Meda Vakamareqeta Noda iTavi!
1 Mai na gauna makawa me yacova mai oqo, e dau lesia o Jiova e levu na itavi vei ira na nona dauveiqaravi. E dau lesia na itavi vei ira na tagane, yalewa, se o cei ga e ganiti ira. (Luke 1:41, 42; Caka. 7:46; Fpai. 1:29) Ia, na itavi dokai cava e vakacolata vei keda nikua?
2 So Noda iTavi Dokai: Dua na itavi dokai levu eda marautaka, oya na nona vakavulici keda sara ga o Jiova. (Maciu 13:11, 15) Dua tale noda vakacaucautaki Jiova ena noda vakamacala ena soqoni. (Same 35:18) O koya gona, meda vakamacala ena soqoni ke gadrevi vaka kina. Kevaka eda raica me dua na ka dokai na itavi e lesi vei keda ena ivavakoso, eda na vakayacora ena noda vinaka taucoko. Vakacava, eda dau vakaitavi vakawasoma ena kena samaki kei na vakavinakataki ni Kingdom Hall?
3 Dua tale na itavi dokai eda marautaka tiko, oya na noda kila ni rogoca noda masu o koya na Kalou Kaukaua Duadua, dina ga nira lomatarotarotaka tu e levu na rogoci ni nodra masu. (Vkai. 15:29) E dau rogoca o Jiova na nodra masu nona tamata. (1 Pita 3:12) E sega ni yalana na levu ni gauna eda rawa ni torovi koya kina. Sa dua dina na isolisoli talei nida rawa ni masu ena “gauna kece ga”! —Efeso 6:18, NW.
4 “Daucakacaka Vata kei Koya na Kalou”; Dua vei ira na itavi dokai duadua, oya na noda “daucakacaka vata kei koya na Kalou” ena noda kacivaka na itukutuku vinaka ni nona Matanitu. (1 Kor. 3:9) Oqo e dua na cakacaka e solia vei keda na lomavakacegu qai vakabulabulataki keda tale ga. (Joni 4:34) E sega ni gadrevi vei Jiova me vakayagataki keda na tamata ena kena vakayacori na cakacaka oqo, ia ena nona loloma e vakacolata kina vei keda. (Luke 19:39, 40) Ia, e sega ni soli vakaveitalia na itavi oqo. O ira ga era rawata na kena ivakatagedegede vakayalo ra qai dei tiko ga kina, e rawa nira vakaitavi ena cakacaka vakavunau. (Aisea 52:11) Eda vakaraitaka beka nida doka na itavi oqo ena noda saga meda cakava e veimacawa?
5 E vakavutuniyautaka na noda bula na itavi dokai e lesia vei keda o Jiova. (Vkai. 10:22) Meda kua sara ni taura vakamamada! Ke da vakaraitaka nida vakamareqeta na itavi dokai oqo, ena marautaka na Tamada vakalomalagi e dau solia “nai solisoli vinaka kecega kei nai solisoli kecega e yaga sara.” —Jeme. 1:17.