Doka Nomu Cakacaka Vata kei Jiova!

1. E raica vakacava o Jiova na cakacaka, na cava e mani lesia?

E DAU marautaka o Jiova nona cakacaka. (Same 135:6; Joni 5:17) Me rawa nira vakila tale ga na marau qori na ibulibuli, e lesia kina vei ira na cakacaka e marautaki qai veivakacegui. Kena ivakaraitaki, a vakadonuya me vakaitavi tale ga na Luvena ulumatua ena bulibuli. (Wilika Kolosa 1:15, 16.) E vakamacalataka vei keda na iVolatabu ni tiko sara ga o Jisu e yasa ni Kalou mai lomalagi “me matai daucakacaka” ni bera ni bula e vuravura.​—Vkai. 8:30.

2. Eda kila vakacava nira dau lesi ena itavi bibi qai marautaki na ibulibuli vakayalo?

² E tiko ena iVolatabu e levu na ivakaraitaki ni dau lesia na cakacaka o Jiova vei ira na luvena vakayalo. Ni rau valavala ca o Atama kei Ivi, e vakatalai rau tani na Kalou mai na nodrau itikotiko Parataisi. E qai “lesi rau na Jerupi me tiko mai na were ko Iteni e na yasana ki na tu-i-cake, kei na yameyame ni bukawaqa e vaka nai seleiwau, sa veigoleyaki tiko, me vakatawa na sala ki na kau ni bula.” (Vkte. 3:24) E vakamacalataki tale ga ena Vakatakila 22:6 ni “tala mai [o Jiova] nona agilosi me vakaraitaka vei ira nona dauveiqaravi na ka kece ena vakarau yaco.”

VAKACAVA O KEDA?

3. E vakatotomuri Tamana vakacava o Jisu ni se tiko e vuravura?

³ Dua na ka nona marautaka o Jisu na cakacaka e lesia vua o Jiova ena gauna e bula kina e vuravura. Me vakataki Tamana ga, e lesia tale ga na itavi bibi vei ratou nona tisaipeli. E vakaraitaka vei ratou na ka marautaki me ratou namaka, e kaya: “Au tukuna vakadodonu vei kemudou, o koya e vakabauti au ena cakava tale ga na cakacaka au cakava. Na ka tale ga e cakava ena levu sara, baleta niu sa na lako tiko vei Tamaqu.” (Joni 14:12) Me ratou kila ni vakatotolotaki na cakacaka qo, e kaya: “E dodonu meda cakava tiko na cakacaka i koya e talai au mai ni se siga, sa voleka mai na bogi ena sega ni dua e cakacaka kina.”—Joni 9:4.

4-6. (a) Na cava meda vakavinavinakataki rau kina o Noa kei Mosese ni rau qarava vinaka na itavi e lesia o Jiova? (b) O cei e vakalagilagi ena cakacaka e lesia vei keda na Kalou?

⁴ Ni bera ni bula e vuravura o Jisu, e dau lesi tale ga vei keda eso na itavi. Rau a sega ni vakayacora vinaka o Atama kei Ivi na itavi a lesia vei rau na Kalou, ia eso tale era qarava vakavinaka. (Vkte. 1:28) E matailalai sara na idusidusi e soli vei Noa me baleta na itata ni waqa mera vakabulai kina na kabula ena gauna ni Waluvu levu. E vakayacora vinaka sara na ka kece e vakarota vua o Jiova. Nona cakava qori, eda bula tu kina nikua!—Vkte. 6:14-16, 22; 2 Pita 2:5.

⁵ E matailalai tale ga na idusidusi e soli vei Mosese me baleta na tara ni valeniveitavaki kei na vakarautaki ni matabete, e muria vinaka. (Lako 39:32; 40:12-16) Se yaga tiko ga vei keda na nona ivakaraitaki ni yalodina me vakayacora na ilesilesi qori. Ena sala cava? E kaya na yapositolo o Paula ni veika qori e ivakatakarakara ga ni “ka vinaka ena yaco mai.”—Iper. 9:1-5, 9; 10:1.

⁶ E dau veisau na cakacaka e lesia na Kalou vei ira nona dauveiqaravi me salavata kei na vakayacori ni nona inaki. Ia e vakalagilagi tiko ga kina o Jiova qai yaga vei ira na vakabauta. E vakatale ga kina na cakacaka e qarava rawa o Jisu ni se tiko mai lomalagi kei na nona bula e vuravura. (Joni 4:34; 17:4) Na cakacaka tale ga e lesi vei keda nikua e vakalagilagi ga kina o Jiova. (Maciu 5:16; wilika 1 Korinica 15:58.) E dina vakacava qori?

RAI DONU ME BALETA NOMU ITAVI

7, 8. (a) Vakamacalataka na cakacaka eda qarava tiko nikua na lotu vaKarisito. (b) Na cava meda cakava ena veidusimaki i Jiova?

