“Sa Noqu na Siliva, Ka sa Noqu na Koula”

ENA ikaono ni senitiuri B.S.K., a sereki ira na tamata ni Kalou ena nodra tu vakavesu mai Papiloni o Tui Sairusi mai Perisia. E vica vata na udolu era lesu i Jerusalemi mera tara tale na valenisoro i Jiova a vakarusai. Sega ni dei na nodra bula vakailavo na lesu oqo, ra qai saqata na meca era tiko veitikivi na tara ni valenisoro. Era mani vaqaqa kina e so na matai se rawa ni vakaoti na cakacaka vakaitamera oqo se sega.

A vakayagataka o Jiova na parofita o Akeai me vakadeitaka vei ira na matai ni tokoni ira tiko. “Ka’u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka’u na vakasinaita na vale oqo e nai ukuuku,” e kaya na Kalou. Ena nodra leqataka na matai na ilavo, a vakasavuya kina o Akeai na itukutuku oqo: “‘Sa noqu na siliva, ka sa noqu na koula,’ sa kaya ko Jiova ni lewe vuqa.” (Akeai 2:​7-9) Ni oti ga e lima na yabaki nona cavuta na vosa veiuqeti oya o Akeai, a vakacavari na taravaki ni valenisoro.​—Esera 6:​13-​15.

E veiuqeti tale ga na vosa i Akeai vei ira na dauveiqaravi i Jiova ena gauna oqo nira vakayacora e so na itavi lelevu e vauca na sokalou. Ena 1879 ni se qai tekivu tabaka na dauveiqaravi yalodina na ivola oqo, a vakatokai ena gauna oya me Zion’s Watch Tower and Herald of Christ’s Presence, a tabaki kina: “Keimami vakabauta ni tokona o JIOVA na tabaki ni ‘Zion’s Watch Tower,’ koya gona, ena sega ni lavaka se vakarota vei ira na tamata mera tokona vakailavo. Ni sa na sega ni vakailavotaka na cakacaka oqo o koya e cavuta na vosa: ‘Sa noqu na koula kei na siliva kece ni veiulunivanua,’ keimami kila ni sa kena gauna me cegu na tabaki ni ivola.”

Se sega vakadua ni tarovi na tabaki ni Vale ni Vakatawa. Na imatai ni itabataba e 6,000 na ilavelave a tabaki ga ena vosa vakavalagi. Nikua e vakatauvatani ni rauta ni 28,578,000 na ilavelave e tabaki ena dua ga na itabataba ena 161 na vosa.a E vakatauvatani ni rauta ni 34,267,000 na ilavelave ni Yadra! e tabaki ena 81 na vosa.

E levu na cakacaka era cakava na iVakadinadina i Jiova e tautauvata na kena inaki kei Na Vale ni Vakatawa​—oya me vakacerecerei o Jiova ni Turaga Cecere duadua e lomalagi kei vuravura vaka kina na kacivaki ni itukutuku vinaka ni nona Matanitu. (Maciu 24:14; Vakatakila 4:​11) Era duavata na iVakadinadina nikua kei na veika e volai ena ivoladraudrau oqo ena 1879. Era vakabauta ni tokona na Kalou na nodra cakacaka, ena sega gona ni leqataki na ilavo ni vakadonuya na vakayacori ni cakacaka. Ia, e vakailavotaki vakacava na nodra cakacaka na iVakadinadina i Jiova? Na mataqali cakacaka cava era vakaitavi tiko kina me vukea na kena vunautaki na itukutuku vinaka e vuravura raraba?

E Vakailavotaki Vakacava?

