e vakadinadinataka ni “sega sara ga na nona iulubale o Atama, e sega ni dodonu me guce,” a kaya o koya e vunau. Na veivakatovolei a sotava o Atama ena were o Iteni e sega ni dredre me vaka na kena a sotava ena yalodina o Jisu. A guce ga o Atama. Ia ena sega vakadua ni guce o Jiova. Ena vakayacori dina ga na nona inaki. (Aisea 55:11) A tukuna vei ira na daukaulotu vou oqo o Brother Pierce: “E ka dokai mo ni vakarokorokotaki Jiova ena nomuni vakaraitaka na yalo ni vakuai kemuni. Me tiko vata mada ga kei kemuni o Jiova ena vanua cava ga oni na veiqaravi kina vakadaukaulotu.”
Ni vakasavuya oti na vakanuinui vinaka era vakauta mai e so na valenivolavola ni tabana ni iVakadinadina i Jiova, sa qai solia na jeameni o Brother Lett, na nodra sitivikiti kei na nodra ilesilesi na gonevuli. Qai tinia na porokaramu ena masu o Vernon Wisegarver, sa dede nona lewenivuvale e Peceli.
O ira na le 6,872 era tiko ena soqo ni tuvaitutu oqo era vakila ni vaka e vakabulabulataki tale na nodra lomakatakata ni cakava na loma ni Kalou. (Same 40:8) Rau kaya e dua na veiwatini o Andrew kei Anna erau lewenikalasi oqo: “Keirau yalataka na neirau bula vei Jiova. Keirau yalataka vua ni keirau na cakava na cava ga e vinakata. Sa vinakata gona o Jiova me keirau gole i Cameroon, e Aferika.” O rau kei ira na vo ni gonevuli era tuvaitutu oqo era tu vakarau sara ga mera cakava na cakacaka era na kunea kina na marau kei na lomavakacegu. Io, era marau na cakava na loma ni Kalou.
[Kato ena tabana e 17]
VEIKA ME BALETA NA KALASI
Vanua era cavutu mai kina: 6
Vanua era lesi kina: 20
Levu ni gonevuli: 52
iVakatautauvata ni nodra yabaki: 35.7
iVakatautauvata ni yabaki ena dina: 18.3
iVakatautauvata ni yabaki ena cakacaka vakaitalatala vakatabakidua: 14.5
[iYaloyalo ena tabana e 18]
Nodra Tuvaitutu na Kalasi 120 ni Watchtower Bible School of Gilead
E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.