⁷ Dua dina na ka dokai ni sureti keda o Jiova meda cakacaka vata kei koya. (1 Kor. 3:9) Nida tara Vale ni Soqoni Lelevu, Vale ni Soqoni kei na valenivolavola ni tabana e via vaka ga na itavi erau qarava o Noa kei Mosese. Ke o vakavinakataka tiko nomu Vale ni Soqoni se o vakaitavi ena tara ni itikotiko liu mai Warwick, Niu Yoka, kua ni raica vakamamada nomu itavi. (Raica na imatai ni iyaloyalo.) Qori e veiqaravi tabu. Koya e bibi sara nida sureti na lotu vaKarisito meda vakaitavi ena tarataravaki vakayalo. E kena inaki me vakalagilagi kina o Jiova, me yaga tale ga vei ira na lewenivanua talairawarawa. (Caka. 13:47-49) E vakarautaka gona na isoqosoqo i Jiova na idusidusi veiganiti me qaravi vinaka kina na itavi qori. Eso na idusidusi qori ena rawa ni veisau kina noda ilesilesi.

⁸ Eda dau talairawarawa na dauveiqaravi yalodina i Jiova ena nona veidusimaki. (Wilika Iperiu 13:7, 17.) De dua eda sega ni kila na bibi ni so na itavi e lesi vei keda. Na ka ga eda vakadeitaka ni yaga noda vakamalumalumu ena veisau kece e raica o Jiova me vakayacori.

9. Era ivakaraitaki vakacava vei keda na qase ni ivavakoso?

⁹ E laurai ena nodra veiliutaki na qase ni ivavakoso nira vinakata dina me vakayacori na inaki i Jiova. (2 Kor. 1:24; 1 Ces. 5:12, 13) Era lomasoli mera cakacaka vagumatua ra qai muria vinaka na veiveisau. Era muria totolo na iwalewale vou ni kena vunautaki na Matanitu ni Kalou sa tauyavu oti. Eso e dredre vei ira na vunau ena talevoni ena imatai ni gauna, vunau ena ikelekele ni waqa, se vunau e matanalevu, ia era sa vakila tu qo na kena yaga. Kena ivakaraitaki, ratou nanuma e va na painia mai Jamani me ratou vunau ena dua na yalava ni bisinisi e sega ni dau tarai. E kaya o Michael: “Sa dede keitou qai tovolea tale, dua na ka neitou rere. De a raica o Jiova na neitou taqaya, ia e qai yaco na kena veibasai, dua na ka neitou marau ena mataka ya. Keitou marau ni keitou muria na idusidusi e tiko ena Noda Cakacaka Vakaitalatala kei na veitokoni i Jiova!” Vakacava o tu vakarau tale ga mo muria eso na iwalewale ni vunau e ganita nomu yalava?

10. Na veisau cava e yaco wale tiko ga qo ena isoqosoqo i Jiova?

¹⁰ Toso na gauna e dau veisau eso na ituvatuva ena isoqosoqo i Jiova. Kena ivakaraitaki, ena vica na yabaki wale ga qo e mai cokovata kina e vica na valenivolavola ni tabana. E vinakati eso na veisau vei ira na tacida era veiqaravi ena vanua qori, dina nira sega ni kila na vuna e vakayacori kina na veisau. (Dauv. 7:8) Era marautaka na tacida qori mera tokona na veisau e dau vakayacori ena isoqosoqo i Jiova!

11-13. Na ka dredre cava era sotava eso ni veisau na ituvatuva ni isoqosoqo?

¹¹ Eda vuli ena veika era sotava na tacida ni cokovata eso na valenivolavola ni tabana. Eso sa dede nodra veiqaravi vakatabakidua e Peceli. E kerei e dua na veiwatini erau veiqaravi voli ena dua na Peceli lailai me rau lai lewena na vuvale mai Mexico, rauta ni vakatolusagavulutaki na kena levu. E kaya o Rogelio: “E dredre sara ga neirau biuta na Peceli lailai keirau a lewena kei ira na neirau itokani.” E kaya o Juan, e dua na tacida tagane a kerei me toki tale ga i Mexico: “E vaka ga e tekivu tale noqu bula, meu bucina eso na veiwekani vou. E vinakati meu kila na itovo vou kei na kena ivakarau.”

¹² Qori tale ga na ka era vakila na veiqaravi e Peceli ena so na vanua mai Urope era kerei mera toki ina valenivolavola ni tabana mai Jamani. Ena kila vinaka o koya e dau taleitaka na totoka ni veiulunivanua ni sega ni rawarawa vei ira na biuti Suwitisiladi mera guilecava na kena veitokaitua totoka. Era na sega tale ga ni guilecava na biuti Austria na bula vakacegu era dau vakila mai nodra vanua.

¹³ O ira na toki i vanuatani ena vou vei ira na nodra itikotiko, cakacaka vata kei na tacidra era sega ni veikilai, de ra vulica tale ga na cakacaka vou. Ena veisau nodra ivavakoso mera vunau ena yalava vou, se vosa vou. E sega ni rawarawa na veisau qori ia era bolea e levu era veiqaravi e Peceli. Na vuna?

