O Rawa ni Veiqaravi ena Vanua e Gadrevi Kina Vakalevu na Dautukutuku?

“E rawarawa na neitou bula e Mereke, ia keirau kauaitaka ga vakaveiwatini na domodomoiyau sa takalevu tu e kea, ni rawa ni keirau rawai kina kei rau na luvei keirau tagane. Keirau a veiqaravi tu vakadaukaulotu kei watiqu, keirau qai vinakata me va tale ya na neirau bula, me rawarawa tu ga qai marautaki.”

NI UQETI Ralph kei Pam na rai qori, rau mani volavola ina so na valenivolavola ni tabana ena 1991, me rau vakaraitaka kina ni rau via veiqaravi ena vanua e gadrevi tu kina vakalevu na dautukutuku ni Matanitu ni Kalou. A sauma lesu nodrau ivola na valenitabana mai Mexico, ni vinakati vakatotolo na dautukutuku e rawa nira vunau vei ira na lewenivanua ena vosa vakavalagi. E kaya tale ga ni “sa matua vinaka tu me tamusuki” na yalava. (Joni 4:35, NW) Sega ni dede, ratou sa vakadonuya na veisureti o Ralph kei Pam, kei na rua na luvedrau tagane, dua e yabaki 8 dua tale e yabaki 12, ratou tekivu vakavakarau sara me ratou toki i vanuatani.

Yalava Levu

E kaya o Ralph: “Ni bera ni keitou biubiu mai Mereke, era kauai eso na mataveitacini ra qai kaya: ‘E rivarivabitaki na toki i vanuatani!’ ‘Vakacava ke dou tauvimate?’ ‘Cava mo dou toki kina ena dua na yalava ni vosa vakavalagi? Era na sega ni taleitaka na ka dina!’ Ia keitou dei tu ga ena neitou vakatulewa. Keitou a sega tale ga ni vakatulewa tu ga vakariri. Sa vica vata na yabaki neitou lalawataka toka mai. Keitou sega ni via dinau, e maroroi ga na ilavo, keitou qai dau veivosakitaka vakavuvale eso na leqa ena rawa ni yaco.”

Ni ratou yaco yani e Mexico o Ralph kei na nona vuvale, ratou lai rai sara ina valenivolavola ni tabana. A vakaraitaki sara vei ratou na mape ni vanua kece ya, qai tukuni vei ratou, “Nomudou yalava qo!” Eratou lai vakaitikotiko e San Miguel de Allende, na taoni ra lewena na duikaikai, e 240 na kilomita mai na vuaira ni korolevu o Mexico City. Ni oti e tolu na yabaki nodratou toki yani, sa tauyavu sara e dua na ivavakoso ena vosa vakavalagi, ra qai lewena e 19 na dautukutuku ena taoni ya. Qori na imatai ni ivavakoso ena vosa vakavalagi e Mexico—ia se levu tale tu na cakacaka.

E rairai dua na milioni na lewenivanua e Mereke era vakaitikotiko e Mexico. Kuria qori, levu tale ga na lewenivanua e Mexico era cakacaka vinaka ra qai vosa vakavalagi me ikarua ni nodra vosa. E vakamacalataka o Ralph: “Keitou masuta me levu tale na tamata cakacaka. E dau vagalalataki tu ga e dua na rumu ni moce vei ira na mataveitacini era gole mai mera ‘raica vakavinaka na vanua,’ e gadrevi kina vakalevu na veiqaravi.”​—Tiko 13:2.

Era Bula Rawarawa Mera Vunau Kina Vakalevu

Sega ni dede nodra sa yaco mai na mataveitacini era vinakata mera vakarabailevutaka nodra cakacaka vakaitalatala. E maliwai ira tiko mai e dua na veiwatini o Bill kei Kathy mai Mereke. Sa 25 na yabaki nodrau veiqaravi voli ena yalava e gadrevi kina vakalevu na dautukutuku. Erau nanuma me rau vulica na vosa vakaSipeni, ia mani sega ni yaco na inaki qori ena gauna rau toki kina ena taoni o Ajijic voleka na Drano o Chapala, na vanua era dau taleitaka na sa cegu mai na cakacaka saumi e Mereke mera lai tiko kina. E vakamacalataka o Bill, “Keirau vaqarai ira vakalevu na dau vosa vakavalagi e Ajijic era via vulica na ka dina.” Rau marautaka na kena tauyavu e dua na ivavakoso—na ikarua ni ivavakoso vosa vakavalagi e Mexico—ni oti ga e rua na yabaki nodrau toki yani ena taoni qo.

