E Tautauvata na iVolatabu kei na so Tale na iVola?

“E vakavuna na Kalou na volai ni iVolatabu kece, e yaga . . . , me vakarautaki vinaka kina na tamata ni Kalou, me tu vakarau tale ga me vakayacora na cakacaka vinaka kece.” ​—2 TIMOCI 3:16, 17.

E LEVU era sega ni duavata ena ka e cavuti qori ena iVolatabu. Vakacava o iko? O raica na iVolatabu me:

• Dua na ivola totoka?

• Dua na ivola ni lotu?

• Dua na ivola ni itukuni e levu na kena ivakavuvuli vinaka?

• Vosa ni Kalou?

E dua tale na taro qo, E bibi na ka o vakabauta? Dikeva mada na ka e tukuna na iVolatabu me baleta na ka e volai kina: “Na ka kece e volai e liu e volai meda vakavulici kina, me noda na inuinui e rawati mai na noda vosota kei na noda vakacegui mai na veika e volai ena iVolatabu.” (Roma 15:4) E tukuni ena iVolatabu ni vakarautaki me veivakavulici qai veivakacegui, e solia tale ga vei keda na inuinui.

Ia ke dua wale ga na ivola na iVolatabu se dua wale ga vei ira na ivola e dau vakayagataki ena lotu, o na nuitaka me vakavulici iko se dusimaka na nomu vuvale, vakabibi ke duidui na ka e tukuni kina mai na ka o nanuma tiko ni donu? Ke ivola ga ni itukuni na iVolatabu, vakacava ena vakacegui iko qai solia vei iko na inuinui na ka e yalataki tu kina?

Ia era vakadeitaka e vica vata na milioni era sa vulica na iVolatabu ni oya sara ga na Vosa ni Kalou. Na cava na vuna? E kilai vakacava ni duidui na iVolatabu mai na ivola tale eso? Meda raica mada e lima na ka e duatani kina na iVolatabu mai na ivola tale eso.