Veisau ena iLavelave e Vulici! — Watchtower LAIBRI ENA INTERNET

Veisau ena iLavelave e Vulici!

Sa veisautaki na irairai ni ilavelave ni Vale ni Vakatawa e vulici meda taleitaka kina na wilika, me yaga tale ga vakalevu ena noda vulica na Vosa ni Kalou.—Same 1:2; 119:97.

Ena va na yabaki sa oti e tabaki kina e rua na ilavelave ni Vale ni Vakatawa, dua e baleti ira na lewenivanua, kena ikarua e baleti keda kei ira na noda vuli iVolatabu era dau tiko ena soqoni.

Me baleta na ilavelave e vulici, e vola kina e dua sa dede nona qaravi Jiova: “Totoka qai veiuqeti, qori sara ga na ka au nanuma niu raica na imatai ni lavelave ni Vale ni Vakatawa e vulici. E tarai au sara ga na titobu ni ka dina e vulici ena iVolatabu. Vinaka vakalevu na veisau qo.” E vola e dua tale na tacida: “Au vakanamata meu vakayagataka e levu na gauna meu vulica na ilavelave vou qo, meu vakayagataka kei na iVolatabu na Reference Bible.” E nuitaki tale ga ni va qori na nomu rai.

E macala ga ni o sa kila ni tekivu tabaki Na Vale ni Vakatawa ena 1879, e rawa ga qori ena veivuke ni yalo tabu i Jiova kei na nona veitokoni. (Saka. 4:6) Ena loma ni 133 na yabaki, e caka eso na veiveisau ena imatai ni tabana ni mekesini qo. Ena 2012, sa na droinitaki ena imatai ni tabana e dua na iyaloyalo me baleta tiko na cakacaka vakavunau, meda nanuma tiko kina na noda ilesilesi vakalou oya meda vunautaka sara vakavinaka na Matanitu i Jiova. (Caka. 28:23) Ena tabana e 2, o na raica na itaba e yavutaki kina na droini ena imatai ni tabana, qai vakamacalataki vakalekaleka na ka e vakaraitaki tiko kei na vanua e caka kina. Ena yaga vakalevu qori ena loma ni yabaki qo, meda nanuma tiko kina nida na vunautaka na dauveiqaravi i Jiova na itukutuku vinaka “ena veiyasa i vuravura.”—Maciu 24:14.

Na cava tale eso na veisau e caka ena mekesini qo? Na kato ni taro e sa na tiko ena itekitekivu kece ni ulutaga ni vuli. Qori ena vakamacalataka eso na tikina bibi e vinakati mo kila ena gauna o wilika se vulica kina na ulutaga ni vuli. E macala ga ni na vakayagataka o koya e liutaka na vuli na taro ena kato me railesuva na ka e veivosakitaki ni oti na vuli. O na raica ni vakarabailevutaki vakalailai na tutuna, na naba tale ga ena tabana yadua kei na parakaravu ena vakalevutaki me laurai vinaka.

Me vaka e vakamacalataki ena ilavelave ni vula qo, e biu tale ga e dua na ulutaga vou, “Na Keda iTukutuku Makawa” e vakamacalataka na veiveisau vakasakiti ena volaitukutuku ni iVakadinadina i Jiova ena gauna qo. Ena tabaki tale ga va gauna eso na italanoa dina, ena tiko qori ena ulutaga, “Era Yalorawarawa ni Soli Ira.” Qori ena vakamarautaki ira, ena vakacegui ira tale ga vakalevu na mataveitacini era veiqaravi tu ena vanua e gadrevi vakalevu kina na dautukutuku ni Matanitu.

Moni marautaka mada ga na gauna o ni vakayagataka moni vulica kina na Vosa ni Kalou ena veivuke ni mekesini qo.

Ira na Vakarautaka na Mekesini qo