Erau via bula rawarawa o Ken kei Joanne mai Kenada, me levu kina nodrau gauna ni cakacaka vakaitalatala. Rau mani toki tale ga i Mexico. E kaya o Ken, “Ena taura na gauna mo qai matau ena ivakarau ni bula ena vanua e rairai sega kina na wai katakata, livaliva, se talevoni me vica vata na siga.” Ia, e dau vakavu marau na cakacaka vakavunau. A lesi o Ken me dua na dauveiqaravi ni ivavakoso, ni oti tale e rua na yabaki sa qase sara ni ivavakoso. A sega ni rawarawa taumada vua na luvedrau yalewa o Britanny me veimaliwai kei ira na lewe ni ivavakoso qo ni lailai kina na itabagone. Ia, ni oti nona vakaitavi ena tara ni Kingdom Hall, a levu sara na nona itokani ena vanua qo.

Erau gole mai Texas e Mereke o Patrick kei Roxanne, rau marau ni rogoca ni toka voleka ga e dua na yalava era tiko kina na daukaulotu, qai sega ni yawa mai na vanua ra tiko kina o ira na kila na vosa vakavalagi. “Ni keirau veisiko oti ga e Monterrey, e dua na taoni ena vuaicake kei Mexico, keirau vakila ni dusimaki keirau o Jiova me keirau lai veivuke e kea,” e kaya o Patrick. Ena loma ga ni lima na siga rau volitaka nodrau vale e Texas rau qai toki sara, e vaka ga rau “lako . . . ki Masitonia.” (Caka. 16:9) E sega ni rawarawa na bula e Mexico, ia ena loma ga ni rua na yabaki, rau marau ni raica na tubu ni iwasewase lailai era le 17 ga na iVakadinadina, me dua na ivavakoso e 40 na dautukutuku.

E dua tale na veiwatini o Jeff kei Deb rau bula rawarawa ga me rau vakarabailevutaka nodrau cakacaka vakaitalatala. Rau volitaka nodrau vale levu e Mereke, rau qai toki ina dua na rumu lailai e Cancún, e dua na siti ena tokalau kei Mexico. Ena veigauna sa oti, e dau matau vei rau na tiko ena soqo ni tabacakacaka ena vale e vakabatabatataki tu qai voleka ga e vale. Ia qo sa na taura toka e walu na aua na nodrau lako ina soqo ni tabacakacaka ena vosa vakavalagi e voleka duadua, qai caka tu ga ena raraniqito. Erau lomavakacegu ni tauyavu na ivavakoso e Cancún ra qai rauta ni le 50 na dautukutuku.

Eso na mataveitacini e Mexico era tekivu veivuke tale ga ena cakacaka vakavunau ena vosa vakavalagi. Kena ivakaraitaki, ni rogoca o Rubén kei na nona vuvale ni a tauyavu na imatai ni ivavakoso ena vosa vakavalagi e San Miguel de Allende qai qarava na yalava taucoko e Mexico, ratou mani nanuma me ratou lai veivuke. E kena ibalebale ni ratou na vulica na vosa vakavalagi, me ratou vakamatauni ratou ena nodra ivakarau ni tovo na vulagi, vaka kina na yawa ni vanua ratou na lakova tiko—800 na kilomita e veimacawa—ena soqoni. E kaya o Rubén: “Keirau marau na vunau vei ira na vulagi era sa vakayabaki tu e Mexico, ia se qai imatai ni gauna mera rogoca kina na itukutuku vinaka ena nodra vosa ga. Era vakavinavinaka eso ra qai luluvu.” Ni ratou veivuke oti ena ivavakoso e San Miguel de Allende, ratou lai painia sara o Rubén kei na nona vuvale ena taoni o Guanajuato, ena loma i Mexico, ratou veivuke ena kena tauyavu na ivavakoso ena vosa vakavalagi, ra qai lewena e sivia e 30 na dautukutuku. Ena gauna qo, ratou sa veiqaravi tiko ena iwasewase lailai ena vosa vakavalagi e Irapuato, dua na taoni volekati Guanajuato.

Vunau Vei Ira na Dredre Mera Sotavi

Era kila tale ga e levu na kai Mexico na vosa vakavalagi me vakataki ira ga na vulagi yani. E dau dredre na wasea vei ira na itukutuku ni Matanitu ni Kalou baleta nira vakaitikotiko ena vanua vakaicaqe, ra qai dau dolava mai na katuba na nodra tamata cakacaka. Ia ke ra mani dolava na katuba na itaukeinivale, era na rairai sega ni via vakarorogo baleta nira nanuma ni matalotu ribatani ga ni vanua ya na iVakadinadina i Jiova. Ia, era na vakarorogo eso, nira veisiko yani na iVakadinadina i Jiova mai na so tale na vanua.