14, 15. (a) Era vakaraitaka vakacava e levu ni ka dokai mera cakacaka vata kei Jiova? (b) Era ivakaraitaki vinaka vakacava vei keda kece?

¹⁴ E kaya o Grethel: “Au vakadonuya na veisureti meu vakaraitaka vei Jiova ni noqu lomani koya e sega ni vakatau ena vanua, ena vale, kei na itavi cava ga.” E kaya o Dayska: “Au vakadonuya na veisureti niu kila ni sureti au o Jiova.” E kaya o André kei Gabriela: “Qo e dua na gauna vinaka me keirau qaravi Jiova kina, qai biuta vakatikitiki na ka keirau vinakata. Keirau kaya, ‘Ni liwa mai na cagi ni veisau i Jiova, e vinaka me keirau muria, e ca ga ni keirau vakaiulubale.’”

¹⁵ Ni cokovata eso na valenivolavola ni tabana, era lesi eso na lewenivuvale e Peceli mera lai painia. E yaco qori ni cokovata na valenivolavola mai Denmark, Norway, kei Suwiteni me valenivolavola ni tabana na Scandinavia. Dua vei ira o Florian kei Anja, erau kaya: “E sega ni rawarawa na neirau ilesilesi vou, ia keirau marautaka. Keirau taleitaka ni vakayagataki keirau o Jiova se mani vanua cava keirau veiqaravi kina. Keirau rawa ni tukuna ni keirau vakalougatataki vakalevu!” Levu vei keda ena sega ni vakayacora na veiveisau qori, ia eda rawa ni muria na nodra lomasoli na tacida ena noda vakaliuca na Matanitu ni Kalou. (Aisea 6:8) O Jiova e dau vakalougatataki ira era raica ni ka dokai mera cakacaka vata kei koya ena ilesilesi cava ga.

MARAUTAKA TIKO GA NOMU CAKACAKA VATA KEI JIOVA!

16. (a) Na cava eda vulica ena Kalatia 6:4? (b) Na itavi marautaki cava eda vakaitavi kece kina?

¹⁶ E dau matau vei keda meda vakatauvatana na ka, ia e uqeti keda na Vosa ni Kalou meda kauaitaka ga na ka eda rawa ni cakava. (Wilika Kalatia 6:4.) Levu vei keda eda sega ni veiliutaki ena loma ni isoqosoqo. Levu tale ga era sega ni painia, daukaulotu se veiqaravi e Peceli. Qori era itavi dokai dina! Meda kua ni guilecava nida vakaitavi kece ena itavi marautaki duadua, oya meda cakacaka vata kei Jiova ena cakacaka vakaitalatala. Qori na itavi meda doka!

17. Na cava ena yaco ni se tiko ga na vuravura i Setani? Na cava meda kua ni yalolailai kina?

¹⁷ Ni se tiko ga na vuravura i Setani, ena rawa ni vakaiyalayala ga noda qaravi Jiova. Eda na rairai sega ni lewa rawa na noda icolacola ni vuvale, noda bula, se so tale na ituvaki. Ia me kua ga ni vakayalolailaitaki keda. Mo kua ni beca nomu rawa ni cakacaka vata kei na Kalou ni o tusanaka na yacana qai tukuna yani nona Matanitu ena gauna kece. Na ka ga e bibi ni drau cakava vata na ka o rawata, o qai masulaka me vakalougatataki ira na tacimu era rawa ni cakava e levu na ka. Mo nanuma tiko ni talei ena mata i Jiova o ira kece era vakacaucautaka na yacana!

18. Na cava meda biuta vakatikitiki, na vuna?

¹⁸ Dina nida dau cala qai tiko noda malumalumu, e marautaka ga o Jiova meda cakacaka vata kei koya. Meda doka gona nida rawa ni cakacaka vata kei na Kalou ena iotioti ni veisiga qo! Levu na ka eda dau taleitaka meda cakava ena gauna qo, ia meda biuta toka mada vakatikitiki baleta ena vuravura vou ena qai raica o Jiova meda vakila na “bula dina,” oya na bula tawamudu ena marau kei na vakacegu.—1 Tim. 6:18, 19.

19. Na cava e vakarautaka tu vei keda o Jiova ena gauna se bera mai?

¹⁹ Nida sa tu qo ena ilago ni vuravura vou, nanuma na ka e tukuna o Mosese vei ira na Isireli ni bera toka ga nira curu ina Vanua Yalataki: “Ena vakavutuniyautaki kemuni ko Jiova na nomuni Kalou e na cakacaka kecega ni ligamuni.” (Vkru. 30:9) Ni oti na Amaketoni, o ira ga na cakacaka vata tiko kei na Kalou era na taukena na vanua e yalataka vei ira. Eda na qai vakanamata ena noda ilesilesi vou, meda veisautaka na vuravura me parataisi totoka!