Na iTabataba Vou ni Vale ni Vakatawa Vakavalagi

E KA ni marau me vakaraitaki yani ena loma ni dua na yabaki, sa na tabaki tiko kina na itabataba vakavalagi e vakarawarawataki na vosa e vakayagataki kina, ena tekivu sara ga ena itabataba qo. Ena tiko kina na ulutaga ni vuli, ke levu na vanua lala ena tabaki eso tale na ulutaga. E nuitaki ni na yaga vakalevu vei ira na tacida na itabataba qo. Na vuna?

E levu vei ira na tacida e Viti, Ghana, Kenya, Liberia, Nigeria, Papua Niu Kini, kei na Yatu Solomoni era vosataka vakalevu na vosa vakavalagi. De dua era na vosataka ga na nodra vosa na tacida qori, ia era na vosataka vakalevu na vosa vakavalagi ena soqoni kei na cakacaka vakavunau. Era vosataka na vosa vakavalagi e rawarawa ni laurai vata kei na kena e vakayagataki ena noda ivola. Eso vei ira na tacida era toki ena so na vanua ena vinakati kina mera veivosaki vakavalagi, dina ga nira kila toka vakalailai na vosa qori. Kuria qori nira sega ni rawa ni tiko ena soqoni e caka ena nodra vosa ga.

Na ulutaga ni Vale ni Vakatawa eda vulica e veimacawa e dua na sala eda vakani tiko kina vakayalo ena kena gauna donu. Me rawa ni yaga kece vei ira na tiko ena soqoni na ulutaga qori, e vakarautaki kina na itabataba vou qo vakavalagi ena vosa e rawarawa, rawarawa tale ga na ituvatuva ni vosa e vakayagataki kina. Ia ena duidui vakalailai na waqana. Ena tautauvata ga na iwiliwili ni parakaravu, na taro, iyaloyalo kei na taro ni railesuvi. Ena vakatau vei ira na mataveitacini se itabataba cava mera vakayagataka ena vulici ni Vale ni Vakatawa. Raica na ivakaraitaki e ra mai na parakaravu rua ena imatai ni ulutaga ni vuli ena itabataba qo me baleta na duidui ni vosa e vakayagataki.

Keitou nuitaka ni itabataba vou qo ena sauma na nodra masu e levu ena nodra dau kerei Jiova: “Mo ni vakavukui au me’u vulica na nomuni vunau.” (Same 119:73). Keitou nuidei nira na vakavakarau vinaka ena Vuli Vale ni Vakatawa e veimacawa o ira na tacida era sega ni kila vinaka na vosa vakavalagi kei ira na gone. O Jiova e lomani ira “na mataveitacini kece,” eda vakavinavinakataki koya ni vakayagataka “na dauveiqaravi e yalodina e vuku” me vakarautaka na ka kece eda vinakata ena kena gauna donu.—1 Pita 2:17; Maciu 24:45.

iLawalawa Dauvakatulewa ni iVakadinadina i Jiova