Nira vunau e matanalevu e sega ni ka vou na nodra dau taroga na lewenivanua, “Oni saumi kina?” E sega, era sega ni saumi. Era solia wale na nodra gauna. Era vakayagataka e levu na aua na dauvunau oqo mera tukuna vei ira na tani na veika me baleti Jiova kei na veisiga se bera mai e yalataki tu ena iVolatabu. E uqeti ira na nodra vakavinavinaka vei Jiova. Era vakavinavinakataka na veika sa cakava vei ira na Kalou kei na yaga ni itukutuku vinaka ena nodra veisautaka na nodra bula kei na nodra rai. O koya gona, era via wasea na itukutuku vinaka oqo vei ira tale e so. Nira cakava oqori, era sa muria sara tiko ga na ivakavuvuli a tukuna o Jisu: “Dou a rawata walega, mo dou solia walega.” (Maciu 10:8) Na nodra gagadre mera vakadinadinataki Jiova kei Jisu, e uqeti ira mera vakayagataka na nodra ilavo mera lako yani, ra wasea na ka era vakabauta vei ira na tani, okati kina o ira na tu ena vanua ribayawa.​—Aisea 43:10; Cakacaka 1:8.

E gadrevi na ilavo me rawa ni vakayacori kina na cakacaka vakavunau oqo kei na veika tale e so e vukea na toso ni cakacaka​—me vaka na vale ni tabaivola, valenivolavola, Assembly Halls, vale ni daukaulotu kei na so tale. E vakailavotaki vakacava? E vakailavotaki kece ena cau. Sega ni lavaki vei ira na lewe ni ivavakoso ni iVakadinadina i Jiova na levu ni ilavo mera solia ena kena tokoni na cakacaka ni soqosoqo se me saumi na ivola era veisoliyaka. Kevaka e dua e via cau me tokona na cakacaka ni veivakavulici, era na marau ni ciqoma na iVakadinadina. Meda dikeva mada e dua na basoga ni kena sasagataki me vunautaki na itukutuku vinaka e vuravura raraba​—oya na vakadewa.

iVola e Tabaki ena 437 na Vosa

Sa sagavulu qo na yabaki na kena kilai ni nodra ivola na iVakadinadina i Jiova e dua vei ira na ivola e vakadewataki vakalevu duadua e vuravura. E sa vakadewataki ena 437 na vosa, na ivolacebaceba, ivola lalai, ivoladraudrau kei na ivola. Me vaka ga na cakacaka tale e so, e gadrevi tale ga ena tabana ni vakadewa na veivuke vakailavo. Na cava e vauci ena vakadewa?

Nira vakadeitaka na edita ni ivola ni iVakadinadina i Jiova na lewe ni dua na ulutaga ena vosa vakavalagi, sa na qai vakau ena kompiuta na kena ilavelave vei ira na dau vakadewa ena veiyasa i vuravura. E nodra itavi na timi ni vakadewa mera vakadewataka ena vosa me tabaki kina na ivola. Ena vakatau na lewe ni timi ena levu ni cakacaka era na qarava kei na dredre ni vosa era na vakadewataka. Na lewe ni dua na timi e rauta ni le 5 ina 25.

E dau vakalewai na vakadewa qai vakadodonutaki ke so na cala. E kena inaki me vakadewataki vakadodonu na vakasama ena dua na ulutaga, me matata tale ga. Ena so na gauna e dau via dredre toka oqori. Nira vakadewataka e dua na ulutaga e vakayagataki kina e so na vosa dredre, ena gadrevi vua e vakadewa kei koya ena wilika me rau na vakekeli sara vakavinaka ena vosa e vakadewa mai kina (Vakavalagi se ena so tale na vosa e yavu ni vakadewa me vaka na vosa vakaVaranise, vakaRusia se vakaSipeni) kei na vosa ena vakadewa kina me rawa ni vakadewataki vakadodonu. Kena ivakaraitaki, ni veivosakitaki ena dua na ulutaga ena Yadra! na veika vereverea me baleta na misini se me baleta na veika makawa, ena gadrevi na vakekeli vinaka.

E levu na dauvakadewa era cakacaka vakatabakidua se vagauna ena valenivolavola ni tabana ni iVakadinadina i Jiova. So tale era cakacaka ena vanua e vosataki kina na vosa era na vakadewa kina. Era sega ni saumi na dauvakadewa. O ira na cakacaka vakatabakidua, e soli na vanua mera tiko kina kei na kedra kakana. Dau soli tale ga vei ira e dua na iwase lailai ni ilavo me rawa nira volia kina e so na ka era na rairai gadreva. E vuravura raraba, e rauta ni le 2,800 na iVakadinadina era veiqaravi tiko ena tabana ni vakadewa. Ena gauna oqo, e 98 na valenivolavola ni tabana ni iVakadinadina i Jiova era qarava tiko na dui timi ni vakadewa ena nodra dui vanua se vanua tani. Dua na kena ivakaraitaki, era tiko ena valenivolavola ni tabana mai Rusia e sivia na 230 na dauvakadewa, era cakacaka vakatabakidua se cakacaka vagauna, ra qai vakadewa ena sivia na 30 na vosa. Oqo e okati tale ga kina e so na vosa e sega ni kilai levu ena taudaku ni yasayasa oya me vaka na vosa na Chuvash, Ossetian, kei na Uighur.

