Era Yalorawarawa Mera Gole i Brazil — Watchtower LAIBRI ENA INTERNET

Era Yalorawarawa Mera Gole i Brazil

ENA vica na yabaki sa oti, o Rúbia (1) e dua na tacida yalewa sa yabaki 30 ena gauna qo, a sikovi Sandra (2), e dua na tacida yalewa e painia tiko ena dua na ivavakoso lailai ena ceva kei Brazil. Dua na ka a yaco ena nona veisiko qori e veisautaka sara ga na bula i Rúbia. Na cava ya? Wilika mada na ka sara ga e kaya o Rúbia.

“E TARAI AU SARA GA NA KA AU ROGOCA”

“Au lako kei Sandra ena dua na nona vuli iVolatabu. Ni vakacagau tiko na vuli, e tukuna na marama e vuli tiko: ‘Sandra, e tolu tale na yalewa ena noqu vanua ni cakacaka eratou via vuli iVolatabu, ia au tukuna me ratou wawa tu mada, dua na gauna ratou na qai vuli. Au kila ni o na osooso ena yabaki qo.’ E tarai au sara ga na ka au rogoca ya. Isa, mera wawa tu o ira era via kilai Jiova! E dredre mada ga me dua na noqu vuli iVolatabu ena ivavakoso au tiko kina. Na ka e yaco ena siga qori ena nona vale na vuli iVolatabu, e uqeti au sara ga meu vukei ira na vakaitikotiko ena taoni lailai ya. Sega ni dede au sa biubiu mai na siti au vakaitikotiko kina meu toki ena taoni e painia tiko kina o Sandra.”

Sa qai vakacava na nona toki ena yalava vou qori o Rúbia? E kaya: “Ena rua ga na vula na noqu toki, sa 15 na noqu vuli iVolatabu. Kila na cava, sega ni dede au sa vakataki Sandra, sa ra tu vakawawa eso tale mera vuli iVolatabu!”

UQETI ME DIKEVA TALE NONA CAKACAKA VAKAITALATALA

O Diego (3), e dua na tacida e se qai yabaki 20 ga vakacaca a veisiko vei ira eso na painia era veiqaravi tiko mai Prudentópolis, e dua na taoni lailai ena ceva kei Brazil. A tarai koya sara ga na nona veisiko qori; a uqeti koya me dikeva tale mada na nona cakacaka vakaitalatala. E kaya: “Au dau vakamumuri wale tu ga ena noqu ivavakoso, au dau rawata ga e vica na aua ena cakacaka vakaitalatala e veivula. Ia niu sikovi ira na painia ya qai rogoca na nodra irogo, au vakasamataka nodra mamarau kei na noqu vakaweleweletaka tu ga na cakacaka vakaitalatala. Niu raica na nodra marau kei na nodra taleitaka na nodra cakacaka, au diva tale ga me vakainaki va ya na noqu bula.” A painia sara o Diego ni oti na nona veisiko qori.

Me vakataki Diego, o dua tale ga na itabagone iVakadinadina o vakaitavi ena cakacaka vakavunau, tiko ena soqoni, ia o sega ni marautaka na cakacaka vakaitalatala qai raica tu ga me dua na itavi? Ke vaka kina, vakacava o rawa ni cakava eso na veiveisau ena nomu bula mo rawa ni vakila na marau ena nomu veiqaravi ena vanua e gadrevi vakalevu kina na dautukutuku ni Matanitu ni Kalou? De dua ena dredre toka mo biuta e dua na ivakarau ni bula vinaka. Ia e levu na itabagone era sa vakatulewataka mera cakava qori. Era tu vakarau mera veisautaka na nodra isausau kei na ka era vinakata mera vakarabailevutaka kina na nodra qaravi Jiova. Kena ivakaraitaki o Bruno, eda na raica qo na kena italanoa.

DAUNIVAKATAGI SE ITALATALA?

