Nodra Tuvaitutu na iKa125 ni Kalasi e Kiliati

Era Uqeti na Daukaulotu Mera Vakataki Jeremaia

“SA RAWATA e dua na ivakatagedegede vinaka na kalasi ni Kiliati qo,” e tukuna o Geoffrey Jackson na lewe ni iLawalawa Dauvakatulewa. A vosa tiko vei ira na le 6,156 ra tiko ena tuvaitutu ni ika125 ni kalasi ni Watchtower Bible School of Gilead ena Seviteba 13, 2008. Ni wili vata kei na le 56 na gonevuli ena kalasi qo, sa ra tuberi oti mai na Koronivuli o Kiliati e sivia na 8,000 na daukaulotu ra qai lesi yani e “nai yalayala kei vuravura”!​—Caka. 1:8.

A taroga o Brother Jackson na jeameni ni soqo qo, “Ena veiuqeti beka ena cakacaka vakaitalatala na nomu rawa ni nuitaki?” E qai tukuna e va na tikina me nuitaki kina vakalevu e dua: na rai dodonu, ivakaraitaki vinaka, yavutaka na ivakavuvuli ena Vosa ni Kalou, qai vakabibitaka na kena kilai na yaca i Jiova.

A vosa ena ulutaga “O na Rawa Beka ni Kila na Ka Kece Ga?” o David Schafer, e veiqaravi ena tabana ni Komiti ni Veivakavulici. E vakadeitaka vei ira na gonevuli nira rawa ni ‘kila na ka kece’ e vinakati mera veiqaravi kina vakadaukaulotu, ke ra vakaliuci Jiova tiko ga qai yalomalumalumu na muria na “dauveiqaravi e yalodina qai vuku.”​—Vkai. 28:5; Maciu 24:45, NW.

A vosa tarava o John E. Barr, e lewe ni iLawalawa Dauvakatulewa, ena ulutaga “Me Kua ni Dua na Ka me Tawasei Keda Mai na Loloma ni Kalou.” Me vaka e dua na tama dauloloma a uqeti ira na gonevuli kei na nodra itubutubu o Brother Barr, mera kua ni leqataka vakalevu na veika era na rairai sotava ena nodra ilesilesi. E kaya sa bau “veivakacegui dina qai veivakadeitaki ena noda bula na loloma ni Kalou.” E sega sara ga ni dua na ka ena rawa ni tawasei ira na daukaulotu mai na loloma ni Kalou, vakavo ga ke ra tawasei ira mai vua.

Sa qai vosa o Sam Roberson ena tabana e qarava na vuli vakayalo (Theocratic Schools Department), e uqeti ira na vakarorogo mera “vakaisulu ena isulu totoka duadua.” Nira vulica na gonevuli na ka e cakava o Jisu kei na nodra bulataka, era na rawa kina ni “vakaisulu e na Turaga ko Jisu Karisito.” (Roma 13:14) A vosa tarava o William Samuelson, na ivakatawa ni tabana e qarava na vuli vakayalo, e vakamacalataka na veika ena dokai kina e dua. E dokai e dua ena rai vakalou, sega ni rai vakatamata.

O Michael Burnett, e dua tale na qasenivuli, a vakatarogi ira na gonevuli me baleta na nodra cakacaka vakavunau ena gauna ra vuli tiko kina e Kiliati. Dina nira lesi na gonevuli ena yalava sa cakacakataki vakawasoma nira tiko ena Koronivuli e Kiliati, Patterson, e Niu Yoka, era se kunei ira tiko ga na tataleitaki. O Gerald Grizzle, e qarava na veika me baleta na soqo ni tikina (Convention Office) a vakataroga e tolu na tacida tagane ratou vuli ena Koronivuli ni Komiti ni Tabana. Na veika ratou vakamacalataka ena yaga sara vakalevu vei ira na gonevuli ena ka mera namaka ena nodra ilesilesi e vanuatani.

A vosa ena ulutaga “Mo Vakataki Jeremaia” o David Splane, e lewe ni iLawalawa Dauvakatulewa, a vuli ena ika42 ni kalasi e Kiliati. Dina ni a leqataka o Jeremaia na nona ilesilesi, a vakayaloqaqataki koya o Jiova. (Jere. 1:7, 8) Ena cakava vaka kina na Kalou vei ira na daukaulotu vou. “Ke dua drau veileqaleqati tiko,” e kaya o Brother Splane, “dabe mada qai vola e tini na nona itovo o dau taleitaka. Ke sega ni yacova na tini, e kena ibalebale mo saga mo kilai koya vinaka.”

A dau vakuai koya o Jeremaia. Ena gauna e via vakasuka kina na nona ilesilesi, a masu, qai tiko vata kei koya o Jiova. (Jere. 20:11) “Ni o yalolailai,” e kaya o Brother Splane, “veivosakitaka kei Jiova. O na kurabuitaka na nona veivukei.”

Ni sa mai cava na porokaramu ni tuvaitutu, a tokaruataka na jeameni nira sa vulica na gonevuli e vica na sala mera nuitaki kina. Nira kila na lewenivanua ni rawa nira nuitaki na gonevuli ena laulau sara nodra itukutuku.​—Aisea 43:8-12.

[Kato ena tabana e 22]

VEIKA ME BALETA NA KALASI

Vanua era cavutu mai kina: 6

Vanua era lesi kina:  21

Levu ni gonevuli: 56

iVakatautauvata ni nodra yabaki: 32.9

iVakatautauvata ni yabaki ena dina: 17.4

iVakatautauvata ni yabaki ena cakacaka vakaitalatala vakatabakidua: 13

[iYaloyalo ena tabana e 22]

Nodra Tuvaitutu na Kalasi 125 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.