Vakavinakataki na Vakadewa

Me vaka ga e kila e dua sa tovolea me vulica e dua na vosa vou, e sega ni rawarawa me vakadewataki vakamatata na vakasama titobu. Na inaki ni vakadewa, me vakadewataki vakadodonu na ka dina kei na vakasama e koto ena yavu ni vakadewa, ia ena gauna vata oya me rogorogo matau ni wiliki, me vaka ga a sega ni vakadewataki. Ena taura e vica na yabaki me rawa nira qai kenadau ena vakadewa na dauvakadewa vou. Sa vakarautaka tale ga na iVakadinadina i Jiova e so na porokaramu ni vuli mera vuli kina, oqo ena nodra dau sikova na timi yadua na dauveivakavulici mera vukei ira ena kena vakavinakataki na vakadewa kei na vakayagataki ni porokaramu ena kompiuta.

E sa vuavuaivinaka tale ga na porokaramu ni vuli oqo. Kena ivakaraitaki, e volatukutukutaka na valenitabana ni iVakadinadina i Jiova e Nicaragua: “Sa qai imatai ni gauna me mai veivakavulici ena ituvatuva kei na iwalewale ni vakadewa vou vei ira era vakadewa ena vosa na Miskito, e dua e cavutu mai na valenivolavola ni tabana o Mexico. E veisau sara ga na ivakarau ni nodra qaravi itavi na dauvakadewa. Sa torocake tale ga na kena ivakatagedegede.”

Vosa e Tara na Lomada

Na inaki ni kena vakadewataki na iVolatabu kei na ivola vakaivolatabu ena noda vosanisucu, me tara na lomada. Sa yaco sara tiko ga oqo. Ena 2006, era marau na iVakadinadina i Jiova mai Bulgaria ena kena soli na New World Translation of the Christian Greek Scriptures ena vosa vaka Bulgaria. E volatukutukutaka na valenitabana mai Bulgaria nira taura e levu na ivola ni vakavinavinaka me baleta na kena vakadewataki na iVolatabu ena vosa vaka Bulgaria. Era kaya na lewe ni ivavakoso ni “sega ni tara wale ga na nodra vakasama na iVolatabu, ia sa tara sara ga na lomadra.” E kaya e dua sa kena turaga mai Sofia: “Sa vakayabaki noqu wilika na iVolatabu, ia se qai vakadua meu wilika e dua na ivakadewa kilai rawarawa qai tara sara ga na lomaqu.” Mai Albania, ni taura nona ilavelave ni New World Translation taucoko ena vosa vakaAlbania, a kaya e dua na tacida yalewa: “Totoka dina na irogorogo ni Vosa ni Kalou ena vosa vakaAlbania! Sa dua dina na ka dokai me vosa vei keda o Jiova ena noda vosanisucu!”

Ena taura toka e vica na yabaki me vakadewataka na iVolatabu taucoko e dua na timi ni vakadewa. Ia, e yaga dina na sasaga oqo ni vakarawarawataka nodra kila na Vosa ni Kalou e milioni vakacaca na tamata.

“Ni da sa Daucakacaka Vata kei Koya na Kalou”

Na vakadewa e dua wale ga vei ira na cakacaka e gadrevi me vakayacori me rawa ni vunautaki sara kina vakavinaka na itukutuku vinaka. Na volai, tabaki, kei na kena vakau na ivola vakaivolatabu kei na qaravi ni cakacaka tale e so ni valenitabana, tabacakacaka kei na ivavakoso ni iVakadinadina i Jiova, e gadrevi kina na sasaga kei na ilavo. Ia, era “soli ira vakarawarawa” na tamata ni Kalou mera vakayacora na itavi era lesi kina. (Same 110:​3, NW) Era okata me itavi dokai na nodra solia na ka era rawata qai raica o Jiova nira “sa daucakacaka vata kei koya.”​—1 Korinica 3:​5-9.