Ena vica na yabaki sa sivi, o Bruno (4), sa yabaki 28 ena gauna qo a vuli ena dua na koronivuli rogo ni ivakatagi, e nona isausau me na liutaka e dua na mataivakatagi. A toso vinaka sara na nona vuli, lakolako sa sureti vakavica me liutaka na mataivakatagi lelevu. E rawa sara ga ni dua na nona cakacaka me rogo kina. “Ia” e kaya o Bruno, “Au vakila ni dua na ka e yali tiko ena noqu bula. Au sa yalataki au vei Jiova, ia au kila niu sega ni solia sara tiko noqu vinaka taucoko vua, qori e vakaleqa sara ga na noqu lewaeloma. Au talaucaka vei Jiova ena masu na ka au vinakata, au veitalanoa tale ga kei ira na mataveitacini matua ena ivavakoso. Niu vakasamataka vakabibi na kequ ituvaki au mani vakatulewataka meu sa na vakaliuca na cakacaka vakaitalatala, sega ni ivakatagi. Au mani biuta kina na koronivuli ni ivakatagi qai lai veiqaravi ena vanua era gadrevi kina o ira mera vunautaka na itukutuku ni Matanitu ni Kalou.” Na cava sa qai yaco?

A toki o Bruno ena taoni o Guapiara (tiko kina e rauta ni 7,000 na lewenivanua), e toka na vanua qo ena rauta na 260 na kilomita mai na siti o São Paulo. Qori e dua sara ga na veisau levu ena nona bula. E kaya: “Au toki ina dua na vale, e sega ni vale levu sara, e sega na kena katoniwaililiwa, tivi, se na internet. Ia e tiko ena vale qori e dua na ka au a sega ni taukena tu e liu—dua na iteitei ni kakana draudrau kei na loga kau vuata!” Niu veiqaravi tiko ena dua na ivavakoso lailai e kea, au na lako vakadua e veimacawa ena veivanua yawa mai na siti meu lai vunau kina, au dau tawana na kakana, wai kei na ivola ena dua na kato, au qai vodo motopai. E levu na tamata ena vanua ya era se sega vakadua ni rogoca na itukutuku vinaka. E tukuna, “E 18 na noqu vuli iVolatabu. Dua na ka noqu marau niu raica na veiveisau era vakayacora na gonevuli ena nodra bula!” E tomana: “Au sa qai kunea ena gauna qo na ka e yali tiko ena noqu bula—na lomavakacegu e rawati ena kena vakaliuci na veika e vauca na Matanitu ni Kalou. Keu a vakaliuca ga na veika vakayago, au na sega ni marautaka qori.” Na cava e dau cakava o Bruno me vukei koya vakailavo ena nona veiqaravi e Guapiara? E kaya ena matadredredre: “Au dau veivakavulici ena qiri qita.” E se kenadau tiko ga ena ivakatagi kei na so tale na ka.

“AU MANI TIKO GA”

O Mariana (5), sa voleka ni yabaki 30 ena gauna qo a sotava tale ga e dua na ituvaki e tautauvata kei Bruno. O Mariana e cakacaka vinaka, e loya, ia a sega ga ni lomavakacegu. E kaya: “Au vakila ni vaka meu ‘cemuria tiko na cagi.’” (Dauv. 1:17) Era uqeti koya e vica na mataveitacini me painia mada. Ni sa vakasamataka vinaka qori, a mani nanuma o Mariana me toki i Barra do Bugres kei ratou na nona itokani o Bianca (6), Caroline (7) kei Juliana (8) me ratou lai veivuke ena dua na ivavakoso ena taoni tu yawa volekati Bolivia, e vica na udolu na maile mai na vanua eratou vakaitikotiko kina. Na cava e qai yaco?

