Era Yalorawarawa Mera Gole i Ecuador
DUA na ituvaki dredre a sotava e dua na cauravou mai Itali. A se qai rawata ga na nona vuli ena sekeneri qai levu duadua na kena maka ena nona kalasi. Era tukuna tale ga vua na wekana kei na nona qasenivuli me saga na vuli torocake. Ia ena vica na yabaki yani e liu a yalataka na nona bula vei Jiova o Bruno qai yalataka me vakaliuca ena nona bula na inaki ni Kalou. Na cava a vakatulewataka? E tukuna: “Au vakaraitaka vei Jiova ena masu niu na dina ina noqu yalayala meu vakaliuci koya. Au vakaraitaka tale ga vakadodonu ena noqu masu niu sega ni vinakata me vakavucesa na noqu bula, ia me levu ga na ka au vakaogai au kina ena noqu qaravi koya.”
Oti e vica tale na yabaki, a gole sara o Bruno i Ecuador, Sauca Merika. E kaya: “Au sega sara ga ni namaka na sala e sauma kina o Jiova na noqu masu.” Dua na ka nona kurabuitaka ni lai sotava e Ecuador e levu tale na itabagone era toki ekea mera vakarabailevutaka na nodra qaravi Jiova.
ITABAGONE ERA ‘VAKATOVOLEI JIOVA’
O Bruno kei na vica vata tale na udolu na itabagone e veiyasa i vuravura era ciqoma na veisureti i Jiova: “Vakatovolei au mada, . . . se’u na dolava, se segai, na katuba ni lomalagi, ka sovaraka vei kemudou na ka ni veivakalougatataki.” (Mala. 3:10) E uqeti ira na nodra lomana na Kalou mera ‘vakatovolei Jiova’ ena nodra yalorawarawa ni solia na nodra gauna, igu, kei na iyau mera tokona kina na inaki i Jiova ena vanua e gadrevi kina vakalevu na veivuke ena kacivaki ni nona Matanitu.
Nira yaco ga ena nodra ilesilesi vou o ira era lomasoli mera lai veivuke, era dau vakadinadinataka ni “levu sara na ka me tamusuki, ia era lewe lailai ga na tamata cakacaka.” (Maciu 9:37) Kena ivakaraitaki, a marau ni vola ina valenivolavola ni tabana e Ecuador o Jaqueline mai Jamani: ‘Se qai rua vakacaca ga na yabaki na noqu veiqaravi e Ecuador, sa 13 tiko na noqu vuli iVolatabu, eratou sa tiko wasoma ena soqoni e le 4. Au marautaka dina qori.’ E tukuna o Chantal mai Kenada: “Au toki ena 2008 ina dua na yasayasa ena baravi kei Ecuador e tiko ga kina e dua na ivavakoso. Sa tolu na ivavakoso ena gauna qo ena yasayasa oya, qai sivia e 30 na painia. E marautaki na toso au raica vei ira e levu na ka vovou!” E kuria: “Au se qai toki ga qo ina dua na siti ena veiulunivanua na Andes e 2,743 na mita na kena cere. Era tiko ena siti qori e sivia na 75,000 na lewenivanua, ia e dua ga na ivavakoso. E vuavuaivinaka na cakacaka ena yalava! Au marautaka tiko vakalevu na noqu cakacaka vakaitalatala.”
ITUVAKI DREDRE E SOTAVI
E macala ga ni levu na ituvaki dredre e sotavi ena veiqaravi e vanuatani. Eso na itabagone era sotava mada ga qori ni bera nira toki. E tukuna o Kayla mai Merika: “Era kauai eso na mataveitacini ena noqu vanua, ia e veivakayalolailaitaki na ka era tukuna. Era sega ni kila na vuna au via toki kina meu lai painia e vanuatani. Au veinanuyaka ena so na gauna, ‘E donu na ka au vakatulewataka?’” A mani vakatulewataka ga o Kayla me toki. E kaya: “Niu dau masu vei Jiova au qai veitalanoa kei ira na taciqu matua, au raica kina ni o Jiova e dau vakalougatataki ira era dau lomasoli.”
E dredre vei ira e levu na nodra vulica e dua na vosa vou. E nanuma lesu o Siobhan mai Ailadi: “E dredre meu dau tukuna na noqu nanuma. E gadrevi meu vosovoso, meu gumatuataka na vosa au vulica, meu dredre tale ga niu dau cala.” E tukuna o Anna mai Estonia: “E rawarawa meu vakamatauni au ina draki katakata, levu ni kuvu, kei na sili wai batabata, ia e dredre meu vulica na vosa vakaSipeni. Au dau nanuma ena so na gauna niu na sega ni rawata. A gadrevi meu dau kauaitaka ga na veika au sa bau cakava rawa, sega ni noqu cala.”
Dua tale na ituvaki dredre na vakanananu i vale. E tukuna o Jonathan mai Merika: “Niu yaco ga yani, au yalolailai niu sa yawa mai vei ira na noqu itokani kei iratou e vale. Ia au valuta rawa qori ena noqu vulica vakataki au na iVolatabu kei na noqu vakaitavi ena cakacaka vakaitalatala. Sega ni dede au sa marau tale baleta e levu na ka totoka au sotava ena vunau, era tu tale ga ena ivavakoso na itokani vou.”