Vakasamataka mada na ivakaraitaki i Gloria ena siti o Querétaro, e Mexico e loma. E kaya: “Era sa vunau oti vei au na iVakadinadina era vosa vakaSipeni, au mani sega ni vakarorogo. Ia na gauna e tekivu leqa kina noqu vuvale kei ira noqu itokani, au yalolailai au mani masuta kina na Kalou, qai kerea vua me walia na noqu leqa. Sega ni dede, a gole mai vale e dua na marama vulagi e kila na vosa vakavalagi. A taroga sara ke dua e vale e kila na vosa vakavalagi, au via kila na cava e vinakata, au mani tukuna vua niu kila na vosa vakavalagi. Na gauna e vakamacala tiko kina, au kaya lo e lomaqu, ‘Na cava mada e mai cakava tu eke na marama ni Mereke lialia qo?’ Ia au se qai kerea oti ga vua na Kalou e dua na ivakatakilakila. De dua e sauma na Kalou na noqu kerekere ena nona tala mai na marama qo.” A vakadonuya o Gloria me vulica na iVolatabu, toso totolo nona vuli mani papitaiso sara, dina ni a tusaqati koya nona vuvale. Ena gauna qo sa painia tudei tiko o Gloria, rau qaravi Jiova tale tiko ga na watina kei na luvena tagane.

Vakalougatataki o Ira na Vakarabailevutaka Nodra Cakacaka Vakaitalatala

E ka ni bolebole toka na veiqaravi ena vanua e vinakati kina vakalevu na dautukutuku ni Matanitu, ia e levu na kena veivakalougatataki. E kaya o Ralph sa tukuni oti mai: “Keirau vuli iVolatabu kei na levu mai Peritania, Jaina, Jamaica, Suwiteni, kei na vuvale mada ga vakatui mai Ghana. So era vakatulewataka mera veiqaravi sara ga vakatabakidua. Ena veiyabaki sa sivi, keitou vakadinadinataka vakavuvale na kena tauyavu e vitu na ivavakoso ena vosa vakavalagi. Erau tomani keirau ena painia na luvei keirau tagane, ia ena gauna qo rau sa veiqaravi tiko e Peceli mai Mereke.”

Ena gauna qo sa 88 kece na ivavakoso ena vosa vakavalagi e Mexico qai levu tale na iwasewase lalai. E rawati vakacava na tubu vakasakiti qo? Levu era vosa vakavalagi e Mexico era se sega vakadua ni sotavi ira na iVakadinadina i Jiova. Eso era vakarorogo baleta ni sega ni saqati ira na wekadra se nodra itokani ni vakatauvatani mai nodra vanua. So era vakadonuya mera vuli iVolatabu baleta nira sa cegu mai na nodra cakacaka saumi, qai levu nodra gauna galala mera vulica kina veika vakayalo. Kena ikuri, e dua na ikatolu ni dautukutuku ena ivavakoso vosa vakavalagi era painia, era gugumatua kina ena cakacaka qai tubu na lewe ni ivavakoso.

Oni na Vakalougatataki

Sega ni vakabekataki ni levu e veiyasa i vuravura era na taleitaka na itukutuku vinaka ke tukuni vei ira ena nodra vosa ga. Koya gona, e veiuqeti dina noda raica ni levu na mataveitacini—itabagone kei na qase, dawai kei ira na vakawati—era tu vakarau mera gole ina vanua e gadrevi kina vakalevu na dautukutuku ni Matanitu ni Kalou. E dina nira na rairai vosota na dredre, ia e lailai sara qo ni vakatauvatani kei na marau era na vakila nira kunei ira na yalomalumalumu era taleitaka na ka dina ena iVolatabu. Rawa beka ni o veisautaka nomu ituvatuva mo rawa kina ni toki ena yalava ena nomu vanua se vanuatani, e gadrevi kina vakalevu na dautukutuku ni Matanitu?a (Luke 14:28-30; 1 Kor. 16:9) Ke vaka kina, o na vakalougatataki sara vakalevu.

