Nodra Tuvaitutu na Ika124 ni Kalasi e Kiliati

Era Vakatauvatani na Daukaulotu ina iLawalawa Vodre

ENA veiyaono na vula, e dau soli kina nodra ilesilesi na gonevuli ena Watchtower Bible School of Gilead era qai sureti kece kina na vuvale i Peceli mai Mereke. Ena ika8 ni Maji, 2008, era duavata kei ira na vuvale e Peceli na vulagi mai na sivia na 30 na matanitu ena tuvani ni lesilesi vei ira na vuli ena ika124 ni kalasi ena Koronivuli e Kiliati. Era marautaka kece na le 6,411 kei ira na gonevuli na siga lavotaki qo.

Na jeameni ni porokaramu o Stephen Lett mai na iLawalawa Dauvakatulewa, e doladola ena vunau e kena iulutaga “Toso e Liu kei na iLawalawa Vodre iVakatakarakara i Jiova.” Ena Vakatakila 9:​1-4 era vakatauvatani na lotu vaKarisito lumuti era bula tale vakayalo ena 1919, ina ilawalawa vodre era tosoya tale na cakacaka. E tukuni tale ga vei ira na gonevuli mera nanuma tiko nira wili ena “ilawalawa levu,” mera na tomani ira kina na ilawalawa vodre vakaivakatakarakara.​—Joni 10:16.

E vunau tarava o Lon Schilling, e lewe ni Komiti ni Tabana mai Mereke, ena ulutaga “Ni Dau Cakacaka Vata.” E yavutaki ena ivakaraitaki vakaiVolatabu i Akuila kei Pirisila, rau veiwatini lotu vaKarisito ena imatai ni senitiuri. (Roma 16:​3, 4) E le 28 na veiwatini era lewena na kalasi e Kiliati. Era vakadreti mera vakaukauataka tiko ga nodra ivau ni vakawati kevaka era vinakata me vuavuaivinaka nodra cakacaka vakadaukaulotu. Erau dau cavuti vata tu ga ena iVolatabu o Akuila kei Pirisila na watina. Nona rai gona na yapositolo o Paula kei ira na lewe ni ivavakoso ni rau dau cakacaka vata. Mera vaka kina na veiwatini daukaulotu nikua, mera cakacaka vata, sokalou vata ra qai vosota vata na veituvaki dredre ena nodra ilesilesi i vanua tani, ia mera dau vakavinavinaka.​—Vkte. 2:​18.

E vunau tarava o Guy Pierce e lewe ni iLawalawa Dauvakatulewa qai nona ulutaga, “Dolea na Vinaka i Jiova.” E vakamacalataka ni noda caka vinaka e sega ni vauci ga kina noda vakuai keda mai na caka ca. Na tamata vinaka e caka vinaka me yaga vei ira e levu. E vinaka vakaoti na Kalou o Jiova. (Saka. 9:​16, 17) Nona vinaka kei nona loloma na Kalou e vakauqeti keda meda lai caka vinaka vei ira e so tale. E tinia ena nona vakavinavinakataki ira na gonevuli qai kaya: “Oni sa dau caka vinaka tiko. Keimami nuidei ni oni na dolea nona vinaka na Kalou ena nomuni caka vinaka tiko ga ena ilesilesi e vakalougatataki kemuni kina na Kalou o Jiova.”

E vunau tarava o Michael Burnett, a daukaulotu tu eliu ia qo e sa lesi me qasenivuli e Kiliati, e nona ulutaga “Me iUkuuku ena Yadremuni.” E vaka mera dara tiko e dua “nai ukuuku” e yadredra, mera nanuma na Isireli nona vakabulai ira o Jiova vakacakamana mai Ijipita. (Lako 13:16) A uqeti ira na gonevuli mera nanuma tiko na veika era a vulica ena Koronivuli e Kiliati me vaka sara ga nodra dara tiko e dua na iukuuku ena yadredra. A vakabibitaka o Brother Burnett ni vinakati na yalomalumalumu, yalomalua, mera qai bulataka na ivakavuvuli vakaivolatabu mera walia kina nodra veileqaleqati kei na nodra itokani daukaulotu se so tale.​—Maciu 5:​23, 24.