E kaya o Mariana: “Au vinakata meu tu e kea me tolu ga na vula. Ia ni oti na gauna ya, sa 15 tiko na noqu vuli iVolatabu! Era gadreva na gonevuli qori e levu na veivuke me rawa nira toso vakayalo. Ia sa bau dredre sara ga meu tukuna vei ira niu sa na lako. Au mani tiko ga.” Ratou vakatulewataka kece na tacida yalewa qori me ratou sa na tiko ga. Vakacava sa qai vakainaki na nona bula o Mariana ena ka e cakava qori? E kaya: “Au marau ni vukei au o Jiova meu vakayagataka na noqu bula meu vukei ira kina na tamata mera veisautaka na nodra bula. Au kalougata dina niu vakayagataka na noqu gauna kei na noqu igu ena dua na ka e vinaka cake sara.” A tukuna o Caroline na ka eratou vakila kece na va na tacida yalewa ya: “Niu moce ena bogi, dua na ka na noqu lomavakacegu niu sa vakayagataka vakalevu na noqu gauna ena vakaliuci ni veika e vauca na Matanitu ni Kalou. Na ka ga e bibi ena noqu bula na noqu vukei ira na vuli iVolatabu. E dua na ka marautaki nida raica na nodra toso. Au vakila sara ga na dina ni vosa qo: ‘Tovolea mada qai raica ni vinaka o Jiova.’”—Same 34:8.

Sa na marau mada ga o Jiova me raica ni sa qai tubu tiko ga na iwiliwili ni itabagone cauravou kei na goneyalewa e veiyasa i vuravura era “via vakacabori ira” mera vunautaka na itukutuku vinaka ni Matanitu ni Kalou ena vanua tu yawa! (Same 110:3; Vkai. 27:11) O ira na dau tu vakarau mera veivuke qori era na vakila na veivakalougatataki i Jiova e dau veivakavutuniyautaki.—Vkai. 10:22.

[Kato/iYaloyalo ena tabana e 5]

“Sega ni Dua na ka Keirau Leqataka”

Ni rau tukuna o João Paulo kei na watina o Noemi na nodrau via lai veiqaravi ena vanua e gadrevi vakalevu kina na veivuke, e vakayalolailaitaki rau na ka era tukuna eso. Era kaya eso ena ivavakoso: “Ke drau toki ena dua na taoni lailai drau na vakila na leqa vakailavo. Na cava mo drau toki kina? E se gadrevi tu mada ga ena ivavakoso qo na veivuke.” E kaya o João Paulo: “E vinaka na nodra ivakasala, ia keirau sega ni vakalaiva ya me veisautaka na neirau vakatulewa.” Nikua sa vica na yabaki na nodrau veiqaravi tiko ena dua na vanua e gadrevi vakalevu kina na dautukutuku, erau marau sara ga o João Paulo kei Noemi ni rau dei tiko ga ena nodrau vakatulewa me rau vakarabailevutaka na nodrau cakacaka vakaitalatala. E kaya o João Paulo: “E sega ni dua na ka keirau leqataka eke. E levu sara na ka keirau rawata ena gauna qo ni vakatauvatani kei na veigauna sa oti, ya ga e bibi.” E tomana o Noemi: “Keirau sega sara ga ni bau veivutunitaka na neirau vakatulewa.”

E sega ni rawarawa na bula ena dua na taoni lailai. Na cava era cakava o ira na toki ena veivanua yawa me tokoni ira vakailavo? Era cakava eso na cakacaka. Eso era vakatavulica na vosa vakavalagi se so tale na vosa, vukei ira na gonevuli ena nodra vuli lesoni, culacula se boroboro se ra cakacaka ga va gauna. Na cava era vakila kece o ira era veiqaravi ena vanua e gadrevi vakalevu kina na veivuke? Na veivakalougatataki era sotava e levu cake mai na ituvaki dredre era sotava!

[Kato/iYaloyalo ena tabana e 6]

Vakanananu e Vale

Tiago: “Niu yaco ga ena ivavakoso vou, dua na ka noqu galili. E vica wale ga na dautukutuku ena taoni ya qai sega ni levu na ka e tu e kea me vakayagataki kina na noda gauna galala. Au vakanananu vakalevu e vale. Au kila ni na vinakati meu cakava e dua na ka meu na marau kina. Au saga meu veikilai kei ira na mataveitacini ena ivavakoso. Sa tiko na noqu itokani, au marau qai sega tale niu galili.”

[iYaloyalo ena tabana e 3]

Noemi kei João Paulo, Ascurra mai Santa Catarina

[iYaloyalo ena tabana e 4]

[iYaloyalo ena tabana e 5]

[iYaloyalo ena tabana e 6]