E dina ni o koya e kaya, “sa noqu na siliva, ka sa noqu na koula,” e sega ni gadreva noda veivuke vakailavo me vakayacori kina na nona cakacaka. Ia, e dokai ira nona dauveiqaravi o Jiova ena nona lesia vei ira na itavi dokai mera vakalagilagia na yacana ena nodra cau vakailavo ina vunautaki ni itukutuku ni bula “ki na veivanua kecega.” (Maciu 24:14; 28:​19, 20) E sega li ni uqeti iko mo tokona ena kena levu o rawata na cakacaka ena sega ni tokaruataki oqo?

[iVakamacala e ra]

[Kato ena tabana e 18]

“E VAKAVURE VAKASAMA DINA”

A volavola e dua na goneyalewa yabaki 14 ina valenitabana ni iVakadinadina i Jiova e Cameroon: “Niu sa volia oti na noqu iyaya ni vuli ni yabaki, au volitaka sara e rua na noqu ivola ni vuli ni yabaki sa oti. Au rawata kina e 2,500 na francs [$5 na ilavo ni Mereke]. Au cautaka tiko yani na ilavo oqo kei na 910 na francs [$1.82 na ilavo ni Mereke] mai na noqu ilavo maroroi. Au uqeti kemuni mo ni tomana tiko ga na nomuni cakacaka vinaka. Vinaka vakalevu Na Vale ni Vakatawa kei na Yadra! E dau vakavure vakasama dina na ivoladraudrau oqo.”

[Kato/​iYaloyalo ena tabana e 18]

NA CAU VAKASAKITI

E taura na valenitabana ni iVakadinadina i Jiova e Mexico, e dua na ivola ni vakavinavinaka mai vei Manuel e dua na gonetagane yabaki ono, e vakaitikotiko e Chiapas State. Ni se bera ni kila na volavola, a mani vola e dua na nona itokani e qase cake na nona ivola. E kaya o Manuel: “A solia vei au o buqu e dua na tinanivuaka. Na gauna e vakaluveni kina, au digitaka sara na luvena e vinaka duadua, ra qai vukei au na taciqu tagane ena ivavakoso meu susuga. Ena levu ni noqu loloma, au sa vakauta tiko yani oqo noqu cau au rawata ena noqu volitaka na vuaka. E 100 na kilokaramu na kena bi, au qai rawata kina e 1,250 na peso [rauta ni $110 na ilavo ni Mereke]. Au kerea ga mo ni qai vakayagataka na ilavo vei Jiova.”

[Kato ena tabana e 19]

‘VAKAYAGATAKA QO ME VAKADEWATAKI KINA NA IVOLATABU’

A soli na New World Translation of the Christian Greek Scriptures ena vosa vakaUkraine ena veisoqo ni tikina a vakayacori e Ukraine ena 2005. Na siga tarava, a kunei na ivola oqo ena kato ni cau: “Au goneyalewa yabaki ciwa. Au via vakavinavinakataka na iVolatabu na Greek Scriptures. A solia o tinaqu vei keirau kei ganequ na neirau vodovodo me keirau vodo basi i koronivuli. Ia, ni sega ni tau na uca, keirau dau taubale i koronivuli, keirau maroroya rawa kina e 50 na hryvnia [$10 na ilavo ni Mereke]. Keirau vinakata me vakayagataki na ilavo oqo ena kena vakadewataki na iVolatabu taucoko ina vosa vakaUkraine.”

[Kato ena tabana e 20]

SALA ERA BOLEA KINA E SO MERA SOLI KA

CAU INA CAKACAKA E VURAVURA RARABA

Levu era vakatikitikitaka e dua na iwase ni ilavo mera biuta ina katonicau e vakatokai “Cau ina Cakacaka e Vuravura Raraba​—Maciu 24:14.”

