Cava Mo Vulica Kina na iVolatabu?

O dau taroga qori? Levu e veiyasa i vuravura era dau vakataroga na taro bibi me baleta na bula. Vakacava, o kila na kedra isau?

Levu era na kaya, “Io!” Na vuna? E vakacegui ira na ka era vulica ena iVolatabu. O via kila na ka e tukuna na iVolatabu? O rawa ni vuli iVolatabu kei ira na iVakadinadina i Jiova.a E sega ni saumi na vuli qori.

Era dau kaya eso nira sureti mera vulica na iVolatabu: “Au osooso.” “Sa rui dredre.” “Au leqataka deu sega ni dina kina.” Ia eso tale era via vulica sara ga na iVolatabu. Raica mada qo e vica:

• “Levu na lotu au lako kina—Katolika, Tawase, nodra valenisoro na Sikh kei ira na Budha. Au vuli talatala tale ga ena dua na univesiti. Sega ga ni saumi noqu taro. Dua na gauna a gole yani vale e dua na iVakadinadina i Jiova. Talei dina nona vakayagataka na iVolatabu me sauma kece kina noqu taro, au mani vakadonuya me keirau vuli.”—Gill, Igiladi.

• “Levu noqu taro e vauca na veika me baleta na bula, sega ga nira sauma rawa na italatala ni noqu lotu. Ia qai sauma rawa e dua na iVakadinadina i Jiova ena nona vakayagataka ga na iVolatabu. Taroga sara keu via kila e levu tale na ka, au vakadonuya me keirau vuli.”—Koffi, Benin.

• “Au dau via kila na kedra ituvaki na mate. Au vakabauta ni o ira na mate era rawa ni vakaleqai ira na bula tiko, ia au via vulica tale ga na ka e tukuna na iVolatabu. Qori na vuna au makutu kina na vuli kei na dua noqu itokani e iVakadinadina.”—José, Brazil.

• “Au saga meu dau wili iVolatabu, au sega ga ni kila na kedra ibalebale. Ra gole yani vei au na iVakadinadina i Jiova ra qai vakamacalataka vakamatata e vica na parofisai vakaivolatabu. Levu tale na ka au via kila.”—Dennize, Mexico.

• “Au sega ni vakadeitaka ke kauaitaki au dina na Kalou. Au mani masuta na Kalou e tukuni ena iVolatabu. Siga ga e tarava ra lako yani vale na iVakadinadina, au vakadonuya sara meu vuli iVolatabu.”—Anju, Nepal.

Eda nanuma lesu na vosa i Jisu ena vica na ivakaraitaki qori: “Era marau o ira na kauaitaka nodra bula vakayalo.” (Maciu 5:3) E tiko tale ga noda gagadre vakayalo. Na Kalou ga e rawa ni vakacegui keda kina ena nona Vosa na iVolatabu.

Cava gona e okati ena vuli iVolatabu? Ena yaga vakacava? Ena saumi qori ena ulutaga tarava.