Vukei au Dina o Jiova

ME VAKA niu dau mamadua, e sega kina ni dua na ka vei au nodra sega ni gole mai e levu ena imatai ni noqu ivunau ena 1957. Ena gauna mada ga au se gone kina, au dau vuni nira gole yani e vale na vulagi, dina ni keimami veikilai.

Ia o na rairai kurabuitaka ni levu na noqu ilesilesi ena isoqosoqo i Jiova e vinakati kina meu dau veimaliwai, qori meu veimaliwai kei ira noqu itokani kei ira na vulagi. Ia au saga tiko ga meu valuta na mamadua, au saga tale ga meu doudou. Au rawa gona ni tukuna ni noqu qarava na ilesilesi kece qo au sega ni rawata ga vakataki au. Au vakadinadinataka ga na dina ni yalayala i Jiova: “Ka’u na vakaukauwataki iko; io, ka’u na vukei iko; io, ka’u na tokoni iko e na ligaqu i matau sa daudina.” (Aisea 41:10) E dau vukei au vakalevu o Jiova ni vakayagataki ira na taciqu vakayalo. Meu talanoataka mada eso vei ira, tekivu mai na gauna au se gone kina.

E VAKAYAGATAKA NA IVOLATABU KEI NA IVOLA LOALOA LAILAI

Ena dua na mataka ni Sigatabu ena yabaki 1940 vakacaca, e gole yani ena neitou iteitei e Ontario e dua na marama o Elsie Huntingford. Rau veitalanoa e matanikatuba kei tinaqu, ia keirau vakarorogo toka mai loma kei tamaqu ni keirau dau mamadua. A nanuma o Ta ni volivolitaki tiko mai o Elsie, a leqataka tale ga ni na volia o Na e dua na ka keitou sega ni gadreva, mani gole me lai tukuna vua ni keitou sega ni via volivoli. Ia e taroga o Elsie: “Dou sega ni via vulica na iVolatabu?” E tukuna o ta, “Io keitou na taleitaka qori.”

E veiganiti dina nona sikovi keitou mai o Sister Huntingford. Rau a lewena tu na noqu itubutubu na United Church of Canada, ia rau mani biuta na lotu qori. Cava na vuna? Baleta ni dau tabaki tu ena pasese ni valenilotu na yacadra o ira na soli, tekivu mai vei koya e levu duadua, yaco sara vei koya e lailai. E sega ni levu nodrau ilavo na noqu itubutubu. Dau biu vakalevu na yacadrau me iotioti ni yaca ena lisi, era sa qai vakasaurarataki rau na iliuliu ni lotu me rau soli vakalevu. Dua mada ga vei ira na iliuliu ni lotu a vakatusa ni sega ni vakavulica tiko na ka e vakabauta dina, ia a cakava ga qori me rawa ni veiqaravi tiko ga vakaitalatala. Keitou mani biubiu, ia keitou qara tiko ga na sala me vakacegui kina na neitou bula vakayalo.

Me vaka ni vakatabui tu na nodra cakacaka na iVakadinadina i Jiova e Kenada, e dau vakayagataka ga o Sister Huntingford na iVolatabu kei na ka e vola ena dua na ivola loaloa me vakavulici keitou kina. Ia a qai tekivu vakayagataka na ivola vakaivolatabu ena gauna sa kila kina ni keitou na sega ni ripotetaki koya vei ira na vakailesilesi vakamatanitu. Ni oti ga na vuli, keitou dau lai vunitaka na neitou ivola ni vuli.a

E gumatua tiko ga o Sister Huntingford me vunautaka na itukutuku vinaka dina ga ni tusaqati qai sotava eso tale na ituvaki dredre. E tarai au dina na nona gugumatua, e uqeti au sara ga meu toso vakayalo. Ena ika27 ni Feperueri, 1949, ni oti ga e dua na yabaki na nodrau papitaiso na noqu itubutubu, au yalataka noqu bula vei Jiova. Au papitaiso ena dua na tavu era dau vakayagataka na dauteitei me nodra igunugunu na manumanu. Au se yabaki 17 ena gauna ya. Niu papitaiso oti ga, au vakadeitaka sara meu veiqaravi vakatabakidua.