O Mark Noumair, sa qasenivuli dede e Kiliati a vunau ena ulutaga “Sere Cava ena Lagati Baleti Iko?” Ena gauna makawa, e dau kena ivakarau me lagati na sere ni marautaki na qaqa ena ivalu. Dua vei ira na sere qori e vakavotui kina nodra tu vakasuka na yavusa i Rupeni, Tani, kei Aseri, ia e vakacerecerei na yavusa i Sepuloni nira vakaraitaka na yalo ni vakuai ira. (Dvei. 5:​16-​18) Ena vakatakilai vei ira e so tale na nodra itovo na lotu vaKarisito kece ena qaqanisere e lagati. Na nona gumatua e dua ni cakava na cakacaka ni Kalou kei na nona yalodina ni vakamuria na veidusimaki ni isoqosoqo i Jiova ena vakamarautaki koya na Kalou qai ivakaraitaki vinaka vei ira na tacina. Nira rogoca na kena vo ena ivavakoso nira vakaitovotaka na sere ivakatakarakara, era na uqeti mera muria nodra ivakaraitaki vinaka.

Me ikuri ni veika era vulica na ika124 ni kalasi, era vakayagataka tale ga e rauta ni 3,000 na aua ena cakacaka vakavunau. Ena iulutaga “Muria na Veidusimaki ni Yalo Tabu,” era vakasavuya na gonevuli vei Sam Roberson mai na Tabana e qarava na Vuli Vakayalo, e so na ka era sotava ena cakacaka vakavunau, qai vakatasuasuataki e so. E tarava mai na ivakaraitaki veivauqeti qo na itavi i Patrick LaFranca mai na Komiti ni Tabana, e Mereke. E vakatarogi ira kina e so era vuli tale ga e Kiliati era sa veiqaravi tiko ena levu na vanua. Era taleitaka na gonevuli na nodra ivakasala yaga na tacidra.

O Anthony Morris mai na iLawalawa Dauvakatulewa a vunau ena otioti ni ulutaga “Nanuma Tiko ni Sega ni Dei na Ka e Laurai.” E vakasalataki keda na iVolatabu meda kua ni kauaitaka vakalevu na veika rarawa eda sotava, ia meda nuitaka na veivakalougatataki i Jiova. (2 Kor. 4:​16-​18) Eda sa vakila kece tu nikua na ituvaki vakaloloma ena vuku ni bula dravudravua, sega na lewa dodonu, veiliutaki ca, tauvimate, kei na mate. Era na rairai vakila tale ga na daukaulotu e so na ituvaki vakaciriloloma. Ia, nira nanuma tiko ni lekaleka wale ga, ena uqeti ira mera vakaliuca Jiova qai nuitaki koya.

E qai tini na porokaramu qori nira sa mai dabe kece ena buturara na gonevuli, era qai rogoca na otioti ni nona vosa o Brother Lett. E uqeti ira mera kua ni soro qai kaya: “Eda na yalodina tiko ga kevaka e tokoni keda o Jiova.” E uqeti ira na daukaulotu vou mera vaka na vodre, mera tomana tiko ga nodra qaravi Jiova, gugumatua, yalodina, qai talairawarawa me tawamudu.

[Kato ena tabana e 30]

VEIKA ME BALETA NA KALASI

Vanua era cavutu mai kina: 7

Vanua era lesi kina: 16

Levu ni gonevuli: 56

iVakatautauvata ni nodra yabaki: 33.8

iVakatautauvata ni yabaki ena dina: 18.2

iVakatautauvata ni yabaki ena cakacaka vakaitalatala vakatabakidua: 13.8

[iYaloyalo ena tabana e 31]

Nodra Tuvaitutu na Kalasi 124 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[iYaloyalo ena tabana e 32]

E tiko na Koronivuli o Kiliati ena Watchtower Educational Center