ULUTAGA LEVU: O KILA NA LEWE NI IVOLATABU?

Na Cava mo Wilika Kina na iVolatabu?

Na ivola kilai levu duadua e vuravura na iVolatabu. Baleta na cava? E rawarawa na kena kilai. Era talanoataki kina na tamata era bula dina, qai vakamacalataka na nodra ivakarau ni veimaliwai kei na nodra veiwekani kei na Kalou. E levu sara na ka eda rawa ni vulica nida wilika na itukutuku kece qori, e rawarawa na vosa e vakayagataki ena iVolatabu qai sega ni wereubiubi. E rawarawa mada ga ni vakadewataki ena vica vata na drau na vosa, qai matata vei ira kece na lewenivanua era bula ena duidui gauna. Na ivakavuvuli tale ga era tu kina e yaga vakalevu.

E bibi meda nanuma tiko ni iVolatabu e sega wale ga ni ivola e vakamacalataki kina na Kalou, e nona ivola sara ga na Kalou. E vakatakilai kina na yacana, nona itovo, kei na nona inaki taumada me baleta na vuravura kei na kawatamata. E tukuni tale ga ena iVolatabu na nodrau veisaqasaqa voli mai ena dua na gauna balavu na vinaka kei na ca: e vaka ga eda wilika tiko e dua na italanoa e ca na kena itekitekivu qai vinaka na kena itinitini. Ni o wilika na iVolatabu qai vakasamataka vakatitobu ena vakaukauataka nomu vakabauta, ena dei tale ga na nomu inuinui.

E sega tale ni dua na ivola e tautauvata kei na iVolatabu. Kena ivakaraitaki, e tukuna na iVolatabu na ka dina me baleta e vica na ulutaga qo:

▪ Na vanua eda vu mai kina, kei na vuna eda rarawa kina

▪ Sala e vakabulai keda kina na kawatamata na Kalou

▪ Na ka sa cakava o Jisu ena vukuda

▪ Na ka ena yacovi keda na kawatamata kei na vuravura ena gauna se bera mai

Ena vinaka mo wilika na ulutaga veitaravi qo mo kila kina se cava na lewe ni iVolatabu.

[iYaloyalo ena tabana e 3]

[Kato ena tabana e 3]

IVAKAMACALA LEKALEKA NI IVOLATABU

Usutu: Na sala ena vakalesuya mai kina na lewadodonu kei na vakacegu na Matanitu ni Kalou mai lomalagi

Lewena: 39 na ivola vakaIperiu (so era vosa vakaArame) kei na 27 na ivola vaKirisi

Vola: E rauta ni 40 na dauvolaivola qai kovuta e rauta ni 1,600 na yabaki, mai na 1513 B.S.K. ina rauta na 98 S.K.

Vosa: Nikua sa vakadewataki taucoko se vakatikina ena sivia e 2,500 na vosa