VUKEI AU O JIOVA MEU YALOQAQA

Ia au a sega sara ni via painia ni oti ga noqu papitaiso. Au cakacaka tu mada ena baqe niu vinakata meu rawata eso na ilavo me vukei au ena noqu painia. Ia me vaka niu se itabagone qai sega ni levu na ka au kila, e totolo ga noqu dau vakasabusabutaka na ilavo. A mani uqeti au e dua na tacida o Ted Sargent meu yaloqaqa, meu vakabauti Jiova. (1 Vei. 28:10) Qori e vukei au sara ga meu tekivu painia ena Noveba 1951. Ena gauna ya, a tu ga vei au e 40 na dola, dua na basikeli makawa kei na dua na kato vou. Ia e dau raica o Jiova me vakarautaki tu ga na ka au vinakata. Au vakavinavinakataka dina nona vakauqeti au o Ted meu painia! Qori e ikuri tale ni veivakalougatataki vei au.

Au ciqoma e dua na qiri mai Toronto ena dua na yakavi, volekata na icavacava ni vula o Okosita 1952. Ratou sureti au na valenivolavola ni tabana e Kenada meu tekivu veiqaravi e Peceli ena vula o Seviteba. Au se bera vakadua ni butuki Peceli, au dau mamadua tale ga, ia dua na ka na noqu nanamaki baleta niu sa rogoca na ka vinaka era tukuna eso na painia me baleti Peceli. Niu yaco yani, au sega tale ni vaka na vulagi.

‘DAU KAUAITAKI IRA NA MATAVEITACINI’

Ni oti ga e rua na yabaki noqu tiko e Peceli, au sosomitaki Bill Yacos meu qarava na itavi ni kodineita ni ivavakoso (se kilai ena gauna ya me congregation servant), meu qarava e dua na ivavakoso e Toronto. Au se qai yabaki 23 ena gauna ya, au nanuma ni se sega ni dua na ka au bau kila. Ia e yalomalumalumu qai yalololoma o Brother Yacos me vakaraitaka vei au na kena qaravi na ivavakoso. E vukei au dina o Jiova.

E turaga bulicaki vinaka o Brother Yacos, e dau matadredredre qai kauaitaki ira dina na mataveitacini. E lomani ira dina na mataveitacini, era lomani koya tale ga. E dau sikovi ira wasoma ena nodra vale, sega ni gauna ga era leqa kina. E uqeti au o Brother Yacos meu cakava tale ga ya, meu dau tomani ira tale ga ena cakacaka vakaitalatala. E tukuna, “Ken, vakaraitaka vei ira na mataveitacini ni o kauaitaki ira dina. Ni o cakava qori era na raibaleta na nomu malumalumu.”

DEI NA LOLOMA I WATIQU

E vukei au o Jiova ena dua tale na sala vakasakiti tekivu mai na vula o Janueri 1957. Ena vula ya, au vakamautaki Evelyn kina. A tauri ivola o koya ena ika14 ni kalasi mai Kiliati. Ni bera ni keirau vakamau, a veiqaravi tu o Evelyn ena vanua ni vosa vakavaranise o Quebec. Ena gauna ya, a lewa tu na lotu Katolika e dua na iwase ni vanua ya. A dredre dina na nona ilesilesi, ia e tomana tiko ga na nona veiqaravi, e yalodina tale ga vei Jiova.