[iVakamacala e ra]

[Kato ena tabana e 21]

Veiuqeti Nodra sa Cegu Mai na Cakacaka

A biuti Peritania o Beryl me gole i Kenada. A lai cakacaka me manidia ena vica na kabani lelevu era kilai e vuravura raraba. A kenadau ena vodo ose qai digitaki tale ga me matataki Kenada ena sotasota ni Olympic ena 1980. Ena gauna sa cegu kina nona cakacaka saumi a lai vakaitikotiko e Chapala, mai Mexico, rau dau lai kana vakaveiwatini ena dua na valenikana ena vanua ya. E kauai ni raica nodra mata mamarau na vosa vakavalagi era sa vakacegu mai ena nodra cakacaka saumi, a vakamacalataki koya sara vei ira qai taroga se cava era mai cakava e Mexico. E voleka nira iVakadinadina i Jiova kece ga na tiko oya. Erau vakasamataka o Beryl kei na watina, ke vakilai na marau dina qai vakainaki na bula ena noda kila na Kalou, rau na via kilai koya tale ga. Ni oti e vica tale na vula nodrau tiko ena soqoni vaKarisito, a vakadonuya o Beryl me vuli iVolatabu. A painia tudei o Beryl me vica vata na yabaki.

[Kato ena tabana e 22]

“E Veivakalougatataki Dina na Nodra Tiko Vata kei Keimami”

Era dau taleitaka na mataveitacini itaukei na nodra toki yani o ira na mataveitacini vulagi ena nodra vanua ni gadrevi tu kina vakalevu na dautukutuku ni Matanitu ni Kalou. E vola e dua na valenivolavola ni tabana mai na Caribbean: “Ke ra biubiu na gole mai vanuatani era veiqaravi tiko eke, ena sega ni dei na ivavakoso. E veivakalougatataki dina na nodra tiko vata kei keimami.”

E kaya na Vosa ni Kalou nira “mataivalu levu na yalewa sa tukuna na itukutuku vinaka.” (Same 68:11, NW) Koya gona, e sega ni kurabuitaki ni levu na tacida yalewa dawai era veiqaravi tiko e vanuatani. Era dau veivukei vakalevu nira dau vakuai ira. E dikeva na valenivolavola ni tabana mai na Tokalau kei Urope: “Era dau le levu na mataveitacini yalewa ena ivavakoso eke, so na gauna e sivia na veimama na dautukutuku era yalewa ena ivavakoso. E levu era se vou sara ena dina, ia ra dau veivukei sara vakalevu na painia dawai yalewa era gole mai vanuatani ena nodra tuberi na ka vovou. Era iyau talei dina na mataveitacini yalewa qo!”

Era raica vakacava na tacida qo na nodra veiqaravi e vanuatani? “E levu sara na ka ni bolebole,” e kaya o Angelica, e dua na painia goneyalewa yabaki 30 vakacaca, e veiqaravi tu e vanuatani me vica vata na yabaki. “Ena dua na ilesilesi, au dau lakova na gaunisala soso e veisiga, ra qai tu wavoki kina na tamata era rarawa tu, e sa bau veivakayalolailaitaki dina. Ia au lomavakacegu niu veivakavulici ena cakacaka vakaitalatala. E dau uqeti au tale ga nodra vakavinavinaka na tacida yalewa e kea ena noqu bole meu lai veiqaravi kei ira. E kaya e dua na tacida yalewa ni uqeti koya sara ga me veiqaravi vakatabakidua na noqu ivakaraitaki, niu mai painia sara ina nona vanua.”

E kaya o Sue, e dua na painia e yabaki 50 vakacaca: “Macala ga ni o na vakila eso na ka ni bolebole, ia e sega ga ni vakatauvatani rawa kei na nomu vakalougatataki. Totoka dina na cakacaka vakaitalatala! Niu dau cakacaka vakalevu kei ira na tacida yalewa gone, au dau wasea vei ira na veika au vulica ena iVolatabu kei na ivola ni soqosoqo ena kena dau wali na veika ni bolebole eda vakila. Era dau tukuna vei au ni uqeti ira noqu dau vosota na leqa niu veiqaravi voli vakadawai ena cakacaka vakapainia me vica vata na yabaki, ra vakadinata nira na rawa tale ga ni vosota na leqa era sotava. E ka marautaki dina noqu uqeti ira na tacida yalewa qori.”

[Mape ena tabana e 20]

(Raica tale na ivola)

MEXICO

Monterrey

Guanajuato

Irapuato

Ajijic

Chapala

Lake Chapala

San Miguel de Allende

Querétaro

MEXICO CITY

Cancún

[iYaloyalo ena tabana e 23]

So era marautaka nodra vunau vei ira na vulagi era taleitaka na rogoca na itukutuku vinaka ena imatai ni gauna