O se Nanuma Tiko?

O taleitaka na ka o wilika ena itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

• Ena vakaturi beka na gone e mate ni bera ni sucu?

E tekivu nona bula e dua ena gauna e kunekunetaki kina. E rawa vei Jiova me vakaturi ira na tamata ena ituvaki cava ga ni nodra bula baleta “ni sa rawarawa vua na Kalou na ka kecega.” (Mari. 10:27) Ia, e sega ni tukuna vakadodonu na iVolatabu ni Kalou ena vakaturi ira na gone era mate ena katonigone.​—4/15, tabana e 12, 13.

• Na cava eda vulica ena nodra ivakaraitaki na qasikalolo, koni, vodre, kei na moko?

Era vakaraitaka na vuku. E vakalagilagi kina vakalevu na vuku ni Kalou. (Vkai. 30:24-28)​—4/15, tabana e 16-19.

• Na cava e tukuna kina na iVolatabu ni yaga na noda vagagalu ena so na gauna?

Na noda vagagalu ena so na gauna e ivakaraitaki ni veidokai, e yaga ena noda vakasamataka vakabibi na ka, e laurai tale ga kina na yalomatua kei na vuku. (Same 37:7; 63:6; Vkai. 11:12)​—5/15, tabana e 3-5.

• E vica na tui kei Juta era guta na vale ni Kalou?

E 19 na tui era veiliutaki e Juta, e 4 e vakasakiti sara nodratou gugumatua​—o Esa, Jiosafati, Esekaia, kei Josaia.​—6/15, tabana e 7-11.

• Era vakaitavi kece na lotu vaKarisito lumuti e vuravura ena kena vakarautaki na kakana vakayalo?

Sega. O koya na dauveiqaravi yalodina e vakatayaloyalotaki ira na lotu vaKarisito kece era lumuti ena yalo tabu, ia o ratou ga na lewe ni iLawalawa Dauvakatulewa ratou cicivaka na cakacaka ni veivakani vakayalo.​—6/15, tabana e 22-24.

• Na cava e rawa ni tukuni kina ni loloma e dua na itovo bibi a vakaduiduitaki Jisu kei ira na iliuliu ni lotu?

O ira na iliuliu ni lotu era beci ira na lewenivanua, era sega ni lomani ira. Era sega tale ga ni lomana na Kalou. O Jisu a lomani Tamana kei ira tale ga na lewenivanua. (Maciu 9:36) E dau veikauaitaki, yalololoma qai yalovinaka.​—7/15, tabana e 15.