E yalodina tale ga ni kabiti au o Evelyn. (Efeso 5:31) E qai vakatovolei sara ga na nona yalodina ni oti ga na neirau vakamau! Keirau a nanuma me keirau gade i Florida, e Merika, ia ni oti ga na siga ni neirau vakamau, e kerea na valenivolavola ni tabana meu tikova e dua na bose ena loma ni macawa taucoko ya ena Peceli mai Kenada. A vakaleqa na neirau ituvatuva na bose ya, ia keirau vinakata me keirau cakava ga na ka e vinakata o Jiova. Keirau mani vakadaroya na neirau gade ni vakamau. Ena loma ni macawa ya, a cakacaka vakavunau o Evelyn ena dua na yalava volekata na valenivolavola ni tabana. E duidui sara na yalava qo mai na nona yalava e Quebec, ia a vosota qori.

Ni cava na macawa ya, au kurabui niu sa lesi meu ivakatawa ni tabacakacaka ena vualiku kei Ontario. Au se qai vakawati ga, au se qai yabaki 25 qai lailai sara na ka au kila, ia keirau gole ga ni keirau nuitaki Jiova. Donuya na draki batabata e Kenada, keirau vodo ena sitimanivanua kei na vica tale na ivakatawa ni tabacakacaka matua era lesu tiko ena nodra ilesilesi. Era vakauqeti keirau dina! E tukuna mada ga e dua vei ira me keirau moce ena rumu a sauma tu ena sitimanivanua me kua kina ni keirau dabe tu ena bogi taucoko ena neirau idabedabe. Ena mataka tarava, keirau sikova e dua na iwasewase lailai e Hornepayne, me vaka ga sa cavuti mai liu, qori ni oti ga e 15 na siga na neirau vakamau.

Ia se levu tale tu na veiveisau me keirau vakanamata kina kei Evelyn. Ena icavacava ni 1960, ni keirau se veiqaravi tiko vakaivakatawa, au sureti e Brooklyn, Niu Yoka meu lai vuli ena ika36 ni kalasi e Kiliati. Ena tini na vula na dede ni vuli, ena tekivu sara ga ena vula o Feperueri 1961. Au marautaka dina na veisureti qori, ia ena yasana adua, e mositi au ni sega ni sureti o Evelyn. Me vakataki ira na vo ni yalewa vakawati era tu ena ituvaki qo, a vinakati vei Evelyn me vola e dua na ivola, me tukuna kina ni na tu vakarau me keirau na veitawasei tu me rauta ni tini na vula. E luluvu sara ga o Evelyn, ia keirau duavata ni bibi meu tikova na vuli, ia e kila ni na yaga vakalevu na veivakavulici mai Kiliati.

Ena loma ni gauna ya, a veiqaravi tu o Evelyn ena Peceli mai Kenada. E kalougata ni rau lai rumu vata kei Margaret Lovell, e dua e lumuti. Dua na ka na neirau veimositi kei Evelyn. Ia ena veivuke ga i Jiova, keirau matau sara ena neirau ilesilesi vou. E tarai au dina na nona tu vakarau o Evelyn me vakuai koya ena gauna e dodonu me keirau vakayagataka vata, me rawa ni yaga vakalevu na neirau veiqaravi vei Jiova kei na nona isoqosoqo.

Ni oti e tolu na vula noqu vuli e Kiliati, e sureti au o Brother Nathan Knorr, o koya e liutaka tiko na cakacaka e vuravura raraba ena gauna ya, ena dua na veisureti vakasakiti. A tarogi au keu rawa ni biuta na vuli e Kiliati meu lesu ena valenivolavola e Kenada meu lai veisosomitaki ena veivakavulici ena Koronivuli ni Cakacaka Vakaitalatala ni Matanitu. A tukuna o Brother Knorr ni vakatau sara ga vei au se cava au na via cakava. Ke sega, au rawa ni vakaotia ga na noqu vuli e Kiliati meu qai lesi meu daukaulotu ena dua na vanua. Ia keu ciqoma nona veisureti meu lesu i Kenada, au na rairai sega ni sureti tale e Kiliati, ia ni toso na gauna, au na rawa ni lesi tale ena yalava e Kenada. Ia e laiva ga me keirau veivosakitaka kei watiqu, meu qai vakatulewa kina.