Era dau vakauta e veivula na ilavo oqo na ivavakoso yadua ina valenivolavola ni iVakadinadina i Jiova ena nodra dui vanua. Na ilavo e cautaki e rawa ni vakau sara ga vakadodonu ina Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-​2483, se ina valenivolavola ni tabana ni iVakadinadina i Jiova ena nomu vanua. Na jeke e vakau ina itikotiko e volai toka e cake me volai kina na “Watch Tower.” E rawa ni cautaki tale ga na iyau talei e so. Me dua na ivola me vakau vata kei na cau oya, me vakamacalataka vakalekaleka ni ka e cautaki tiko oya e soli vakailoloma.

CAU E TIKO NA KENA VEIDINADINATI

E rawa ni cautaki na ilavo ina Watch Tower ena dua na veidinadinati me vakayagataki e vuravura raraba, ia ena suka tale vua e cau ke mani gadreva. Me baleta e so tale na ivakamacala, yalovinaka qai volavola ina Treasurer’s Office ena itikotiko e volai toka mai cake.

SOLI KA E LALAWATAKI

Me ikuri ni kena cautaki vakadodonu na ilavo, e tiko tale e so na mataqali cau me yaga ena cakacaka ni Matanitu ni Kalou e vuravura. Oqo e okati kina na:

Inisua: E rawa ni volai ina Watch Tower Bible and Tract Society of Pennsylvania na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, na sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni dau tauri tu ga vakawawa ena vuku ni Watch Tower Bible and Tract Society of Pennsylvania, se me qai soli me taukena na Watch Tower and Tract Society of Pennsylvania ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa me dau soli na stock kei na bond ina Watch Tower Bible and Tract Society of Pennsylvania me dua ga na cau vakadodonu.

Qele kei na Vale: E rawa me soli vakadua na qele se na vale se rawa tale ga me caka e dua na veiyalayalati me se tei tawana tiko mada ga na qele se vale o koya e solia me yacova nona mate. Me veitaratara kei na valenivolavola ni tabana ena nona vanua o koya e via solia na qele se na vale ni bera ni vakadeitaka na veiyalayalati.

Will kei na Trust: E rawa ni soli na iyau se na ilavo ina Watch Tower Bible and Tract Society of Pennsylvania ena kena tabaki e dua na will, se na rawa ni vagolei ina Watch Tower Bible and Tract Society of Pennsylvania na ka e rawati ena vuku ni dua na veidinadinati. Ena rawa ni vakalailaitaka na ivakacavacava e saumi na kena vagolei na trust ina dua na isoqosoqo vakalotu.

Na cau vaka oqo era vakatokai mera “soli ka e lalawataki,” e kena ibalebale ni soli ka vaka oqo e dodonu me lalawa sara ga kina vakavinaka o koya e via soli ka. Me vukei ira na via soli ka ina cakacaka ni iVakadinadina i Jiova e vuravura raraba ena sala vaka oqo, sa vakarautaki kina e dua na ivola lailai vakavalagi kei na kena vakaSipeni e vakatokai na Charitable Planning to Benefit Kingdom Service Worldwide. E volai na ivola oqo me baleta e so na sala ni soli ka vakailoloma ena gauna sara ga oqo, se me qai soli ena gauna sa mate kina e dua. Nira wilika na ivola lailai oqo ra qai veitaratara kei na nodra dui daunivakasala ni lawa se ivakacavacava, era le levu era sa veivukei ena nodra cakacaka vakalotu kei na nodra veivukei na iVakadinadina i Jiova e vuravura raraba, qai gauna vata oqori era vakalailaitaka kina na ivakacavacava e dau lavaki vei ira. E rawa ni kerei na ivola lailai oqo ina Charitable Planning Office.

Ena so tale na ivakamacala, e rawa ni o veitaratara kei na Charitable Planning Office, e rawa ni o volavola ina itikotiko se qiri ena talevoni e toka qo e ra, se veitaratara kei na valenivolavola ni iVakadinadina i Jiova ena nomu vanua.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707

[iYaloyalo ena tabana e 19]

Dauvakadewa ena vosa na Miskito ena valenitabana e Nicaragua