E dredre tale ga na ivakarau ni bula. Ena rairai sega ni tautauvata qori kei na ivakarau ni bula o sa matau kina. E tukuna o Beau mai Kenada: “Eso na ka e gadrevi me vaka na livaliva kei na wai e raici vakamamada tu ena vanua o cavutu mai kina. Ia eke, e sega tu ni kilai ena drodro mai na wai kei na livaliva se sega.” Ena veivanua era se vakatorocaketaki tiko, e sega ni vinaka na sala ni veilakoyaki, e levu era dravudravua, era sega tale ga ni vuli. O Ines mai Austria e vosota rawa na ituvaki va qori ni kauaitaka ga na nodra itovo vinaka na lewenivanua. E tukuna: “Era dau veikauaitaki, yalomalua, dau veivukei ra qai yalomalumalumu. E marautaki sara nira taleitaka vakalevu mera vulica e levu tale na ka me baleta na Kalou.”
‘VAKALOUGATATAKI MERA KUA NI LEQA ENA DUA NA KA’
Era vakuai ira na itabagone era veiqaravi tiko mai Ecuador, ia era raica ni ka e vakarautaka vei ira o Jiova ‘e uasivia sara na ka’ era namaka. (Efeso 3:20) Era vakadinadinataka nira ‘vakalougatataki mera kua ni leqa ena dua na ka.’ (Mala. 3:10) Qo na nodra rai me baleta na nodra cakacaka vakaitalatala:
Bruno: “A tekivu na noqu veiqaravi e Ecuador ena yasayasa totoka na Amazon. Ena dua na gauna e muri au lai veivuke ena kena vakalevutaki na valenivolavola ni tabana mai Ecuador. Au sa veiqaravi tiko qo e Peceli. Au vakatulewataka niu se tiko mai Itali meu vakaliuci Jiova, sa vakayacora tiko o Jiova na noqu kerekere meu vakaogai au ena levu na ka marautaki niu qaravi koya tiko.”
Beau: “Keirau sa veivolekati sara ga kei Jiova baleta niu dau vakaogai au ena itavi vaKarisito e Ecuador. Au vakalougatataki tale ga ena noqu lakova e levu na vanua totoka—na ka sara ga au dau diva tu.”
Anna: “Au sega ni vakabauta ni rawa ni cakava e dua na yalewa dawai me vakataki au na ka era cakava na daukaulotu. Ia au sa qai kila qo ni rawa. Au vakavinavinakataka na veivakalougatataki i Jiova, au marautaka tiko kina na veivakatisaipelitaki, tara Vale ni Soqoni, sa levu tale ga na noqu itokani vou.”
Elke: “Niu tiko mai na noqu vanua o Austria, au dau masulaka vei Jiova me dua ga na noqu vuli iVolatabu. E 15 na noqu vuli iVolatabu eke! E dau vakamarautaki au dina na nodra matamamarau na gonevuli era toso vinaka tiko.”
Joel: “Dua na ka marautaki mo lai qaravi Jiova ena vanua o vulagi kina. O na vulica mo nuitaki koya vakalevu, e vakavu marau tale ga na nomu raica ni vakalougatataka na nomu sasaga! Ni oti ga e dua na yabaki na noqu biubiu mai Merika, e tubu na iwiliwili ni dautukutuku mai na 6 ina 21 ena iwasewase lailai au veiqaravi tiko kina. Era tiko ena iVakananumi e le 110.”
VAKACAVA O IKO?
Ni oni vakasamataka na kemuni ituvaki ra itabagone, vakacava oni rawa ni lai veiqaravi ena vanua e gadrevi vakalevu kina na veivuke ena kena kacivaki na Matanitu ni Kalou? E macala ga ni dua na vakatulewa bibi qori qai gadrevi kina mo lalawa vinaka. Ia mo rawa ni toki, e bibi mo lomani Jiova vakalevu kei ira era tu ena yalava. Ke tiko vei iko na loloma qori o rawata tale ga na kena ivakatagedegede, masulaka vagumatua vei Jiova na veiqaravi e vanuatani. Tukuna tale ga vei rau na nomu itubutubu kei ira na qase ni ivavakoso na ka o via cakava. O na rairai vakatulewataka mo vakaitavi tale ga ena taba ni veiqaravi tabu, o na marau qai lomavakacegu kina.
[Tikina bibi ena tabana e 3]
“Niu dau masu vei Jiova au qai veitalanoa kei ira na taciqu matua, au raica kina ni o Jiova e dau vakalougatataki ira era dau lomasoli.”—Kayla mai Merika
[Kato/iYaloyalo ena tabana e 6]
Ka mo nanuma me baleta na veiqaravi e vanuatani
• Me dua na ituvatuva dei ni nomu vuli vakataki iko
• Railesuva na Noda Cakacaka Vakaitalatala ni Okosita 2011, tabana e 4-6
• Veitalanoa kei ira era sa veiqaravi oti mai vanuatani
• Vakadidike me baleta na itovo vakavanua kei na itukutuku makawa ni vanua o digia
• Vulica na kena vosa
[Kato/iYaloyalo ena tabana e 6]
Era sega ni leqa vakailavo eso era veiqaravi e vanuatani baleta ni . . .
• vica na vula e veiyabaki era dau lai cakacaka ena nodra vanua
• redetaki tu na nodra vale se rumu
• tiko na nodra bisinisi e rairai cicivaka tiko e dua tale
• cakacaka ni vakayagataki na Internet
[iYaloyalo ena tabana e 4, 5]
1 Jaqueline mai Jamani
2 Bruno mai Itali
3 Beau mai Kenada
4 Siobhan mai Ailadi
5 Joel mai Merika
6 Jonathan mai Merika
7 Anna mai Estonia
8 Elke mai Austria
9 Chantal mai Kenada
10 Ines mai Austria