Au kila vinaka na rai i Evelyn me baleta na ilesilesi vakalou. Au tukuna sara vei Brother Knorr, “Na ka ga e vinakata na isoqosoqo i Jiova me keirau cakava, keirau na marau me keirau muria.” Keirau kila se mani duidui vakacava na ka keirau taleitaka, keirau na lako ga ena vanua e lesi keirau kina na isoqosoqo i Jiova.

Au biubiu gona mai Brooklyn ena Epereli 1961 meu lesu e Kenada meu lai veivakavulici ena Koronivuli ni Cakacaka Vakaitalatala ni Matanitu. Ena dua na gauna e muri, keirau lewena sara na vuvale e Peceli. Ia au kurabuitaka niu baci sureti tale meu lai tikova na ika40 ni kalasi e Kiliati, ena tekivu qori ena 1965. E vola tale o Evelyn e dua na ivola me vakadonuya ni keirau na tu veiyawaki. Ia ni oti ga e vica na macawa, keirau marautaka dina ni ciqoma tale ga o Evelyn na nona ivola ni veisureti me keirau vuli vata.

Mani tekivu sara na neirau vuli ena vosa vakaVaranise. E tukuna o Brother Knorr ni keimami na lesi i Aferika o keimami na vuli ena vosa vakaVaranise. Ia ena siga ni tauri ivola, keirau lesi tale e Kenada! Au lesi tale ga meu kodineita ni Komiti ni Tabana. Au tukuna vei Brother Knorr, “Au se gone sara ga,” niu se qai yabaki 34. Ia e vakauqeti au ga. Niu tekivu qarava ga na itavi qori, au dau taro ivakasala vei ira na matua vakayalo, o ira sa dede tu nodra veiqaravi e Peceli, ke vinakati me vakatulewataki eso na ka bibi.

PECELI—VANUA NI VULI KEI NA VEIVAKAVULICI

E levu dina na ka au vulica vei ira na mataveitacini ena noqu veiqaravi e Peceli. Au dokai ira qai qoroi ira na vo ni lewe ni Komiti ni Tabana. E tarai au dina na nodra ivakaraitaki vinaka na qase kei na gone keimami veiqaravi vata e Peceli kei ira tale ga na lewe ni ivavakoso keirau lewena.

A vukei au tale ga na veiqaravi e Peceli meu veivakavulici, meu vakaukauataka tale ga na nodra vakabauta. A tukuna na yapositolo o Paula vei Timoci: “Mo muria tiko ga na ka o vakavulici kina.” A tukuna tale ga: “Na ka o rogoca vei au me vaka era vakadinadinataka e levu, mo tukuna qo vei ira na tagane yalodina me rawa ni qai ganiti ira mera vakavulica vei ira eso tale.” (2 Tim. 2:2; 3:14) Era dau tarogi au na taciqu vakayalo se cava au vulica ena 57 na yabaki ni noqu veiqaravi e Peceli. Au dau sauma vakalekaleka, “Mo yalorawarawa, mo cakava totolo na ka kece e vinakata na isoqosoqo i Jiova, mo qai nuitaki Jiova me vukei iko.”

E vaka ga au se qai gole mai Peceli ena siga enanoa, au mamadua, sega tale ga ni levu na ka au kila. Ia ena veiyabaki sa sivi, e vaka e ‘taura tu o Jiova na ligaqu i matau.’ Qori ena nona vakayagataki ira na taciqu ena vakabauta mera kauaitaki au, mera veivuke tale ga. Io, e se vakauqeti au tiko ga na Kalou ni kaya: “Mo kakua ni rere; ka’u na vukei iko.”—Aisea 41:13.