Ena Yaga Vakacava Vei Iko na Ka Dina O Vulica me Baleti Eli?

O IRA na vakavuvulitaka ni vanua ni veivakararawataki o eli era veiuqeti me beci o Jiova kei na nona itovo. E tukuna na iVolatabu ni Kalou ena vakarusai ira na daucaka ca. (2 Cesalonaika 1:6-9) Ia e sega ni nona itovo uasivi duadua na cudru.

E sega ni dau veivakacacani se veisausaumitaka na ca na Kalou. Ni a taroga mada ga: “Me’u vinakata vakalailai na nona mate na tamata ca?” (Isikeli 18:23) Ke sega ni taleitaka na Kalou mera mate na daucaka ca, ena rawa vakacava ni vakadonuya mera vakararawataki tawamudu?

Na loloma e itovo uasivi duadua ni Kalou. (1 Joni 4:8) Sega ni vakabekataki ni “yalovinaka ko Jiova vei ira na tamata kecega: ka sa yacova na nona cakacaka kecega na nona yalololoma.” (Same 145:9) E vinakata gona na Kalou meda dolea lesu na nona loloma ena noda lomani koya mai vu ni lomada.—Maciu 22:35-38.

Cava ena Uqeti Iko Mo Cakava na Loma ni Kalou—Nomu Lomani Koya se Nomu Rerevaki Eli?

Na ivakavuvuli ni veivakararawataki i eli e vakavuna na nona rerevaki vakalialia na Kalou. Ia ena rerevaka dina na Kalou o koya e vulica na ka dina me baleta na Kalou qai lomani koya. E kaya na Same 111:10, “Na rerevaki Jiova sa kenai vakatekivu ni vuku: era sa yalomatua kecega ko ira era sa cakava na nona vunau.” Na rere e tukuni e ke e sega ni kena ibalebale me domobulataki na Kalou, ia me qoroi qai rokovi ni Dauveibuli. Eda na sega ni via vakacudruya nida rerevaki koya dina.

Na ka dina me baleti eli a uqeti Kathleen, e dua na yalewa yabaki 32 a dau vakayagataka tu eliu na wainimategaga. E kilai ni dau lakova na pati, e voravora qai tawakilikili nona ivalavala, e dau beci koya tale ga. E tusanaka: “Niu raici luvequ yalewa yabaki dua au dau vakasamataka, ‘Na ka au cakava tiko vua, au na lai kama sara ga kina i eli.’” E tawayaga na nona sasaga me muduka nona vakayagataka na wainimategaga. E tukuna, “Au vinakata me vinaka noqu bula, ia e veivakalolomataki na veika e tu e vuravura kei na veika au cakava. Kena irairai ni sega ni yaga meu dua na yalewa vinaka.”

Ia a sotavi ira na iVakadinadina i Jiova o Kathleen. E tukuna, “Au vulica ni sega ni dua ena kama i eli, na kena ivakadinadina vakaivolatabu e vakaibalebale dina. E vakacegui au noqu kila niu na sega ni lai kama i eli.” A vulica tale ga ni yalataka na Kalou ni rawa na bula tawamudu ena vuravura e sega kina na veika ca. (Same 37:10, 11, 29; Luke 23:43) E kaya, “Sa qai dua na noqu inuinui dina—meu bula tawamudu ena Parataisi!”

Ena muduka beka o Kathleen nona vakayagataka na wainimategaga ke sega ni vakarerei ena ivakavuvuli ni kama ena bukawaqa i eli? A kaya: “Niu garova na wainimategaga, au dau masu, au kerea na veivuke ni Kalou. Au vakasamataka nona rai me baleta na veika dukadukali, au sega ni via vakacudrui koya. A rogoca dina na noqu masu.” (2 Korinica 7:1) Na nona rere o Kathleen me vakacudruya na Kalou e sereki koya mai na nona vakabobulataki ena wainimategaga.

Na noda lomana na Kalou kei na noda rerevaki koya dina ena uqeti keda meda cakava na lomana meda marau tawamudu kina, sega ni noda rerevaka na veivakararawataki i eli. E vola na daunisame: “Sa kalougata ko ira kecega era sa rerevaki Jiova; ko ira era sa lako voli e na nona sala.”—Same 128:1.

[Kato/​iYaloyalo ena tabana e 19]

O Cei Ena Vakabulai Mai Eli?

E so na ivakadewa ni iVolatabu era vakavuna na veilecayaki ena nodra vakadewataka me “eli” e rua na vosa vaKirisi erau duidui —na Qiena kei na Etesi. Na vosa Qiena ena iVolatabu e dusia na rusa vakadua, sega kina na inuinui ni veivakaturi. Ia o ira na tu e Etesi era nuitaka na veivakaturi.

Ni mate, vakaturi o Jisu, e kaya na yapositolo o Pita vei ira na vakarogoci koya ni o Jisu “a sega ni biu tu ga i eli.” (Cakacaka 2:27, 31, 32, Bible in Basic English; Same 16:10) Na vosa e vakadewataki me “eli” ena tikinivolatabu qori e vosa vaKirisi ni Etesi. A sega ni lako o Jisu ina dua na vanua ni veivakararawataki. O Etesi se o “eli” e ibulubulu ga. Na Kalou e sega ni vakabulai Jisu duadua ga mai Etesi.

E kaya na iVolatabu me baleta na veivakaturi: “O mate kei eli erau soli ira na mate tu kina.” (Vakatakila 20:13, 14, Bible in Basic English) Na kena vakalalai o “eli” e vakaibalebaletaki ina nodra vakabulai o ira e vakadonuya na Kalou mera vakaturi. (Joni 5:28, 29; Cakacaka 24:15) Sa dua dina na inuinui totoka—nodra vakabulai tale na wekada lomani! Ena cakava qori na Kalou o Jiova e tawayalani na nona loloma.