Nodra Tuvaitutu na Ika123 ni Kalasi e Kiliati
Ra Uqeti na Vuli Mai Kiliati Mera “Dau Vakekeli Vakatitobu”
ERA soqo vata yani ena Vakarauwai, 8 Sepiteba, 2007 e le 6,352 mai na 41 na vanua mera tiko ena tuvaitutu ni ika123 ni kalasi ni Watchtower Bible School of Gilead. Tekivu na porokaramu ena 10 na kaloko ena mataka. A kidavaki ira na vakarorogo na jeameni o Anthony Morris, e lewe ni iLawalawa Dauvakatulewa, qai dua nona vosa lekaleka. Oti oya sa qai tukuna ni na vosa taravi koya o Gary Breaux, e lewe ni Komiti ni Tabana mai Mereke.
E vakabibitaka o Brother Breaux vei ira na gonevuli ni ka talei ena mata i Jiova o ira na cakava na lomana, e sega ni bibi vua na kedra irairai vakayago. (Jere. 13:11, NW) E uqeti ira mera gugumatua mera ka talei tiko ga ena mata i Jiova. Na itavi tarava a vosa kina o Gerrit Lösch, e lewe ni iLawalawa Dauvakatulewa, e vakabibitaka kina ni sega ni cala noda nuitaka me vakalougatataki keda o Jiova nida qaravi koya. (Iper. 11:6) Ia, me vu dina mai lomada na noda veiqaravi.
A vosa tarava o William Samuelson, na ivakatawa ni tabana e qarava na vuli vakayalo (Theocratic Schools Department), e uqeti ira na tuvaitutu mera yalodina ina nodra ilesilesi lavotaki mera vunautaka na nona veiliutaki na Tui, me kilikili tale ga nodra itovo.a E uqeti ira na tuvaitutu o Sam Roberson, na ivukevuke ni ivakatawa ni tabana e qarava na vuli vakayalo, mera dau kauaitaka na nodra itovo vinaka e so tale. Era na vakavinakataka kina na gonevuli na nodra “lomani ira na veiwekani [“mataveitacini,” NW].”—1 Pita 2:17.
Ni oti na vica na itavi veivakauqeti oya, a qai vosa o Mark Noumair e qasenivuli e Kiliati. E vakataroga e vica na gonevuli, era vakasavuirogorogotaka na ka era sotava ena cakacaka vakavunau ena gauna ni vuli. E matata vei ira na vakarorogo nira taleitaka dina na cakacaka vakavunau, vaka kina na nodra vinakata mera vakavulici ira tale e so. A vosa tarava o Kent Fischer mai na valenivolavola e Patterson, a vakataroga e so na lewe ni Komiti ni Tabana mai na tolu na vanua era lesi kina na daukaulotu. Era marautaka na vakarorogo—ra okati kina na nodra itubutubu na gonevuli—na ka era tukuna na lewe ni komiti, oya nira dau karoni vinaka na daukaulotu vou ena vanua era lesi kina. Oti, sa qai vosa o Izak Marais mai na tabana e qarava na cakacaka ni vakadewa ena veiyasa i vuravura (Translation Services Department), a vakataroga e so na daukaulotu era sa veiqaravi tu mai vakadede. Era rogoca kina na gonevuli e so na ka marautaki mera vakanamata kina.
O Geoffrey Jackson e lewe ni iLawalawa Dauvakatulewa e vosa ena ulutaga levu ni porokaramu, “Cava O na Cakava ena Veika O sa Rogoca?” A veiqaravi vakadaukaulotu o Brother Jackson ena Wasa Pasifika me rauta e 25 na yabaki, a vakamacalataka na itinitini ni iVunau ena Ulunivanua. E talanoataka kina o Jisu e rua na turaga erau tara vale, e dua e vuku dua tale e lialia. E kaya ni a rairai dua ga na yasayasa erau tara vale kina. A tara na nona vale na turaga lialia ena dela ni nuku, ia na turaga vuku a kelikeli vakatitobu me yacova ni sa kunea na vatu, qai tauyavutaka kina na nona vale. Gauna e cagilaba kina, a sega ni yavalati na vale e tara ena dela ni vatu, ia a bale ga na vale a tara ena dela ni nuku.—Maciu 7:24-27; Luke 6:48.
E kaya o Jisu ni o ira na rogoca na nona ivakavuvuli ia ra sega ni cakava kina e dua na ka era vakatakarakarataki koya na turaga lialia. O koya na turaga vuku e vakatakarakarataki ira na rogoca na vosa i Jisu ra qai bulataka sara. E kaya o Brother Jackson vei ira na tuvaitutu, “Oni na vakataki koya na turaga vuku ni oni bulataka na ka oni vulica ena iVolatabu ena vanua oni lesi kina.” E tinia nona vosa ena nona uqeti ira mera “dau vakekeli vakatitobu” ena vanua era lesi kina.
Sa qai yacova mai na gauna me soli kina vei ira na gonevuli na nodra sitivikiti, tukuni tale ga vei ira na vanua era lesi kina, sa qai so na nona vosa ni veivakadreti o Brother Morris. E uqeti ira na gonevuli mera dau muri Jisu, mera dau nuitaka tale ga na veivakaukauataki i Jiova. Oti, sa qai vakacavari na porokaramu ni tuvaitutu.
[iVakamacala e ra]
a E qarava na tabana ni vuli vakayalo na Komiti ni Veivakavulici. Na tabana ni vuli oqo e qaravi kina na koronivuli i Kiliati, na koronivuli ni Komiti ni Tabana, kei na koronivuli ni ivakatawa ni tabacakacaka.
[Kato ena tabana e 31]
VEIKA ME BALETA NA KALASI
Vanua era cavutu mai kina: 10
Vanua era lesi kina: 24
Levu ni gonevuli: 56
iVakatautauvata ni nodra yabaki: 33.5
iVakatautauvata ni yabaki ena dina: 17.9
iVakatautauvata ni yabaki ena cakacaka vakaitalatala vakatabakidua: 13.8
[iYaloyalo ena tabana e 32]
Nodra Tuvaitutu na Kalasi 123 ni Watchtower Bible School of Gilead
E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.